News

Dili-Komandu Polisia Nasional Timor-Leste (PNTL) fo posse ba Komandante PNTL munisipiu Atauro, Komandante UPM, Xefe Departamentu Tranzitu, Segundu Komandante munisipiu Ermera, Covalima, no Atauro hodi konkretija no inplementa estratejia dezenvolvimentu ba estadu no nasaun.

Nomeasaun neé halao bazeia ba Despasu Nu.242/CG-PNTL/VI/2022 hodi nomeia Superintendente Eugenio Perreira hodi assume kargu nudar Komandante Unidade Polisia Maritima (UPM) hodi subtitui Inspetur Xefe João Cesar da Silva.

Despasu Nu.243/CG-PNTL/VI/2022 hodi nomeia Supernitendente Assistente Eduardo Campos ba kargu nudar Komandante munisipiu espesial Atauro.

Despasu Nu.244 /CG-PNTL/VI/2022 hodi nomeia Superintendente Assistente Albino Mouzinho hodi asumi kargu nudar Xefe Departamentu Tranzitu Seguransa Rodoviariu hodi subtitui Superintendente João Belo Reis.

Despasu Nu.245/CG-PNTL/VI/2022 hodi nomeia superintendente Assistente Inacio Amaral hodi assume kargu nudar Segundu Komandante munisipiu Ermera hodi subtituI Supernitendente Assistente Eduardo Campos.

Despasu Nu.246/CG-PNTL/VI/2022 hodi nomeia Superintendente Assistente Martinho Borges ba kargu Segundu Komandante munisipiu Covalima hodi subtitui Superintendente Assistente Albino Mouzinho.

Despasu Nu 247 /CG-PNTL/VI/2022 hodi nomeia Inspetur Xefe João Cesar da Silva ba kargu Segundu Komandante munisipiu Atauro.

Komandante Jeral PNTL Komisariu Polisia Faustino da Costa hateten ba Komandante nomeadu sira katak PNTL oras neé daudaun sei hasoru dejafiu maibe keta haluha katak dejafiu hirak neé laos atu hamate espiritu ita nian atu halao knaar maibe ida neé sai hanesan referensia ida para oinsa ita bele ultrapasa  dejafiu ida neé ba dalan diak liu maka garante paz no estabilidade ba ita nia povu no rai doben, Nia hatoó asuntu neé iha serimonia tomada de posse neébe halao iha Kuartel Jeral PNTL Kaikoli Dili, sexta (03/06).

Nia hatutan nomeasaun nudar fiar Komandu nian nomos knaar ho responsabilidade inklui esperensia no konyesementu neébe ita boot sira iha maka atu hatutan liman ain Komandu nian iha baze ho misaun ida garante paz no iha knaar fatin buat hotu tenke lao tuir lei, prosedur no interese komun povu no nasaun nian.

“Komandante nomeadu sira iha responsabilidade hodi garante katak lei no ordem tenke lao, inplementa no hatur duni tuir misaun instituisaun PNTL nian,”dehan Komandante Jeral.

Iha tinan 2021 Governu konstitusional da-VIII hamosu lei ida hodi hamosu tan postu administrativu rua(2) mak hanesan Hatulia B iha munisipiu Ermera nomos iha parte Lospalos neébe hamosu postu administrativu foun iha parte Lore.

Alende neé iha Dekretu Lei propriu hodi loke no termina Atauro neébe maka durante neé sai parte ba Zona Ekonomia Espesial Merkadoria no Sosial (ZEEMS)S no partense ba munisipiu kapital Dili sai hanesan munisipiu espesial, inplementasaun ida tama emvigor iha loron 01 janeiru 2021.

Ho nuneé prosesu administrativu nian instituisaun PNTL hahu akompaña nuneé ohin ita hotu hamutuk iha neé katak munisipiu 12 no RAEOA iha mos munisipiu espesial Atauro nuneé PNTL instituisaun ida neébe atu bele inplementa no tau bazeia ba lei neébe maka estadu no governu fo sai ohin ita fo Tomada de posse ba Komandante espesial ba munisipiu espesialho nia Segundu Komandante neébe sei halao knaar hamutuk ho autoridade iha munisipiu espesial ida neé hodi bele asegura katak munisipiu espesial ida neé sei seguru no sei dezenvolve iha ambiente ida neébe paz no  hakamtek

Iha oportunidade neé Komandu PNTL agaradese ba Komandante sesante sira hanesan  Xefe departamentu Seguransa Rodoviariu no Komandante UPM  neébe maka asume kargu foun iha fatin foun, esforsu no sakrifisiu hirak neébe maka Imi halo durante mandatu Komandu asegura no nota ida neé no husu nafatin imi atu bele kontinua knaar no responsabilidade neébe Komandu atribui ba Ita boot sira. Komandu mos apresia Adjuntu Komandante munisipiu Covalima no Ermera neébe asume mos responsabilidade no knaar foun Komandu apresia tebes no nota esforsu no servisu hirak neébe Ita boot sira halohahu kedas tempu pandemia toó konklui serimonia Restaurasaun Independensia

“Komandu fiar katak servisu hirak neébe imi halo iha fatin foun ho knaar foun ita boot sira sei hamosu  ideias foun oinsa atu dezenvolve instituisaun PNTL liu-liu ba interese oinsa atu asegura povu no rai doben ida neé nuneé dezenvolvimentu bele lao diak liu,” haktuir Komisariu.

Iha okajiaun neé Komandante PNTL munisipiu espesial Atauro Supernitendente Assistente Eduardo Campos hatoó agradese ba Komandante Jeral no Segundu Komandante Jeral ba konfiansa neébe fo mai Hau atu asume kargu Komandante munisipiu Atauro nuneé hau sei halo esforsu hotu atu servisu hamutuk ho membru sira nomos autoridade munisipal sira no komunidade sira oinsa atu garante seguransa paz no estabilidade iha Atauro atu nuneé Atauro bele sai fatin ida seguru atu ema hotu neébe passa sira nia ferias, halo investimentu no atividade hotu iha situasaun neébe hamkatek tuir misaun espesial ida neébe Hau asume

Serimonia solene neé prezidi husi Komandante Jeral PNTL akompaña husi Segundu Komandante Jeral Komisariu Polisia Mateus Fernandes no Inspetur Jeral Superintendente Xefe Polisia Carlos Jeronimo no partisipa husi Estrutura Komandu PNTL, Komandante Unidade, Xefe Seksaun no Xefe Departamentu. Media PNTL

Dili, Komandu Polísia Nasional Timor-Leste (PNTL) sexta-feira neé hala’o serimonia distribuisaun Viatura  hamutuk 29, neébe kompostu husi viatura hamutuk 14 ba Unidade Vulneravel Pesoal Nasional (VPU) no Subseksaun  Vulneravel Pesoal iha munisipiu 13 no viatura hamutuk 15 ba Departamentu Tránzitu Seguransa Rodoviaria (DTSR) no seksaun Tranzitu Seguransa Rodoviaria sira iha munisipiu. Serimonia ida neé konkretiza tanba hetan apoiu husi Membru Parlamentu Nasoinal Komisaun B no kompra ho Orsamentu Geral Estado (OGE) 2022 nian.

Vise Ministru Interior António Armindo iha ninia intervensaun hateten lori Ministru Interior nia naran agradese ba Deputadu sira Parlamentu Nasional neébe apoiu Ministriu Interior (MI) kona-ba sosa kareta/viatura sira neé. MI mai ho konseptu tolu maka hanesan primeiru maka atu hareé Normais Legais sira, balun ita halo revizaun no balun ita halo produsaun foun.

“Segundu maka bem estar membru seguransa sira nian hanesan hasaé sira nia orsamentu ba alimentasaun hahuú kedas iha fulan Janeiru, neé esforsu Ministeriu nian maka neé; terseiru maka Infrastrutura inklui kondisaun servisu ita hareé hahuú kedas husi fronteira, ita konstrui postu hamutuk 25 iha tinan ida deit, ita sei hareé kestaun atu hadia eskuadra sira neébe maka ho kondisaun ladun diak, iha tinan ida neé”, esplika Vise Ministru Interior neé.

Membru governu neé salienta tan katak esforsu seluk neébe maka MI halo além de hareé ba bem estar no infrastrutura maka kona-ba viatura, hanesan iha tinan kotuk distribui ona kareta hamutuk  21, maibé ita hareé ba realidade la toó nafatin, ita propoin liu husi Komisaun sira aumenta tan hamutuk viatura 90.

“Ohin simu 29 deit ba unidade VPU no Tránzitu, neé ita distribui ba Komandu Munisipiu sira mai simu direita tanba ita hakarak sira lori ba liu-liu ema sira neébe iha VPU no departamentu Tránzitu mai simu rasik, maibé laos ida neé deit ita sei iha tan viatura 61 neébe maka sei distribui ba eskuadra hotu iha Timor laran tomak molok fulan Dezembru tinan neé remata”, hatutan Vise MI neé.

Iha fatin hanesan Komandante Jerál PNTL Komisariu Polísia Faustino da Costa iha ninia diskursu hateten PNTL iha tinan hirak ikus neé maske sempre hasoru problema no dezafiu lubuk maibé iha parte seluk Estadu no Governu sempre hareé no tau matan liu-liu iha area sira neébe kritiku no sai nuúdar faktor neébe presiza atu hetan apoiu hodi instituisaun Estadu ida neé bele hala’o nia kna’ar ho atendimentu neébe diak ba komunidade.

“Nuneé hahuú kedas iha tinan 2020 PNTL hetan orsamentu neébe halo hodi kompras viatura ba PNTL ninan, nuneé Komandu hahuú kompra ida neé hodi distribui ba eskuadra sira hotu iha PNTL ninian maka hamutuk viatura operasional 15, nuneé kontinua kedas iha tinan 2021 ho esforsu MI no Vise MI nian PNTL konsege kompra tan viatura hamutuk 21 neébe ikus mai ida neé ita atribui/distribui kedas ba eskuadra sira iha teritoriu nasional”, tenik Komandante Jerál PNTL neé.

Komisariu Polísia afirma tan katak OGE tinan 2022, PNTL liu husi MI aprezenta planu atu sosa viatura hodi kompleta servisu iha terenu, maibé ida neé la konsege pasa iha parte Komisaun Revizaun Orsamentu ninian. Maibé ho fisklazisaun neébe Membru Parlamentu Nasoinal Komisaun B halo iha terenu no hareé katak PNTL presiza duni atu kompra viatura maka iha tinan 2022 neé konsege halo kompras viatura hirak neé.

Hola parte iha serimonia neé maka Vise Ministru Interior, Membru Parlamentu Nasoinal Komisaun B, Presidente Mulher Parlamentares, adjuntu PDHJ, Komandante Jerál, Segundu Komandante Jerál, Inpétur Jerál, Komandante Komandu Operasaun, Administrasaun, Komandante Komandu munisipiu, Unidade, Xefe servisu no departamentu sira iha Kuartél Jerál inklui bainaka seluk.

Media PNTL.     

Dili-Polisia Nasional Timor-Leste (PNTL) liu husi Departamentu Tranzitu Segransa Rodoviariu durante periodu fulan janeiru to’o abril hatama resetas ba kofre estadu hamutuk $189.307.00, montante osan ne’e rekola liu husi   Operasaun Polisia regularija Lei Kodigu Estrada nomos kontrolu movimentu transporte husi nasaun estranjeiru mai teritoriu Timor-Leste.

Porta voz Komandu PNTL Superintendente Xefe Armando Monteiro esplika operasaun Polisia regularija Lei Kodigu Estrada ne’ebe maka bai-bain bolu cek point iha teritoriu timor laran tomak ita hatama resetas hamutuk $154.440.00   no inplementa Lei Nu.28/2017 kontrolu movimentu transporte husi nasaun estranjeiru mai teritoriu Timor-Leste liu husi fronteira Sakato Oecusse no Batugade Bobonaro PNTL kolekta no hatama osan ba kofre estadu hamutuk $34.167.00, Nia hato’o asuntu ne’e liu husi komferensia emprensa iha Kuartel Jeral PNTL Kaikoli Dili, tersa (31/05).

Nia hatutan montante ne’e depende ba movimentu transporte husi nasaun vizinu tama mai teritoriu nasional nomos oinsa intensiva volume operasaun regularija lei iha teritoriu laran tomak.

Alende ne’e operasaun ba kareta estadu iha fim da semana no loron ferias, Operasaun konjuntu entre PNTL liu husi Departamentu Tranzitu Seguransa Rodoviariu hamutuk ho Patrimoniu Estadu, Komisaun Anti Korupsaun (KAK) nomos Diresansaun Nasional Transporte Terrestre (DNTT) kontinua lao nafatin hodi halo cek point ba Kareta Estadu no depende ba movimentu no planu husi ministeriu relevante no PNTL liu husi Ministeriu Interior involve tanba planu ida ne’e planu KAK nian ne’ebe maka PNTL sai nain hodi inplementa. Media PNTL

Dili- Komandu Polisia Nasional Timor-Leste (PNTL) kaptura no investiga ona suspetu nain tolu (3) ba kazu Homesidiu Agravadu iha munisipiu Ermera neébe maka rejulta vitima lakon vida.

Porta Voz Komandu PNTL Superintendente Xefe Armando Monteiro hateten hodi kalan (30/05) tuku: 21:00 iha aldeia Erru suku Ponilala munisipiu Ermera akontese kazu homesidiu agravadu neébe maka rejulta vitima ADJ (23) lakon vida no agora vitima evakua ona mai Ospital Guidu Valadares hodi submete ba prosesu otopsia, Nia hatoó asuntu neé liu husi komferensia emprensa iha Kuartel Jeral PNTL Kaikoli Dili, tersa (31/05).

Nia esplika husi akontesementu ida neé Komandu PNTL munisipiu Ermera halo ona medida Polisial hodi kaptura suspetu nain tolu (3) ho inisial JS (67), ADJ ( 54) no LDC (27) neébe maka sai autor prinsipal ba kazu asaltu no Omesidiu ida neé, suspetu hirak neé kontinua submete ba prosesu investigasaun durante oras 72 nia laran hafoin Komandu PNTL Ermera sei aprejenta ba Tribunal Distrital Dili hodi submete ba Primeiru Interogatoriu.

Kazu neé ho motivu tanba mosu desintendimentu komunikasaun liu husi telefone ho ida neé parte rua la satisfas no la konkorda malu no hasoru malu hodi espresa sira nia emosaun to ikus rejulta vitima lakon nia vida,

Iha biban neé Komandu mos atualija kazu Asaltu malu no Ofensa Integridade Fizika Simples iha kapital Dili, Aitarak Laran neébe akontese iha meia noite tuku 00:54 neébe maka rejulta vitima AT (30) kondisaun grave no sei halo tratamentu iha Ospital Guido Valadares, nuneé Komandu PNTL munisipiu Dili, Eskuadra Dom Aleixo sei halo identifikasaun ba vitima tanba vitima sidauk fo informasaun tanba kondisaun grave.

Ho akontesementu ida neé Komandu PNTL munisipiu Dili liu husi Eskuadra Dom Aleixo hola medidas no kaptura suspetu ho ninia grupu sira hamutuk ema nain 24 agora daudaun submete hela ba prosesu investigasaun.

Xefe Relasaun Publika neé esplika motivu husi kazu neé joventude neébe maka ho dominasaun egoismu iha fatin konsentrasaun  jogu biliard neébe maka hamosu no kria inimigu no hamosu konflitu entre sira neébe maka hela iha bairu neba.

Tuir relatoriu neébe maka komandu PNTL munisipiu Dili relata katak kazu konflitu neé involve grupu organizaasaun Arte Ritual Mat7.

Ida neé maka situasaun inportante neébe maka presija atualija no media bele transmite ba publiku hodi nuneé komunidade bele akompaña no prevene  no kontribui sei iha indikasaun movimentu krime ruma neébe maka lao hela iha ita nia hela fatin no bairu hodi relata ba autoridade no postu Polisia neébe besik nuneé autoridade seguransa bele foti medidas persuasiva no preventiva. Media PNTL

Motain, Komandu Polísia Nasional Timor-Leste (PNTL) domingo foin lalais 929/05) ne’e hala’o serimonia lansamentu fatuk dahuluk postu Unidade Polísia Fronteira (UPF) iha Motain no Inagura postu rua hanesan postu UPF Kaizus Laran no postu UPF TCL13 ne’ebe lansa no inagura husi Primeiru Ministru (PM) Taur Matan Ruak ne’ebe hanesan mós Ministru Interior (MI).

Iha ninia intervensaun, Primeiru Ministru hateten iha tinan rua-nulu ita halo ona postu 25 (rua-nulu-resin-lima) ba UPF, iha tinan rua ita halo rua-nulu-resin-lima, ida ne’e konsege tanba iha parseria ne’ebe diak ho governu Australia liu husi embaixada no ita nia parseiru TLPDP.

“Iha balun maka ita nia parseiria mesak halo, iha balun ita mak halo maibé kuaze iha projetu sira ne’e hotu ita iha parseria tanba buat ne’ebe ita labele kompleta, sira (parseria) kompleta hanesan ekipamentu iha laran, governu la tau osan maibé ita nia parseiru apoiu maka’as los, mas ida ne’e kobre iha inisiativa programa rua maka hanesan primeiru formasaun no treinu, segundu maka bens estar ba ita nia polísia sira”, tenik Primeiru Ministru ne’e.

Ministru Interior ne’e esplika liu tan laos deit atu ezizi polísia sira atu presta servisu ne’ebe maka diak ba komunidade no nasaun maibé liu-liu sira nia fatin mós ita tenke hadia; postu integradu hanesan ne’e ita halo neen iha Timor laran tomak husi Oecusse tantu mós iha fronteira modelu ida ne’e.

“Hau hakarak aproveita oportunidade ida ne’e hodi agradese ba Vise Ministru Interior ho nia ekipa tomak, liu-liu tékniku arkitétu ne’ebe halo modelu ne’ebe simples maibé modelu ida ne’ebe sustentavel em parseria ho ita nia parseru desenvolvimentu, ita hare’e didiak modelu ne’ebe ita introduz modelu ida ne’ebe fasil atu halo manutensaun no modelu ne’ebe diak, bele uza iha tempu naruk nia laran”, salienta Primeiru Ministru ne’e.

Iha fatin hanesan Komandante Jerál PNTL Komisariu Polísia Faustino da Costa iha ninia diskursu hateten serimonia ne’ebe hala’o simples maibé iha signifikadu ne’ebe bo’ot tebes laos deit ba PNTL maibé ida ne’e ba Timor-Leste liu-liu oinsa atu asegura Timor-Leste iha rai ketan.

“Aporveita oportunidade ida ne’e hakarak hato’o ami nia agradese wain ba PM durante tempu hirak ne’e nia laran ne’ebe ita hahu’u konstrui ona postu sira iha fronteira ne’ebe laos deit mai husi Orsamentu Geral Estado (OGE) ninia maibé mós ho esforsu no orientasaun PM nian ba Vise Ministru Interior (VMI) ikus mai ita hetan parseiru ne’ebe apoiu laos deit iha momentu ida ne’e maibé liu-liu iha tempu ne’ebe difisil maka tempu COVID-19 ninian”, tenik Komandante Jerál PNTL ne’e.

Komisariu Polísia ne’e afirma tan katak tanba iha tempu COVID-19 ninian iha ne’ebe PNTL nia membru sira presiza koloka hodi halo vizilansia iha area fronteira liu-liu postu ida ba postu seluk ho distansia ne’ebe dok ho presensa parseiru ninian ita konsege tau postu polísia balun hodi asegura no liu-liu ba objetivu kombate propagasaun surtu COVID-19 ninian.

Hola parte iha serimonia ne’e Primeiru Ministru, Ministru Defesa, Vise Ministru, Embaixador Australia iha Timor-Leste, Komandante TLPDP, reprezentante Presidente Autoridade Munisipiu Bobonaro, Administrador postu Balibo, Xefe Suku Batugade ho nia estrutura, Komandante UPF ho  nia estrutura, Komandante PNTL munisipiu Bobonaro, Dili, Komandante Komandu Administrasaun, Komandante UEP no komunidade Batugade.

Media PNTL.    

Dili- Polisia Nasional Timor-Leste (PNTL) halo avaliasaun servisu seguransa ba serimonia Investidura Prezidente Republika (PR) no Restaurasaun Independensia ba dala XX (20 de maiu) hodi mantein susesu ne’ebe iha no hadia diak liutan.

Komandante Komandu Operasaun Superintendente Xefe Pedro Belo hateten reuniaun avaliasaun ida ne’e inportante tebes hodi hare fila-fali planu ne’ebe maka antes ne’e ami hatun no ejekuta hamutuk iha terrenu tuir planu operasaun kalae, Nia hato’o asuntu ne’e iha Sentru Formasaun Polisia Comoro Dili, kuarta (25/05).

Nia hatutan Ita hotu akompaña katak durante vizita ne’ebe maka iha ba serimonia Investidura no Restaurasaun Independensia no seguransa ba fatin hotu lao ho diak, parte eskoltu ba VIP sira mos lao ho diak ita akompaña situasaun jeral iha Dili laran no bairu-bairu lao ho diak.

“Ami nia Polisia sira iha terrenu inplementa duni saida maka ami tau iha planu, maske iha failansu balu tanba ne’e maka durante ne’e laos halao diak deit maibe iha buat balu ne’ebe ladiak Ami aprejenta ba Komandante sira para tenke hadia,” dehan Komandante Belo.

Nia afirma parte balu ne’ebe maka iha responsabilidade Komandu nian liu-liu parte administrasaun nian Ami tau iha aprejentasaun powerpoint hotu para sira hotu hare hodi tau iha ajenda no programa ba administrasaun para oinsa tau ba iha planu orsamentu jeral 2023 tanba sei iha Eleisaun Parlamentar no forma governu no antes halao servisu sei simu tomada de posse no iha posibilidade karik sei konvida bainaka balu sei mai tan, tanba ne’e maka ami prepara aan agora no frakeja ne’ebe maka iha ami hotu hamutuk depois hadia diak liutan iha futuru.

Difikuldade ne’ebe maka PNTL infrenta iha serimonia inportante rua ne’e bainaka ema inportante Very Important People (VIP) no VVIP ne’ebe maka barak demais entaun membru hirak ne’ebe maka ami koloka ba la sufsiente hodi apoiu sira liu-liu iha parte vatedores ba tranzitu sira entaun tenke foti fali membru regular sira hodi reforsa fali parte tranzitu tanba ne’e maka atu rezolve problema ida ne’e tenke liu husi rekrutamentu ida hodi aumenta membru sira atu reforsa ba iha fatin sira ne’e.

Iha fatin parajen nian iha membru balu ne’ebe maka koloka maibe la sufsiente atu organija kareta no motor iha fatin serimonia tanba momentu ne’e iha serimonia ne’ebe boot maibe rekursu ne’ebe maka PNTL iha hatun hotu maibe nia kapasidade maka ne’e duni tanba ne’e maka frakeja hirak ne’e tau hamutuk para bele hadia diak liutan.

Alende ne’e PNTL mos presija jacket light hodi halo servisu iha tempu kalan tanba iha serimonia boot foin lalais koloka hotu membru polisia regular iha dalan ninin maske sira laos membru tranzitu maibe tanba situasaun obriga entaun sira mos halao servisu tranzitu nian maibe sira ba ho farda normal (farda nakukun) entaun ida ne’e ladun diak ba sira nia vida tanba ne’e ami propoin ba Komandu Administrasaun oinsa atu rezolve diak liutan iha tinan oin mai.

Rejultadu avaliasaun hatudu katak seguransa ba serimonia nasional rua ne’e lao ho susesu iha kapital Dili no teritoriu laran tomak, situasaun jeralmente lao diak teb-tebes tanba iha momentu neba Komandu Jeral hasai ordem operasaun ba Komandu munisipiu sira hodi ejekuta tuir planu ne’ebe maka dejena ona.

Reuniaun Avaliasaun ne’e ne’e organija husi Komandu Operasaun no diriji husi Komandante Jeral PNTL Komisariu Polisia Faustino da Costa akompaña husi Inspetur Jeral Superintendente Xefe Polisia Carlos Jeronimo no Komandante Sentru Formasaun Polisia Superintendente Xefe Polisia Arquimino Ramos no partisipa husi Xefe Departamentu Justisa, Komandante UPF, Segundu Komandante UEP, Segundu Komandante munisipiu Dili, Reprejentante Komandante UPM, Xefe Departamentu, Xefe Seksaun, Ofisiais Inspetur, Sarjentu no Ajente sira. Media PNTL

Dili, Komandu Polísia Nasional Timor-Leste (PNTL) liu husi Unidade Klinika PNTL tersa-feira (24/05) ne’e hala’o abertura Refreshing Training Ba Peer Educator Moras HIV/SIDA ba membru PNTL husi Munisipiu no Unidade.

Segundu Komandante Jerál PNTL Komisariu Polísia Mateus Fernandes iha nia intervensaun ba serimonia abertura ne’e agradese ba Ministeriu Saude no parseiru UNFPA ne’ebe iha fuan bo’ot atu ajuda ita nia populasaun sira iha PNTL nian laran tanba Saude ne’e problema bo’ot, wainhira laiha saude ne’ebe diak maka labele hala’o misaun ho diak.

“Wainhira ita sente fraku, ita hetan moras oin-oin, ita nia servisu mós dala ruma lao ladun diak, tanba ne’e husu ba maluk sira durante Training loron tolu ne’ebe importante tebes, asuntu sira ohin foka iha ne’e kona-ba HIV/SIDA, Hepatites no moras seluk sai hanesan asuntu sira ne’ebe estraga no hafraku ita nia umanidade, halo ita fraku atu hala’o ita nia misaun”, tenik Segundu Komandante Jerál PNTL ne’e.

Komisariu Polísia ne’e afirma liu tan katak funsaun Polísia hanesan funsaun professional ida tanba ne’e parte ida importante liu maka ita nia saude, iha promosaun liu ba ita nia maluk lubuk ida maka afeta moras HIV/SIDA no moras seluk, liu-liu membru sira ne’ebe maka destaka iha liña fronteira.

Iha fatin hanesan reprezentante UNFPA hateten sente kontente tanba bele realiza treinamentu ida ne’e, hafoin iha akordu entre PNTL ho UNFPA hodi hala’o programa sira ba membru PNTL sira husi munisipiu no unidade.

“Treinamentu agora ne’e foin maka dala-uluk hala’o tanba iha tinan rua liu ba, ita halo ona akordu ho parte rua, maibé ho prosesu ne’ebe naruk tebes tanba birokrasia UNPFA nian maibé agradese tebes ba fiar ne’ebe maka PNTL fó ba UNFPA”, tenik reprezentante UNFPA ne’e.

Treinamentu ne’e sei hala’o durante loron tolu, hahu’u husi loron 24 to’o 26 fulan Maiu tinan 2022, ne’ebe maka partisipantes sira mai husi reprezentante membru PNTL husi munisipiu Baucau, Manatuto, Viqueque, Lautem, husi Unidade UEP no UPM. Marka presensa iha abertura ne’e Segundu Komandante Jerál PNTL, reprezentante UNFPA ho nia ekipa, reprezentante Ministeriu Saude, ekipa Klinika PNTL no partisipantes sira.  Media PNTL.

Dili, Atu asegura diak seguransa ba bainaka Espesial husi nasaun Portugal ba Investidura Tomada Posse no Restaurasaun Independensia 20 Maiu, maka Komandu Polísia Nasional Timor-Leste (PNTL) hamutuk ho Komandu F-FDTL tersa-feira (17/05) ne’e hala’o enkontru Koordenasaun Servisu ho ekipa Kometiva husi Xefe Estadu Portugal nian.

Komandante Komandu Operasaun PNTL Superintendente Xefe Pedro Belo ba jornalista sira hafoin enkontru hateten ohin ekipa kometiva husi Xefe Estadu Portugal nian mai iha Kuartél Jeral atu halo koordenasaun servisu durante presensa Presidente Portugal nian iha Timor-Leste hodi partisipa iha Investidura Tomada Posse no Restaurasaun Independensia 20 Maiu tantu mós partisipa iha aktividade balun iha kapital Dili.

“Tanba ne’e maka ohin ami hare’e fila fali programa vizita sira husi ita nia protokolu, antes serimonia ofisial ne’ebe iha, maibé iha mós vizita extra sira ne’ebe maka Presidente Portugal sei ba vizita, tanba ne’e maka ami halo koordenasaun seguransa ho didiak hodi asegura fatin sira ne’ebe maka sei halo vizita ba“, esplika Komandante Komandu Operasaun PNTL ne’e.

Superintendente Xefe ne’e akresenta tan katak ohin ekipa kometiva Xefe Estadu Portugal nian hato’o ona programa balun ne’ebe maka sei hala’o iha kapital Dili durante presensa Presidente Portugal nian iha Timor-Leste. PNTL prontu nafatin atu asegura presensa bainaka espesial nian iha Timor-Leste ba iha programa vizita ne’ebe maka planea ona.

“Kona-ba membru PNTL hira no husi unidade ne’ebe maka sei asegura bainaka espesial sira, ida ne’e téknikamente Planu Operasaun, Komandu hasai ona ba Komandu, Unidade no Departementu atu bele asegura seguransa durante serimonia Nasional nian hala’o”, hatutan Superintendente Xefe ne’e.

Hola parte iha sorumutu ne’ebe lidera husi Komandante Komandu Operasaun PNTL Superintendente Xefe Pedro Belo, maka hanesan Komandante UEP, Xefe DTSRN, Xefe SIP, Segundu Komandante PNTL munisipiu Dili, Komandante Operasaun F-FDTL ho nia ekipa, ekipa kometiva Xefe Estadu Portugal no reprezentante MNEC.

Media PNTL.