Dili- Ministeriu Interior (MI) aprezenta relatoriu auditoria tinan 2016 ba Polisia Nasional Timor-Leste (PNTL) munisipiu Ermera, munisipiu Dili no Unidade Polisia Maritima (UPM).
Inspetora Geral Gabinete Inspesaun Auditoria MI Candida do Rosario da Costa Soares hateten Fiskalizasaun no Auditoria ne’ebe maka halao atu identifika progresu no dezafiu ne’ebe maka Komandu PNTL munisipiu Ermera, Komandu PNTL munisipiu Dili no UPM halao durante ne’e, Nia hato’o kestaun ne’e iha serimonia Aprezentasaun Relatoriu Auditoria 2016 iha Salaun Ministeriu Interior Vila-Verde.
Nia haktuirtan katak fiskalizasaun ne’ebe maka halao foka liu konaba Finansas, Lojistika, Administrasaun, Operasaun, Formasaun no Prosesu Disiplinar, tanba ne’e ami rekomendasaun inportante maka atu hadia jestaun ezekusaun orsamentu Jeral Estadu tanba iha ona lei ne’ebe regula inplementasaun no asegura hodi justifika uzu orsamentu do estadu.
“Liu husi Serimonia Aprezentasaun Relatoriu Auditoria 2016 ami konvida Komandante ho nia membrus sira nudar meius atensaun hodi aprezenta relatoriu fiskalizasaun no kolia hamutuk hodi fo hanoin konaba rekomendasaun ne’ebe maka hakerek iha relatoriu no husu atu hadia nafatin,” dehan nia.
Iha okajiaun ne’e Iha okaziaun ne’e Adjuntu Komandante PNTL munisipiu Dili Superintendente Asistente Euclides Belo hateten Komandu munisipiu Dili la aseta ho rekomentasaun GIA tanba rekomendasaun ne’ebe maka halo tenke hare ba Kompetensia ne’ebe maka iha nune’e rekomendasaun tenke halo ba Komandu Jeral laos ba Komandu munisipiu Dili tanba Komandu Munisipiu ezekuta ordem hotu-hotu ne’ebe mai husi hirarkia Komandu Jeral nian.
GIA rekomenda ba Komandu PNTL munisipiu Dili atu Estabelese biblioteka hodi prezerba materia konaba formasaun nian maibe ne’e kabe ba Centru Formasaun Polisia (CFP) tanba treinamentu hirak ne’ebe maka estabelese ba Komandu munisipiu no Unidade sira ne’e sentraliza iha CFP maske treinamentu balu realiza iha Komandu munisipiu maibe nafatin ligadu ho CFP.
Auditoria ba tinan 2016 halao ba Komandu PNTL munisipiu Ermera, Dili, UPM no Diresaun Sivil iha Ministeriu Interior nia okos.
Serimonia Aprezentasaun Relatoriu Auditoria 2016 partisipa husi Komandante PNTL munisipiu Dili Superintendente Xefe Pedro Belo, Adjuntu komandante PNTL munisipiu Ermera Superintendente Asistente Raimundo de Araujo, reprezentante Komandu UPM, no konvidadus sira. Media PNTL
