News

Dili, 07 novembru 2022 – Hafoin ba halot mate isin Clementino Borges iha Suku Dare, Postu-Administrativu Vera-Cruz, Munisípiu Dili, joven barak fila ho konvoi mai Dili mosu kedas konfrontu tuda malu entre joven iha area Nahaek no Balide rezulta uma barak hetan estragus.

Polísia konsidera asaun tuda-malu entre grupu joven ne’ebé akontese iha loron domingu (06/11/22) tuku 4 loro kraik ne’e afeta situasaun seguransa no movimentu transporte publiku tanba ne’e Komandu PNTL Munisipiu Dili husu apoiu koloka membru PNTL, BOP, COE no Polisia Militar ba area refere hodi hakalma situasaun nune’e labele kontinua tuda malu.

Iha akontesementu ne’e Eskuadra PNTL Vera-Cruz tiru gas lakrimozoniu ho lian makas hakilar atu jovem sira para asaun brutal maibe sira kontinua tuda malu nuneé ekipa konjunta Servisu Informasaun Polísia Nasionál (SIPN-PNTL), hamutuk ho Servisu Informasaun Militár (SIM-F-FDTL), junta ho J2, Unidade Informasaun Falintil, S2, sente triste haree joven agora la hadomi malu tanba tuda malu iha dalan publiku inklui halo trauma ba labarik kik, feto no inan faluk sira hela iha Estrada ninin nune’e foti inisiativa tiru hodi hakalma situasaun.

Hosi asaun brutal hirak ne’e fo lisaun mai ita katak Nasaun Timor-Leste ukun an ona liu dékada rua, hamriik hanesan Estadu de direitu Demokrátiku. Progresu oi-oin akontese hodi halo mudansa ba povu timor-oan sira hotu. Politikamente Timor-Leste iha korajem hodi konfia ba susesu luta Libertasaun Nasional iha ne’ebé Joventude barak mak fo kontribuisaun ba luta libertasaun ida ne’e ba interese ida deit atu hetan “ukun rasik an maibe ohin loron balu lakon ona nia sentidu.

Sentidu ukun rasik an, lori signifikadu boot ba povu Timor-Leste, iha ne’ebé Povu Timor oan sira ‘hakore an’ livre hosi okupasaun no luta ba libertasaun nasional Joventude wa’in sai vítima. Tanba deit hakarak ukun rasik an no moris iha liberdade tuir valor demokrasia. Maske nune’e Joventude barak sei nafatin iha ispíritu nasionalizmu no patriotizmu forte ba luta ukun rasik an.

Media Serviços Relações Públicas

Dili, Komandu Polísia Nasional Timor-Leste (PNTL) durante loron Finadu hahu’u husi loron 29 fulan Outubru to’o loron 03 fulan Novembru tinan ne’e, rezista kazu asidente hamutuk neen ne’ebe maka akontese iha terioriu Timor laran tomak.

Porta Voz Komandu PNTL Superintendente Xefe Arnaldo de Araújo liu husi Konferensia Imprensa sexta-feira (04/11) ne’e hateten maske akontese asidente no insidente balun maibé situasaun seguransa en jerál iha teritoriu laran lao diak no hakmatek.

“Durante finadu ema na’in neen maka mate tanba asidente maka hanesan iha loron 29 fulan Outubru ema ida mate no ida hetan kanek tanba hetan asidente iha munisipiu Manatuto wainhira sai husi uma mai Estrada, no iha loron 30 fulan Outubru ema ida mate iha munisipiu Baucau iha ne’ebe kamioneta ida halai kontra diresaun/lalos ba soke motor ida hodi halai liu tan ba soke motor ida iha ne’ebe vitima tur hela motor leten hodi rezulta ema ne’e mate”, haktuir Porta Voz Komandu PNTL ne’e.

Superintendente Xefe ne’e akresenta tan katak iha loron 31 fulan Outubru no loron 02 fulan Novembru akontese kareta ida soke motor, rezulta ema ida mate. Nune’e ema hamutuk na’in neen maka mate durante loron finadu.

Kazu Asaltu Malu Iha Fatunaba

“Ita hotu hatene katak asaltu malu ne’ebe akontese iha Fatunaba, iha loron kinta-feira (03/11) madrugada, parte NOC simu informasaun husi Komandante PNTL munisipiu Dili katak akontese problema asaltu malu entre grupu rua hanesan grupu arte marsiais no grupu arte rituias, ne’ebe maka rezulta ema ida mate”, hatutan Superintendente Xefe ne’e.

Porta Voz Komandu PNTL ne’e esplika kronologia husi akontesimentu ne’e maka grupu rua tuda malu (77 ho PSHT) iha kalan nia laran no vitima tuir informasaun ne’ebe iha katak nia ba hamrik fali lampra nia okos hafoin grupu husi parte sorin tuda kona nia hafoin vitima monu ba rai, iha momentu ne’eba kedas familia transporta vitima ba Hospital Nasional Guido Valadares maibé la konsege salva no vitima mate tiha ona iha fatin akontesimentu.

“Oras ne’e dadaun PNTL liu husi Servisu Investigasaun Kriminal Nasional (SIKN) halo ona investigasaun ba suspeitu hamutuk na’in 27 inklui feto ida no ema hirak ne’e detein hela iha sela detensaun Komandu PNTL munisipiu Dili, tuir planu aban (05/11) suspeitu hirak ne’e sei submete ba primeiru interogatoriu; iha atuasaun ne’e ekipa konjuntu kompostu husi SIKN, Servisu Informasaun Polísia (SIP) Komandu PNTL munisipiu Dili, SNI, BOP fó apoiu tomak hodi asegura situasaun ida ne’e, no oras ne’e dadaun situasaun iha fatin akontesimentu lao normal no kontroladu tanba ekipa PNTL nafatin asegura hodi evita problema ne’e ninia kontinuasaun”, haktuir Porta Voz Komandu PNTL ne’e.

Vitima husi akontesimentu ne’e ho ninia identidade Clementihno Broges husi grupu PSHT ho idade tinan 25, hela fatin iha Fatunaba.

Media PNTL.

Dili, Governu Xina liu husi ninia embaixada iha Timor-Leste sexta-feira (28/10) ne’e kontinua apoiu ekipamentus servisu nian ba Komandu Polísia Nasional Timor-leste (PNTL) hodi hala’o kna’ar iha terenu.

Komandante Jerál PNTL Komisariu Polísia Faustino da Costa iha ninia intervensaun ba serimonia ne’e hateten PNTL nu’udar institusaun Estadu nian hodi hala’o no implementa Lei no orden no mós tau matan ba Paz iha rai doben Timor-Leste.

“Atu kontinua dezenvolve no kapasita hodi atinzi ninia mehi no misaun instituisaun PNTL nian ninia ema sira maka hahu’u no durante tempu ida ne’e, instituisaun PNTL buka makanizmu oinsa atu bele iha kria kondisaun, ida seluk maka transmite/transforma koñesimentu no abilidade ba membru sira liu-liu dirige sira ba misaun PNTL nian”, tenik Komandante Jerál PNTL ne’e.

Komisariu Polísia ne’e haktuir tan katak ohin ita hotu hamtuk iha fatin ida ne’e hodi simu sasan husi embaixada Xina nia iha Timor-Leste mai iha PNTL, sasan hirak ne’e maka hanesan Boña hamutuk 2000, Biti Kombate hamutuk 1000, Kastete/Stick hamutuk 1000 no Solar Panel hamutuk 100.

“Sasan hirak ne’e nesesita duni ba instituisaun PNTL ninian tanba ita hotu hatene katak dala-wain, ekipamentus básiku sira ne’e difikulta no afeta/implika ba profesionalizmu polisial ninian iha atendimentu iha baze”, hatutan Komisariu Polísia ne’e.

Autoridade másimu instituisaun Seguransa ne’e afirma tan katak ekipamentus hirak ne’e sei distribui ba iha Komandu munisipiu, eskudra no postu sira iha fronteira. Entretantu, Solar Panel rasik sei distribui ba iha postu Unidade Fronteira ne’ebe maka iha ona maibé ladauk iha eletrisidade. Antes ne’e, iha tinan 2019, PNTL mós hetan ona apoiu husi nasaun Xina liu husi ninia embaixada hanesan Uniforme ba Servisu hamutuk 4500 pares no Kapa Udan nian hamutuk 4500.

Iha fatin hanesan Embaixador Xina iha Timor-Leste Dr.Xiao Jiangou iha ninia diskursu hateten nia parte sente haksolok tanba bele hola parte iha serimonia distribuisaun ekipamentu hirak ne’e ba PNTL. Tuir nia nasaun Xina iha vontade ne’ebe diak atu kontinua kapasita membru PNTL iha futuru.

“Ekipamentu hirak ne’ebe maka ohin ami oferese ba PNTL ho ninia kustu osan dolar rihun walu, ne’ebe mai husi Polísia Xina ba Polísia Timor-Leste nian hodi bele hala’o sira nia kna’ar ho diak, ami espera apoiu hirak ne’e bele ona ajuda PNTL nia servisu”, haktuir Embaixador Xina iha Timor-Leste ne’e.

Dr.Xiao Jiangou akresenta tan katak iha futuru governu Xina sei nafatin kontinua servisu hamutuk ho governu Timor-Leste atu konsolida politika hamutuk hodi benefesia kooperasaun iha area oin-oin hodi hametin diak liu tan lasu amizade nasaun rua ne’e nian.

Hola parte iha serimonia ne’e Komandante Jerál PNTL Komisariu Polísia Faustino da Costa, Segundu Komandante Jerál PNTL Komisariu Polísia Mateus Fernandes, Embaixador Xina iha Timor-Leste Dr.Xiao Jiangou, Vise Ministru Interior ninia reprezentante, Komandante Unidade, Xefe Departamentu, Xefe Servisu inklui funsionariu sira iha Kuartél Jerál nian.

Media PNTL.           

Dili, 27 outubru 2022 (SRP) – Membru kompañia Korpu Seguransa Pesoál (sigla portuges;CSP) nain 28 ohin simu boña hodi sai familia bot Unidade Espesiál Polísia (UEP) hafoin partisipa kursu báziku eskoltu hodi hasae kuñesmentu no abilidade hodi hala’o servisu operasionál iha terrenu ho profesionál no proporsionál tuir prosedimentu ne’ebé iha oinsá fó protesaun ba alta entidade sira.

Komandante UEP, Supertintendente Xefi Polísia, Orlando Gomes, hateten objetivu hosi treinamentu ne’e hodi fo asisntesia seguransa ba alta identidade sira wainhira hasoru situasaun krusial ruma.

“Ohin imi konklui ona treinamentu fiziku ho Marça corrida ba etapa dahat nian durante fulan ida ne’ebe hahu kedas hosi teknika patrullamentu apeadas ka Lao Ain, monta ekipamentu espingardan (shotgun), tiru presijaun no reaksaun kona armas tanba imi sei sai hanesan autór prinsipál atu fó protesaun ka evakuasaun ba alta entidade sira nune’e presija trenu tékniku ba seguransa pesoál ninian”, esplika Orlando Gomes, hafoin akompaña kursu Eskoltadu iha Kuartel UEP Bairo-Pite Dili, kinta ne’e (27/10/2022).

Tuir nia, treinamentu ida-ne’e importante tebes liu-liu ba membru CSP sira atu iha koñesementu no abilidade diak atu ezerse funsaun seguransa nian, tanba membru tomak iha responsabilidade ba ida-idak nia funsaun mesmu sira hetan ona formasaun téknika no tátiku presija mós abilidade fizika no psikolójiku iha formasaun auto defeza.

“Atu dehan mos katak, formadór sira ne’ebé sai instrutur ba kursu ne’e timor oan sira husi membru UEP no CSP rasik no ita hetan apoiu orsamentu hosi TLPDP liu hosi kooperasaun Ministeriu Interior no Komandu Jeral PNTL atribui mai UEP hodi realiza kursu ba membru hirak ne’ebé maka mai husi Kontijente Jerál, BOP, COE no Pelotaun Apoiu Servisu hodi hasa’e tan tán kuñesementu kona-ba tékniku no táktiku Seguransa Pesoál nian”, Orlando Akresenta.

Lider Polísia Espesiál ne’e salienta, persija aumenta nafatin kapasidade no skill iha situasaun balu ne’ebé maka mosu nune’e membru CSP sira preparadu ona para halo atuasaun no la dúvida atu lori VIP sira ba fatin ne’ebé maka seguru.

Iha okajiuan ne’e, Komandante UEP hamutuk ho Komandante BOP, Superintendente Asistente Silveiro de Araujo, bolu membru nain rua hosi total 28 inklui feto ida, simbolikamente hodi taka boña enkuantu restante ne’e Segundu Komandante UEP, Superintendente Damião Correia, Komandante CSP, Inspetor Xefi Marcos Soares Lopes, hamutuk ho instructor sira maka taka boña ba membru sira seluk. Media Servico Relacoes Publicas MI

Dili- Ekipa Fiskalizasaun Konjunta (EFK) ba viaturas estadu aviza ba Funsionariu Publiku(FP) sira atu utiliza Viaturas Estadu (kareta no motor) ho responsabilidade tuir nesesidade servisu wainhira hetan karta autorizasaun husi Superior.

Objetivu husi kontrolu ba movimentu viaturas estadu ne’ebe maka EFK sei halo maka atu kontinua halo melloramentu ida liu-liu oinsa ita bele iha efisiensia no efetividade ba utilijasaun rekursu estadu nian no iha tempu hanesan bele kontribui ba redusaun despeza estadu nian.

Tuir Politika Governu Konstitusional da-VIII oinsa ita bele halo efisiensia no efetividade iha despeza liu-liu oinsa it abele promove poupansa ida ne’ebe signifikante ba despeza estadu nian liu-liu iha utilijasaun veiukulu estadu nian maka ekipa fiskalizasaun Konjuntu ne’ebe estabelese tia ona iha kompetensia atu bele halo servisu ceck pont kontrolu ba movimentu viaturas estadu husi nivel nasional to’o munisipiu inklui mos postu administrative sira.

EFK kompostu husi Pontu Fokal PNTL Pontu Fokal KAK, Pontu Fokal Komisaun Funsaun Publika, Diresaun Jeral Patrimoniu Estadu, no Diresaun nasional Transporte Terestre le komunikadu emprensa Bazeia ba Dekretu lei Nu. 21/2021 de 10 novembru kria subsidiu mensal de transporte, Resolusaun Governu numeru 130/2021 kona ba jestaun no Realokasaun veiukulus estadu no Padraun Prosedimentu Operasional (PPO) kona ba realokasaun no utilijasaun Veikulus Estadu Pool iha Ministeriu, Instituisaun Estadu, Servisu Fundu Autonoma no Pool Nasional, hato’o asuntu ne’e ba jornalista sira liu husi komferensia emprensa iha Kuartel Jeral PNTL Kaikoli Dili, kinta (27/10)

Ekipa Fiskalizasaun hakarak aviza ba Responsavel Lojistika no Patrimoniu iha Ministeriu, Instituisaun Estadu, Servisu Fundu Autonoma, Autoridade no Administrasaun Munisipal hotu atu:

1. Halo kontrolu maximu ba utilijasaun viaturas estadu iha loron feriadu Matebian/Finadu iha 31 outubru to’o 3 novembru 2022 no autoriza deit ba sira ne’ebe halo atividade ba fins profisionais (servisu) ho karta autorizasaun husi Superior.
2. Refere ba pontu nu.1 iha leten la aplika ba sira ne’ebe autorizadu ona ho lei no dekretu lei hodi uza regularmente viatura estadu.
3. Husu ba responsavel lojistika no patrimoniu sira atu fo hatene ba utilijador balun ne’ebe la kumpri halo favor inform aba EFK atu halo intervensaun imediata.
4. EFK sei halo monitorizasaun ba utilizasaun kareta estadu durante loron bootFinadu liu husi halo vizita ba Ministeriu, check point no sweeping.
5. EFK halo ona kordenasaun ho PNTL (Diresaun Tranzitu Nasional no munisipiu) hodi halo check point ba movimentu viaturas estadu nian iha nivel munisipiuno postu administrativu sira hodi identifika utilizador viaturas estadu ne’ebe la kumpri avizu ne’e hodi bele prosede ba prosesu sira;
6. Ba utilizador viaturas estadu (kareta no motorizada estadu) ne’ebe mak la kumpri avizu ne’ebe mak fo sai ona, sei hetan responsabilidade Adminitrativa, Disiplinar no criminal.
7. Husu ba publiku atu halo mos kontrolu ba utilizasaun viaturas estadu durante loron finadu, liu husi hasai fotografia no video hodi lansa iha media social no mos facebook CAC ou WA EFK nian 7730 4448, 7799 1550, no 7723 0182 hodi bele prosesa.
8. Sei fo autorizasaun deit hodi halo movimentu ba viaturas instituisaun hanesan: PNTL, F-FDTL, Servisu Saude, bombeiros, Servisu karantina, Alfandega, Ambulancia no hirak ne’ebe iha autorizasaun hodi halao servisu professional ka fo asistensia ba dezastre naturais.

Wainhira la kumpri regras hirak ne’ebe maka aplika maka PNTL Diresaun Nasional Tranzitu Seguransa Rodoviariu sei prende no ekipa EFK sei halo prosesu tuir kompetensia ne’ebe maka atribui ba sira.

Ekipa Fiskalizasaun Konjunta (EFK) kompostu husi pontu Fokal PNTL Inspetur Xefe Polisia Inocêncio da Costa M.Freitas, Pontu Fokal CAC Dr. Euclides Vidal Madeira,  Pontu Fokal KFP Belizario Rafael Pereira,  Pontu Fokal Ministeriu da Finansas Cipriano R. Pereira  no Pontu Fokal MTC Americo Alves Ribeiro. Media PNTL

Dili, Komandu Polísia Nasional Timor-Leste (PNTL) kuarta-feira (26/10) ne’e realiza Enkontru Konsellu Superior Extraordinariu ida hodi koalia asuntu balun liu-liu kona-ba situasaun dezenvolvimentu institusional nune’e mós ho ninia prespetiva ba iha Estatuto PNTL nian.

Inspetúr Jerál PNTL Superintendente Xefe Carlos Jerónimo ba jornalista sira hateten asuntu seluk ne’ebe koalia iha enkontru ne’e maka kazu prosesu disiplinar rua ne’ebe maka ohin ami konsege halo diskusaun.

“Kazu prosesu disiplinar rua ne’e maka sira ne’ebe maka falta servisu atu tama ba iha prosesu disiplinar nian liu-liu kona-ba prosesu demisaun”, esplika Inspetúr Jerál PNTL ne’e.

Superintendente Xefe ne’e akresenta tan katak na’in rua ne’ebe maka tama ba iha prosesu disiplinar nian liu-liu kona-ba prosesu demisaun, só na’in ida maka tama ba kategoria demisaun no ida seluk iha diskusaun tanba iha faktus balun nune’e sai deit pendente, na’in rua ne’e ho deviza nu’udar agente no agente xefe. Membru na’in rua refere falta servisu liu ona normalidade hanesan falta to’o loron 120, entaun ida ne’e liu ona normal, no ohin aprezenta kazu ne’e mai no ami halo diskusaun.

“Iha diskusaun ne’e rasik, ida mak liu ba iha prosesu demisaun no ida seluk maka sei pendente; antes tama ba iha prosesu demisaun, normalmente sei liu husi prosesu disiplinar iha ne’ebe departamentu justisa halo hafoin maka aprezenta ba iha Konsellu Superior no Konsellu Superior aprezenta ba membru sira Konsellu nian, hafoin sei hare’e, tetu ida ne’ebe maka serve atu ba demisaun, balun hare’e ba faktu seidauk kompletu no sei aprovunda tan kazu ne’e”, esplika Superintendente Xefe ne’e.

Inspetúr Jerál PNTL akresenta tan katak hafoin prosesu hirak ne’e hotu, Komandu sei halo proposta hodi aprezenta ba Ministeriu Interior hafoin maka Ministeriu foti dezisaun. Membru na’in rua refere ida servisu iha Komandu Jerál no ida seluk iha Komandu munisipiu.

“Kona-ba membru na’in 9 ne’ebe oras ne’e dadaun hetan suspensaun ba kazu sela detensaun Komandu munisipiu Dili, ninia prosesu disiplinar sei hala’o hela seidauk aprezenta hodi foti dezisaun, kona-ba atu hetan demisaun ka lae ita labele mehi buat ida, presiza faktus no apuramentu oinsa maka sei hare’e, analiza didiak hafoin karik prosesu krime nian aprezenta ona ba Ministeriu Públiku (MP) ne’e prosesu ida, prosesu disiplinar lao nafatin tuir ninia regras”, haktuir Inspetúr Jerál PNTL ne’e.

Superintendente Xefe ne’e esplika liu tan katak kona-ba prazu loron 70 ba kazu refere ne’e asuntu ketak ida, ne’e hanesan fó suspensaun ba nia hodi submete ba prosesu, maibé ida seidauk dezisaun final.

Hola parte iha enkontru ne’e Vise Ministru Interior António Armindo, Komandante Jerál PNTL Komisariu Polísia Faustino da Costa, Segundu Komandante Jerál Komisariu Polísia Mateus Fernandes, Inspetúr Jerál no membru Konsellu Superior nian.

Media PNTL.  

Dili, Komandu Polísia Nasional Timor-Leste (PNTL) kontinua halo kapasitasaun ba ninia membru sira hodi frekuenta Kursu oin-oin iha estrangeiru.  Kursu hirak ne’e frekuenta husi ofisias to’o ba membru PNTL sira.

Porta Voz Komandu PNTL Superintendente Xefe Arnaldo de Araújo liu husi Konferensia Imprensa kuarta-feira (26/10) ne’e hateten situasaun seguransa en jerál iha teritoriu nasional laran lao diak no hakmatek mezmu akontese asidente no insidente balun maibé la afeta ba situasaun jerál.

“Agora dadaun PNTL halo hela kapasitasaun ba nia membrus balun ne’ebe maka oras ne’e dadaun ba tuir kursu iha rai liur hanesan membrus na’in 4 tuir kursu Akademika iha Portugal, membru na’in ida tuir kursu Seniotekniku/Asu, Kursu CPOS membru na’in ida durante fulan ne’en no kursu Anti Terorizmu iha Tailandia ba membru UEP na’in tolu”, esplika Porta Voz Komandu PNTL ne’e.

Superintendente Xefe ne’e salienta tan katak iha mós Ofisias Superior na’in hat ne’ebe maka oras ne’e dadaun frekuenta hela Kursu Defence Strategic Studies Course (DSSC) iha Australia durante tinan ida no iha fulan oin sei iha tan Ofisias Superior na’in rua maka sei ba tuir Kursu iha Indonesia kona-ba CESPIM.

Notifikasaun ba Jornal Independente, Komandu PNTL”Laos Kriminaliza Maibé Atu Mai Fó Informasaun”

Relasiona ho karta notifikasaun ne’ebe maka PNTL hasai liu husi Servisu Investigasaun Kriminal Nasional (SIKN) ba Jornal Independente, Komandu PNTL nia intensaun katak laos atu Kriminaliza maibé notifika hodi mai fó informasaun relasiona ho notisia ne’ebe maka Jornal Independente públika.

Superintendente Xefe Arnaldo de Araújo esplika, iha loron 25 fulan ne’e, Komandante Jerál PNTL Komisariu Polísia Faustino da Costa hasoru malu ona ho jornalista husi Jornal Independente hateten katak notifikasaun ne’e hanesan bain-bain, atu mai fó klarifikasaun kona-ba publikasaun ne’ebe maka jornal refere públika ona.

“Notifikasaun ne’e halo basea ba orientasaun husi Segundu Komandante Jerál Komisariu Polísia Mateus Fernandes em subtituisaun ba iha Xefe SIKN, iha momentu ne’ebe maka Komandante Jerál halo hela ninia viagem servisu ba Portugal”, salienta Porta Voz Komandu PNTL ne’e.

Iha biban konferensia imprensa ne’e, Porta Voz Komandu PNTL apela ba sidadaun hotu ne’ebe mak sei halo viagem ba munisipiu relasiona ho loron bo’ot finadu nian. Husu atu komunidade sira ne’ebe movimentu ba munisipiu karik lao ho diak, ita hatene katak oras ne’e tama ona iha tempu udan tanba ne’e husu atu idak-idak kuidadu ninia ann wainhira lao viagem.

“Husu mós atu hare’e didiak uluk kondisaun transporte hanesan motor no kareta nian molok halo viagem no husu atu labele tula pasageiru liu kapasidade transporte nian tanba bele provoka mosu asidnete”, haktuir Superintendente Xefe ne’e.

Media PNTL.    

24, outubru 2022– PNTL (Polisia Nasional Timor-Leste), liu hosi Servisu Sekreta SIPN, junta ho SNI, N2, S2, Makikit, iha loron domingu kalan ne’e kaptura ona jovem nain-3 ne’ebe envolve iha konfrontasaun tuda malu entre Bidau Akadiruhun no Bidau Tahu Laran iha Suku Akadiruhun, Postu Administrativu Nain-Feto, Munisipiu Dili.

Informasaun ne’ebe ekipa servisu sekreta rekolla katak konfrontu ne’e hahu hosi joven sira bolu malu iha oras tuku 6 lorokraik hodi halibur hamutuk hemu tua iha Largo Lecidere, nune’e iha oras tuku 8 kalan sira lao grupu lori sasan kroat halo provokasaun ba malu hodi hakilar no temi “milisia” no kontinua kedas tuda malu iha estrada publiku.

Antes ne’e iha loron rua ba kotuk, ekipa servisu sekreta ba ona iha terenu hasoru vitima hodi hetan informasaun kona-ba autor sira, maibe autoridade lokal no komunidade sira rasik la kunese tanba maioria joven sira ne’e mesak oin foun deit.

Hafoin rona informasaun hirak ne’e ekipa servisu sekreta forsa rua nian kompostu hosi SIPN, SNI, N2, S2, Makikit hetan akompanamentu seguransa hosi Polisia Militar, BOP no Forsa Rezerva, lao tama sai Bairu laran hodi kaptura suspeitu sira ne’ebe familia subar halo mos aprensaun ba sasan kroat hanesan katana, tudik, vizka no rama oan hodi lansa ne’ebe kategoria kontra lei numeru 5/2017, pratika arma branca.

Entretantu joven nain-3 ne’ebe ekipa konjunta kaptura maka hanesan ASM tinan 30, hela iha Kintal Bot, Suku Santa Cruz, nudar traballador iha kompanhia produsaun Cafe. SPF tinan 26, hela fatin Aldeia Bedik, Suku Bidau Akadiruhun nudar estudante akademiku no ikus liu suspeitu DM tinan 30, hela iha Aldeia 01 Bedik, Suku Akadiruhun, nudar motorista iha embaixada akreditadu ida iha Timor-Leste.

Suspeitu nain-3 hamutuk ho evidenisa hirak ne’e ekipa konjunta etrega ona ba Eskuadra PNTL Nain-Feto, hodi kontinua halo prosesu. Media Serviços Relações Públicas

Dili-Pontu Fokal Jeneru kompleta formasaun konaba igualdade jeneru hodi bele hasae sira nia konyesementu konaba feto paz no seguransa, Asediu Sexual.

Komandante Jeral PNTL Komisariu Polisia Faustino da Costa iha enseramentu ne’e ejiji ba partisipante sira atu servisu makaas hodi promove igualdade jeneru no partisipasaun feto iha instituisaun PNTL, Nia hato’o asuntu ne’e iha CFP Komoro Dili, sexta (21/10).

Nia hatutan hare imi planu atividade ba oin bazeia ba situasaun real no tau iha pratika materia ne’ebe maka Imi simu husi formador sira hodi inplementa iha terenu, hatudu rejultadu treinamentu ne’e liu husi pratika iha servisu fatin ho komitmentu no responsabilidade nune’e bele konvense komandante sira nomos halo planu atividade hodi foku ba asuntu interna iha instituisaun PNTL no akompaña mos situasaun externa iha komunidade.

“Parabens ba ita boot sira, Hau hein asaun no rezultadu. Fiar katak imi hamutuk ho Hau hodi halo mudansa ba instituisaun PNTL no Republika Demokratika Timor-Leste (RDTL),” dehan Komisariu.

Iha biban ne’e komandante Jeral lori ekipa tomak hato’o agradese ba komandante TLPDP Superintendent Daren Booy nomos formador sira husi TLPDP no Justisa Sosial (JUS).

Serimonia enseramentu ne’e kompleta ho entrega sertifikadu no no emplema ba formadu sira.

Marka prejensa iha enseramentu ne’e Komandante TLPDP, Xefe Gabinete Jender Inspetur Xefe Polisia Maria Fatima Martins, Formador no no pontu forkal Jeneru husi Komandu PNTL munisipiu 14, Unidade no Servisu Migrasaun. Media PNTL

Lisboa, Komandante Jerál Polísia Nasional Timor-Leste (PNTL) Komisariu Polísia Faustino da Costa iha loron 9 fulan Outubru tinan 2022 hala’o vizita traballu ba iha nasaun Portugal hodi dezenvolve relasaun amizade no mós Kooperasaun Bilateral ho Guarda Nacional Repúblicana (GNR).

Hafoin partisipa misa konjuntu entre Komandu F-FDTL no PNTL iha Katedral Kinta-feira(20/10) ne’e ba jornalista sira, Komisariu Polísia Faustino da Costa hateten viagem ne’e hala’o tanba hetan konvite husi Portugal ho objetivu rua, primeiru maka atende konvite ne’ebe mai husi Portugal hafoin Primeiru Ministru autoriza.

“Segundu maka atu aproveita mós situasaun ida ne’ebe ita hotu hatene katak ita nia Timor oan barak maka iha ne’eba (Portugal), tan ne’e hau koalia barak liu kona-ba ida ne’e atu dehan oras ne’e hau nia gabinete prepara hela relatoriu atu haruka ba Primeiru Ministru (PM) hanesan mós Ministru Interior (MI); atu dehan deit katak kuaze fulan tolu ikus Timor oan ne’ebe tama iha Portugal ne’e ema rihun lima resin no situasaun sira ne’ebe dala-ruma ita dehan ita nia maluk sira toba iha jardim, iha fatin públiku, ida ne’e akontese duni no hau hare’e, hasoru duni maluk sira ne’e”, esplika Komisariu Polísia ne’e.

Komandante Jerál PNTL ne’e afirma tan katak governu Português no Embaixada Timor-Leste iha Portugal, sira halo esforsu lubuk ida buka oinsa atu identifika ita nia Timor oan hotu iha ne’eba (Portugal) hafoin komesa solusiona problema balun. Lori sira balun sai husi jardim ba fatin ne’ebe iha kondisaun atu sira bele deskansa, maske kondisaun laos atu responde totalmente. Balun buka identifika ona emprezariu sira iha ne’eba atu haruka sira servisu, kuaze ema atus hat maka halo ona ida ne’e.

“Maibé hanesan Timor oan hakarak atu dehan, ita tantu iha ita nia rai ka ema nia rai, buat ida importante maka disiplina halo tuir Regras/Lei ne’ebe iha, tanba hau hafoin hasoru ita nia embaixadora ho nia estrutura tomak tantu mós ekipa husi Portugal ninian, situasaun rua ne’ebe maka tuir lolos labele akontese/mosu; primeiru maka sira ne’ebe toba iha jardim laran to’o moras, embaixada ho governu Português buka solusaun fasilita lori ba hospital atu halo tratamentu, wainhira to’o iha hospital médiku sira haruka baixa, kalan nia halai lakon tiha aban nia mosu fila fali toba iha jardim, ne’e buat ida ne’ebe lolos labele akontese”, esplika Komandante Jerál PNTL ne’e.

Autoridade másimu instituisaun seguransa ne’e salienta tan katak kestaun segundu maka sira lubun ne’ebe governu fó ona servisu, haruka servisu ba kompañia sira ho kada oras ida Euro Hat, hafoin servisu tiha oras balun komesa dehan ida ne’e laos ami nia servisu, servisu ne’e la merese ba ami tan ne’e ami tenke sai; entaun situasaun hirak ne’e hau hanoin dehan ita nia embaixada tantu governu Português esforsu oinsa atu identifika; iha autoridade ida iha ne’eba dehan Portugal nunka hanoin atu halo att ba Timor oan sira tanba Portugal nunka rekoñese wainhira Indonesia mai okupa Timor-Leste. Sira nafatin dehan katak Timor sei hola parte Portugal ninian administrasaun, só sira foin rekoñese lolos wainhira ita restaura ita nia independensia iha 20 Maiu.

Iha biban vizita traballu ne’e, Komisariu Polísia Faustino da Costa simu Medalha de D.Nuno Alvares Pereira, Mérito da Guarda Nacional Repúblicana Primeira Classe.

Media PNTL.