Dili– Diresaun Nasional Rejistu Notariadu (DNRN) Ministériu da Justisa, Tersa (15/9) halo ezame sidadania ba estranjeiru na’in 100 resin hodi sai sidadaun Timor-Leste. Hosi numeru ne’e ida nuudar membru ativu Polisia Nasional Timor-Leste(PNTL ), Unidade Task Forse.
Diretora Exekutivu DNRN, Maria Fatima hatete, sidadaun estranjeiru balun ne’ebe tuir ezame nudar funsionariu Publiku no polisia. Sira ne’e tuir rekrutamentu iha tempu UNTAET nian.
“Sistema administrasaun momentu halo rekrutamentu mak ladiak. Ida ne’e hau bele dehan fallansu bo’ot ida hanesan sidadaun Timor, ema sira hanesan ne’e lolos laiha direitu atu servisu iha instituisaun Estadu nian”, Maria de Fatima nuudar Directora DNRN ba Timor Post iha ninia servisu fatin, Tersa, (15/9).
Nia hatutan, estranjeiru ne’ebe durante ne’e ativu hanesan funsionariu Publiku no Polisia laiha dokumentus sidadania. Entaun hakarak ka lakohi sira tenke tuir ezame sai sidadaun Repúblika Demokratika de Timor-Leste (RDTL).
“Ami hetan sidadaun estranjeiru ne’ebe seidauk sai sidadaun Timor-oan, balun funsionariu Ministeriu Saude no balun ativu polisia. Ida ne’e laos ami nia kestaun. Maibe tenke prienxe rekezitus tuir lei ne’ebe ezisti iha país ne’e”, katak tan.
Parte seluk, bainhira jornalista diariu ne’e koko halo intervista ba membru polisia ne’e, nia lakohi fo komentariu. Membru polisia ne’e hela iha Timor desde 1982, hola feto Timor husi Munisipiu Bobonaro, agora hela iha Raikotu.
Tuir observasaun Timor Post, membru polisia ne’e uza farda polisia no hatais jaket azul iha farda leten bainhira tuir ezame. (Fontes: Timor Post, edisaun Kuarta 16 Setembru 2015).
