Dili- Membru PNTL nain 28 kompleta treinamentu Primeiro Sucoro(PS) durante loron tolu (21-23/05) iha Centru Formasaun Polisia (CFP)
Inspetor Jeral Superintendente Xefe Carlos Jeronimo hateten Primeiro Sucoru ne’e inportante ba Polisia Nasional Timor Leste (PNTL) nune’e mos ba sidadaun Timor oan tanba ita bele fo ajuda ba maluk balun wainhira hetan asidente ka iha situasaun emerjensia ruma, Nia hato’o asuntu ne’e iha serimonia enserasamentu treinamentu PS iha salaun Enkontru CFP Comoro Dili, Kinta (23/05)
Nia haktuirtan Komandu sente katak iha urjensia ida atu fo konyesementu ba membru tomak konaba Primeiro Sucoro tanba iha terrenu PNTL sempre hasoru problema wainhira sidadaun ruma hasoru asidente ita telefone deit ba ambulansia atu mai salva vitima sira maibe ita la halo prevensaun ka tulun balu iha situasaun emerjensia antes lori ba ospital hodi hetan tratamentu.
“Imi sai Pioneru iha PNTL atu nune’e ita boot sira mos habelar ba membru sira seluk Hafoin remata treinamentu ida ne’e ita boot sira fila-fali ba halao imi nia knaar karik hasoru situasaun emerjensia ruma ita labele hein tanba sidadaun sira hare asaun saida maka Polisia atu halo,” dehan Inspetor Jeral ne’e.
Iha okajiaun ne’e Sekretariu Jeral CVTL Anacleto Bento Fereira hateten treinamentu ida ne’e adekuadu tebes ba servisu PNTL nian tanba ita hotu hatene katak PNTL nia funsaun ida maka atu inplementa Ordem no Paz no iha nia lalaok inplementasaun iha uzu de forsa tanba ne’e wainhira iha uzu de forsa maka tenke hatene meius oinsa rekupera no salva ema nia vida kuandu possibel.
Propoin ba Centru Formasaun Polisia (CFP) atu koloka Treinador Primeiro Sucoro permanente iha CFP tanba CVTL iha programa fo treinamentu ba treinador sira.
Treinamentu Primeiro sucoro durante loron tolu(3) ne’ebe oferese husi Cruz Vermelha de Timor-Leste (CVTL) partisipante sira aprende konaba primeiro sucoro baziku, corpo humanu, salva ema iha faturas (tohar) hodi prevene ran sai barak , liga ema nia ruin tohar no oinsa fo tulun no material seluktan.
Antes remata treinamentu partisipante sira halo simulasaun konaba oinsa fo Primeiro Sucoro ba vitima sira ne’ebe maka hetan asidente trafiku antes evakua ba Ospital.
Iha ensermanetu ne’e partisipante sira simu personal First Aid Kit (pakote Primeiro Sucoro ba partisipante ida-idak) atu lori fila no wainhira halao knaar maka iha akontesementu ruma imi bele tulun vitima sira. Media PNTL
