Ainaro– Komunidade husi Suku Ainaro Vila Postu Adminitrativu Ainaro Munisipiu Ainaro pronto atu oferese rai ba Polisia Nasional Timor Leste (PNTL) atu halo konstrusaun uma própriu ba Ofisial Polisia Suku (OPS) ne’ebe koloka iha sira nia suku.
Lia hirak ne’e hato’o husi Xefe Suku Ainaro Vila Agapito Martins ba Komandante Jeral PNTL, Komisariu Julio da Costa Hornay bainhira vizita Suku Ainaro Vila liu husi programa primeiru sentru aprendizajen polisia komunitaria ne’ebe hala’o iha Munisipiu Ainaro, Sesta (18/12/2012).
“Ami komunidade Suku Ainaro Vila pronto atu oferese rai hodi halo konstrusaun ba Ofisial Polisia Suku ne’ebe mak servisu hamutuk ho ami hodi bele mantein paz no estabilidade iha ami nia suku rasik.”
Xefe Suku Agapito lori nia komunidade nia naran agradese ba Komandante Jeral Komisariu Julio Hornay tamba durante ukun-an, laiha governante no ukun nain ruma mak vizita iha sira nia suku, foin Komandante Jeral PNTL mak ba vizita iha ira nia suku.
Iha parte seluk, Xefe Suku Agapito mos aprezenta katak, kazu krime iha sira nia suku menus tamba komunidade rasik mak koopera diak tebes ho polisia liu-liu OPS, tamba ne’e nia mos agradese ba PNTL tamba bele koloka nia membru OPS ba iha sira nia suku hodi bele fo apoiu ba Xefe suku no komunidade ne’ebe hela iha suku refere.
Iha fatin hanesan, Komandante Jeral PNTL, Komisariu Julio da Costa Hornay hateten, nia sente orgullu tebes tamba komunidade Suku Ainaro Vila ho inisiativa no komitmentu atu oferese rai ba PNTL hodi halo konstrusaun uma ba OPS, no hein katak OPS ho Xefe Suku no komunidade tomak iha suku refere bele servisu hamutuk diak liu tan hodi bele reduz numeru krime iha Munisipiu Ainaro.
Entertantu Komandante Jeral nia vizita ba Suku ne’e akompaña husi Komandante PNTL Munisipiu 12, Xefe Departamentu Polisia Komunitaria Nasional, Komandante PNTL Munisipiu Ainaro, Xefe programa HAKOHAK husi Fundasaun Ázia, Reprezentante Administrador Munisipiu Ainaro ne’ebe simu ho lisan tradisional Ainaro nian, bidu no tebe husi labarik no ferik katuas sira husi Suku Ainaro Vila. Media PNTL.
