Dili, iha loron Sabadu, 27 Agostu 2016 Komandante Jerál PNTL Komisariu Polísia Julio da Costa Hornay akompaña husi Segundu Komandante Jerál Komisariu Polísia Faustino da Costa hasoru malu ho Brigadeiru Jenerál F-FDTL Filomeno Paixão de Jesus no Vise Xefe Estado Maior Jenerál Coronel Falur Rate Laek no mós ofisias tomak hala’o Konferensia Imprensa iha Kuartel Jerál F-FDTL Fatuhada.
“Ohin (27/08) konvida maluk jornalista sira hotu, atu mai rona no ajuda transmite informasaun ne’ebe Komandu Forsa rua hasai, kona-ba Insidente ne’ebe mosu iha Ainaro. Atu informa katak Komandu Forsa rua Estadu nian, apár ho Insidente ho Asidente ne’ebe mosu iha loron Sexta (26/08) oras tuku 9:30 kalan, iha festa Feira Ministeriu Administrasaun Estatal nian iha Munisipiu Ainaro. Estadu Major Jenerál ho Komandu Jerál PNTL konsidera Insidente ne’e hanesan insidente ne’ebe involve individu ka oknum PNTL nu’udar suspeitu no individu membru F-FDTL nu’udar vitima, laos insidente entre F-FDTL ho PNTL hanesan instituisaun. Ba kazu ne’e, Komandu PNTL foti ona medidas Kautelares ba membru PNTL refere. Ohin (27/08) dadersan Segundu Komandante munisipiu Ainaro apresenta mai Komandu membru refere entrega kedas ba Servisu Investigasaun Kriminal no agora iha ona detensaun 72 oras depois lori ba primeiru interogatoriu iha Tribunal Distrital Suai. Além de parte disiplinar, Komandu foti medidas Kautelar maka suspensaun preventiva, signifika membrus refere Dezarmadu kedas, desfardadu no hase’es husi servisu hodi atende ninia prosesu. Portantu, Komandu rua husu ba Komandu ho diresaun Subordinariu sira kontinua hala’o nia kna’ar Estadu nian, halo servisu normal hanesan bain-bain hodi asegura nafatin Prestasaun Sevisu ba ita nia komunidade iha teritoriu laran tomak no garante no koordenasaun servisu diak entre Instituisaun rua ne’e iha terenu. Husu ba membrus tomak atu serve ita nia povu ho dignu, honestu no professional tuir Lei no regras servisu ne’ebe vigora. Tama iha instituisaun seguransa, laos atu aproveita hodi hala’o violasaun ka torturasaun hanesan ema bandalismu sira, maibé tama iha institusaun ida ne’e atu serve povu no nasaun ida ne’e, ne’ebe nia povu sosa ho nia isin no ran. Instituisaun sei la lakon buat ida, bainhira hasai nia membrus sira ne’ebe la merese ona atu servisu ona iha instituisaun ida ne’e. Tanba joven barak maka hein hela iha liur hakarak atu tama bainhira loke vaga sira prontu atu tama no prontu atu serve povu ida ne’e ho diak no dignu. Ba Komandante sira nomeadu, Komandu husu atu kontrola membrus sira nia servisu no atetude loron ba loron no brani foti medidas wainhira hare’e ka rona membrus sira la kumpre nia orientasaun ka komete infrasaun ruma. Ikus liu, atu afirma ba públiku kona-ba rumoris katak kazu Ainaro hodi kalan (26/08) PNTL ho F-FDTL tiru malu, ne’e lalos. Los maka oknum PNTL tiru ita nia soldadu ida ne’ebe oras ne’e baixa hela iha hospital. Ho akontesimentu ne’e, hodi kalan (26/08) Komandu rua kontaktu malu, kontrola membrus tomak tantu F-FDTL no PNTL hodi hakalma situasaun. Hanesan Komandante Jerál PNTL ho Segundu Komandante Jerál lori Komandu nia naran hakarak husu deskulpa ba Komandu F-FDTL em jerál no espesial ba familia tomak ne’ebe nia oan hetan kanek tanba hetan tiru husi oknum PNTL. Komandu sei foti medidas disiplinar mais forte hasoru membru ne’ebe komete iha infrasaun ida ne’e”.
Media PNTL.
