News

Dili, membru Polísia Nasional Timor Leste (PNTL) hamutuk na’in 114 ofisialmente partisipa iha abertura serimonia Primeiru Kursu ba Sarjentu ne’ebe sei hala’o durante fulan sia (9) nia laran.

Membru hirak ne’e kompostu husi Unidade, departamentu iha PNTL inklui mós membru Polísia husi nasaun Comunidade dos Países da Língua Portuguesa (CPLP) hamutuk na’in hat (4) husi Guiné-Bissau no São Tome e Príncipe.

Ministru Interior Dr. Longuinhos Monteiro iha diskursu ba serimonia ne’e apela ba partisipante sira atu aproveita oportunidade formasaun diak ida ne’e, atu bele sai professional liu tan hodi servi povu rai doben ida ne’e.

“Hau husu ba imi 114 atu halo aproveitamentu ne’ebe bo’ot durante formasaun fulan sia (9) nia laran, no hau espera katak bainhira imi remata iha loron 5 fulan Agostu tinan oin, imi hirak ne’ebe agora hamrik iha oin sei mantein nafatin to’o formasaun ne’e remata”, tenik Ministru Interior.

Dr. Longuinhos Monteiro akresenta tan katak, instruindo (partisipante) sira ne’ebe maka sei frekuenta kursu ida ne’e tenke sente orgullu ba ann rasik tanba husi ema atus walu (800) resin ne’ebe maka konkore ba formasaun sarjentu nian, na’in 114 maka eskollidu hodi partisipa iha formasaun ida ne’ebe maka foin primeira vez halo iha Polísia sira nasaun CPLP nian.

Iha fatin hanesan, Komandante Jerál PNTL em exersisiu Komisariu Polísia Faustino da Costa hateten primeiru kursu ba sarjentu ne’e, politika ida husi governu Timor Leste nian ne’ebe maka apresenta husi Ministeriu Interior, Ministeriu Administrasaun Interna CPLP nian hodi hato’o mai iha PNTL ne’ebe maka agora dadaun lidera hela Xefe Polísia CPLP ninian.

“Husi ministeriu apresenta mai iha Komandu PNTL atu organiza eventu ida ne’e, katak eventu ida ne’e dala uluk ita halo seidauk iha nasaun CPLP nian ida maka halo ona formasaun konjunta hanesan ida ne’e”, hateten Segundu Komandante Jerál PNTL.

Komisariu Polísia Faustino da Costa salienta tan katak vaga ne’e fó ema 12 ba nasaun ha’at (4) hanesan São Tome e Príncipe, Cabo Verde, Guiné-Bissau no Guiné Equitorial maibé to’o agora hetan deit konfirmasaun husi nasaun rua hanesan Guiné-Bissau nia delegasaun kompletu ona hamutuk ema na’in 3, São Tome e Príncipe nian na’in 1 to’o ona no na’in 2 maka sei iha problema teknika, tuir planu semana oin sei to’o ona iha Dili. Nasaun São Tome e Príncipe mak husu atu aumenta tan sira nia kandidatu hodi partisipa iha kursu refere.

Kona-ba materia sira ne’ebe maka sei oferese iha kursu ne’e, Komisariu Polísia Faustino da Costa esplika, “materia sira ne’ebe maka atu hanorin maka primeiru kona-ba professional, liu-liu iha nivel sarjentu nian hanesan lideransa, koñesimentu jerál, tekniku ne’ebe iha kategoria sarjentu”.

Ba membru nasaun polísia CPLP sira ne’ebe maka la envolve iha formasaun ne’e, tuir Komisariu Polísia Faustino da Costa ne’ebe sai hanesan Presidente Komisaun Admisaun hateten oportunidade ne’e formasaun ne’e laos obrigatoriu ba polisia nasaun CPLP sira, maibe fila fali ba sistema, estrutura, no hirakia kada nasaun nian ne’ebe la hanesan.

Entretantu representante partisipante ba kursu ne’e Henrique Ussumiue Ojafume husi nasaun Guiné-Bissau sente orgullu no agradese ba governu Timor Leste liu-liu Koamndu PNTL ne’ebe maka fó ona oportunidade hodi partisipa iha Primeiru Kursu ba Sarjentu.

Serimonia abertura ba Primeiru Kursu ba Sarjentu ne’ebe ho tema “Reforcar As Capacidades dos Nossos Sargentos Para Melhor Servir O Nosso Povo” ne’e, ofisialmente halo husi Ministru Interior, Komandante Jerál PNTL em exersisiu, Komandante Centro Formação Polícia (CFP), Komandante PNTL Munisipiu, membru Guarda Nacional Repúblicana (GNR), konvidadus no familia husi partisipante sira.

Media PNTL.

Dili- Situasaun Seguransa no Ordem Publika iha munisipiu Ermera lao no kontroladu nune’e populasaun bele halao atividade ho seguru.

Komandante Interinu PNTL munisipiu Ermera Superintendente Asistente Raimundo de Araujo hateten oras ne’e dadaun situasaun seguransa iha munisipiu Ermera lao hakmatek no kontroladu tanba populasaun iha munisipiu ne’e kontribui hodi kria paz no estabilidade, nia hato’o asuntu ne’e hafoin partisipa iha serimonia Aprezentasaun Relatoriu Auditoria 2016 iha Salaun Ministeriu Interior, Vila-Verde Dili.

Adjuntu Komandante PNTL munisipiu Ermera haktuirtan katak maske mosu konflitu balun maibe Komandu PNTL munisipiu Ermera konsege halo aprosimasaun hodi rezolve no mantein seguransa ne’ebe maka kontroladu.

“Liu husi kooperasaun servisu ho Komunidade, Veteranus no Autoridade Lokal iha munisipiu Ermera maka Komandu PNTL munisipiu Ermera estabele seguransa no moris hakmatek”.

Antes termina Superintendente Asistente ne’e esplika katak krime ne’ebe maka ass liu no PNTL rejista maka Violensia Domestika maibe liu husi aprosimasaun no sosializasaun Lei Violensia Domestika ho Polisia Komunitaria iha suku krime ne’e komesa redus ona. Media PNTL

Dili- Polisia Nasional Timor-Leste (PNTL) sei kontrola inportasaun fugetes iha fronteira terrestre hodi prevene inportasaun illegal husi Indonezia mai Timor-Leste.

Segundu Komandante Jeral PNTL Komisariu Polisia Faustino da Costa hateten Komandu PNTL hasai ona Despaisu hodi orienta Komandante munisipiu hotu inklui rejiaun Autonoma Especial Oe-Cusse no Unidade Patrulamentu Fronteira (UPF/PNTL) ba operasaun fugetes hamutuk ho entidade postu integradu atu halo operasaun fugetes, Nia hato’o asuntu ne’e ba jornalista sira iha Kuartel Jeral PNTL Kaikoli Dili (29/11).

Komisariu ne’e haktuirtan katak orientasaun ne’ebe Komandu fo sai maka Komandante UPF no Komandante munisipiu sira iha fronteira inklui Komandante munisipiu hotu tenke asegura katak se deit maka inpor ou hatama fugetes mai timor seim lisensa husi governu PNTL sei foti no prende hotu.

Alende ne’e PNTL tenke halo movimentu no aumenta volume ba prevensaun atu nune’e bele halo barazen de Estrada ka cek point.

Maske objetivu husi pesoal no kompania sira ne’ebe mai ba loron inportante hanesan aniversariu Proklamasaun Independensia 28 Novembru, 7 Dezembru dia dos Herois, 25 Dezembru loron Natal, 31 Dezembrru no 1 de Janeiru tinan foun maibe illegal no laiha lisensa maka Komandu la autorija no la tolera.

Tuir prosedimentu legal bainhira polisia prende sasan ruma halo investigasaun no kontinua nia prosesu ba Ministeriu Publiku nudar nain ba prosesu hafoin kontinua ba Tribunal hodi prosesa tuir lei ne’ebe maka vigora. Media PNTL

Dili- iha semana kotuk Polisia Nasional Timor-Leste(PNTL) rezista asidente trafiku hamutuk 17, asidente ne’ebe maka akontese maka hanesan kareta soke malu, kareta soke ema lao ain no asidente motor .

Segundu komandante Jeral PNTL Komisariu Polisia Faustino da Costa hateten tuir dadus ne’ebe maka PNTL iha durante fim da semana to’o horseik (28/11) rezista kazu asidente trafiku hamutuk 17 maibe la rezulta kanek todan no mate, Nia hato’o asuntu ba jornalista sira nia Kuartel Jeral PNTL Kaikoli Dili (29/11).

Komisariu ne’e haktuirtan katak iha asidente trafiku ne’e rezulta estraga kareta no motor. Media PNTL

Dili-Proklamasaun Independensia 28 Novembru ba dala 41 lao ho seguru tanba seguransa maximu husi Polisia Nasional Timor-Leste (PNTL) no kolaborasaun povu Timor-Leste ba loron inportante ne’e.

Segundu Komandante Jeral PNTL Komisariu Polisia Faustino da Costa hateten proklamasaun independensia ba dala 41 ne’ebe maka halao iha nivel nasional iha munisipiu Lautem no munisipiu 12 seluk lao ho diak no suksesu. Nia hato’o asuntu ba jornalista sira nia Kuartel Jeral PNTL Kaikoli Dili (29/11).

Lori Komandu Jeral nia naran hato’o parabens ba povu Timor-Leste no agradese ba parte hotu-hotu tanba komemorasaun ne’e lao diak ho kontribusaun ema hot-hotu nian.

Komemorasaun Proklamasaun Independensia ba dala 41 nivel nasional nebe halao iha munisipiu Lautem komandu PNTL munisipiu Lautem koloka membru nain 157 hodi fo seguransa ba eventu ne’e. Media PNTL

Dili- Gabinete Jeneru Polisia Nasional Timor-Leste halo konsultasaun ba validasaun esbosu estratejia jeneru tinan 2017-2021 hamutuk ho parseru sira atu nune’e bele hasae partisipasaun feto PNTL.

Xefe gabinete Jeneru PNTL Inspector Xefe Daria Ximenes hateten liu husi konsultasaun ohin ami halibur ideias hamutuk ho parseru sira hodi trasa planu ba polisia femenian durante tinan hat nia laran nune’e bele dezenvolve diak liutan polisia femenina, Nia hato’o asuntu ne’e iha konsultasaun esbosu estratejia jeneru iha Kuartel Jeral PNTL Kaikoli Dili (24/11).

Xefe Jeneru PNTL ne’e haktuirtan katak Bazeia ba planu ne’ebe maka trasa ona fromasaun ba lideransa transformativu ba polisia feto no mane husi sarjentu to’o ofisiais ne’be maka sei identifika no ba tinan oin ami sei prepara formasaun ba sira hotu ho apoiu orsamentu husi SEM, UN Women no Ministeriu Interior.

“Partisipasaun polisia femenina iha atividade polisia nian lao diak maibe sei falta formasaun ne’ebe klean ba polisia femenina nia reprezentasaun iha komunidade nia leet konaba publiku speaking (deskursu publiku) ne’ebe maka presija atu halo formasaun kontinua nune’e bele halo interasaun diak ho komunidade”.

Inspetor Jeral Superintendente Xefe Carlos Almeda Jeronimo iha nia intervensaun hateten Planu estratejiku ida ne’e interesante duni nune’e Komandu PNTL bele hare no halo ajustamentu ruma no bele hare oinsa ba futuru dezenvolve liutan polisia femenina.

Nia haktuirtan katak ho diskusaun ne’e o kontribui ba hodi nune’e bele resolve buat ruma liu-liu area jeneru nian no espera katak iha diskusaun ikus hamutuk ho parseru sira ne’e bele hamosu ideias ruma hodi hariku esbosu ida ne’e nune’e iha tuir mai esbosu planu estratejiku jeneru ida ne’e ida bele valida, tanba ho tempu ida los duni planu estratejiku ida ne’e atu fo hanoin ba Komandu atu nune’e ba futuru hanoin oinsa.

Antes ne’e gabinete jeneru halo ona diskusaun internal ho membrus PNTL, pontu fokal husi munisipiu no ikus liu ho parseru sira hodi buka apoiu no suporta husi parseru sira liu-liu kona ba formasaun.

Konsultasaun ba validasaun esbosu estratejia jeneru PNTL ne’e diriji husi Inspetor Jeral Superintendente Carlos Almeda Jeronimu akompaña husi Xefe Gabinete jeneru no reprejentante UN Women no partisipa husi parseru sira hanesan Reprezentante Embaixada Japaun, Rede Feto, Fundasaun Alola, Fundasaun Mahein, Alfela, Fokupers, Pradet no JSMP. Media PNTL

Dili- Departamentu Polisia Komunitaria halo konsultasaun ba Esbozu Norma Organizasaun no Prosedimentu (NOP) ba Komandante PNTL munisipiu 13 hodi bele halo diskusaun no hamosu ideias ruma hodi hadia diak liutan esbozu ne’e .

Xefe Departamentu Polisia Komunitaria Superintendente Asistente Antonio da Luz hateten Konsultasaun ne’e atu halibur ideias husi Komandante munisipiu 13 no partisipante sira atu dezenvolve NOP ne’e sai diak liutan, Nia hato’o asuntu iha Hotel Ramelau Aimutin Dili (23/11).

Komandante da Luz haktuirtan katak NOP ne’e sai hanesan mata dalan ba Ofisial Polisia Suku (OPS), Konselu Polisiamentu Komunitaria (KPK) no Konselu Siguransa Munisipiu (KSM) atu bele inplementa iha servisu loro-loro nian iha terrenu bazeia ba ho mata dalan ne’ebe maka iha atu halo servisu tuir orientasaun servisu ne’ebe maka iha.

NOP hakerek kona-ba inplementasaun servisu Polisia Komunitaria liu-liu OPS atu nune’e bele kompriende didiak saida maka sira atu halo iha terenu no foti desijaun ruma nomos servisu hamutuk ho KPK ne’ebe estabelese ona atu rezolve problema ne’ebe maka komunidade sira enfrenta.

“ Durante ne’e ita utiliza deit manual ne’ebe maka uluk parseru ho departamentu Polisia Komunitaria dezenvolve maibe ita hanoin katak manual ne’e ladun forte tanba ne’e ita transforma manual ne’e sai hanesan lei oan ida liu husi NOP atu bele regula servisu OPS, KPK no KSM hodi nune’e bele foti desijaun balu relebante ho problema hirak ne’ebe akontese iha Komunidade nia leet,” Komandante ne’e esplika..

Hafoin Konsultasaun iha fulan Dezembru 2016 ami sei halo revizaun hafoin bolu fila-fali Komandante munisipiu sira nomos partisipante sira ne’ebe partisipa iha konsultasaun ne’e hodi bele hare fila-fali opiniaun sira ne’ebe partisipante sira fo hodi bele dezenvolve diak liu NOP ida ne’e, no wainhira remata maka husu aprovasaun husi Komandante Jeral hodi halo impelementasaun iha terrenu.

Konsultasaun ba Esbozu NOP ne’e diriji husi Segudu Komandante Jeral PNTL Komisariu Polisia Faustino da Costa akompaña husi Komandante Komandu Administrasaun Superintendente Xefe Mateus Fernandes, Komandante Komandu Operasaun Superintendente Xefe Henrique da Costa, Reprezentante Embaixada Nova Zelandia no Xefe Fundasaun Azia no partisipa husi Eis Segundu Komandante Jeral Komisariu Afonso de Jesus, Komandante PNTL munisipiu 13, Adjuntu Diretor Fundasaun Mahein, reprezentante JICA, Polisia Nova Zelandia no konvidadus sira. Media PNTL

Dili- Polisia Nasional Timor-Leste (PNTL) propoin ba Ministru Interior atu halo revizaun ba regulamentu disiplinar PNTL nune’e bele fo kompetensia ba Konselu Superior atu foti desijaun ba membru ne’ebe halo infrasaun.

Segundu Komandante Jeral PNTL Komisariu Polisia Faustino da Costa hateten Komandu PNTL prekupa Regulamentu Disiplinar PNTL nian tanba ne’e ami prepara proposta esbosu foun atu aprezenta ba Ministru Interior atu bele hetan ideias no alterasaun balu antes lori kontinuasaun prosesu para iha apresiasaun no alterasaun, Nia hato’o asuntu ne’e ba jornalista sira iha Kuartel Jeral PNTL Kaikoli Dili (21/11).

Komisariu Faustino haktuirtan katak regulamentu disiplinar PNTL iha frakeja balu maske lei organika hateten PNTL nia formasaun no disiplina identiku militar maibe prosesu infrasaun ba membru sira ne’ebe halo infrasaun krime no disiplinar ne’e kompletamente halo prosesu sivil.

“PNTL nia regulamentu disiplinar hateten katak wainhira membru ruma komete infrasaun krime no sivil maka sei halo prosesu sivil katak se ita hatene momos katak ema ne’e sala maibe konsidera nafatin Presumsaun Inosente (praduga tak bersalah) tanba ne’e maske ema ne’e sala tenke liu husi prosesu ida liu-liu ba kazu krime maske membru ne’e sala maibe Konselu Superior so bele rekomenda ba prosesu ba Demisaun bainhira julgamentu iha ona Sentensa Tribunal kondena tinan 3 ou liu tama prizaun”. Segundu Komandante Jeral esplika.

Wainhira Tribunal kondena minimu tinan tolu prizaun maka Konselu Superior PNTL propoin ba demisaun, se ministeriu tutela aseta maibe pesoal ne’e rasik sente la satisfas nia bele halo rekursu ba Tribunal Distrital no Tribunal desidi katak mantein desijaun ne’ebe Komandu no governu foti no ema ne’e rasik la satisfas ho desijaun ne’e maka nia rasik halo Rekursu Kontesiozus ba Tribunal Rekursu.

Durante prosesu ne’e lao maka sansaun no despaisu sira ne’ebe aplika antes anula hotu no labele lao signifika membru ne’e hatais farda no halao servisu bai-bain hodi hein desizaun ba rekursu ne’ebe maka nia halo.

Relasiona ho kazu balu ne’ebe maka tuir lolos halo suspensaun ou demisaun ba membru ne’e maibe kontinua halao servisu nafatin tanba ne’e dalabarak publiku kestiona no hau responde katak lei maka fo dalan tanba ne’e maka kazu balu iha 2008 to’o 2016 membru sira servisu nafatin tanba lei maka autorija. Media PNTL

Dili- Komandu PNTL munisipiu Dili kaptura negosiante nain hat (4) ne’ebe maka faan fugetes (paixon) tamba governu bandu atu negosiante sira faan paixon antes loron natal.

Segundu Komandante Jeral PNTL Komisariu Polisia Faustino da Costa hateten iha semana liu ba Komandu Munisipiu Dili konsege halo kapturasaun ba ema nain 4 ne’ebe faan fugetes sira nain 4 ne’ebe kaptura prosesu iha munisipiu Dili lao hela no foti ona fugetes balu iha Komandu municipal Dili, Nia hato’o asuntu ne’e ba jornalista sira iha Kuartel jeral PNTL Kaikoli Dili (21/11).

Komisariu Faustino haktuirtan katak fugetes iha loza sira ita foti hotu ona no prosesu lao maibe sira ne’ebe agora daudaun faan ba labarik sira iha dalan uza sistema mobile ho motorizada katak sira ho motor ba iha bairu balun no hare labarik e depois sira para iha neba no faan fugetes tanba ne’e maka PNTL tenta buka nafatin autor sira ne’e.

“ Negosiante sira ne’e uza modus operandi agora la hanesan saida maka sira halo iha pasadu, sira nain hat ne’ebe kaptura sira nia deklarasaun maka ne’e ema sira faan fugetes agora ne’e la faan permanente iha loza ou fatin balun”.

Operasaun ba fugetes ka paixon bazeia ba diretiva ida ne’ebe maka hasai ona iha tinan 2015 ne’ebe maka orenta operasaun ba fugetes tanba fulan Novembru fugetes komesa tarutu iha bairu balun iha Dili laran tanba ne’e Komandu fo ona orentasaun ba Komandu munisipiu inklui Unidade Patrulamentu Fronteira (UPF) sira atu asegura. Media PNTL