Laga- Komandante Polisia eskuadra Laga, Sargentu Duarte B. Ximenes informa, membru Konselu Revolusaun Maubere(KRM) nain ida ho naran Domingos da Costa, Segunda (10/11) voluntariamente entrega an ba polisia eskuadra Laga liu husi autoridade local.
“Hau fo sai ba publiku katak grupu KRM iha Laga iha nain 8, maibe iha tuku 03:45 maun alin ida naran Domingos da Costa Xavier tinan 54 husi aldeia Samalari voluntariamente entrega aan liu husi ninia Xefi aldeia depois ba Xefi suku, “ informa Duarte B. Ximenes, kuarta (11/11) iha nia servisu fatin.
Prosesu intrega aan ne’e nia parte simu informasaun husi Xefi suku Samalari, depois nia kontinua ba iha suku Samalari hodi lori membru KRM ne’e mai submete iha prosesu investigasaun.
Prosesu investigasaun ne’e agora lao hela, no agora dadaun membru KRM ne’e iha hela edifisiu eskuadra Laga iha seksaun investigasaun ninian hodi kontinua prosesa ba komando PNTL munisipiu Baucau.
Nia hateten katak rajaun membru KRM ne’e entrega aan tanba membru ne’e hatene katak ninia naran iha lista, tanba ne’e nia tenke voluntariamente entrega aan para hodi kumpri saida mak estadu fo tuir lei haruka.
“Ami buka hela identifika no hatene nia lalaok durante akontesementu to’o ita nia maun Mauk Moruk mate no sira nain 7 ne’ebe maka sidauk entrega aan mak hanesan Jose Sunardi, Akai, Alberto Kardoso, Luis, Augusto, Moises no Eusebio, entre sira nain 7 ne’e nain 6 husi suku Saelari no nain ida husi suku Samalari,” informa Komandante.
Komandante Duarte hateten, sei kontinua esforsu atu lori mos membru KRM seluk hodi submete iha prosesu. No garantia ema ida sei la halo intimidasaun, torturasaun ou amiasa ba membru KRM sira tantu ida ne’ebe maka entrega an ona no ba sira ne’ebe maka seidauk entrega an.
Fonte: Timor Post edisaun Kuarta 18 Novembru 2015
