Dili- Komandante Jeral Polisia Nasional Timor-Leste (PNTL) husu ba povu tomak atu simu rezultadu Eleisaun Parlamentar (ELPAR) ho paz no hakmatek.
Komisariu Julio da Costa Hornay hateten povu Timor-Leste tomak katak festa demokrasia ne’e ita nian no povu maka determina partidu saida deit maka sira fiar atu ba oin hodi dezenvolve nasaun ida ne’e tanba ne’e tenke simu rezultadu eleisaun, Nia hato’o asuntu ne’e ba jornalista sira iha Kuartel Jeral PNTL Kaikoli Dili Sabadu (22/07).
Komisariu ne’e haktuirtan katak nudar sidadaun timor mai ita hotu hamutuk hodi asegura nafatin estabilidade no paz ida ne’e hodi hatudu ba mundu katak timor mos bele.
“Mai ita hamutuk hodi simu rejultadu Eleisaun ida ne’e partidu A ka B ne’ebe maka manan ita hotu prontu atu apoiu malu hodi dezenvolve ita nia rai tanba mesak timor oan deit maka sei kaer ukun ida ne’e hodi dezenvolve povu no nasaun ne’e ba oin”.
Primera vez Timor-leste organiza Eleisaun no kaer seguransa rasik no buat hotu lao diak, tanba ida ne’e mai ita kaer metin no asegura no tane ass valor ida ne’e nudar timor oan hodi hatudu ba mundu katak ita bele duni desde uluk to’o ohin loron no iha konfiansa boot atu dezenvolve nasaun ne’e hanesan nasaun seluk.
Situasaun Jeral seguransa Eleisaun Parlamentar periodu 2017-2022 iha teritoriu laran tomak lao hakmatek situasaun aktual iha munisipiu 13 lao hakmatek no laiha problema grave ne’ebe maka akontese iha sentru votasaun no iha fatin ne’ebe deit eleisaun lao ho ambiente ida diak no paz no komunidade livre fo sira nia votus.
Atu termina Komisariu Julio haktuir tuir planu operasaun ne’ebe maka Komandu trasa tia ona em kordenada ho F-FDTL katak PNTL ho apoiu husi F-FDTL prontu atu asegura prosesu kontajen de votus hodi asegura kontajen ne’e lao ho justu no honestu ba ema hotu tanba ida ne’e povu nia determinasaun ba futuru nasaun ida ne’e. Media PNTL
