News

Dili- Polisia Nasional Timor-Leste (PNTL) kontinua simu vasina Pfizer Booster hodi hasae imunidade membru PNTL atu nune’e kontinua halao servisu ho saudavel.

Komandante Jeral PNTL Komisariu Polisia Faustino da Costa hateten governu liu husi ministeriu relevante desidi atu kontinua vasina Pfizer laos deit ba labarik tinan 12-17 maibe kontinua mos ba ema adultu programa ne’e lao ona no hanaran Booster Pfizer (Booster katak vasina ne’ebe aumentatan), Nia hato’o asuntu ne’e iha abertura vasina iha Kuartel Jeral PNTL Kaikoli Dili, sexta (07/01).

Komisariu ne’e husu ba membru PNTL atu aproveta oportunidade ida ne’e desde ke Ministeriu Saude iha posibilidade nafatin apoia ba PNTL nia membru sira maka Komandu ho laran luak tebes tanba saude inportante.

Hau hakarak atu dehan ba ita hotu iha ne’e katak iha nasaun seluk vasina sira hanesan ne’e ita sira Komandante iha ne’e tenkeser selu laos gratuita maibe iha Timor-Leste buat hotu gratuita mos sei iha nafatin ema ida rua ke sei hanoin dehan katak maske gratuita mos lakoi, Hau hanoin katak ita tenke tau situasaun ida ne’e didiak.

Apela ba membru tomak atu aproveta ita nia governu nia programa ida ne’ebe gratuitu, ita tenkeser partisipa tanba ne’e diak ba ita ida-idak nia saude tanba tuir relatoriu ne’ebe iha no fo sai liu husi komferensia emprensa iha Timor-Leste kontinua rejista kazu ida rua-rua ate iha munisipiu mos iha entaun dala idatan dehan ba membru PNTL tomak ho nia familia aproveta ne’e para diak ba ita, ita nia familia no instituisaun nomos diak ba ita hotu.

Governu Timor-Leste desidi ona halo programa vasina nasional COVID-19 ba sidadaun hotu-hotu no iha modelu vasina oin tolu maka hanesan: AstraZeneca, Cinovax no ikus liu Pfizer ne’ebe maka nasaun barak iha mundu utilija.

Atu termina Komandante Jeral agradese ba ekipa Mediku PNTL no Ministeriu Saude ne’ebe mai husi Sentru Saude Vera-Cruz katak susesu no saude diak ba ita boot sira. Aproveta hato’o mos tinan foun diak, ksolok, paz no saude diak ba ita.

Programa vasina Pfizer Booster ne’e partisipa husi Segundu Komandante Jeral PNTL Komisariu Polisia Mateus Fernandes, Komandante Komandu Operasaun PNTL, Superintendente Xefe Pedro Belo, Xefe Departamentu Justisa PNTL, Superintendente Xefe Agostinho Gomes, Xefe seksaun, Xefe Departamentu, Xefe Servisu, Ofisial Superior, Ofisial Sub-Alternus, Sarjentu, Ajente no Funsionariu Sivil. Media PNTL

Dili- Ekipa konjunta PNTL (Departamentu Justisa) no F-FDTL (Unidade Polisia Militar) ensera operasaun disiplina konjunta ho kodigu “HABERAN” ne’ebe maka instituisaun rua ne’e halao durante semana tolu (3) iha kapital Dili hodi prevene infrasaun disiplina.

Xefe Departamentu Justisa PNTL Superintendente Xefe Polisia Agostinho Gomes hateten atividade ne’ebe halo iha terrenu operasional lao diak liu husi patrullamentu, cek point no responde kazu balu ne’ebe maka involve membru militar F-FDTL no PNTL, operasaun ne’e halao durante semana tolu (3) hahu loron 13 dezembru to’o 03 Janeiru 2022, Nia hato’o asuntu ne’e iha Kuartel Jeral PNTL Kaikoli Dili, tersa (04/01).

Komandante ne’e haktuirtan operasaun ne’ebe maka ita halao maske iha tempu badak deit maibe konsege atinji duni apoiu operasaun ne’ebe ita hakarak maka halo liu prevensaun infrasaun disiplina husi membru instituisaun rua ne’e hatudu duni disiplina durante periodu Natal no Tinan Foun ho realidade katak laiha problema entre membru instituisaun rua ne’e hodi kontribui ba paz no estabilidade. ne’ebe fo oportunidade boot ba ita nia komunidade sira ne’ebe hela iha kapital nasaun ne’e hodi festeja Natal no Tinan foun ho hakamtek no trankulidade nia laran ne’e maka esforsu ne’ebe ita hotu halo maske kiik oan, utuan no badak maibe ne’e maka buat ne’ebe ita bele halo.

“Operasaun ohin ita termina tanba ne’e hau lori Departamnetu Justisa nia naran hato’o agradesementu no parabens ba membru militar F-FDTL no membru Departmanetu Justisa PNTL ne’ebe maka involve diretamente iha operasaun HABERAN, obrigadu ba imi nia servisu no dedikasaun ne’ebe maka imi halao tia ona,” dehan Komandante Gomes.

Ex Komandante munisipiu Manufahi ne’e enkoraja membru sira atu servisu hanesan jerasaun heroi sira tanba ita maka kontinua sira nia dedikasaun, sakrifisiu no sofrimentu ne’ebe fo hodi sosa nasaun ne’e entaun ita tenke hamrik metin hodi hatudu ba povu no estadu katak ita bele sai forsa regular ho referensia boot ne’ebe maka uluk ita nia forsa FALINTIL funu maske ho situasaun difisil maibe ho disiplina.

Iha okajiaun ne’e Komandante Interinu Unidade Polisia Militar, Kapitaun Francisco Xavier dos Reis Neto hato’o parabens no obrigadu ba membru Polisia militar (F-FDTL) no membru Polisia Profost (PNTL) durante imi nia servisu ami ovserba diak tebes hodi halo kordenasaun diak nomos imi iha hanoin no inisiatiba hodi hadia no garante disiplina membru husi instituisaun rua ne’e durante periodu Natal no Tinan Foun nune’e ema hotu bele haksolok hodi festeja loron boot ida ne’e.

Nia haktuirtan Ita la sura ita nia susesu maibe ita sura no hanoin ba ita nia funsaun servisu tanba ita nia susesu laos ita mak avalia maibe Nai Ulun no Povu sira maka bele avalia ida ne’ebe diak no ida ne’ebe aat. Ita labele sura ita nia kolen tanba ita nia kolen la sura no la tetu ho ita nia heroi sira. Nudar membru instituisaun rua hamrik nudar herois sira nia jerasaun hamrik iha sira nia fatin hodi servi ba povu no nasaun ida ne’e atu sai diak liutan.

“Ba imi hotu kopera malu diak hare malu nudar timor oan hanesan membru husi instrumentu estadu laos membru ba instrumentu privadu, nudar timor oan ita mak bele hadia no halo diak liutan ba ita nia instituisaun hodi fo garantia ba povu no nasaun atu fo fiar no laran metin ba instituisaun rua ne’e no ita bele hadia diak liutan iha futuru tanba instituisaun rua ne’e maka nasaun nia seguransa hodi fo seguransa ba povu no Defeza ba nasaun ida ne’e atu sai diak liutan,” Kapitaun Neto apela.

Nia hatutan labele hanoin atu sura saida maka imi hanoin no halo diak ba imi nia funsaun no imi nia servisu no misaun ne’ebe imi okupa ida ne’e maka inportante liu. Ba imi membru sira ami nain rua Komandante loron ida maka ami tun ba terrenu hodi hare imi nia servisu, ami nota katak imi servisu duni no iha rejultadu ema hotu haksolok nune’e ita bele redus infrasaun disiplinar ne’ebe komete husi membru instituisaun rua ne’e.

Ohin ita halo enseramentu ba operasaun HABERAN, enseramentu ida ne’e laos final maibe hanesan serimonia kiik oan ida ne’ebe maka ita bele halo deskansa para ita bele halo ita nia isin kolen libre utuan nune’e ita bele hanoin fali aban bainrua ba oin to’o fulan Dezembru ne’e ita bele halo saida.

Dala idatan hau hato’o parabens no agradese ba imi hotu nune’e ita hotu saude diak hodi hasoru malu fali iha loron ohin ita parada hamutuk iha ne’e hodi ensera operasaun ida ne’e.

Serimonia enseramentu Operasaun haberan ne’e partisipa husi Ofisial F-FDTL no PNTL sira hotu, Sarjentu, Soldadu no Ajente sira. Media PNTL

Dili-Inisiu tinan 2022 Komandu Jeral Polisia Nasional Timor-Leste (PNTL) reestrutura Komandante munisipiu, Unidade no Xefe Gabinete hodi fo tomada de posse ba komandante munisipiu Baucau, Covalima, Komandante Interinu UPM, Xefe Relasaun Publika no Xefe Relasaun Internasional.

Nomeasaun ne’e bazeia ba Despasu Nu 328/CG-PNTL/XII/2021 hodi nomei Supernitendente Antonio Maria de Sá ba kargu nudar Komandante munisipiu baucau hodi Subtitui Superintendente Xefe Armando Monteiro.

Despasu Nu.327/CG-PNTL/XII/2021 hodi nomeia Superintendente-Assistente Basilio de Jesus hodi assume kargu nudar Komandante munisipiu Covalima hodi subtitui komandante sesante nomei Supernitendente Antonio Maria de Sá.

Despasu Nu.326/CG-PNTL/XII/2021 hodi nomeia Inspetur- Chefe João César da silva hodi asumi kargu nudar Komandante Unidade Polisia Maritima hodi subtitui Superintendente-Assistente Basilio de Jesus.

Despasu Nu.325/CG-PNTL/XII/2021 hodi nomeia Inspetur-Chefe Aniceto da Silva de fatimahodi assume kargu nudar Segundu Komandante UPM.

Despasu Nu. 329/CG-PNTL/XII/2021 hodi nomeia Superintendente-Chefe Armando Monteiro ba kargu Xefe Gabinete Relasaun Públika hodi subtitui Superintendente-Chefe Arnaldo Araujo. Despasu Nu. 330/CG-PNTL/XII/2021 hodi nomeia Superintendente-Chefe Arnaldo Araujo hodi assume kargu nudar Xefe Gabinete Coordenadorba koperasaun no Relasaun Internasional no

Komandante Jeral PNTL Komisariu Polisia Faustino da Costa hateten Hau ho Segundu Komandante Jeral Komisariu Polisia Mateus Fernandes hato’o agradesementu wain ba Komandante sira ne’ebe maka ohin simu posse hodi assume kargu foun ba servisu no esforsu sira hotu ne’ebe Imi halo durante assume knar iha Komandu munisipiu, Unidade no Gabinete, Nia hato’o asuntu ne’e liu husi intervensaun iha serimonia tomada de posse ne’ebe maka halao iha Kuartel Jeral PNTL Kaikoli Dili, (03/01).

“Hau dezafia nafatin Komandante sira atu bele hatutan servisu ne’ebe Komandante sesante sira halo ona hodi kontinua mantein no hadia diak liutan hodi asegura atividade polisial hotu-hotu ne’ebe presija asegura tuir misaun no knaar PNTL nian,”dehan Komisariu Faustino.

Komisariu ne’e hato’o parabens ba Estrutura foun no husu Komandante sira atu mantein servisu ne’ebe maka diak no kontinua halo diak liutan.

Partisipa iha serimonia tomada de posse ne’e Estrutura Komandu PNTL, Xefe Seksaun, Xefe Departamentu no Unidade. Media PNTL

Dili, Komandu Polísia Nasional Timor-Leste (PNTL) hamutuk ho Vise Ministru Interior (VMI) no Embaixador Australia iha Timor-Leste kuarta-feira (22/12) ne’e hala’o lansamentu hatu’ur fatur dahuluk ba konstrusaun edifisiu ICT (Informação Comunição e Tecnológia-sigla Português) PNTL iha resintu Kuartél Jerál PNTL Kaikoli ne’ebe hetan apoiu husi embaixada Australia iha Timor-Leste liu husi parseiru desenvolvimentu Timor Leste Police Development Program (TLPDP) no obra ne’e rasik kaer husi kompañia Caltech iha Timor-Leste.

Vise Ministru Interior António Armindo iha ninia intervensaun ba serimonia ne’e hateten lori Primeiru Ministru (PM) hanesan mós Ministru Interior (MI) no Ministeriu tomak nia naran hakarak apresia ho apoiu tomak ne’ebe mai husi governu Australia através husi TLPDP ne’ebe kontinua apoiu Ministeriu Interior (MI) no PNTL, ita nia parseiru entre TLPDP ho PNTL tempu naruk no ita nia deseju/hakarak kooperasaun ne’e kontinua lao nafatin atu garante ita nia seguransa iha rai laran no mós iha fronteira ho terrestre.

“Iha okaziaun ida ne’e atu apresia mós ba apoiu tomak ne’ebe maka durante tinan ida hau ho PM hanesan mós MI ninia mandatu, iha buat barak maka akontese iha tinan ida nia laran, hahu’u kedas husi fronteira to’o mai Komandu Jerál, ne’e hanesan apoiu extraordinaria nunka akontese karik iha tempu pasadu ka iha tempu ne’ebe maka kurtu/badak maibé apoiu ne’e barak los no hau fiar katak ne’e konfiansa entre relasaun ema ho ema, instituisaun ho instituisaun no governu ho governu, ida ne’e maka sira demonstra apoiu sira nian mai Timor Leste”, tenik Vise Ministru Interior ne’e.

Entretantu, embaixador Australia iha Timor Leste Peter Roberts hateten nia sente kontente tebes bele mai iha eventu importante ida ne’e tanba infrastrutura PNTL nian hetan sofre husi inundasaun no infrastrutura ne’e pratikamente ICT importante duni ba polísia nia servisu.

“Hau kontente tebes liu husi TLPDP bele servisu hamutuk ho MI no PNTL atu suporta projetu importante ida ne’e tanba polísia iha futuru depende ba data/dadus, entaun projetu ne’e pratikal no importante duni, no hau mós hakarak koalia katak kna’ar PNTL nian importante iha tempu COVID-19 nia laran tanba Polísia servisu maka’as duni”, hateten embaixador Australia iha Timor Leste ne’e.

Iha fatin hanesan, Komandante Jerál PNTL Komisariu Polísia Faustino da Costa iha oportunidade ne’e lori estrutura Komandu nia naran hakarak hato’o katak serimonia ohin ne’e nian ne’ebe hetan apoiu husi parseiru TLPDP ba PNTL.

“Ohin ita hamutuk iha ne’e atu asiste/akompaña katak iha tempu/minutu balun nia laran tan parseiru desenvolvimentu sei apoiu tan PNTL liu-liu konstrui fatin/espasu ba Servisu Informasaun no Teknologia PNTL nian, apoiu ida ne’e responde ba nesesidade sira PNTL nian tanba iha loron 4 fulan Abril tinan ne’e laos deit iha kapital Dili maibé inklui mós edifisiu sentral Komandu PNTL nian hetan inundasaun bo’ot hodi be’e sae no estraga hotu sasan, dokumentu inklui ekipamentu informatíku sira ne’ebe instala iha Komandu PNTL nia rasik”, esplika Komandante Jerál PNTL ne’e.

Hola parte iha serimonia lansamentu ne’e Vise Ministru Interior, Embaixador Australia iha Timor-Leste, Komandante Jerál, Segundu Komandante Jerál, Inspector Jerál, Komandante Komandu Operasaun, Administrasaun, Xefe Servisu no Departamentu sira Kuartél Jerál, Ekipa TLPDP, Diretór kompañia Caltech, ekipa MI no konvidadu sira seluk. Serimonia hatu’ur fatuk dahuluk ne’e hetan bensaun husi Amu Kapelaun PNTL.

Media PNTL.                       

Dili- Polisia Nasional Timor-Leste (PNTL) prontu atu asegura seguransa ba selebrasaun loron Natal no tinan foun hodi garante sidadaun hotu halao movimentu ho livre no seguru, prontidaun ne’e hatudu liu husi Show Force haleu kapital Dili.

Komandante Komandu Operasaun Superintendente Xefe Pedro Belo hateten ita hotu hatene katak ikus-ikus ne’e iha mos problema balun ne’ebe komunidade sente la seguru tanba ne’e maka ohin loron PNTL hatudu nia forsa katak prontu hodi asegura seguransa ba loron boot natal no tinan foun, Nia hato’o asuntu ne’e liu husi komferensia emprensa iha palasiu governu Dili, kuarte (22/12).

Nia haktuirtan PNTL iha semana rua (2) nia laran hahu ohin ba oin sei la tolera kualker kriminoju ne’ebe maka halo krime hodi impede atividade ne’ebe komunidade sei halao iha loron tuir mai.

“Aviza ba joven no komunidade hotu atu tur hakmatek iha ida-idak nia uma, kuandu hakarak hemu alcohol, hemu iha uma labele hemu tua iha dalan ninin no halo problema ba ema sira ne’ebe hemu tua tuir dalan ninin maka PNTL sei kontrola. Hakarak hemu rame-rame halo festa iha ida-idak nia uma ou fatin festa nian nune’e impede ema seluk nia movimentu no atividade bainhira impede ema seluk nia direitu no atividade no iha informasaun ne’ebe tama ba Komandu Jeral, Komandu munisipiu nomos Eskuadra maka PNTL sei la tolera tanba ne’e husu nafatin ba ema hotu-hotu tenke kopera ho PNTL hodi nune’e ita hotu hakarak iha tinan 2021 buat hotu lao diak hodi simu tinan foun 2022.,” dehan Komandante Belo.

Atu termina Komandante ne’e relata katak husi fronteira tama to’o kapital Dili no munisipiu hotu iha operasaun durante fulan hirak liuba PNTL kaptura ema barak ne’ebe maka lori fugetes tama mai timor no PNTL sei nafatin halo operasaun bazeia ba orentasaun husi Komandante Jeral katak fugetes so bele tiru iha loron 24 no 31 Dezembru kalan,iha loron bailet sei la iha toleransia nune’e Komandu munisipiu halo operasaun kalan-kalan no kaptura sidadaun sira husu komunidade sira atu kopera ho PNTL atu labele halo atividade kontra bandu.

Show Force haleu kapital Dili, ne’e kompostu husi kompania unidade Espesial Polisia (UEP) peltaun tolu (3), kompania Unidade Patrulamentu fronteira (UPF) pelataun ida (1), Kompania Unidade Polisia Maritima (UPM) peltaun rua(2), Kompania Kuartel Jeral peltaun tolu (3) no Kompania Dili ho peltaun tolu (3).

Show Force haleu kapital Dili ne’e akompanha husi Inspetur Jeral, Komandante Komandu Operasaun nasional, komandante munisipiu, Komandante Unidade, Xefe Servisu, Xefe Departamentu, Ofisial Superior, Ofisial Sub Alternu, Sarjentu no Ajente sira. Media PNTL

Dili- Polisia Nasional Timor-Leste (PNTL) halo formatura jeral preparasaun seguransa ba loron boot Natal 24-25 no Tinan foun 31-01 janeiru 2022 hodi hatudu Forsa Seguransa nia prontidaun atu asegura seguransa ba povu no nasaun.

Komandante Jeral PNTL Komisariu Polisia Faustino da Costa hateten Parada de prontidaun ida ne’e atu bele orienta no fahe tarefa de servisu ba Komandante munisipiu, Unidade de apoiu sira iha nasional no munisipiu oinsa atu asegura fronteira rai maran nomos fronteira tasi, Nia hato’o asuntu ne’e iha deskursu ba serimonia formatura jeral iha Kuartel UEP Bairo-Pite Dili, (22/12)

Nia haktuirtan Ohin ita realija serimonia ida ne’e hodi estrutura Komandu PNTL orienta ba Komandante do Komandu munisipiu no Komandante Unidade destakadu sira iha teritoriu nasional katak:

1. Kontinua nafatin asegura atividade no eventu hirak iha selebrasaun Natal no tinan foun hodi garante katak ema hotu-hotu bele lao livre bainhira deit no iha tempu saida deit hodi festeja loron boot ne’e.
2. Orienta ba Komandante munisipiu no Komandante autoridade munisipais sira katak tenke kontinua halo kordenasaun diak ho parte relevante liu-liu lideransa komunitaria, autoridade lokal no Autoridade relijioja liu-liu igreja katolika konaba preparasaun ba selebrasaun loron natal no tinan foun.
3. Orienta Komandante do Komandu Unidade ne’ebe hahu husi nasional no destakadu iha munisipiu atu nafatin kopera no apoiu Komandu munisipiu liu-liu munisipiu autoridade sira ne’ebe ita boot sira destaka ba hodi garante katak festeja natal no tinan foun ne’ebe sei mai atividade hirak ne’e sei lao ho diak, prosperu, feliz no hakmatek.

Aproveta oportunidade ne’e hakarak hato’o mos ba membru PNTL tomak atu halao nia knaar tuir responsabilidade ne’ebe maka iha ho aktu professional, katak maske ema barak sei festeja natal no tinan foun PNTL nia membru sira mak garante katak selebrasaun hirak ne’e lao ho diak.

“La autorija ba membru PNTL atu konsumu alkohol molok halao servisu no ba membru sira ne’ebe maka tenke husik fatin servisu tanba nesesidade urjente ruma maka autoridade no Komandante munispiu tenke iha konyesementu no hetan autorijasaun liu-liu ba sira ne’ebe halo deslokasaun entre munisipiu, postu administrativu ou entre suku,” dehan Komisariu Faustino.

Komandu mos salienta PNTL hasoru dejafiu no problema lubuk ida liu-liu menus rekursu humanus pessoal, komunikasaun, transporte maibe ho ekipamentu no rekursu ne’ebe iha maka  PNTL liu husi Komandu orienta atu Komandante sira ita nafatin hatudu katak ho rekursu ne’ebe minimu ita pronto nafatin atu servi ita nia povu.

Aproveta oportunidade ne’e hakarak hato’o ba publiku katak Natal no tinan foun nudar eventu no atividade annual maibe ita hotu hatene katak ho prejensa Jejus Kristu nian atu lori dame, domin no paz ne’ebe ema konsidera natal hanesan festa familia nian katak ita hotu hamutuk atu selebra hodi simu kosok oan ne’ebe sei mai nune’e joven sira no populasaun tomak ita hotu tenke hatur ita nia aan hanesan joven future nasaun nian.

Atu termina lori estrutura Komandu PNTL nian hakarak hato’o votus feliz natal ba Komandante sira hotu ho familia ba membru PNTL tomak ho familia boot PNTL ho esperansa katak ita hotu sei hamutuk nafatin atu garante katak selebrasaun natal no tinan foun 2022 sei lao ho hakmatek, prospero no iha feliz nia laran.

Formatura jeral ne’e kompostu husi kompania unidade Espesial Polisia (UEP) peltaun tolu (3), kompania Unidade Patrulamentu fronteira (UPF) pelataun ida (1), Kompania Unidade Polisia Maritima (UPM) peltaun rua(2), Kompania Kuartel Jeral peltaun tolu (3) no Kompania Dili ho peltaun tolu (3) no Formatura jeral ne’e kompleta ho Show Force haleu kapital Dili.

Serimonia formatura jeral ne’e ho prejensa husi Inspetur Jeral, Komandante Komandu Operasaun nasional, komandante munisipiu, Komandante Unidade, Xefe Servisu, Xefe Departamentu, Ofisial Superior, Ofisial Sub Alternu, Sarjentu no Ajente sira. Media PNTL

Dili, Komandu Polísia Nasional Timor-Leste (PNTL) liu husi Departamentu Polisiamentu Komunitaria Nasional (DPKN) tersa-feira (21/12) ne’e hala’o Enseramentu Programa Edukasaun Sívika Ba Estudante Nível Universitáriu Kona-ba Kultura Hadomi Vida ne’ebe hala’o ona ba estudante Universitáriu sia (9) iha kapital Dili durante fulan tolu (3) nia laran.

Segundu Komandante Jerál PNTL Komisariu Polísia Mateus Fernandes iha ninia intervensaun ba serimonia ne’ebe hala’o iha Salaun Auditoriu Universidade Nasional Timor Lorosa’e (UNTL) Hera hateten PNTL iha ninia papel hateten katak atu protégé ema ho riku-soin iha Timor laran tomak, kada relatoriu fulan-fulan nian hatudu katak asidente ema mate ho motor hamutuk ema hitu to’o ruanulu-resin-ida, maioria sira ne’ebe laiha lisensa, dukur, halai sala, la kontrola, motor sira laiha dokumentu, hare’e husi rezultadu sira ne’e hanesan ameasa bo’ot ba jovem Timor oan sira.

“Tanba jovem maka hanesan dignidade Timor nian, ita presiza prepara sira halo didiak ne’ebe durante fulan tolu (3), Polísia Tránzitu sira servisu hamutuk ho Diresaun Nasional Transporte Terrestre (DNTT) halo servisu ida ne’ebe diak tebes-tebes no ba sira ne’ebe hetan sertifikadu apresiasaun ne’e maneira motivasaun ida atu oinsa maka ita bele kontinua formasaun hanesan ne’e ba oin,” tenik Segundu Komandante Jerál PNTL ne’e.

Komisariu Polísia ne’e afirma tan katak PNTL sei kontinua koopera hamutuk ho Universitáriu sira atu kontinua halo formasaun hanesan ne’e, atu ita bele sosializa malu nune’e ita bele iha konsiensia ida katak Timor ne’e ita hotu nian. No lori PNTL nia naran agradese ba parte hotu-hotu, liu-liu magnifíku reitor ou reprezentante husi Universidade sia (9) hodi haruka sira nia estudante envolve iha formasaun ida ne’e.

Iha fatin hanesan reprezentante Reitor UNTL hateten kona-ba Hadomi Vida ne’e konsagra ona iha ita nia  Konstituisaun no Bilblia ba ita sira ne’ebe Sarani Kátoliku signifika sai Kultura ne’e laos atu obriga maibé ne’e obrigasaun jerál, responsabilidade kedas husi ema idak-idak nian. Tanba ne’e, Hadomi Vida importante tebes ba nasaun hotu-hotu.

Tuir Diretor DPKN Superintendente António da Luz, Programa Edukasaun Sívika ne’e hala’o ona ba estudante nivel Universitáriu sira iha kapital Dili hanesan UNTL, UNPAZ, UNDIL, DIT, IOB, Instituto Superior Cristal, Isfic no IPDC. Abertura ba programa ne’e hala’o iha loron 15 fulan Setembru 2021 iha UNPAZ no remata iha UNTL iha loron 15 fulan Dezembru 2021. Programa ne’e hanesan planu PNTL nian ne’ebe implementa husi DPKN no servisu hamutuk ho DNTT no Departamentu Tránzitu Seguransa Rodoviáriu. Objetivu husi programa Edukasaun Sívika ne’e primeiru maka atu konsasializa joven sira atu hadomi sira nia vida no ema seluk nia vida, segundu maka atu eduka sira hodi kompriende kona-ba Lei Nu.06/2003 kona-ba Kódigu Estrada no Regras Sinais Tránzitu sira nian.

Media PNTL.                

Dili- Polisia Nasional Timor-Leste (PNTL) halo Reuniaun Konsellu Superior ba-daruak iha tinan 2021 hodi halo avaliasaun servisu no prosesu disiplina ba membru Polisia nain hat (4) tanba kazu indisiplina.

Sekretariu Konsellu Superior Superintendente Xefe Polisia, Carlos Jeronimo hateten Reuniaun Konsellu Superior (KS) ordinaria loron ohin nian ho ajenda prinsipal rua (2) ba kazu prosesu disiplinar no avaliasaun servisu tinan 2021 no prespetiva ba tinan 2022, Nia hato’o asuntu ne’e ba Jornalista sira iha Kuartel jeral PNTL kaikoli Dili (20/12).

Nia haktuirtan Kazu disiplinar iha prosesu hat (4) ne’ebe maka ohin delibera hotu ona no agora dau-daun hatama hela iha meja no ita hein katak iha tempu badak sei hatene nia rejultadu, husi kazu hat ne’e iha membru balu maka hetan demisaun.

Iha prosesu deliberasaun ne’e Komandante ida-idak fo nia opiniaun ba kazu ne’e hafoin tetu fila-fali hodi foti desijaun. Alende ne’e halo diskusaun konaba prespetiva PNTL ba tinan 2022 hodi hare saida maka PNTL sei halo iha tinan oin.

Informa mos katak Konsellu Superior halao reuniaun tinan ida dala rua kada fulan nen(6) alende ne’e iha mos reuniaun ekstraordinaria.

Reuniaun Konsellu Superior PNTL ba daruak ne’e prezidi husi Komandante Jeral Komisariu Faustino da Costa nudar Prezidente Konsellu Superior, akompana husi Segundu Komandante Jeral PNTL Komisariu Mateus Fernandes nudar Vise Prezidente Konselllu Superior no Sekretariu Konsellu Supeior Superintendente Xefe Carlos Jeronimo no partisipa husi Komandante Komandu Operasaun Nasional, Superintendente Xefe Pedro Belo, Komandante Komandu Administrasaun PNTL, Superintendente Xefe Polisia Jose Soares, Xefe Servisu Investigasaun Kriminal Nasional PNTL, Jose M. Neto Mok,  Komandante Sentru Formasaun Polisia, Superintendente Xefe Polisia Arquimino Ramos, Xefe Servisu Informsaun Polisial, Superintendente Polisia Boavida Ribero, Komandante munisipiu 12 no mos Komandante Unidade UEP, UPM no UPF. Media PNTL

Dili- Vise Ministru Interior no Komandante Jeral PNTL inagura postu Tranzitu iha Terminal Tasi-Tolu ne’ebe maka konstrui husi kompania RUDAL 7984 hodi fasilita PNTL nia servisu.

Vise Ministru Interior Antonio Armindo lori Primeiru Ministru no Ministru Interior nia naran hato’o agradesementu no parabens ba Maun Mahoka ne’ebe maka ho laran diak tebes ajuda Ministeriu Interior no Komandu PNTL hodi konstrui postu tranzitu iha Dili laran, konstrusaun ne’e daik no dignu ba membru PNTL atu halao servisu hodi servi komunidade sira, Nia hato’o asuntu ne’e iha Tasi-Tolu Dili Domingo (19/12)

Nia hatutan sidadaun hotu ne’ebe hetan lukru husi nasaun ida ne’e iha dever tomak atu kontribui ba nia rain, ida ne’e maka Maun Mahoka halo hodi konstrui ona Postu Tranzitu 10 no iha informasaun katak sei konstruitan postu rua (2).

Ita tenke rekonyese kontribuisaun mai husi individu, kompania ka governu hotu-hotu ne’e nia objetivu ida deit atu halo dezenvolvimentu ba ita nia rain maka sura mos ho Maun Mahoka hanesan individu husi kompania timor oan orgullu kontinua atu apoiu ita nia dezenvolvimentu iha nasaun ida ne’e.

Iha okajiaun ne’e Komandante Jeral PNTL Komisariu Polisia Faustino da Costa hateten ohin ita hotu iha ne’e atu asisti no akompana asistensia ne’ebe maka diretur kompania RUDAL fo ba ita maibe ida ne’e laos ba dala uluk ita hotu asisti iha fulan hirak liu ba kompania ne’e oferese postu Tranzitu ho modelu hanesan hamutuk nen (6) ba PNTL, Ohin ita kontinua simu no inaguratan postu hamutuk hat (4).

Aproveta momentu ida ne’e hakarak atu dehan ba Komandu PNTL munisipiu Dili katak hafoin inagura postu ida ne’e imediatu tenke okupa no uza durante oras 24 nia laran, labele husik mamuk no abandona.

“Postu hirak ne’e tenke uza ho kuidadu hodi mantein ambiente mos no hijeniku katak tenke mos, no saudavel maka parte administrasaun tenke hare apoiu nesesariu atu  nue’e be’e tenke iha iha kualker momentu no nesesidade seluk ne’ebe maka presija ba postu hirak ne’e,”Komisariu Faustino aviza.

Lideransa Maximu Instituisaun PNTL ne’e husu ba komunidade iha Tasi-Tolu atu kuidadu no mantein uma ida ne’e nia kondisaun diak hodi funsiona postu ne’e ho diak nune’e bele halo atendementu ba komunidade sira ho fasil no lalais katak komunidade maka sai nain ba postu ida ne’e no PNTL liu husi apoiu Sr. Mahoka nian fornese atu atende ita boot sira hotu bainhira deit persija.

PNTL mos agradese ba Diretor kompania RUDAL Sr.Mahoka, no apresiasaun ba Deputadu Cornoeli gama ’L7’ no komunidade sira ne’ebe marka prejensa iha serimonia inagurasaun ida ne’e hodi sai testamuna ba kompania RUDAl nia apoiu ba instituisaun PNTL.

Entretantu Diretur Komapania RUDAL 7984 Mahoka hateten iha tinan 2021 iha iha rendimentu utuan ida ne’e naton atu ajuda governu hodi konstrui postu tranzitu iha kapital Dili, hau ajuda hodi haritan postu Tranzitu iha Tasi-Tolu hodi bele ajuda situasaun ruma bainhira joven sira dalaruma iha loron boot hemu tua lanu provoka no baku malu entaun ho prejensa Polisia nian iha postu ne’e bele preve no Evita joven sira halo problema.

Nia hatutan iha Bebonuk situasaun pior liutan ema tauk lao ba mai iha tempu kalan dalaruma ema balu subar fali iha fatin helik maibe agora hari ona postu iha Bebonuk entaun bele garante katak sidadaun sira lao livre ba mai tanba membru PNTL sei asegura seguransa ba komunidade sira.

Marka prejensa iha serimonia inagurasaun ne’e Komandante PNTL munisipiu Dili Supenrintendente Xefe Henrique da Costa, Segundu Komandante Superintendente João Sancho Pires, Komandante komandu Administrasaun Superintendente Xefe Jose Soares, Ofisiais Superior PNTL, konvidadu no komunidade sira. Media PNTL