News

Aileu, Komandante Jerál Polísia Nasional Timor-Leste (PNTL) Komisariu Jerál Polísia Henrique da Costa hafoin simu posse nu’udar Autoridade másimu instituisaun seguransa iha loron 27 fulan Marsu tinan 2023 hala’o vizita servisu dahuluk nian ba iha Komandu PNTL munisipiu Aileu iha loron 10 fulan Jullu tinan 2023.

Iha vizita ne’e, Komandante Jerál PNTL ne’e hala’o enkontru ho Komandante Eskuadra, Xefe Seksaun inklui membru PNTL munisipiu Aileu nian hodi hato’o planu no prioridade Komandu nian durante assume kargu nu’udar Autoridade másimu instituisaun seguransa.

Planu prioridade lima ne’ebe sei implementa durante mandatu tinan tolu (2023-2026), ida maka hanesan hadia estrutura Komandu PNTL nian hanesan halo Rotasaun, Transferensia no Nomeasaun ba Ofisias Superior, Subalternu, Sargentu, no Ajente sira iha munisipiu hotu. Além de hadia estrutura Komandu nian, halo mós Reforma basea ba Estatuto instituisaun PNTL nian.

Komisariu Jerál Polísia Henrique da Costa iha vizita ne’e hato’o orientasaun ba Komandu munisipiu sira hodi koloka estrutura foun tuir Deviza ne’ebe maka iha. Iha tempu badak, Komandu nia esperansa maka sei halo promosaun ba membru sira tuir Antiguidade hodi bele priense estrutura Komandu nian.

Biban vizita ba iha munisipiu Aileu ne’e, Komandante Jerál PNTL ne’e partisipa mós iha serimonia Komemorasaun tinan 50 Existensia munisipiu Aileu nian. Aktividade vizita ne’e, Komisariu Jerál Polísia Henrique da Costa akompaña husi esposa Sra.Manuela de Araújo ne’ebe maka halo mós enkontru ho esposa Ofisias Superior sira iha Komandu PNTL munisipiu Aileu nian.

Antes termina vizita servisu, Autoridade másimu instituisaun seguransa hato’o Motivasaun ba membru PNTL sira iha munisipiu Aileu atu bele servisu ho profesionalizmu, dedikasaun no hala’o kna’ar tuir Lei no Ordem ne’ebe maka iha.

Media PNTL.      

Dili, Komandu Polísia Nasional Timor-Leste (PNTL) liu husi Departamentu Investigaasaun Kriminal (DIK) iha loron segunda-feira (10/07) ne’e asegura ona sidadaun Timor oan ida ne’ebe maka hasai liafuan att ka Defama Líder Nasional aktual Primeiru Ministru Xanana Gusmão iha Media Sosial.

Xefe DIK Superintendente Polísia João Belo dos Reis liu husi konferensia imprensa segunda-feira (10/07) ne’e hateten baseia ba publikasaun iha Media Sosial (Facebook) ita nia sidadaun Timor oan balun hasai liafuan att (Tolok) ba Primeiru Ministru iha Media Sosial.

“Nune’e DIK lokaliza kedas/buka tuir informasaun lokaliza nia hela fatin, detekta nia númeru kontaktu no agora dadaun ema ne’e ami notifika ona hodi fó ninia deklarasaun baseia ba publikasaun ne’ebe nia halo”, informa Xefe DIK ne’e.

Superintendente Polísia hakuir tan katak, sidadaun refere ho inisial MJ ho idade 33 uja ID Facebook ‘Jonn Malic’ hodi hasai liafuan att no defama eis Komandante En-Xefe FALINTIL no aktuál Primeiru Ministru José Alexandre Kay Rala Xanana Gusmão iha Media Sosiál Facebook.

“Hafoin lokaliza nia hela fatin, maka ohin (10/07) parte DIK ba foti sidadaun refere iha ninia residensia privada iha area Mota-Ki’ik, Suku Hera, Postu Administrativu Cristo Rei, Munisipiu Dili hodi lori mai Kuartél Jerál, hodi presta ninia deklarasaun baseia ba publikasaun ne’ebe nia halo”, hatutan Superintendente Polísia ne’e.

DIK Detekta Mosu Asaun Tráfiku Umanu Ilegal, Sidadaun Timor Oan Barak Sai Vitíma

Iha semana kotuk, sidadaun Timor oan na’in ha’at (4) fila husi estrangeiru (Malaysia), parte DIK foti ona sira nia deklarasaun no detekta katak akontese rede Tráfiku Umanu illegal tanba sidadaun na’in ha’at ne’e tuir rekrutamentu liu husi online, hafoin transporta ba liur liu husi Indonesia tama iha Malaysia, fó servisu la tuir kontratu ne’ebe maka sira asina.

“Ita detekta mós katak, laos sidadaun na’in ha’at ne’e deit, maibé antes ne’e sidadaun hamutuk 21 maka fila ona husi Malaysia ho kazu ne’ebe maka hanesan no parese sei barak tan iha Malaysia, tanba ne’e ita sei buka tuir nafatin”, haktuir Xefe DIK ne’e.

Superintendente Polísia João Belo dos Reis apela ba sidadaun Timor oan hotu ne’ebe buka hela servisu, atu labele fiar arbiru, publikasaun rekrutamentu liu husi online ne’ebe habosok ita bo’ot sira. Karik ema ruma oferese servisu ka publika hela informasaun atu fó servisu, diak liu buka didiak no husu atu labele fiar arbiru, tenke konsulta uluk ho parte governu nian liu-liu SEFOPE, parte ne’ebe bele fiar no parte ne’ebe bele fó servisu no nasaun ne’ebe maka bele oferese servisu ba ita. Se lae maka ita sai vitíma hanesan mós ita nia maluk lubuk ida ne’ebe maka agora deporta fila ona mai husi Malaysia no sai vitíma ba rede Tráfiku Umanu husi ema sira ne’ebe maka laiha responsabilidade.

“Sira ne’ebe halo rekrutamentu ne’e dala barak mai husi Kupang, ema iha Kupang maka oferese servisu liu husi online ba Timor oan no to’o ikus ita konsidera katak tama ona iha rede Tráfiku Umanu nian”, hakotu Superintendente Polísia ne’e.

Media PNTL.           

Dili, Komandu Polísia Nasional Timor-Leste (PNTL) munisipiu Lautem aprezenta ona kazu ida ne’ebe hamate sidadaun Timor oan ida iha loron 06 fulan Jullu tinan 2023 ba iha Ministeriu Públiku (MP) hodi hetan mandadu detensaun ba suspeitu sira ne’ebe envolve iha akontesimentu ne’ebe halakon sidadaun refere.

Porta Voz Komandu PNTL Superintendente Polisia António da Lúz liu husi konferensia imprensa segunda-feira (10/07) ne’e informa ho akontesimentu ne’ebe akontese ne’e halo komunidade sira kestiona situasaun balun kona-ba atuasaun servisu Polísia nian no mós prosesu sira.

“Prosesu ba kazu ne’e, Komandu PNTL munisipiu Lautem halo ona prosesu, agora dadaun aprezenta ona ba MP atu bele hetan mandadu detensaun, prosesu inisial halo ona, identifika ona suspeitu na’in hitu (7), husi Komandu PNTL munisipiu Lautem halo ona prosesu identifikasaun maibé ita hein mandadu detensaun husi MP atu bele asegura suspeitu sira ne’e hodi bele partisipa iha prosesu kontinuasaun”, esplika Porta Voz Komandu PNTL ne’e.

Superintendente Polisia akresenta tan katak husi Komandu Jerál hasai ona despaisu ba iha Inspetúr Jerál hodi bele kria ekipa ida hodi halo investigasaun ba membru PNTL iha munisipiu Lautem kona-ba servisu ne’ebe maka sira halo. Tanba públiku kestiona kona-ba Polísia nia atendimentu ne’ebe ho akontesimentu ne’e no agora dadaun Komandante Jerál hasai ona despaisu ba iha Inspetúr Jerál hodi kria ekipa konjunta ida husi Inspetúr Jerál, parte Investigasaun ho mós parte Justisa atu halo prosesu Investigasaun ba membru PNTL sira iha munisipiu Lautem. Matebian oras ne’e dadaun entrega ona familia hodi halo prosesu funeral, antes ne’e halo ona prosesu autopsia ba mate isin.

Grupu Rua Asaltu Malu, Komandu PNTL Munisipiu Bobonaro Asegura ona Suspeitu Na’in Ida

Iha loron 06 fulan Jullu tinan 2023, akontese kazu asaltu malu entre grupu rua iha munisipiu Bobonaro hodi estragus komunidade sira nia uma rua, parte PNTL munisipiu Bobonaro asegura ona suspeitu na’in ida

Liu husi konferensia imprensa, Porta Voz Komandu PNTL Superintendente Polisia António da Lúz hateten Komandu PNTL munisipiu Bobonaro halo ona prosesu identifikasaun no asegura suspeitu na’in ida no sei buka tan suspeitu sira seluk ne’ebe maka envolve iha konfrontu ne’e.

“Liu husi biban ne’e, apela ba maluk sira ne’ebe envolve iha kazu ne’e atu entrega ann ba iha Polísia hodi halo prosesu, tanba ita hatene halo problema, ita tenke responsabiliza ba aktu sira ne’ebe maka ita halo, dala ida tan instituisaun PNTL husu ba maluk sira ne’ebe envolve iha kazu asaltu malu ida ne’e no estragus komunidade nia uma, husu atu bele entrega ba parte Polísia hodi tuir prosesu legal ne’ebe maka iha”, hakotu Superintendente Polisia ne’e.

Media PNTL.          

Dili, Komandu Polísia Nasional Timor-Leste (PNTL) liu husi Unidade Espesial Polísia (UEP) iha loron 08 fulan Jullu tinan 2023 halo formatura jerál hodi dezloka ninia membru hamutuk na’in 66 ba munisipiu sira ne’ebe maka hetan dezastre naturais hodi fó apoiu ba komunidade sira.

Reprezentante Komandante Jerál PNTL, aktual Komandante Komandu Operasaun Superintendente Xefe Polísia José Soares iha ninia intervista hateten Komandu laiha kbi’it/forsa atu fó apoiu sosial hanesan hahan maibé sempre prontidaun atu oferese ninia membru sira hodi tu’un ba terenu fó apoiu fíziku ba komunidade sira ne’ebe afetadu husi dezastre naturais.

“Ohin PNTL dezloka ita nia efetivu husi UEP ho kuantidade 66 hodi apoiu munisipiu sira ne’ebe maka iha loron rua liu ba hetan dezastre naturais, ami hatene katak maske hafoin kampaña to’o eleisaun no formasaun governu, ami iha situasaun alerta ne’ebe maka ami esforsu ami nia ann tomak hodi asegura kampaña to’o formasaun governu maibé iha situasaun kalamidade ida hanesan ne’e, ami prontu nafatin atu bele apoiu ita nia komunidade sira iha munisipiu hitu ne’ebe maka hetan dezastre naturais”, informa Reprezentante Komandante Jerál PNTL ne’e.

Komandante Komandu Operasaun PNTL ne’e salienta tan katak prezensa membru UEP nian iha munisipiu ho objetivu atu servisu hamutuk ho Komandu munisipiu no mós autoridade relevante sira iha munisipiu atu bele fó apoiu ba komunidade sira.

“Apoiu hanesan hadia komunidade sira nia uma ho saida maka iha, apoiu institute gestaun ekipamentus ninian atu bele normaliza fali estraga sira no fó seguransa iha munisipiu sira ne’e atu nune’e ekipa sira bele halo servisu ho diak, atu bele lori fali komunidade sira ba iha situasaun ida normal”, hatutan Komandante Komandu Operasaun PNTL ne’e.

Superintendente Xefe Polísia ne’e informa tan katak membru UEP hirak ne’e sei dezloka ba iha munisipiu sira ne’ebe hetan dezastre naturais maka hanesan munisipiu Lautem, Viqueque, Baucau, Mantutu, Manufahi, Ainaro, Covalima, Ermera no Bobonaro.

“Kada munisipiu, ita sei koloka membru na’in 7 ou 8 hodi bele fó apoiu umanitariu ba komunidade afetadu sira husi dezastre natuias no sei termina sira nia servisu iha loron sexta-feira semana oin”, hakotu Superintendente Xefe Polísia ne’e.

Hola parte iha serimonia dezlokasaun ne’e Komandante Komandu Operasaun Superintendente Xefe Polísia José Soares, Inspetúr Jerál, Komandante Interinu CFP, Komandante UEP ho estrutura no membru sira.

Media PNTL.  

Dili, Komandu Polísia Nasional Timor-Leste (PNTL) sexta-feira (07/07) ne’e hala’o serimonia abertura Treinamentu Taekwondo ba membru Unidade Espesial Polísia (UEP) ne’ebe maka hetan suporta husi embaixada Korea do Sul iha Timor-Leste.

Komandante Jerál PNTL Komisariu Jerál Polísia Henrique da Costa iha ninia diskursu ba serimonia ne’ebe hala’o iha Komandu UEP Bairo-Pite hateten prezensa embaixador Korea nian iha serimonia abertura ida ne’e hanesan jestu ida ba prontidaun governu Korea do Sul hodi fó apoiu mai PNTL iha dezenvolvimentu instituisaun ida ne’e.

“Ohin ita hotu foin asiste embaixador Korea nian entrega ekipamentu Taekwondo mai PNTL espesial ba iha UEP ho nia estrutura tomak, atu ho responsabilidade kuidadu didiak ekipamentus hirak ne’e, nune’e ita hotu bele utiliza ba akividade ita nian iha tempu ida ne’ebe naruk”, tenik Komandante Jerál PNTL ne’e.

Komisariu Jerál Polísia ne’e afirma iha okaziaun ida ne’e hakarak hato’o agradesimentu ida ne’ebe klean ba apoiu ne’ebe fó ona mai PNTL, no hein katak apoiu hirak ne’e laos to’o deit iha ne’e maibé bele mós fó apoiu iha area seluk ba dezenvolvimentu instituisaun PNTL nian iha futuru. Tanba ne’e ami hakarak espresa katak dezenvolvimentu PNTL sei konta mós ho ita bo’ot (Korea do Sul) nia apoiu.

“Ba ita sira ne’ebe maka sei aproveita treinamentu ida ne’e, iha siênsia defesa pesoal laos hanorin ita hodi uza forsa ho violensia, maibé siênsia defesa pesoal hanorin ita atu pasiensia, disiplina, iha benefisiu barak tebes iha treinamentu defesa pesoal ida ne’e maka hanesan, primeiru sai meius ida hodi defende ann, rua maka ita iha físiku ne’ebe saudável, hala’o ita nia múskulo sira ne’ebe forte no isin sira fleksu liu, halo ita konfia ann liu tan no barani hodi hala’o servisu, promove ita nia pasiensia, disiplina no kontrola ann”, hatutan Komisariu Jerál Polísia.

Autoridade másimu intituisaun seguransa apela ba membru UEP ne’ebe maka sei partisipa iha treinamentu ne’e katak aktividade ne’e fó benefisiu maka’as tebes hanesan membru PNTL, tanba ne’e husu imi hotu atu tuir Treinamentu Taekwondo ida ne’e ho sériu no responsabilidade. Informa mós katak Treinamentu Taekwondo ida ne’e laos deit ba membru UEP maibé mós ba membru PNTL hotu ne’ebe hakarak hola parte iha Treinamentu ida ne’e.

Iha fatin hanesan, embaixador Korea do Sul iha Timor-Leste Shin Mantaek iha ninia intervensaun hateten mai iha fatin ida ne’e hanesan onra ida ba hau hodi bele mai asiste abertura treinamentu Taekwondo ida ne’e no atu fahe ekipamentu treinamentu nian.

“PNTL ninia misaun ida maka atu oinsa atu asegura paz no seguransa ba povu sira Timor-Leste nian, maibé entre Polísia sira ne’e, membru UEP iha buat ida maka espesial iha ne’ebe ema sira seluk laiha hanesan aifunan ida ne’ebe ita bo’ot sira espesial”, hateten embaixador Korea do Sul ne’e.

Shin Mantaek haktuir tan katak atu halo servisu espesial sira ne’e, membru Polísia sira mós tenke iha esperítu ida katak laiha buat maka inposivel, hafoin iha físiku, forsa ne’ebe maka ema seluk laiha, no sempre prontu atu hasoru dezafiu saida deit maka akontese iha terenu.

“Tanba ne’e hau fiar ho treinu Taekwondo ida ne’e sei bele ajuda atu eleva tan ita bo’ot sira nia skill ka abilidade ne’ebe iha ona, treinamentu Taekwondo ida ne’e la hanesan ho treinamentu sira seluk maibé treinamentu ida ne’e sei foka liu ba oinsa atu hametin liu tan auto konfiansa, esperítu fiar ann, hasa’e liu tan físiku atu nune’e bele hasoru situasaun saida deit maka akontese, ba iha terenu ita bo’ot sira bele ultra pasa”, haktuir Shin Mantaek.

Iha biban serimonia ne’e, embaixador Korea do Sul iha Timor-Leste Shin Mantaek entrega ekipamentus Taekwondo nian ba iha Komandante Jerál PNTL Komisariu Jerál Polísia Henrique da Costa akompaña husi Komandante UEP. Hola parte iha aktividade ne’e, Komandante Komandu PNTL Munisipiu Dili, Komandante Interinu CFP, Komandante UEP ho estrutura tomak, Sekretariu Jerál Taekwondo Timor-Leste no kovidade sira seluk.

Media PNTL.                                             

Dili- Komandu Polisia Nasional Timor-Leste (PNTL) halao Reforma ba membru PNTL nain 158 iha loron 16/06 tinan 2023 bazeia ba Estatuto Professional do Pessoal com Funções Policiais da PNTL Dekretu Lei Nu. 69/2022 de 28 de setembro.

Segundu Komandante Jeral PNTL Komisariu Polisia Pedro Belo hateten membru PNTL hirak ne’ebe maka reforma priense ona rekejitu tuir lei ne’ebe maka hakerek iha Estatutu Pessoal PNTL nian iha artigu lubuk ida ne’ebe hakerek nune’e sira Reforma tuir rekejitu, Nia hato’o asuntu ne’e hafoin halao enkontru ho komandante munisipiu no komandante Eskuadra no Xefe Seksaun sira iha Komandu munisipiu Dili, kuarta (05/07).

Relasiona ho Polemika Reforma ba membru PNTL ne’e Segundu Komandante Jeral klarifika  Governu Konstitusional da IX hanoin Reformadu Sira ne’e atu mai fila-fali entaun tenke iha revizaun ba Estatutu PNTL nian hodi fo dalan ba sira atu fila-fali mai instituisaun PNTL ou desijaun saida maka sira bele foti hodi Reformadu sira ne’e fila-fali mai.

“Hau nia hanoin pessoal diak liu goveernu hasai rezolusaun ida para fo ajuda subsidiu ka  orsamentu ruma ba sira atu nune’e sira bele moris ho dignu tanba Ami foti desijaun bazeia ba lei ne’ebe maka hakerek iha estatutu pessoal PNTL,”dehan Komisariu Pedro.

Iha Estatutu pessoal PNTL artigu 128 rtigo 128.º Passagem à aposentação

O polícia da PNTL,tendo prestado o tempo mínimo de serviço previsto na lei geral, passa à situação de aposentação sempre que:

1. a) Atinja os 60 anos de idade; ou
2. b) Seja julgado física ou psiquicamente incapaz para o exercício das funções na PNTL pelo órgão competente.

Nia esplika iha kazu reforma Voluntariu wainhira membru ne’ebe maka hakarak pre-aprezentasaun nia bele hato’o nia pedidu ho rajaun ruma karik tanba nia servi ona iha instituisaun PNTL durante tinan 20 no nia iha tinan 55 nia bele hato’o nia pedidu reforma ba Komandante Jeral hafoin Komandante Jeral aprova, nia bele lao tuir ida ne’e, maibe sira ne’ebe maka tinan 60 ne’e obrigatoriu tuir lei hakerek laos ami maka inventa no naran koalia deit.

Lei Estatutu Professional PNTL aprova iha tinan 2022 no promulga husi Prezidente Republika Dr.Jose Ramos Horta tanba ne’e Ami halao deit buat ne’ebe maka hakerek iha lei no desijaun bazeia ba lei.

Estatutu la hakerek konaba Reformadu sira nia nesesidade halo nusa maka ami bele tuir ami so kumpri deit buat ne’ebe maka hakerek iha lei. Lei hakerek wainhira membru PNTL Reforma ona maka tenke submete ba Ministeriu Solidaridade Sosial hodi husu osan pensaun nian iha Institutu Nasional Seguransa Sosial (INSS) hodi trata iha neba.

Oras ne’e daudaun Reformadu nain 158 fulan-fulan simu osan nafatin to’o mate, hakerek klaru katak sira ne’ebe salariu kik liu ba Ajente $200.00 no Ofisiais Superior Superintendente Xefe $ 550.00 ba leten liu fali membru Ajente sira ne’ebe ativu hela sira nia vensimentu la to’o $ 500.00 maibe sira ne’ebe manan $500.00 maka koalia barak maibe labuat ida wainhira sira diak maka diak mos ba ami tanba Ami hotu dalan tuir ida ne’e hotu, wainhira governu halo mudansa ami kontente liutan. Se wainhira governu halo mudansa no aumenta tan artigu balu iha Estatutu PNTL nian entaun ne’e diak no ami agradese teb-tebes tanba dalan ida ne’e maka ami hotu tuir.

Eis Komandante munisipiu Baucau ne’e haktuir Estatutu PNTL rasik oras ne’e daudaun tama ona iha faze revizaun no tempu barak se governu presija ami ba aprejenta. Hau ho Komandante Jeral sempre iha atensaun ba lei ne’ebe maka la fo valoriza ba PNTl nian ami tenke halo hotu revizaun atu aprejenta fila-fali ba governu hodi hare fila-fali tanba Estatutu PNTL presiza halo revizaun hodi hare koanba pensaun no seluktan ne’ebe maka presija atu hadia.

Alende ne’e halo mos Revijaun ba Dekretu Lei, Lei Organika PNTL, Lei Disiplina PNTL tanba dalaruma buat ne’ebe maka halo dalaruma la han malu lei ne’e halai ketak-ketak fali tanba ne’e presija halo revizaun.  Nia hakotu. Media PNTL

Dili- Segundu Komandante Jeral PNTL Komisariu Polisia Pedro Belo motiva Komandu PNTL Dili ho nia membru sira atu hasae vizivilidade servisu iha publiku no komunidade nia leet atu bele responde sedu wainhira mosu problema no halo prevensaun ba krime.

Komisariu Pedro Belo hateten ohin Hau mai atu fo korajen nafatin sira no fo nafatin apoiu sira. Ami hotu hamutuk atu servisu ne’e lao diak liutan ba oin kontinua servisu hamutuk, utilija rekursu ne’ebe maka iha atu jere hodi reforsa malu atu nune’e sidade Dili iha disiplina liu-liu iha parte Tranzitu nian, Nia hato’o asuntu ne’e hafoin reuniaun ho Komandante munisipiu, Komandante Eskuadra no Xefe Seksaujn sira iha Komandu munisipiu Dili, kuarta (05/07).

Nia hatutan Hau mai halo reuniaun ho sira atu servisu hamutuk ho Komandante sira nune’e Ami bele kontinua mantein nafatin servisu diak ne’ebe maka iha no aumenta servisu diak liutan atu nune’e komunidade sira bele sente, liu-liu iha parte tranzitu nian nune’e mos servisu ba vizivilidade atu Polisia besik liutan ba komunidade nomos atu halo disiplina ba seguransa rodoviariu nian liu-liu ema sira ne’ebe utilija kareta no motor tenke uza Estrada ho lolos tuir lei ne’ebe maka iha no labele uza estrada publiku hanesan dalan privadu.

“Ohin hau mai vizita Komandu munisipiu Dili atu apresia Komandante sira no membru tomak iha Komandu PNTL munisipiu Dili nian ne’ebe maka servisu diak teb-tebes, iha mudansa ne’ebe maka ita hotu akompaña,”dehan Komisariu Pedro.

Eis Komandante munisipiu Dili ne’e akresenta durante ne’e Komandu PNTL munisipiu Dili servisu diak teb-tebes ita hare iha mudansa durante Ami nain rua Komandante Jeral nia mandatu, hafoin simu pose iha loron 27 marsu 2023 liu mai ita hare kazu krime ne’ebe maka akontese iha Dili nia grau tun makaas lahanesan uluk maske iha Area Dom Aleixo nian krime sei akontese tanba populasaun barak entaun sempre iha kazu maibe la hanesan uluk.

Ita hare mos vizivilidade iha tempu kalan Polisia sira sempre iha tanba Komandu Dili servisu diak ho Komandu Unidade Espesial Polisia (UEP), Unidade Patrulhamentu Fronteira (UPF) no Komandu Jeral sira apoiu malu hodi halo servisu ne’ebe maka diak teb-tebes para ema bele hare katak vizivilidade Polisia iha komunidade nia let komesa lao daudaun maske seidauk masimu maibe rejultadu oras ne’e hatudu ona katak komunidade mos sente katak iha duni ona vizivilidade hamutuk ho sira.

Ami presija hare hamutuk oinsa dezenvolve Seksaun Tranzitu para bele lao diak liutan tanba ita presija hare tempu oras-oras ne’ebe maka mosu engarafamentu iha fatin balu entaun presija halo mos iha disiplina nomos iha fatin balu ne’ebe maka ema balu ne’ebe maka utilija estrada maibe halai neneik liu entaun impede fali ema seluk ne’ebe maka iha kotuk ho nesesidade urjente ba prekupasaun servisu ka ba ospital tanba familia moras no seluktan susar utuan tanba sira ne’ebe maka utilija dalan iha oin hanesan partikular tanba ne’e presija aplika disiplina ba sira.

Ba motorista sira ne’ebe maka lori kareta ho motor maibe koalia hela ho telfone, WhatsApp, mensajen no seluktan Ami sei aplika disiplina ba sira tanba ne’e Komandu munisipiu Dili hamutuk ho membru sira sei servisu makaas hodi bele kontrola ema sira ne’e halo disiplina hodi redus risku asidente iha dalan publiku atu nune’e ema bele utiliza Estrada publiku ho lolos.

Kestiona konaba limitasaun transporte Segundu Komandante Jeral ne’e hatan Komandu munisipiu Dili seidauk iha kareta propriu atu tula sasan evidensia hanesan motorizada ne’ebe maka prende wainhira Seksaun Tranzitu halo sweeping ne’e hanesan difikuldade ida maibe ida ne’e la hamate sira nia espiritu servisu tantu rekursu no materiais saida maka iha ami uza ida ne’e no jere nafatin hodi kontinua halo servisu. Planu ba oin presija hare ona asuntu ne’e tanba Tranzitu mos hatama osan barak ba kofre estadu nune’e kuandu Governu fo apoiu masimu ba Tranzitu maka sira mos sei hatama osan barak liutan ba Estadu tanba ne’e presija tau atensaun, hare sira nia kondisaun no sira nia nesesidade hodi motiva sira atu servisu makaas liutan.

Membru PNTL Dili komesa husi Hau nia lideransa hotan Komandante sira seluk to’o fali Komandante Natercia  nia lideransa agora nia hatene muito bem membru sira ne’ebe servisu iha ne’e Sira nia Espiritu servisu makaas liu fali dala ruma sira haluha tia sira nia familia no hakarak atu servi deit Estadu, povu no rai ida ne’e atu sai diak.

Oras ne’e daudauk sira hatudu daudaun komesa husi ami nia mandatu to’o agora sira hatudu ona sira nia prestasaun servisu liu husi sira nia profesionalismu ita bele hatete katak uluk ema sempre kestiona no komplein konaba Polisia nia servisu katak kontra diretus humanus maibe agora ita ladun rona katak iha violasaun diretus humanus, saida maka sira atu halo agora  maka sira koalia maka barak liu, koalia ho komunidade, ho lian mamar, oin midar ba komunidade no hakbesik ba komunidade mak barak liu hodi nune’e komunidade servisu hamutuk ho Polisia.

Iha okajiaun ne’e Komandante PNTL munisipiu Dili Superintendente Xefe Polisia Natercia Martins hateten Ami agradese tanba bele hetan vizita husi Segundu Komandante Jeral mai iha Ami nia fatin, horseik hau simu orientasaun Segundu Komandante Jeral nia objetivu vizita ida ne’e  atu hato’o buat ruma ligadu ba seguransa iha kapital Dili nomos mensajen ruma no orentasaun Komandu nian mai ita hotu atu kontinua motiva nafatin ita hodi halao ita nia knar hanesan membru PNTL atu servi komunidade nia seguransa.

Hau reprejenta estrutura tomak hato’o bem vindo ba Segundu Komandante Jeral mai ami nia Komandu, hatene katak ita boot iha ne’e antes no tempu barak tebes hamutuk ho membru sira, laos ema foun mai Komandu Dili nune’e hatene ho didiak kondisaun no situasaun iha kapital Dili nomos durante liu eventu boot lubuk ida no ita hetan apresiasaun lubuk ida husi komunidade buat hirak ne’e hotu tanba koamndante Jeral no Segundu Komandante Jeral nia lideransa.

“Ami hotu iha ne’e Komandante Eskuadra sira Ami nia firmi no komitmentu no ami nia prinsipiu ne’e tau lema Servi Lei no Ordem mak durante ne’e fo Espiritu mai ami halao ami nia knar ho responsabilidade,” Komandante Natercia hakotu.

Media PNTL

Dili, Vise Ministru Interior sesante iha Oitavu Governu Konstitusional António Armindo hamutuk ho Sekretariu Estadu Protesaun Sivil sesante Joaquim Amaral iha segunda-feira (03/07) ne’e entrega Relatoriu Servisu durante mandatu ba Ministru Interior foun Nono governu Konstitusional Franscisco Guterres no Sekretariu Estadu Protesaun Sivil Mariano Reis.

Hafoin serimonia ne’ebe hala’o iha salaun enkontru Ministeriu Interior Vila-Verde ba jornalista sira Ministru Interior Franscisco Guterres hateten nia parte agradese ba Vise Ministru Interior sesante no Sekretariu Estadu Protesaun Sivil sesante ne’ebe maka entrega Relatoriu ba servisu hirak ne’ebe maka sira hala’o ona.

“No mós sira briefing kona-ba ba saida maka durante ne’e halo ona, hafoin sei hare’e hodi fó kontinuadade ba servisu balun no sei iha prioridade lubuk maka sei hatu’ur atu ba oin iha loron 120 nia laran pelu menus saida maka ita presiza halo hotu”, tenik Ministeriu Interior Franscisco Guterres.

Ministeriu Interior salienta tan katak iha briefing ne’ebe maka hato’o hanesan kestaun infrastrutura, kestaun politika balun, kestaun servisu operasionais balun inklui protesaun sivil, kona-ba saida maka ami sei halo durante tinan lima mai oin.

“Ami mai atu kontinua halo servisu, hafoin ita buka solusaun ba problema ne’ebe iha atu bele resolve, oinsa ita atu hatu’ur setór seguransa ida ne’ebe maka forte atu bele apoiu ba dezenvolvimentu nasional no ami hahu’u ohin ba oin, ami husu deit hotu-hotu nia kolaborasaun, povu tomak nia kolaborasaun atu ita bele hametin ita nia seguransa nasional atu bele fó kontinuadade ba dezenvolvimentu ne’ebe maka ita hakarak, atu alkansa iha Planu Estratéjiku 2030 ne’e rasik”, informa Ministeriu Interior ne’e.

Membru Governu foun ne’e subliña tan katak ba kestaun sira seluk, hafoin maka ita buka solusaun maibé promote katak iha loron 120 ami sei rezolve problema balun ne’ebe maka presiza rezolve hanesan ohin fó hatene, atu ita bele hala’o servisu ne’e ho diak liu tan. Ita hare’e oinsa bele moderniza ekipamentus no infrastrutura ba PNTL, halo reforma ida ne’ebe diak ba iha sétor seguransa ne’e rasik atu bele hala’o servisu ho diak.

“Iha loron 120 nia laran ami mós sei re-define fila fali kestaun ameasa ba iha países ida ne’e, ameasa ba rai ida ne’e saida, uluk ita hetan tiha ona, re-define ho evoluasaun tempu ne’e atu ita hare’e katak ameasa ne’e ida ne’ebe lolos, atu ita bele dezenvolve setór seguransa atu bele responde ba ameasa sira ne’ebe maka iha, tanba ne’e hau hamutuk ho Sekretariu Estadu Protesaun Sivil foun iha ne’e hamutuk ho instituisaun seguransa tomak atu hare’e kestaun sira ne’e hotu, ita mós prepara Planu Estratéjiku ida atu iha tinan lima ne’e saida maka ita presiza halo”, hakotu membru governu ne’e.

Vise Ministru Interior Sesante Rokomenda ba Ministru Interior Foun Atu Mellora Kondisaun Servisu Fatin

Vise Ministru Interior sesante António Armindo rekomenda ba governu foun atu kontinua mellora infrastrutura ba eskuadra no Komandu PNTL munisipiu sira to’o nasional. Rekomendasaun hirak ne’e hato’o wainhira entrega Relatoriu servisu Vise Ministru Interior sesante ba Ministru Interior foun iha Nono governu Konstitusional.

“Aprezenta mós ba Ministru Interior foun katak iha deseñu foun ne’ebe Pototrait/hanesan deit aplika ba eskuadra hotu iha Timor laran tomak deseñu hanesan eskuadra Dom Aleixo ninian, depois sira nia rekrutamentu ba polísia ne’e sai mós hanesan rekomendasaun ba Ministru foun”, tenik Vise Ministru Interior sesante ne’e.

António Armindo salienta tan katak rekomendasaun seluk ne’ebe maka aprezenta kona-ba Parseiru Internasional sira, atu kontinua nafatin ho ita nia parseiru internasional sira ne’ebe maka servisu hamutuk ho Ministeriu Interior, PNTL, Protesaun Sivil ho Servisu Migrasaun hotu-hotu kontinua nafatin. Aprezenta mós ba Ministru Interior foun katak iha parseiru balun maka sei apoiu nafatin UPM ho Ró no Karreta.

“Rekomendasaun lubuk ida, balun sensitivu ami labele koalia hamutuk ho Diresaun sira seluk iha enkontru maibé ami briefing ona Ministru Interior foun no Sekretariu Estadu Protesaun Sivil foun oinsa bele kontinua, rekomendasaun lubun bazeia ba realidade ne’ebe ita hasoru durante tinan 3 iha ita nia mandatu”, hakotu António Armindo.

Komandante Jerál PNTL Komisariu Jerál Henrique da Costa no Segundu Komandante Jerál PNTL Komisaru Polísia Pedro Belo hola parte mós iha serimonia entrega Relatoriu Servisu husi Vise Ministru Interior sesante iha Oitavu Governu Konstitusional ho Sekretariu Estadu Protesaun Sivil sesante ba Ministru Interior foun Nono governu Konstitusional Franscisco Guterres no Sekretariu Estadu Protesaun Sivil Mariano Reis.

Media PNTL.