Frontera terrestre nudar fatin alternativa ne’ebe maka fasil ba movimentu tama sai ema no sasan tantu legal no illegal tanba ne’e Unidade Polisia Frontera (UPF )no POlisia Nasional Timor-Leste(PNTL) iha munisipiu ne’ebe maka baliza iha frontera tenke kontrola inportasaun illegal.
Segundu Komandante Munisipiu Dili Superintendende Asistente Euclides Belo husu ba Komandante munisipiu Bobonaro atu halo servisu hamutuk ho membrus tomak no UPF atu kontrola inportasaun illegal ne’ebe maka tama iha frontera Timor-Leste, nia hato’o prekupasaun ne’e liu husi retiru reflesaun ne’ebe maka halao foin lalais ne’e iha Centru Formasaun Polisia Comoro Dili.
Nia informatan katak durante ne’e movimentu inportasaun sasan illegal hanesan fugetes, mina no motorizada barak liu husi Frontera terrestre tanba ne’e presija atu kontrola.
Hatan ba prekupasaun ne’e Komandante Munisipiu Bobonaro Superintendente Xefi Armando Montero hateten movimentu inportasun sasan illegal hanesan fugetes, motor, kareta no mina kontinua ejisti iha Frontera Batugade Maske PNTL munisipiu Bobonaro ho POLDA NTT halo esforsu tomak hodi taka maibe motor ho karreta husi Surabaya diretamente mai iha Alto Lebos (postu administrative Lolotoe) no uza Xapa matrikula timor nian tanba timor oan sira mos involve iha aktividade ne’e.
Nia haktuirtan katak iha Frontera ami hapara tia ona tanba ne’e munisipiu Dili tenke halo kordenasaun ho KBRI atu hapara inportasaun illegal motor ho kareta husi Indonezia no hau sujere ba ita hotu atu kontrola sasan hirak ne’e tanba povu ejiji hela PNTL atu halo servisu ida ne’e.
Inportasaun mina illegal ne’ebe maka PNTL munisipiu Bobonaro kaptura sei iha tonelada 100 resin no fatin atu rai mos laiha ona, kazu ne’e laos deit akontese iha Maliana maibe dalaruma ba tia Oecuse maka mai fali Dili, ida ne’e atu fo kulpa ba se, laiha ema mak barani atu deskobre konaba krime mina nian, ne’e hanesan problema boot ida.
konaba problema Fugetes iha nivel nasional ami husu fali ba Komandante Operasaun, iha tinan uluk ita halo koordenasaun ho Ministeriu Komersiu programa governu nian iha maibe individu balu mos nakar hodi aproveta despaisu governu hodi hatama fugetes ba governu no hatama mos ninian privadu ida ne’e maka tarutu iha ita nia leet.
Fugetes hirak ne’e mai ho dokumentus no transporte ida deit maske PNTL no Unidade UPF iha neba, imigrasaun cek dokumentus dehan los ona no alfandega tau ona karimbu ami kontrola wainhira mosu abuzu poder no fraude fiskal (sasan ne’e liu no hatene mos finjidus dehan lahatene) ida ne’e maka ami bele interven no dokumentus konaba inportasaun sasan hirak ne’e maka presiza tau matan. Media PNTL
