Dili, Komandu Polísia Nasional Timor-Leste (PNTL) hamutuk ho Vise Ministru Interior (VMI) no Embaixador Australia iha Timor-Leste kuarta-feira (22/12) ne’e hala’o lansamentu hatu’ur fatur dahuluk ba konstrusaun edifisiu ICT (Informação Comunição e Tecnológia-sigla Português) PNTL iha resintu Kuartél Jerál PNTL Kaikoli ne’ebe hetan apoiu husi embaixada Australia iha Timor-Leste liu husi parseiru desenvolvimentu Timor Leste Police Development Program (TLPDP) no obra ne’e rasik kaer husi kompañia Caltech iha Timor-Leste.
Vise Ministru Interior António Armindo iha ninia intervensaun ba serimonia ne’e hateten lori Primeiru Ministru (PM) hanesan mós Ministru Interior (MI) no Ministeriu tomak nia naran hakarak apresia ho apoiu tomak ne’ebe mai husi governu Australia através husi TLPDP ne’ebe kontinua apoiu Ministeriu Interior (MI) no PNTL, ita nia parseiru entre TLPDP ho PNTL tempu naruk no ita nia deseju/hakarak kooperasaun ne’e kontinua lao nafatin atu garante ita nia seguransa iha rai laran no mós iha fronteira ho terrestre.
“Iha okaziaun ida ne’e atu apresia mós ba apoiu tomak ne’ebe maka durante tinan ida hau ho PM hanesan mós MI ninia mandatu, iha buat barak maka akontese iha tinan ida nia laran, hahu’u kedas husi fronteira to’o mai Komandu Jerál, ne’e hanesan apoiu extraordinaria nunka akontese karik iha tempu pasadu ka iha tempu ne’ebe maka kurtu/badak maibé apoiu ne’e barak los no hau fiar katak ne’e konfiansa entre relasaun ema ho ema, instituisaun ho instituisaun no governu ho governu, ida ne’e maka sira demonstra apoiu sira nian mai Timor Leste”, tenik Vise Ministru Interior ne’e.
Entretantu, embaixador Australia iha Timor Leste Peter Roberts hateten nia sente kontente tebes bele mai iha eventu importante ida ne’e tanba infrastrutura PNTL nian hetan sofre husi inundasaun no infrastrutura ne’e pratikamente ICT importante duni ba polísia nia servisu.
“Hau kontente tebes liu husi TLPDP bele servisu hamutuk ho MI no PNTL atu suporta projetu importante ida ne’e tanba polísia iha futuru depende ba data/dadus, entaun projetu ne’e pratikal no importante duni, no hau mós hakarak koalia katak kna’ar PNTL nian importante iha tempu COVID-19 nia laran tanba Polísia servisu maka’as duni”, hateten embaixador Australia iha Timor Leste ne’e.
Iha fatin hanesan, Komandante Jerál PNTL Komisariu Polísia Faustino da Costa iha oportunidade ne’e lori estrutura Komandu nia naran hakarak hato’o katak serimonia ohin ne’e nian ne’ebe hetan apoiu husi parseiru TLPDP ba PNTL.
“Ohin ita hamutuk iha ne’e atu asiste/akompaña katak iha tempu/minutu balun nia laran tan parseiru desenvolvimentu sei apoiu tan PNTL liu-liu konstrui fatin/espasu ba Servisu Informasaun no Teknologia PNTL nian, apoiu ida ne’e responde ba nesesidade sira PNTL nian tanba iha loron 4 fulan Abril tinan ne’e laos deit iha kapital Dili maibé inklui mós edifisiu sentral Komandu PNTL nian hetan inundasaun bo’ot hodi be’e sae no estraga hotu sasan, dokumentu inklui ekipamentu informatíku sira ne’ebe instala iha Komandu PNTL nia rasik”, esplika Komandante Jerál PNTL ne’e.
Hola parte iha serimonia lansamentu ne’e Vise Ministru Interior, Embaixador Australia iha Timor-Leste, Komandante Jerál, Segundu Komandante Jerál, Inspector Jerál, Komandante Komandu Operasaun, Administrasaun, Xefe Servisu no Departamentu sira Kuartél Jerál, Ekipa TLPDP, Diretór kompañia Caltech, ekipa MI no konvidadu sira seluk. Serimonia hatu’ur fatuk dahuluk ne’e hetan bensaun husi Amu Kapelaun PNTL.
Media PNTL.
