Dili, Komandu Polísia Nasional Timor-Leste (PNTL) liu husi Komandante Jerál Komisariu Polísia Julio da Costa Hornay iha Kinta ne’e (25/05) hasoru malu ho ekipa ida husi Konsellu Imprensa Timor-Leste (KI).
Komandante Jerál PNTL Komisariu Polísia Julio da Costa Hornay hafoin enkontru hateten idea hirak ne’ebe maka ekipa Konsellu Imprensa hato’o iha enkontru ne’e importante tebes oinsa atu bele kria MOU ida hodi bele servisu hamutuk atu bele koopera ba malu entre membru Polísia ho jornalista sira.
“Hau sente ideas sira ne’ebe maka Prezidente Konsellu imprensa ho nia ekipa mai hato’o ne’e importante tebes oinsa para ita bele kria servisu hamutuk tantu polísia no jornalista sira atu fahe informasaun ba malu, nune’e mós bele hadia buat balun ne’ebe maka durante ne’e lao dala-ruma informasaun ne’ebe maka polísia hato’o maibé jornalista sira hakerek buat ketak”, tenik Komandante Jerál PNTL.
Komisariu Polísia Julio da Costa Hornay subliña liu tan katak husi enkontru ne’e maka Komandu sujere atu hadia wainhira mosu fallainsu ruma, husu atu hadia laos deit iha sikun husi página ida nian ne’ebe maka ema labele le’e fila fali maibé se bele iha página ida tomak.
“Mas depois ho vizita Konsellu Imprensa nian ne’e hodi fó informasaun katak ami iha direitu de resposta, ida ne’e hau hanoin buat diak ida karik akontese aban bainrua ita bele hadia, nune’e mós fotografia sira ne’ebe tau iha informasaun sira ne’e tenke apár malu ho kazu ne’ebe akontese, labele tau fali fotografia ne’ebe maka la apár ho informasaun ne’ebe fó sai”, salienta Komisariu Polísia ne’e.
Entretantu, Prezidente KI Virgilio Guterres iha entrevista hateten objetivu husi vizita ne’e maka atu hato’o insiativa Konsellu ninian atu iha futuru bele halo kooperasaun entre instituisaun rua ne’e (PNTL-KI) liu-liu oinsa bele garante liberdade imprensa no liberdade ba jornalista sira atu halo kobertura.
“Tanba dala barak mosu entedimentu la hanesan, liu-liu maluk jornalista iha entedimentu ne’ebe maka la hanesan nune’e mós ita nia maluk polísia sira ne’ebe servisu iha kampu, entaun sempre mosu problema ki’ik oan ne’ebe bele resolve liu husi kooperasaun”, hateten Prezidente KI iha kuartél jerál PNTL.
Virgilio Guterres haktuir liu tan katak iha vizita ne’e informa mós ba Komandu PNTL hanesan intituisaun ne’ebe maka atu manten ordem públika, atu aplika ou implementa saida maka ema bolu direitu de resposta katak bainhira jornalista ou media ruma públika konteúdu ne’ebe maka lalos kona-ba PNTL ou membru PNTL, PNTL iha direitu de resposta atu hato’o ba media ne’ebe hakerek no media ne’ebe hakerek, tuir Lei no Regulamentu iha obrigasaun atu públika iha fatin hanesan notisia ne’ebe maka sra públika.
“Iha area balun ne’ebe maka ami koalia maka oinsa atu envolve jornalista sira iha treinamentu atu hatene servisu Polísia nian nune’e mós ami hakarak partisipa iha sesaun balun ne’ebe ami bele fahe ba polísia sira kona-ba servisu media nian”, tenik Prezidente KI.
Media PNTL.
