News

Dili, iha semana ida nia laran (22-28/05/2017) Polísia Nasional Timor-Leste (PNTL) rejista asidente hamutuk 34 no insidente hamutuk 46 ne’ebe maka akontese iha teritoriu Timor laran tomak.

Segundu Komandante Jerál PNTL Komisariu Polísia Faustino da Costa iha segunda ne’e (29/05) ba jornalista sira hateten asidente ne’ebe maka rejista, kompustu husi ema ho kanek kma’an hamutuk 28, ema ho kanek todan 10 no ema na’in tolu (3) maka mate ne’ebe maka akontese iha munisipiu Aileu, Dili no Liquiça.

“Iha semana ida nia laran ita iha insidente hamutuk 46, husi insidente ne’ebe maka akontese konsege hetan estragus sasan no ema balun kanek tanba ne’e ita kompara asidente ho insidente, asidente hasai ema nia vida barak liu duque insidente ne’ebe maka mosu iha ita nia rai”, hateten Segundu Komandante Jerál PNTL.

Komisariu Polísia Faustino da Costa haktuir liu tan katak ho asidente no insidente ne’ebe maka mosu,  afeta ba iha situasaun jerál iha teritoriu nasional katak situasaun jerál iha Timor-Leste lao ho diak.

Kolokasaun Membru PNTL Iha Eskuadra Atauro Sufisiente

Relasiona ho preukupasaun husi membru Parlamentu Nasional (PN) kona-ba kolokasaun membru PNTL iha postu administrativu Atauro, Segundu Komandante Jerál PNTL Komisariu Polísia Faustino da Costa hateten Komandu koloka pesoal hirak ne’ebe maka konsidera katak bele responde situasaun iha Atauro,  kestaun maka ne’e karik  insufisiensia ba rekursu umanu buat ida, insufisiensia ba rekursu materiais buat ida.

“Ita iha membru ne’ebe komandu konsidera katak sufisiente iha Atauro, além de komandu distrital nian ema ne’ebe maka ita koloka, iha mós Unidade Polísia Maritima iha ne’eba signifika pesoal ne’e sufisiente hodi halo servisu”, tenik Komisariu Polísia Faustino da Costa.

Segundu Komandante Jerál PNTL subliña liu tan katak kestaun halo rekrutamentu presija hare’e mós ba iha orsamentu ne’ebe kada tinan hodi bele halo prosesu rekrutamentu, maibé Komandu hanoin hela atu altera kriteriu Lei kona-ba rekrutamentu ou konkursu nian.

“Instituisaun Estadu ida ne’e rekruta ema ne’ebe hakarak servi povu ho rai ida ne’e, laos Instituisaun Estadu ida ne’e atu fasilita fó servisu ba ema ne’ebe servisu laiha Timor, ida ne’e ami troka maneira ida ne’e, katak instituisaun estadu ida ne’e intrega ema ne’ebe hakarak servisu ba rai ida ne’e,” salienta Komisariu Polísia Faustino da Costa.

Media PNTL.     

Dili- Investigador Polisia Nasional Timor-Leste (PNTL) tenke halo servisu tuir lei no ordem hodi garante justisa ba ema hotu.

Segundu Komandante Jeral PNTL Komisariu Polisia Faustino da Costa hateten Investigador sira tenke halao servisu tuir lei no ordem hodi promove justisa ne’ebe hanesan ba ema hotu nune’e bele garante seguransa no moris hakmatek, Nia hato’o asuntu ne’e iha enseramentu Konferensia Investigasaun Kriminal iha Hotel Beach Garden Praia dos Coceiros Dili Sexta (26/05).

Komisariu Faustino haktuirtan katak ita iha Komandante Jeral, Konstiruisaun RDTL no Lei tanba ne’e nudar Segundu Komandante Jeral hau apresia no louva imi nia servisu bainhira imi halao tuir lei no ordem maibe hau la tolera rajaun hirak ne’ebe maka labele justifika.

“Hau husu ba imi atu tau iha pratika no hatudu iha terrenu diskusaun ne’ebe imi halo durante loron tolu (3) hanesan mos formasaun seluk ne’ebe imi iha hau hakarak hare no akompana progresu husi imi nia servisu.”

Liu husi Konferensia ba dala-5 ne’e  bele halo avaliasaun ba servisu investigador sira nian hodi nune’e bele redus kazu pendente.

Iha okajiaun ne’e Inspetor Xefe Mouzinho Correia nudar Xefe Komisaun Organizadora hateten ita iha esperasansa katak liu husi konferensia ne’e bele halo mudansa balu ba sistema ne’ebe maka uza iha prosesu investigasaun tanba liu husi aprezentasaun kada grupu konaba prekupasaun no rekomendasaun ne’e sai materia inportante ba Servisu Investigasaun Criminal Nasional (SICN) hodi hato’o ba Komandu para iha konesementu no materia hirak ne’e bele diskuti iha planu asaun nasional tuir mai.

Konferensia Investigasaun Kriminal ba dala-5 ho tema “Uniformiza Setor Justisa no Aplikasaun Lei iha Timor-Leste” ne’ebe maka halao durante loron tolu 24-26 de Maiu foka liu konaba Estabelesementu Sistema, Jestaun, Manajementu, Mekanismu no Metodu Koperasaun investigador sira no Xefe Investigador munisipiu 13, Oinsa investigador sira utilija Sistema Incident Management System (IMS) iha sira nia servisu loro-loron no seluktan.

Konferensia ne’e involve instituisaun hirak ne’ebe servisu iha area aplikasaun lei hanesan PNTL, PSIK, Servisu Imigrasaun no Prokuradoria Geral Republica. Media PNTL

Dili, Komandu Polísia Nasional Timor-Leste (PNTL) liu husi Komandante Jerál Komisariu Polísia Julio da Costa Hornay iha Kinta ne’e (25/05) hasoru malu ho ekipa ida husi Konsellu Imprensa Timor-Leste (KI).

Komandante Jerál PNTL Komisariu Polísia Julio da Costa Hornay hafoin enkontru hateten idea hirak ne’ebe maka ekipa Konsellu Imprensa hato’o iha enkontru ne’e importante tebes oinsa atu bele kria MOU ida hodi bele servisu hamutuk atu bele koopera ba malu entre membru Polísia ho jornalista sira.

“Hau sente ideas sira ne’ebe maka Prezidente Konsellu imprensa ho nia ekipa mai hato’o ne’e importante tebes oinsa para ita bele kria servisu hamutuk tantu polísia no jornalista sira atu fahe informasaun ba malu, nune’e mós bele hadia buat balun ne’ebe maka durante ne’e lao dala-ruma informasaun ne’ebe maka polísia hato’o maibé jornalista sira hakerek buat ketak”, tenik Komandante Jerál PNTL.

Komisariu Polísia Julio da Costa Hornay subliña liu tan katak husi enkontru ne’e maka Komandu sujere atu hadia wainhira mosu fallainsu ruma, husu atu hadia laos deit iha sikun husi página ida nian ne’ebe maka ema labele le’e fila fali maibé se bele iha página ida tomak.

“Mas depois ho vizita Konsellu Imprensa nian ne’e hodi fó informasaun katak ami iha direitu de resposta, ida ne’e hau hanoin buat diak ida karik akontese aban bainrua ita bele hadia, nune’e mós fotografia sira ne’ebe tau iha informasaun sira ne’e tenke apár malu ho kazu ne’ebe akontese, labele tau fali fotografia ne’ebe maka la apár ho informasaun ne’ebe fó sai”, salienta Komisariu Polísia ne’e.

Entretantu, Prezidente KI Virgilio Guterres iha entrevista hateten objetivu husi vizita ne’e maka atu hato’o insiativa Konsellu ninian atu iha futuru bele halo kooperasaun entre instituisaun rua ne’e (PNTL-KI) liu-liu oinsa bele garante liberdade imprensa no liberdade ba jornalista sira atu halo kobertura.

“Tanba dala barak mosu entedimentu la hanesan, liu-liu maluk jornalista iha entedimentu ne’ebe maka la hanesan nune’e mós ita nia maluk polísia sira ne’ebe servisu iha kampu, entaun sempre mosu problema ki’ik oan ne’ebe bele resolve liu husi kooperasaun”, hateten Prezidente KI iha kuartél jerál PNTL.

Virgilio Guterres haktuir liu tan katak iha vizita ne’e informa mós ba Komandu PNTL hanesan intituisaun ne’ebe maka atu manten ordem públika, atu aplika ou implementa saida maka ema bolu direitu de resposta katak bainhira jornalista ou media ruma públika konteúdu ne’ebe maka lalos kona-ba PNTL ou membru PNTL, PNTL iha direitu de resposta atu hato’o ba media ne’ebe hakerek no media ne’ebe hakerek, tuir Lei no Regulamentu iha obrigasaun atu públika iha fatin hanesan notisia ne’ebe maka sra públika.

“Iha area balun ne’ebe maka ami koalia maka oinsa atu envolve jornalista sira iha treinamentu atu hatene servisu Polísia nian nune’e mós ami hakarak partisipa iha sesaun balun ne’ebe ami bele fahe ba polísia sira kona-ba servisu media nian”, tenik Prezidente KI.

Media PNTL.      

Dili- Polisia Femenina Kuartel Jeral Polisia Nasional Timor-Leste (PNTL) halo inkontru reflesaun hamutuk hodi koalia konaba progresu no dezafiu iha servisu lor-loron nian atu dezenvolve ba oin.

Iha inkontru ne’e Komandante Jender koalia konaba difikuldade servisu ne’ebe maka Polisia Femenina infrenta, Etika Komunikasaun, Performansia no Disiplina.

Xefe gabinete Jender Inspetor Xefe Daria Ximenes hateten inportante tebes atu halo inkontru hamutuk ho Polisia Femenina sira tanba hafoin assume kargu tinan ida resin seidauk halo inkontru hodi rona problema ne’ebe maka Polisia Femenina infrenta hodi buka solusaun hamutuk.

Nia haktuirtan katak Polisia Femenina sira presiza kolia sai no fo hatene ba sira nia Komandante problema no difikuldaade saida deit maka sira infrenta iha sira nia knaar lor-loron nian nune’e la difikulta sira nia servisu.

Iha okajiaun ne’e Segundu Komandante Jeral PNTL Komisariu Polisia Faustino da Costa hateten inkontru ne’e inportante tanba Komandante jender deteta problema ne’ebe maka Polisia Femenina infrenta tanba ne’e presiza koalia ba malu, espera katak liu husi inkontru reflesaun ida ohin sira intende, akompaña no apar situasaun.

Komisariu ne’e haktuirtan katak iha instituisaun PNTL feto no mane servisu hamutuk ba povu no nasaun tanba ne’e instituisaun PNTL hakarak dezenvolve Polisia Femenina husi suku to’o nasional faze por faze tuir prosedimentu no Orsamentu Jeral Estadu ne’ebe aloka ba PNTL.

“ Iha kestaun balu ne’ebe maka Komandu nota indireta hanesan fardamentu ba membru ne’ebe gravida ne’ebe maka foin dezeña atu nune’e PNTL feto sira ne’ebe isin rua iha farda propriu ba sira laos uza ropa sivil, alende ne’e iha planu asaun Polisia Femenina ejiji atu halo promosaun ne’ebe hanesan maibe PNTL iha regra promosaun laos prioridade deit ba feto maibe tuir prosedimentu no rekejitu ne’ebe maka iha,” Komisariu Faustino klarifika.

Enjeral dezenvolvimentu Polisia Femenina lao diak tanba sira suporta mane nia servisu tanba feto sira okupa kargu inportante hanesan Komandante Administrasaun, Unidade, Komandante Postu Administrativu, Adjuntu Komandante munisipiu no Komandante munisipiu katak prosesu no progresu lubuk ida ne’ebe maka iha, ho fiar ne’ebe maka fo bele mantein no dezenvolve diak liutan hodi suporta instituisaun.

Tuir planu ne’ebe maka aprova husi Komandante Jeral inkontru reflesaun ne’e sei halao ba Polisia Femenina ba Unidade Polisia Maritima (UPM), Unidade Polisia Fronteira (UPF), Unidade Espesial Polisia (UEP), Polisia Imigrasaun, no Polisia femenina iha munisipiu 13. Media PNTL

Dili, Komandu Polísia Nasional Timor-Leste (PNTL) liu husi Servisu Investigasaun Kriminal Nasional (SICN) realiza konferensia ida iha Kinta ne’e (25/05) hodi uniformiza setór justisa no aplikasaun Lei iha Timor-Leste.

Komandante Jerál PNTL Komisariu Polísia Julio da Costa Hornay iha nia intervensaun ba abertura konferensia ne’e hateten oportunidade diak iha sorumutu ne’e hakarak refere ba importansia aktualidade, ba tema iha konferensia ne’e maka Uniformiza Setor Justisa no Aplikasaun Lei Iha Timor-Leste hodi afirma katak ida ne’e bele sai hanesan ezersisiu halo reflesaun hodi hasai konkluzasaun importante ba futuru.

“Ohin loron mundu ne’ebe globalizadu no ema labele ona se’es husi ameasa sira ne’ebe sai paradigma foun ba estratégia atu kombate inseguransa, globalizasaun ne’ebe lao lais haluha ameasa no hamosu problema iha skala mundial ema labele ona tau fronteira entre seguransa interna no externa”, hateten Komandante Jerál PNTL iha Hotel Garden Beach.

Komisariu Polísia Julio da Costa Hornay subliña liu tan katak iha tinan 2016 PNTL rezista númeru krime ne’ebe sae akompaña ho tendensia internasional ho munisipiu Dili iha leten tuir estatistíka ne’ebe hatudu ho krime ne’ebe as liu maka ofensa ba integridade físika no rezista mós aumenta kriminalidade kontra patrimoniu.

“Atu hala’o servisu PNTL nian buat esensial maka prosedimentu legais tenke uniforme ba munisipiu hotu-hotu nune’e hodi fasilita aplikasaun ba kódigu prosesu penal, kona-ba ida ne’e hau hanoin ita nia parseiru sira fó apoio material ba ita no mós livrus balun ne’ebe maka Investigasaun Kriminal kria iha nivel distrital to’o ba iha eskuadra”, salienta Komisariu Polísia ne’e.

Entertantu Prokurador Jerál da Repúblika Dr. Jose da Costa Ximenes iha nia intervensaun konferensia ne’e hateten kestaun importante maka kooperasaun entre Ministeriu Públiku ho PNTL iha âmbitu invetigasaun kriminal nian.

Iha fatin hanesan Komandante SICN Superintendente Jorge Monteiro hafoin konfrensia ba jornalista sira hateten konferensia ne’e halo relasiona ho uniformalizasaun ba iha prosesu sira investigasaun nian no mós prosedura-prosedura sira ne’ebe maka nesesita iha prosesu krime nian.

“Partisipantes sira ne’ebe maka hola parte iha konferensia investigasaun kriminal ne’e ita hare mai husi ajensia sira ne’ebe maka iha interligadu ba malu hanesan gabinete Prokurador Jerál da Repúblika, gabinete prokurador sira iha area jurídiku hat nian hanesan Dili, Baucau, Suai no mós Oecusse”, tenik Komandante SICN.

Superintendente Jorge Monteiro salienta liu tan katak além de area jurídiku hat ne’ebe iha, inklui mós polísia sira ne’ebe iha parte Polísia Sientifika Investigasaun (PSIK) nian no mós iha polísia sira iha parte servisu imigrasaun nian.

“Ita nia objetivu atu involve instituisaun estadu ka instituisaun governu interligadu iha prosesu krime nian laran ne’e, ita bele kria métodu ou mekanizmu ida hodi bele kria servisu hamutuk hodi nune’e ita bele uniformiza sistema investigasaun tantu iha PNTL nian, tantu PSIK nian, tantu iha Ministériu Públiku nian ne’ebe tutela ba iha prosesu krime nian atu nune’e sistema no prosedimentu prosesu investigasaun ne’e halo iha fatin sira ne’ebe diferente maibé nia formatu no sistema ne’e hanesan deit”, tenik Superintendente Jorge Monteiro.

Partisipa iha konferensia ne’e Komandante Jerál PNTL, parseiru desenvolvimentu TLPDP, Emabaixador Australia iha Timor-Leste, Embaixadora Estadu Unidus Amerika iha Timor-Leste, Prokurador Jerál Repúiblika no hetan partisipantes sira husi investigador PNTL nian iha munisipiu.

Media PNTL.

Dili- Polisia Nasional Timor-Leste (PNTL) sei hatun efetivus hotu ne’ebe maka iha atu nune’e fo seguransa maximu durante periodu kampaña no Eleisaun Parlamentar.

Komandante Komandu Operasaun Superintendente Xefe Henrique da Costa hateten iha Eleisaun Parlamentar PNTL sei aumentatan membru nune’e bele garante seguransa ba povu no nasaun hodi realiza festa demokrasia ne’e lao ho diak, Nia hato’o asuntu iha entrevista ho jornalista sira iha kuartel Jeral Kaikoli Dili Kuarta (24/05).

Komandante ne’e haktuirtan katak oras ne’e daudaun Komandu Operasaun identifika no alista Rekursu Humanu ne’ebe maka iha atu involve iha ekipa seguransa ba Eleisaun Parlamentar nune’emos Ekipamentu, Transporte no Komunikasaun nune’e sasan hirak ne’e bele rezolve antes tama iha periodu kampaña no eleisaun atu bele halo servisu ho diak.

“Preparasaun ne’ebe maka PNTL halo fahe ba etapa tolu maka hanesan etapa seguransa pra-elisaun, periodu eleisaun no depois de eleisaun (kontazen de votus).”

Pra-eleisaun PNTL halo atividade hodi prepara kapasidade ka rekursu humanus hodi responde ba eleisaun Parlamentar, fahe informasaun ba Xefe Operasaun kada munisipiu atu halo planu operasaun.

Alende ne’e PNTLmos halo planu atu nune’e iha tempu badak halo workshop ba Komandante munisipiu, Xefe servisu no Komandante Unidade sira no konvida Comisaun Nasional Eleisaun (CNE) no Sekretariadu Tekniku Administrasaun Eleitoral (STAE) atu partisipa iha workshop ne’e hodi fo informasaun ba Komandante sira atu nune’e bele fo informasaun ba Komandante sira atu iha tempu kampaña no eleisaun karik mosu insidente ka situasaun ruma oinsa parte Polisia bele halao servisu.

Iha Eleisaun Prezidensial liu ba PNTL involve membru nain 3.700 resin maibe iha eleisaun Parlamentar sei aumentatan membru tanba tuir planu STAE sei aumentatan sentru votasaun iha teritoriu laran tomak.

Antes termina Komandante Henrique esplika katak membru PNTL hirak ne’ebe maka hetan suspensaun, lisensa sem vensimentu no Lisensa maternidade sei la involve iha seguransa maibe Komandante Jeral fo ona orentasaun katak iha periodu kampaña no eleisaun la autorija atu fo lisensa annual no lisensa sem vensimentu. Media PNTL

Dili, Komandu Polísia Nasional Timor-Leste (PNTL) liu husi Servisu Investigasaun Kriminal Nasional (SICN) iha Tersa ne’e (23/05) halo sorumutu ida ho estudante sira husi eskola Sekundaria Santa Madalena de Canossa hodi fahe informasaun kona-ba lalaok Droga ninian.

Komandante Operasaun PNTL Superintendente Xefe Henrique da Costa hafoin sorumutu ne’e hateten informasaun ne’ebe maka parte SICN fahe ba estudante sira maka koñesimentu kona-ba droga ninian no tipu husi droga ne’e, inpaktu físika no psíkologika pesoal ida nian wainhira uza aimoruk ne’e.

“Hanesan ita hatene katak estudante sira ne’e maka hanesan jerasaun nasaun nian, sira presija atu hatene kona-ba risku ou ameasa husi droga ne’e rasik entaun sira presija hatene atu nune’e sira bele hadok ann husi hahalok no utilizasaun droga hodi labele inpaktu ba sira nia físiku no influensia ba sira nia psíkologika”, tenik Komandante Operasaun PNTL.

Superintendente Xefe Henrique da Costa salienta tan katak parte PNTL hakarak ho presensa estudante hamutuk 50 ne’e bele sai mós hanesan embaixador ka embaixadora ou habelar liu tan informasaun husi parte polísia nian, liu-liu kona-ba droga ninian ba iha sira nia kolega estudante seluk ne’ebe maka la hetan esplikasaun ka esklaresimentu ruma husi parte polísia nian kona-ba droga.

“Espera katak ho buat hirak ne’ebe parte SICN fahe ona ba estudante hirak ne’e bele sai informasaun positivu ida atu nune’e sira bele aplika iha sira nia moris loron-loron nian liu-liu mós iha eskola”, subliña Superintendente Xefe Henrique da Costa.

Iha parte hanesan, Xefe Servisu Investigasaun Kriminal Nasional Superintendente Jorge Monteiro iha nia intervensaun ba sorumutu ne’e hateten relasiona ho karta ne’ebe maka eskola Sekundaria Santa Madalena de Canossa dirigi mai parte SICN atu bele fahe informasaun kona-ba aimoruk att sira hanesan droga, apresia tebes ba inisiativa diak ida ne’e.

“Hau iha hanoin ida, tantu polísia tantu sosiedade sivil, ema hotu-hotu inklui ami sira servisu iha polísia nia laran, ami iha hanoin ida, ami iha presepsaun ida, ami iha mentalidade ida katak koñesimentu kona-ba droga ne’e importante tebes-tebes, tanba droga ne’e ou aimoruk att ne’e nia efeitu laos ki’ik ba ba ita nia isin”, hateten Xefe SICN.

Media PNTL.

Dili- Polisia Nasional Timor-Leste (PNTL) Unidade Tránzitu Seguransa Rodoviariu Prontu fo seguransa ba Bainaka Espesial (VIP no VVIP) ne’ebe maka mai partsipa komemorasaun Restaurasaun Independensia no Tomada de Posse ba Prezidente Repúblika eleitu.

Komandante Unidade Tranzitu Seguransa Rodoviariu Nasional Inspetor Xefe Antonio Lourenco da Costa Soares hateten Bateadores kuaze nain 30 ho motorizada 20 resin no kareta 5 ne’e maka sei responsabiliza ba VIP no VVIP ne’ebe mai husi estranjeru no VIP ho VVIP nasional, Nia hato’o asuntu ne’e hafoin fo orentasaun ba membru sira iha Kuartel Jeral Kaikoli Dili Kinta (18/05).

Nia haktuirtan katak Bateadores sira iha responsabilidade atu asegura segurannsa ba bainaka estranjeiru sira hahu husi Aeroportu Internasional Nicolao Lobato’o lori ba sira nia hela fatin no ba fatin serimonia to’o fila.

“ Iha biban ida ne’e hau hato’o informasaun no fo orentasaun atu membru sira kumpri tuir tarefa ne’ebe maka iha, nudar Polisia sempre prontidaun atu halao servisu bainhira deit no responsabiliza ba knaar ne’ebe sira halo.”

Bateadores hirak ne’e sei fahe ba grupu ida-idak ne’ebe maka kompostu husi motorizada 4 no kareta 2 ba VIIP ba delegasaun Prezidente Parlamentu Cina no ba VIP sira seluk koloka motorizada rua.

Kestiona konaba kontrolu movimentu Transporte no ema iha Komemorasaun loron istoriku ne’e Komandante Antonia hateten ne’e area juridiku Komandu PNTL munisipiu Dili tanba ne’e sei responsabilija husi Unidade Tranzitu Seguransa Rodoviariu munisipiu Dili. Media PNTL

Dili, Komandu Polísia Nasional Timor-Leste (PNTL) iha tersa ne’e (16/05) foin ba dala uluk hetan vizita husi estudante eskola Sekundaria Santa Madalena de Canossa hodi halo sorumutu basea ba pedidu ne’ebe maka Komandu simu.

Komandante Operasaun PNTL Superintendente Xefe Henrique da Costa ne’ebe lidera sorumutu ne’e hateten objetivu husi vizita ne’e maka estudante sira hakarak atu hatene kona-ba servisu PNTL durante ne’e.

“Komandu responde kedas pedidu refere no hanoin katak ne’e hanesan momentu diak ida husi parte Komandu jerál ninian hodi esplika ba sira atu nune’e bele hadaet tutan ba sira ne’ebe maka la hetan oportunidade atu mai vizita Komandu Jerál PNTL”, tenik Komandante Operasaun PNTL ba jornalista isra hafoin sorumutu.

Superintendente Xefe Henrique da Costa hatutan liu tan katak aktividade vizita ida ne’e hanesan aktividade ba dala uluk iha Komandu PNTL tanba durante ne’e parte polísia maka halo vizita ba eskola no suku sira no Komandu iha esperansa ba futuru bele mós eskola sira seluk iha interese atu buka hatene oinsa funsionamentu no kna’ar servisu PNTL nian hala’o servisu nu’udar autoridade seguransa iha rai ida ne’e.

“Buat ne’ebe ita esplika ba sira kona-ba estrutura komandu ninian, hahu’u husi komandu jerál ba to’o iha munisipiu, ita mós hatudu ba sira kona-ba devisa sira iha instituisaun PNTL no oinsa atu hetan promosaun, membru ne’ebe maka komete krime oinsa nia prosesu no ita tenta atu fahe informasaun ba ita nia estudante sira kona-ba hirakia ne’ebe existe iha instituisaun ida ne’e hahu’u husi kapital to’o mós iha suku no aldeia sira”, salienta Komandante Operasaun PNTL.

iha fatin hanesan, professor eskola Sekundaria Santa Madalena de Canossa Aderito Ruben da Costa Freitas ne’ebe dirigi ekipa estudante hirak ne’e ba jornalista sira hateten, iha ensinu sekundaria Canossa iha disiplina ida ho naran sidadania desenvolvimentu sosial ne’ebe koalia kona-ba funsionamentu seguransa liu-liu foka ba instituisaun PNTL.

“Prosesu aprendizagem, hau hanesan professor hanorin sira iha ninia limitasaun, sira bele aprende siénsia husi siénsia ne’ebe iha, agora sira nia vizita mai PNTL ne’e bele dehan hanesan vizita aulas ida real husi duni orgaun instituisaun sira ne’ebe kaer kna’ar hanesan seguransa maka informasaun ba estudante sira”, hateten professor eskola Sekundaria Santa Madalena de Canossa.

Edukador ne’e subliña liu tan katak polísia sira laos sai hanesan parte krime ne’ebe ita hare’e husi matan maibé alunus sira bele komprende funsionamentu sira nian no estudante sira mós bele hare’e katak buat ida ne’e sai hanesan importansia atu iha futuru sira bele kandidata ann tanba ida ne’e hanesan vokasaun ida no sira mós bele apresia polísia nia servisu laos atu kritika deit maibé oinsa atu bele mantein seguransa iha rai ida ne’e.

Media PNTL.

Dili- Polisia Nasional Timor-Leste (PNTL) durante semana ida loron 8 to’o 14 rezista asidente trafiku hamutuk 33 ne’ebe rejulta nain ida mate, sanululu resin kanek todan no nain 22 kanek Kamaan.

Segundu Komandante Jeral PNTL Komisariu Polisia Faustino da Costa hateten durante semana kotuk PNTL rejista kazu asidente trafiku hamutuk nain 33 ne’ebe rezulta vitima ida mate iha munisipiu Baucau no nain sanulu resin kanek todan inklui membru PNTL balun, Nia hato’o asuntu ne’e iha Quartel Jeral PNTL Kaikoli Dili Segunda (15/05).

Komisariu ne’e haktuirtan katak dadus asidente ne’e mai husi munisipiu 13, maiori kazu asidente trafiku tanba fator umanu no natureza.

Kestiona konaba seguransa no ordem públika Komisariu Polisia Faustino afirma katak en jeral situasaun seguransa iha teritoriu laran tomak lao kontroladu. Media PNTL