News

Dili-Forsa seguransa Eleisaun Parlamentar (ELPAR) ohin desloka ba munisipiu 12 hodi fo seguransa ba Eleisaun Parlamentar periodu 2017-2022.

Deslokasaun ne’e halao liu husi serimonia formatura jeral deslokasaun forsa parada ELPAR  iha Kuartel Jeral PNTL Kaikoli Dili Kinta (20/07).

Segundu Komandante Jeral PNTL Komisariu Faustino da Costa enkoraja membru tomak tenke mantein disiplina no rona orden orientasaun ne’ebe Komandante munisipiu sira fo.

“Komandu fo orientasaun ba Komandante no membru tomak katak PNTL kumpri saida maka lei eleitoral define no tenke garante katak povu tomak iha asesu atu ba vota ho seguru no hakmatek labele iha ema ida impede ema seluk atu labele vota.”

Total membru ne’ebe maka fo seguransa ba ELPAR hamutuk nain 3849 kompostu husi  Unidade Espesial Polisia (UEP), Unidade Polisia Maritima (UPM), Unidade Polisia Foronteira (UPF) no membru husi Kuartel Jeral inklui Servisu Imigrasaun, alende ne’e iha mos ekipa rezerva iha Komandu Jeral  ne’ebe maka sei alerta no forsa rezerva husi UEP ne’ebe maka prontu fo apoiu bainhira mosu situasaun emerjensia..

PNTL sei koloka membru iha kada Sentru Votasaun minimu ida no maximu rua depende ba ba risku no grau amiasa ne’ebe maka PNTL identifika.

Liu husi Orsamentu Fundu Dotasaun Tudo Governu Komandu PNTL aluga kareta hamutuk 50 hodi fasilita membru sira ba munisipiu,

Antes termina Komisriu ne’e husu ba povu tomak atu lalika tauk hakat ba Centru Votasaun ne’ebe besik no vota ho konsiensia no lalika tauk tanba Polisia sei asegura seguransa maximu ba festa demokrasia ne’e no prontu atua bainhira nesesita no karik iha situasaun emerjensia ruma liga numeru emerjensia PNTL 112. Media PNTL

Dili, Prezidente Repúblika Dr. Francisco Guterres Lu-Olo hato’o nia kongratulasaun ba Instituisaun Polísia Nasional Timor-Leste (PNTL) no Falintil Forsa Defesa Timor-Leste (F-FDTL) nu’udar Instituisaun ida ne’ebe maka asegura seguransa paz no estabilidade nasaun nian.

Xefe Estadu Dr. Francisco Guterres Lu-Olo hato’o nia sentimentu ne’e iha nia intervensaun ba serimonia abertura Simpózium Internasional ba Eleisaun Parlamentar 2017 iha Timor-Leste: Prosesu ba Eleisaun Livre No Justu-Hodi Promove Demokrasia, Kinta ne’e (20/07) iha Hotel Timor ne’ebe maka Organiza husi Comissão Nacional de Eleições (CNE).

“Hau saúda Forsa Seguransa no Defeza, PNTL no F-FDTL no sira nia preparasaun hodi asegura pás, seguransa no lojístika ba prosesu eleitorál ida ne’e lao ho diak, iha eleisaun 2012 PNTL hatudu katak sira hala’o sira nia kna’ar ho kapasidade no kompetensia Komandu nian, entre ofisiál no ajente sira, hau fiar-metin katak tinan ida ne’e PNTL kontribui nafatin ho nivel hanesan”, tenik Prezidente Repúblika Timor-Leste.

Dr. Francisco Guterres Lu-Olo hato’o mós importante temi inisiativa husi Ministeriu Interior no CNE rasik, ne’ebe promove eventu ida ba partidu hotu-hotu asina paktu ida no mós Jornada ba Pás husi Igreja Katólika. Instituisaun hirak ne’e no sira seluk tan, husi instituisaun relijioza, organizasaun naun-governamentál no sira seluk, kontibui mós ba kampaña eleitoral lao iha ambiente ida ho respeitu no liberdade.

“Kualidade eleisaun nian la depende deit husi partisipasaun sidadaun sira nian no husi kampaña eleitoral ho responsabilidade maibé depende mós husi oinsa responsável sira kaer, halo supervizaun no garante prosesu eleitorál ne’e lao tuir dalan loos”, subliña Xefe Estadu.

Media PNTL.

Dili- Komandu Polisia Nasional Timor-Leste (PNTL) agradese ba Media Komunikasaun Sosial ne’ebe maka halao sira nia kna’ar hodi habelar informasaun ba povu Timor-Leste hodi partisipa iha prosesu Eleisaun Parlamentar ho Paz no hakmatek.

Segundu Komandante Jeral PNTL Komisariu Faustino da Costa hateten Komandu PNTL agradese ba media Komunikasaun Sosial tanba kna’ar media nian inportante teb-tebes hodi habelar no atualija informasaun ba povu durante kampaña Parlamentar nune’e sira iha informasaun sufsiente no kampaña ne’e lao ho diak, Nia hato’o asuntu ne’e ba jornalista sira hafoin serimonia formatura jeral deslokasaun forsa parada Eleisaun Parlamentar iha Kuartel Jeral PNTL Kaikoli Dili (20/07).

“Agradese ba ita boot sira tanba seguransa laos PNTL mesak maibe ho media nia programa no informasaun ne’ebe maka fo sai iha Jornal, Radio, Televizaun no Pajina Elektroniku aumenta espensia povu tanba ne’e maske partidu Politiku no militante barak maibe sira partisipa laiha problema.”

Komisariu ne’e haktuirtan katak media kontribui tebes hodi apoiu ba estabilidade no seguransa durante kampaña.

Kampaña ELPAR Lao ho Susesu

Iha oportunidade ne’e Segundu Komandante Jeral PNTL ne’e mos hato’o parabens ba povu tomak tanba povu intende ona saida maka demokrasia nune’e prosesu kampaña parlamentar durante loron 30 (20/06 to’o 19/07) lao ho susesu no seguru tanba povu nia konsiensia no maturidade politika ass.

Situasaun jeral Kampaña Parlamentar lao diak maske iha insidente kiik oan ne’ebe maka akontese iha Viqueque no Baucau PNTL konsege rezolve ho diak no loron ikus kampaña partidu FRETILIN iha indikasaun balu maibe ho apoiu ema hotu nian autoridade Polisia no F-FDTL konsege hakalma no situasaun lao ho diak. Media PNTL

Dili, Komandu Polísia Nasional Timor-Leste (PNTL) iha tempu besik sei halo reforma ba nia membru sira ne’ebe maka tama ona idade atu reforma nune’e Komandu bele halo fali rekrutamentu atu bele rekopera hikas efetivu membru PNTL nian.

Prezidente Repúblika (PR) Dr. Francisco Guterres Lu-Olo wainhira halo vizita dahuluk ba Instituisaun PNTL hateten planu PR nian durante mandatu tinan lima oin mai maka sei hadia instituisaun PNTL hanesan iha aprezentasaun Komandante Jerál nian kona-ba nesesidade atu halo reforma iha PNTL nia laran.

“Iha reforma ne’ebe sira halo kona-ba hanesan sira nia ema ne’ebe bele tama ona ba reforma, ida ne’e presija legislasaun ida ou Lei ida ne’ebe bele define sira nia estatutu, klaru que iha tempu oin mai governu foun sei halo ida ne’e liu husi Ministeriu Interior”, salienta Dr. Francisco Guterres Lu-Olo.

Ba futuru PR iha esperansa katak sei bele kria autoridade ida atu hare’e instituisaun PNTL no F-FDTL, hamutuk ou ketak-ketak hanesan agora dadaun, ida ne’e nesesidade PNTL ho F-FDTL nian maka sei determina oinsa maka bele servisu.

Entretantu, Komandante Jerál PNTL hateten tuir lista ne’ebe maka iha membru hamutuk 140 no agora dadaun sei hein estatutu pesoal PNTL nian remata no aprova ona iha Konsellu Ministru no implementa ona maka sei determina pesoal hirak ne’ebe maka idade tama ona reforma hodi bele rekruta nafatin foun atu bele rekopera fila fali.

Komandu Husu Komunidade Asegura Paz No Estabilidade Iha Loron Eleisaun

Relasiona ho loron eleisaun Parlamentar tinan 2017 ne’ebe sei hala’o iha loron 22 fulan Jullu, Komandu PNTL liu husi Komandante Jerál apela ba komunidade sira hotu liu-liu juventude Timor oan sira atu bele mantein Paz no Estabilidade iha loron eleisaun.

“Situasaun jerál lao kalma, hakmatek hanesan ita hotu akompaña katak ita nia povu Timor agora matenek ona, ita nia líder partidu politiku matenek hotu bele eduka sira nia militante no militante sira rasik mós matenek ona hodi hatene saida maka krime no saida maka estabilidade no paz”, hateten Komandante Jerál PNTL.

Komisariu Polísia Julio da Costa Hornay subliña liu tan katak Timor oan hotu hamutuk hodi kria estabilidade no paz maka durante tempu kampaña to’o ohin loron buat hotu lao diak, laos tanba PNTL deit maka servisu maibé tanba ita nia komunidade liu-liu juventude sira koopera diak hodi mantein paz no estabilidade. Komandante Jerál mós apela ba Timor oan hotu atu asegura nafatin situasaun hakmatek ida ne’e iha periodu kampaña ne’ebe besik remata no iha loron eleisaun to’o formasaun governu.

“Tanba ne’e festa demokrasia, festa ita Timor oan hotu nian laos líder partidu politikus sira nian deit, sei ita hotu-hotu asegura ida ne’e to’o alkansa objetivu ne’ebe ita hotu hakarak, hau sente ne’e hanesan vitoria bo’ot ida nu’udar Timor oan, tanba ne’e mai ita hotu partisipa, akompaña no fó apoio atu estabilidade no paz lao diak”, tenik Komisariu Polísia ne’e.

Media PNTL.        

Dili, Komandu Polísia Nasional Timor-Leste (PNTL) iha Segunda ne’e (17/07) ba dahuluk hetan vizita husi Prezidente Repúblika (PR)  Dr. Francisco Guterres Lu-Olo akompaña husi Primeiru Ministru Dr. Rui Maria de Araújo no Ministru Interior Dr. Longuinhos Monteiro.

Vizita dahuluk  PR nian ne’e hodi hare’e dereta  Instituisaun seguransa nia kondisaun durante ne’e hodi asegura paz no estabilidade iha Timor-Leste liu-liu iha tempu kampaña no eleisaun Parlamentar tinan ne’e.

Prezidente Repúblika hafoin sorumutu ho Komandante Jerál no Ofisias Superior PNTL nian hateten koordenasaun servisu Komandu Jerál no Komandu Munisipiu lao diak tebes tanba durante ne’e seidauk rezistu krime ne’ebe grave ou todan.

“Internalmente Komandu PNTL iha meius ida ne’ebe iha kondisaun atu bele hala’o sira nia kna’ar ho diak maske sei rezistu mós asidente viasaun ne’ebe ho númeru sei ass tebes hanesan mós krime ofensas koorporais sei iha no iha mós violasaun sexsual, além de ne’e iha mós kontrola imigrasaun ninian hanesan droga maibé ida ne’e PNTL hala’o nia servisu ho efetivu”, tenik Dr. Francisco Guterres Lu-Olo.

PR iha esperansa ba PNTL katak iha tempu oin sei hala’o ida ne’e ho diak liu tan hamutuk ho F-FDTL ne’ebe sai hanesan forsa defesa Timor-Leste nian maibé sira iha konseitu estratéjiku defesa no seguransa nian iha ne’ebe PNTL hola parte mós ida ne’e hodi iha futuru governu foun mai atu oinsa bele hadia diak liu tan instituisaun rua ne’e (PNTL no F-FDTL) hodi bele kompleta malu iha servisu.

“Hau sempre husu nafatin kona-ba subsidaridade de operasaun militares no mós hanesan kona-ba komplementaridade PNTL ho F-FDTL nian, ne’e prinsipiu ida ne’ebe mai husi konseitu estratéjiku defesa seguransa nian ida ne’ebe PNTL ho F-FDTL kaer”, subliña Xefe Estadu Timor-Leste ne’e.

Iha fatin hanesan, Komandante Jerál PNTL Komisariu Polísia Julio da Costa Hornay ne’ebe akompaña PR iha entrevista hateten objetivu vizita dahuluk PR nian hafoin simu pose maka hakarak atu hatene situasaun jerál iha PNTL nian, liu-liu efetivu no servisu PNTL nian importante liu kona-ba seguransa eleisaun ninian.

“Komandu informa totalmente ba PR tantu efetivu korpu komandu ninian iha munisipiu hotu no oinsa planu operasaun ba seguransa eleisaun, aktividade diariu ne’ebe maka iha, kolokasaun pesoal no situasaun jerál iha rai laran”, hateten , Komandante Jerál PNTL.

Komisariu Polísia Julio da Costa Hornay espera katak iha futuru ho informasaun hotu ne’ebe maka Komandu PNTL hato’o ba PR, nai ulun sira bele apoio atu desenvolve liu tan instituisaun ida ne’e.

Iha aktividade vizita ne’e, halo uluk pasa revista hafoin Komandante Jerál halo aprezentasaun hodi hato’o kondisaun no situasaun ne’ebe maka Instituisaun PNTL infrenta durante ne’e atu asegura seguransa iha rai laran. PR hafoin partisipa iha aprezentasaun Komandu nian, halo kedas Telekonferensia ho Komandante PNTL munisipiu sira hodi hato’o situasaun seguransa iha kada munisipiu durante periodu kampaña partidu politiku sira nian.  Dr. Francisco Guterres Lu-Olo hafoin halo Telekonferensia, asina mós livru de Onra PNTL nian no hare’e mós operasaun Camera CCTV ne’ebe maka monta iha sidade Dili hodi monotoriza aktividade rodoviariu nian.

Media PNTL.

Dili, Komandu Polísia Nasional Timor-Leste (PNTL) liu husi Centro Formasaun Polícia (CFP) segunda ne’e (10/07) hala’o serimonia abertura ba Kintu Kursu ba formasaun ajente rekruta hamutuk ema 184.

Komandante Jerál PNTL Komisariu Polísia Julio da Costa Hornay iha ninia intervensaun ba serimonia ne’e hateten kursu formasaun ajente fó ba membru PNTL foun sira ho kompetensia ne’ebe nesesaria hodi desempeña aktividade polisial, fahe formasaun bloku tolu hanesan formasaun baze, formasaun eskolar no formasaun exersisiu.

“Ohin ita forma iha ne’e hodi loke formasaun ida ne’e ne’ebe ajente sira sei hahu’u husi formasaun baze ne’ebe sei hala’o iha Centro formasaun Rairobo (Postu Administrativu Atabae, Munisipiu Bobonaro) no iha formasaun ida ne’e atu eduka ajente sira, treina ajente sira nia físika, disiplina no mós materia sira balun ne’ebe iha ligasaun ba preparasaun mentalidade ajente rekruta nian prepara ba sai membru efetivu PNTL”, hateten Komandante Jerál PNTL.

Komisariu Polísia Julio da Costa Hornay ba ajente rekruta hamutuk 184 ne’e hateten tuir regulamentu konkursu ninian ajente hirak ne’e labele to’o iha fatin ida ne’e (CFP) tanba ajente sira ne’e hanesan reserva deit, maibé husi ezizensia ne’ebe ajente rekruta hirak ne’e hato’o no mós hare’e ba orsamentu konkursu ninian bo’ot tebes maka governu deside hodi simu ajente hirak ne’e atu tama iha formasaun.

Iha biban hanesan, Komandante CFP Superintendente Arquimino Ramos iha ninia intervensaun hateten prosesu formasaun atu muda mentalidade sivil ba polísia, liu husi sistema no polítika formasaun ida ne’ebe diak no relevante ho situasaun no kondisaun ne’ebe kreda sivil no la haluha normas sira ne’ebe aplika universal.

“Formasaun polísia foun ba nivel ajente nu’udar formasaun prinsipal hodi forma karakter no kompetensia ajente polísia hodi servi no protégé povu ne’ebe sira atu servi ba, ne’e duni iha sistema formasaun ida ne’ebe adekuadu no iha kualidade hodi hari’I karakter individu sai ema ne’ebe ho karakter nu’udar membru polísia ne’ebe iha koñesimentu atu hala’o nia funsaun ho susesu”, tenik Komandante CFP.

Superintendente Arquimino Ramos esplika tan katak ajente rekruta sira ne’ebe atu frekuenta Kursu ida ne’e ho total 184 maka tama iha inkoporasaun entre sira ne’e, hotu-hotu mane no kandidatu sira ne’e halo teste desde tinan 2014 no tama iha kategoria reserva ho total ema hamutuk 200, halo re-exame ba médiku iha loron 15-31 Juñu 2017. Husi total ema hamutuk 200, iha na’in 8 maka la marka prezensa no na’in 8 la pasa tanba moras.

“Kintu formasaun ajente ne’e sei hala’o ho durasaun fulan neen (6) tanba governu Timor-Leste liu husi  Ministeriu Interior aprova ona kuríkulum ne’ebe Komandu CFP hato’o no responsabilidade tomak ba kursu ida ne’e iha PNTL nia liman rasik, maske nune’e prezensa ekipa GNR (Guarda Nacional República) nian sai hanesan asesor”, haktuir Komandante CFP ne’e.

Formasaun ba ajente foun ne’e sei fahe ba bloku tolu maka hanesan primeiru, formasaun baze ho módulu jerál durante oras 210 (semana neen nia laran) kompustu husi inkoporasaun, formasaun karakterístika, exersisiu de kampu, avaliasaun teoríka e prátika, no aktividade komplementar hahu’u husi loron 7 Jullu to’o loron 18 fulan Agostu 2017. Segundu, bloku formasaun eskolar kompustu husi módulu júridiku, tékniku professional, sosio kompromentar, módulu jerál, aktividade físika, vizita de estudu no aktividade kompromentares ho total oras 560, hahu’u iha loron 21 Agostu- 21 Dezembru 2017. Bloku formasaun datoluk maka formasaun ezersisiu, ajente rektruta sira hala’o aktividade exersisiu iha terenu hanesan estajiu durante semana rua hahu’u iha loron 22 Dezembro 2017 to’o loron 11 Janeiro 2018. Tuir planu ajente hirak ne’e sei halo graduasaun iha loron 19 fulan Janeiro 2018.

Media PNTL.  

Dili- Membru Polisia Nasional Timor-Leste(PNTL) munisipiu Dili simu vasinasaun Hepatitis B hodi prevene moras ne’e.

Segundu Komandante PNTL munisipiu Dili Superintendente Asistente Euclides Belo hateten Komandu PNTL munisipiu Dili fo orientasaun ba membru PNTL munisipiu Dili ne’ebe maka hala’o servisu iha Eskuadra Dom Aleixo, Vera-Cruz, Nain Feto, Cristo-Rei, Metinaro no Atauro atu tuir vasinasaun Hepattitis B.

Komandante Euclides haktuir tan katak ba membru iha Eskuadra Metinaro no Atauro Seksaun Saude PNTL sei koordena ho Centro Saude Metinaro no Atauro atu fo vasinasaun ba membru PNTL ne’ebe maka servisu iha Eskuadra rua ne’e tanba distansia ne’ebe dok membru sira labele mai tuir vasinasaun iha Komandu munisipiu Dili.

Iha okajiaun ne’e Xefe Seksaun Saude PNTL Inspetor Abilio Araujo Goncalves hateten vasinasaun ne’e ho objetivu atu halo prevensaun ba moras Hepatitis B ne’ebe maka perigu tebes ba ema nia saude.

“Programa vasinasaun ne’e hala’o etapa dala tolu iha fulan Jullu, Agostu no Setembru hodi hetan vasinasaun kompletu ne’ebe maka hala’o iha Dili no munisipiu 11 inklui Rejiaun Espesial Oe-Cusse,” dehan Inspetor Abilio.

Tuir dadus ne’ebe iha to’o oras ne’e membru PNTL hamutuk nain 171 maka mate ho moras oin-oin inklui moras Hepattitis B.

Programa vasinasaun ne’e realiza tanba servisu hamutuk PNTL ho Ministeriu Saude hodi fo apoiu aimoruk no pessoal saude. Media PNTL

Dili- Komandu Polisia Nasional Timor-Leste (PNTL) informa situasaun jeral seguransa rai laran no situasaun Kampaña Parlamentar ba Prezidente Republika.

Komandante Jeral PNTL Komisariu Julio da Costa Hornay hateten situasaun kampaña hahu iha 20 de Juñu to’o ohin loron la’o ho seguru laiha insidente no asidente grave ne’ebe fo ameasa ba seguransa maske akontese insidente entre militante Partidu KHUNTO ho ema deskuiñesidu iha Munisipiu Viqueque, Nia hato’o asuntu ne’e hafoin enkontru mensal ho prezidente Republika iha Palasiu Prezidente Bairo-Pite Dili Kinta (06/07).

“PNTL halo ona investigasaun hodi hato’o ba Ministeriu Publiku depois ita hare rezultadu oinsa maibe ne’e depende ba prosesu legal. Alende ne’e Prezidente CNE mos konvida ona lider KHUNTO hodi informa konaba situasaun ida ne’e”.

Kronolojia kazu Viqueque iha loron Sabadu 1/07 tuku 19:00 Otl militante partidu KHUNTO fila husi kampaña iha lacluta to’o iha Luca ema tuda sira nia kareta hodi hamosu reasaun hodi rezultadu estragus ba komunidade nia uma no sasan. Media PNTL

Dili, relasiona ho akontesimentu ida ne’ebe maka akontese iha postu adminstrativu Lakluta munisipiu Viqueque hafoin partidu Kmanek Haburas Unidade Nasional Timor-oan (KHUNTU) halo atividade kampaña hetan asaltu husi grupu deskoñesidu.

Komandante Jerál PNTL Komisariu Polísia Julio da Costa Hornay hafoin serimonia Vasinaaun kontra Moras Hepatite B iha Centro Formasaun Polícia (CFP) segunda ne’e (03/07) hateten tuir informasaun husi Komandu PNTL munisipiu Viqueque katak iha problema ida entre militante sira ne’ebe halo kampaña iha postu administrativu Lakluta fila, grupu deskoñesidu balun lori fiska maka tiru militante husi partidu Khunto.

“Wainhira militante husi partidu Khunto fila husi atividade kampaña mosu provokasaun no karreta ida hetan tiru fiska husi grupu deskoñesidu no iha tempu ne’e kedas polísia halo atuasaun no oras ne’e dadaun kazu refere iha ona prosesu investigasaun nia laran”, tenik Komandante Jerál PNTL.

Komisariu Polísia Julio da Costa Hornay subliña liu tan katak, parte Komisaun Nasional Eleisaun (CNE) bolu ona reprezentatnte husi partidu KHUNTU huntuk atu bele halo esplikasaun klaru ba CNE atu bele intende, kausa husi problema ne’e saida no prosesu investigasaun mós lao hela.

Tanba ne’e, Komisariu Polisia Julio husu ba militante sira husi partidu hotu atu bele kontribui ba estabilidade no pás, labele halo provokasaun ba malu maibé ho pasiensia maka bele manan buat hotu.

Media PNTL.

Dili, Komandu Polísia Nasional Timor-Leste (PNTL) servisu hamutuk ho Ministeriu Saúde (MS) realiza programa Vasinasaun kontra moras Hepatitis B ba membru PNTL sira  atu halo prevensaun husi moras refere.

Komandante Jerál PNTL Komisariu Polísia Julio da Costa Hornay iha ninia intervensaun ba serimonia ne’e hateten esperiénsia ne’ebe iha hatudu katak moras ida ne’e hamate ona ema barak nia vida, tanba ne’e ho lansamentu programa ne’e membru PNTL sira bele halo prevensaun hahu’u agora.

“Tanba ne’e programa mundial ida ne’e diak tebes-tebes ba ita liu-liu ba PNTL tanba ita hasoru risku barak iha servisu, ita laiha meius ida hanesan prevensaun ba ita nia isin antes ita atende ema moras, ho vasinasaun ida ne’e hanesan oportunidade diak atu ita labele hetan risku ba ita nia vida”, tenik Komandante Jerál PNTL.

Komisariu Polísia Julio da Costa Hornay lori Komandu PNTL nia naran iha intervensaun hato’o agradesimentu ba MS ne’ebe reprezenta Diretora Jerál ba kooperasaun servisu ne’ebe halo entre PNTL ho MS durante ne’e tanba husi loron ba loron membrus PNTL sira tenke lori ema moras sira husi asidente ba Hospital mezmu PNTL iha ona mediku na’in 5 maibé PNTL presija nafatin kooperasaun servisu ho MS iha futuru.

Iha fatin hanesan Ministeriu Saúde (MS) ne’ebe reprezenta Diretora Jerál Dra. Odete da Silva Viegas iha ninia lia menon hateten MS hato’o agradesimentu ba Ministeriu Interior liu-liu ba PNTL tanba ho eventu ida ne’e bele tutan papel no planu aktividade MS nian ne’ebe hola parte iha programa saúde públiku.

“Iha fulan ida ne’e MS komemora mós loron nasional saúde ba dala uluk iha Timor-Leste, tinan-tinan ita selebra loron mundial saúde maibé iha tinan ida ne’e Konsellu Ministru aprova ona katak iha loron 22 fulan Jullu sai hanesan loron nasional saúde no MS sei koopera nafatin ho instituisaun PNTL atu oinsa iha fulan ida ne’e tomak MS nafatin hetan kolaborasaun, koordenasaun no partisipasaun PNTL tomak ba selebrasaun loorn mundial saude nian”, hateten Dra. Odete da Silva Viegas.

Dra. Odete da Silva subliña liu tan katak objetivu husi sorumutu ida ne’e katak organizasaun saúde mundial hili loron 28 fulan Jullu sai hanesan loron mundial ba Hepatitis, entaun oportunidade diak ida ita iha tinan ida ne’e tema saida maka organizasaun saúde mundial hili ba komemorasaun loron mundial Hepatitis nian koalia atu oinsa maka ilimina moras Hepatitis.

“Hanesan ita bo’ot sira hatene, Hepatitis ne’e virus ida ne’ebe bele kona ba ita wainhira ita nia sistema inkuidade ne’e tun, tanba ne’e vasinasaun ida ne’e hola parte oinsa ita bele prevene husi moras ida ne’e”, salienta Diretora Jerál MS.

Partisipa iha eventu ida ne’e, Komandante Jerál, Segundu Komandante Jerál, Ofisias Superiores, Komandante PNTL Munisipiu Aileu, Ainaro, Bobonaro, Lautem no Xefe Operasaun husi munisipiu. Vasinasaun ne’e halo uluk ba membru sira iha Kuartél Jerál, Centro Formação Polícia (CFP) no tuir planu sei alarga ba iha membru PNTL sira iha Munisipiu.

Media PNTL.