News

Dili-Parseru Timor-Leste Police Development Programe (TLPDP-sigla ingles)  oferese ekipamentu sevisu ba Komandu Jeral Polisia Nasional Timor-Leste (PNTL) hodi responde ba estragus ne’ebe akontese tanba inundasaun.

Komandante do Komandu Administrasaun Superintendente Xefe Polisia Jose Soares hateten ohin 04/06 Komandu Jeral PNTL hetan doasaun husi parseru prinsipal PNTL hodi responde ba inundasaun ne’ebe maka akontese iha kapital Dili iha loron 04/04/2021 ne’ebe maka rejulta estragus barak ba ekipamentu servisu PNTL nian iha Kuartel Jeral hanesan komputador, meja, kadeira, makina fotokopia no makina inprimir, Nia hato’o asuntu ne’e ba media PNTL iha Kuartel Jeral PNTL Kaikoli Dili, Sexta (04/06).

“Ohin ita hetan doasaun husi TLPDP komputador 20, meja 10, kadeira 25 no seluktan hodi responde ba Komandu Jeral ; Alende ne’e TLPDPmos halo buat barak hodi apoiu ba Komandu munisipiu Dili, Unidade Polisia Fronteira (UPF), Unidade Polisia Maritima(UPM,” dehan Soares.

Komandante ne’e haktuirtan ekipamentu hirak ne’e sei distribui ba seksaun PSDO, Gabinete Asesoria Juridiku, Relasaun Publika, Departamentu Finansas, Servisu Investigasaun Kriminal, Unidade Tranzitu, Aprovijionamentu, SIP no departamentu no seksaun ne’ebe maka presija, maske labele responde hotu maibe ita responde balu tanba sira seluk bele kobre husi ita nia planu de kompras husi Orsamentu Jeral Estadu (OJE).

TLPDP nudar parseru prinsipal PNTL ne’ebe sempre apoiu institusaun seguransa ne’e desde  tinan 2000 liu ba no iha koperasaun diak entre governu ho governu no Polisia ho Polisia tanba ne’e maka sira sempre tau matan no foka liu ba Polisia hodi fo apoiu ekipamentu servisu, kapasitasaun, kursu lideransa, kursu jestaun no apoiu seluktan.

Serimonia entrega sasan ne’e partisipa husi Inspetor Jeral, Komandante Unidade Tranzitu, Xefe Gabinete Relasaun Internasional, Xefe IT, Xefe unidade no Departamentu  sira. Medai PNTL

Dili, Komandu Polísia Nasional Timor-Leste (PNTL) liu husi Porta Voz Komandu nian iha Konferensia Imprensa tersa-feira (01/06) ne’e hateten durante semana ida hahu’u husi loron 24 to’o loron 31 fulan Maiu tinan 2021, PNTL rezista kazu Insidente hamutuk 41 ne’ebe kompostu husi Asaltu malu 9, Baku malu 12, Disturbiu públiku 2, Tuda malu 4, Tuda Ambulansia 1 no Violensia Domestika 13.

Porta Voz Komandu PNTL Superintendente Xefe Arnaldo de Araújo ba jornalista sira hateten PNTL kontinua halo fiskalizasaun ba implementasaun extensaun Serka Sanitaria no Konfinamentu Jerál ba populasaun iha munisipiu Dili no Serka Sanitaria iha Munisipiu Baucau no Viqueque.

“Iha loron 27 fulan Maiu kalan, iha munisipiu Baucau Vila akontese kazu Arma Branka (Hana ema ho Rama Ambon) hodi rezulta vitima ho inisial N.M.C idade 21 hanesan estudante hela iha aldeia Lutumutu, suku Tirilolo-Baucau, kondisaun vitima kanek no evakua kedas mai Dili hodi hasai rama musan, lori hikas ba Sentru Izolamentu Vera Cruz tanba vitima wainhira hala’o teste Swab, nia pozitivu COVID-19, suspeitu sira detein ona no kazu ne’e rezista ona ba iha Ministeriu Públiku (MP)”, esplika Porta Voz Komandu PNTL ne’e.

Superintendente Xefe ne’e akresenta tan katak iha loron 30 fulan Maiu, iha munisipiu Bobonaro postu administrativu Maliana akontese ema lanu ba tuda loja sidadaun Chinesa nian hodi rezulta ema na’in 2 kanek. PNTL detein ona suspeitu na’in ida no kazu refere vitima husu atu la lori prosesu ba oin.

Media PNTL.

Dili- Komadante Jerál Polísia Nasional Timor-Leste (PNTL) Komisariu Faustino da Costa fó posse ba Xefe Servisu Informasaun Polísia (SIP) Superintendente Boavida Ribeiro hodi troka Xefe SIP sesante Superintendente Xefe Hermenegildo G. da Cruz ne’ebe nomeadu ba kargu nu’udar Adidu Seguransa Timor-Leste iha Australia.

Tomada de posse ne’e hala’o tuir Despasu Gabinete Komandante Jerál Nu.209-A/CG-PNTL/VI/2021 kona-ba Termu Nomeasaun no Responsabiliddae ba kargu Xefe SIP.

Komisariu Polísia Faustino da Costa hateten tanba nesesidade servisu maka Komandu hare’e no avalia servisu sira hotu hodi nomeia emposadu Superintendente Boavida Ribeiro ba kargu Xefe SIP tanba Xefe SIP sesante simu kna’ar no responsabilidade foun, Nia hato’o asuntu ne’e ba Jornalista sira iha Kuartel Jeral PNTL Kaikoli Dili, tersa(01/06).

“Maske ita iha hela Estadu Emergensia no Serka Sanitaria maibe iha duni nesesidade atu iha futuru sei halo tan rotasaun ka mudansa balun ba nivel Komandu atu nune’e labele husik Komandante ida iha fatin ida iha tempu naruk nia laran maibe mínimu bele assume pasta ka responsabilidade mais ou menus tinan balun nia laran labele liu tinan 7-10”, dehan Komandante Jerál.

Superintentende Boavida Ribeiro antes ne’e assume kargu nudar Segundu Komandante Centro Formação Polícia (CFP-sigla portuges) hahu Fulan agostu 2020 too loron 30 fulan maiu 2021.

Hola parte iha serimonia Segundu Komandante Jerál Komisariu Mateus Fernandes, Inspetór Jerál Superintendente Xefe Carlos Jeronimo, Komandante Komandu Operasaun Superintendente Xefe Pedro Belo, Administrasaun, Xefe SIKN, Komandante CFP no Xefe Servisu sira iha Kuartél Jerál. Media PNTL.

Dili- Komandante Jeral PNTL no Segundu Komandante Jeral aprejenta situasaun seguransa rai laran ba Prezidente Republika Francisco Guterres Lú-olo katak situasaun seguransa iha rai laran lao diak no kontroladu.

Komandante Jeral PNTL Komisariu Faustino da Costa hateten iha enkontru ho Xefe Estadu ohin Komandu PNTL aprejenta katak situasaun iha nivel teritoriu rai laran lao diak maske iha akontesmentu balu hanesan asaltu, grupu tuda malu, no baku malu prosesu ne’ebe maka iha ita atende no nota katak grupu hirak ne’e nafatin husi eis grupu arte marsiais sira hanesan akontesementu iha munisipiu balu nebe prosesu Polisia atende no atua hela, Nia hato’o asuntu ne’e iha Palasiu Prezidensial Nicolao Lobato Bairo-Pite Dili, kinta (27/05).

Komisariu ne’e haktuirtan situasaun ne’ebe ita iha maka Estadu Emerjensia, Serka Sanitaria nomos Konfinamentu Domisiliariu Jeral no servisu ne’ebe maka PNTL halo hodi asegura no inplementa ami aprejenta situasaun no informasaun hirak ne’e ba Xefe Estadu.

Iha enkontru ne’e Komandu PNTL Relata mos atuasaun balu ne’ebe maka Polisia halo tanba tenke asegura prosesu hotu nune’e dalaruma iha kazu balu mosu hanesan kazu iha Taxi-Tolu, Liquica no Suai akontesementu hirak ne’e akontese duni nune’e parte Komandu hasai ona ekipa konjuntu husi inspesaun no Departamentu Justisa hodi ba hasoru vitima sira nomos membru PNTL hirak ne’ebe maka involve hodi submete ba prosesu interna(prosesu disiplinar).

Kestiona konaba prosesu ba membru sira Komandante Jeral haktuir membru hirak ne’ebe maka komete iregularidade Komandu PNTL halo prosesu interna no prosesu externa, prosesu hirak ne’e Independente no ida hare ba grau de infrasaun entaun tenke hein fali parte ida seluk. Media PNTL.

Dili, Komandu Polísia Nasional Timor-Leste (PNTL) liu husi Komandante Komandu Operasaun Superintendente Xefe Pedro Belo segunda-feira (24/05) ne’e liu husi konferensia imprensa klarifika ba jornalista sira relasiona ho insidente ida ne’ebe maka mosu iha Tasi-Tolu no ikus mai viral iha Media Sosial, katak kronologia lolos husi akontesimentu ne’e maka iha loron dominggu (23/05) oras tuku 11 meudia, iha area postu entrada munisipiu Liquiça no kapital Dili nian. Ita hotu hatene katak fatin sira ne’e komesa Estadu Emergensia (EE), Serka Sanitaria no Konfinamentu Domisiliariu Obrigatoriu iha regras hotu hakerek ona hodi Polísia ezekuta no halo tuir.

“Iha situasaun ida nia laran, iha Lei hateten katak ema hotu-hotu ne’ebe bele halo sirkulasaun iha kapital Dili, tanba Dili aplika hela Konfinamentu Domisiliariu Obrigatoriu entaun ema sira ne’ebe sai husi uma ho nia kriteria tau ona iha Regras EE nian, iha Rezolusaun Governu Nu.60/2021 hateten katak negosiante roda tolu bele halo movimentu ba no mai iha Dili laran, maibé kuandu movimentu sai fali ba munisipiu seluk, iha fali regras seluk ne’ebe tenke kumpri”, esplika Komandante Komadu Operasaun PNTL ne’e.

Superintendente Xefe haktuir tan katak postu entrada ne’ebe iha atu estabelese regras sira ne’ebe iha ba ema hirak ne’ebe tama no sai husi Dili ba munisipiu, no munisipiu tama mai kapital Dili. Iha ne’eba aplika regras ida katak ba movimentu negosiante sira hodi halo aktividade maka iha loron segunda, kuarta no sexta-feira. Iha situasaun ne’e kontrariu ho akontesimentu ne’ebe mosu orseik (23/05) loron dominggu, maibé tanba saida maka aktividade ne’eba bele hala’o?

“Entaun iha momentu ne’eba, membru Polísia sira ne’ebe hala’o servisu iha fatin ne’eba atu implementa regras sira ne’ebe iha, maibé ita hotu hatene katak mosu akontesimentu ida ne’ebe agora viral ona iha Media Sosial, ita labele hare’e ba atuasaun ne’ebe Polísia halo, maibé ita presija hare’e mós ninia kauza husi akontesimentu ida ne’e”, haktuir Superintendente Xefe ne’e.

Komandante Komadu Operasaun PNTL ne’e afirma kauza lolos husi akontesimentu ne’e ema hotu la koalia maibé atuasaun ikus ne’ebe polísia halo, ida ne’e maka sai kestaun ba públiku no ema hotu nia matan. Maibé hakarak hateten katak akontesimentu ne’e lolos maka wainhira polísia sira atu impõen no esplika regras EE nian ba negosiante, maibe saida maka nia (negosiante-red) halo hasoru polísia. Wainhira ema esplika ona no ita kumpri tuir, hau hanoin akontesimentu orseik sei la mosu. Tanba nia (negosiante-red) hatene katak nia ultrapasa ona munisipiu ida ba munisipiu seluk, enkuantu regras EE hateten ona katak bele halo movimentu iha loron ne’ebe determina ona.

“Mosu diskusaun oituan entre membru polísia sira ne’ebe destaka iha postu ne’eba ho negosiante ne’e, hafoin ida ne’e polísia mós hatu’un negosiante ne’e ninia sasan (Nu’u) ba rai tanba negosiante ne’e soe Nu’u ba rai kona kedas membru PNTL ida nia ulun hodi rezulta oin nakukun no sai mós vitima, husi ida ne’e maka ema hotu bele akompaña tanba nia (Membru PNTL-red) sente moras, nia tenta foti Nu’u tuda negosiante, maibé la konsege tanba membru PNTL seluk dada tun tiha negosiante ne’e husi tiga-roda leten”, hatutan Superintendente Xefe Pedro Belo.

Eis Komandante PNTL munisipiu Dili ne’e haktuir tan asaun sira ne’e laos asaun ida ne’ebe planeadu maibé asaun sira ne’e espontañu tanba kontinuasaun husi diskusaun ne’ebe antes ne’e mosu ona. Kazu refere, oras ne’e dadaun iha ona prosesu investigasaun nia laran no ita hotu hein desizasaun ikus ne’ebe maka Tribunal maka iha ninia kompetensia atu hasai.

Media PNTL.       

Dili- Polisia Nasional Timor-Leste Unidade Espesial Polisia (PNTL-UEP) harahun material  explusivu maka hanesan Artileri 1, Granada 10 no Ojetil artilleri 4 ne’ebe maka rekola iha munisipiu Ermera, Liquisa no Bobonaro durante tinan 2020 to’o Maiu 2021.

Segundu komandante UEP Superintendente Damião  Correia hato’o  agradese ba populasaun munisipiu Ermera tanba sira nia kontribuisaun fo informasaun ba PNTL hodi rekola material Explusivu no armas ne’ebe  maka militar Indonezia husik hela iha suku, aldeia no postu administrativu nune’e ohin Unidade Espesial Polisia (UEP) husi seksaun EOD halo inativasaun hodi harahun material hirak ne’e, Nia hato’o asuntu ne’e munisipiu Ermera, Kinta (20/05)

Komandante ne’e  apela ba komunidade sira karik hetan sasan material funu nian iha munisipiu Ermera no munisipiu ne’ebe deit labele book tanba perigu ba ita nia vida nune’e informa deit ba Polisia ne’ebe besik sira nia hela fatin hanesan OPS no Eskuadra nune’e seksaun inativasaun halibur no harahun.

Iha okajiaun ne’e Segundu Komandante PNTL munisipiu Ermera Eduardo Campos hateten liu husi servisu hamutuk ho autoridade lokal no veteranus sira maka PNTL rekola material hirak ne’e husi postu administrativu Atabae munisipiu Bobonaro, Liquica no Ermera ita rekola no tau hamutuk iha Komandu munisipiu Ermera hodi halo destroisaun.

Atividade destroisaun ne’e asisti direta husi Segundu Komandante PNTL munisipiu Ermera hamutuk ho ekipa, husi seksaun Inativasaun Engeniu Explosivu (EOD-Sigla Inglesh) no Relasaun Publika Komandu Jeral hamutuk ho media komunikasaun sosial  no komunidade sira. Media PNTL

Dili, Komandu Polísia Nasional Timor-Leste (PNTL) durante loron 5 nia laran (Hahu’u husi loron 14 to’o loron 18 Maiu 2021) rezista kazu Insidente hamutuk 30 no Asidente hamutuk 11.

Superintendente Xefe Arnaldo Araújo hanesan Porta Voz Komandu PNTL liu husi konferensia imprensa tersa-feira (18/05) semana ne’e relata kazu Insidente ne’ebe Komandu rezista maka ho tipu Asaltu hamutuk 12, Baku malu 2, Tuda malu 1, Naok 1, Estraga Sasan 1, Ema lanu 1, Ema tara-an 2, Ema mout iha tasi 1 no Violensia Domestika hamutuk 9.

“Iha loron 15 fulan Maiu akontese Ró ida mout iha tasi ne’ebe tula ema hamutuk na’in 7 no sasan konstrusaun nian hanesan semente saka 50 ho diresaun Dili atu ba Ataúro, maibe wainhira iha tasi klaran mosu ró mout hodi rezulta ema na’in 4 maka mout, na’in 3 konsege salva ann, na’in 2 hetan ho kondisaun mate no na’in 2 seluk to’o oras ne’e dadaun ekipa konjunta husi Unidade Polísia Marítima (UPM) hamutuk ho F-FDTL komponente Naval sei buka tuir hela, kazu refere sei iha prosesu investigasaun kriminal hodi hatene lolos motivu ou kauza husi insidente ne’e”, esplika Superintendente Xefe ne’e.

Porta Voz Komandu PNTL afirma tan katak iha loron 16 fulan Maiu Polísia hetan informasaun katak deskonfia ema oho-ann iha aldeia 20 Setembru, suku Bebonuk, vitima ho naran Levenita Madeira idade 40 hanesan kaben husi Sekretariu Estadu Arte no Kultura. Polísia halo examinasaun iha fatin akontesimentu no lori vitíma ba hospital hodi submete ba iha autopsia. Parte polísia rekolla ona informasaun husi sasin balun, rezultadu autopsia kompetensia husi parte Hospital Nasional Guidu Valadares (HNGV) enkuantu mate isin entrega ona ba parte familia.

“Enkuantu husi loron 14 to’o loron 18 fulan Maiu mosu kazu asidente hamutuk 11 iha ne’ebe ema ho kanek kma’an 10 no grave ka mate na’in ida”, tenik Porta Voz Komandu PNTL ne’e.

Media PNTL.

Dili, Hahu’u husi loron 09 to’o loron 14 fulan Maiu tinan 2021 Komandu Polísia Nasional Timor-Leste (PNTL) rezista kazu Insidente hamutuk 21 no kazu Asidente hamutuk 6. Maske nune’e situasaun seguransa iha teritoriu nasional lao hakmatek no kontroladu.

Porta Voz Komandu PNTL Superintendente Xefe Arnaldo Araújo liu husi konferensia imprensa sexta-feira (14/05) ne’e hateten total kazu Insidente 21 kompostu husi tipu kazu Asaltu malu hamutuk 11, Tuda PNTL 1, Tuda kareta/motor 2, Tuda Uma 1 no Violensia Doméstika hamutuk kazu 6. Entretantu tipu kazu Asidente ne’ebe maka mosu hanesan kanek grave 1 no kanek kma’an 5.

“PNTL kontinua halo fiskalizasaun ba implementasaun extensaun Serka Sanitaria no Konfinamentu Jerál ba populasaun sira iha munisipiu Dili no Serka Sanitaria iha munisipiu Baucau no Covalima”, tenik Porta Voz Komandu PNTL ne’e.

Superintendente Xefe iha biban ne’e mós hato’o ba públiku katak Komandu Jerál PNTL hakarak hato’o sentidu kondelênsia ba familia matebian membru PNTL Primeiru Sarjentu Domingos Maia no Sarjentu Domingos Mendonça ne’ebe maka iha loron 12 fulan Maiu hakotu iss iha mundu ne’e. Nune’e Komandu PNTL desde hahu’u to’o ohin loron konsege rezistu membru PNTL ne’ebe mate hamutuk ema na’in 219 no sira ne’ebe maka moras permanente hamutuk na’in 29.

“PNTL iha ona kondisaun ho orsamentu ne’ebe oras ne’e dadaun iha hamutuk milaun 85 ne’ebe maka rezerva hela hodi fó apoiu ba membru sira ne’ebe maka moras todan, maibé ita hatene katak oras ne’e dadaun ita iha hela situasaun ida ne’ebe ita labele transfere membru hirak ne’ebe moras hodi halo tratamentu iha estrangeiru, no Komandu iha hela osan hamutuk milaun 20 hodi sosa aimoruk/medikamentu no halo tratamentu ba membru sira ne’ebe maka moras”, esplika Superintendente Xefe ne’e.

Xefe Gabinete Relasaun Públika afirma tan katak membru PNTL ne’ebe oras ne’e dadaun ho rezultadu pozitivu ba moras COVID-19 provizoriamente hamutuk ema na’in 16 iha teritoriu nasional, tuir rezultadu husi ekipa Saúde PNTL nian halo wainhira membru sira hala’o teste Swab.

Media PNTL.    

Dili, Komandu Polísia Nasional Timor-Leste (PNTL) liu husi Porta Voz kuarta-feira (12/05) ne’e relata informasaun parte tolu ba media ho asuntu maka hanesan Prevensaun Kriminalidade iha Teritoriu Nasional, Kazu Asaltu Malu entre grupu iha area Vera Cruz no Informasaun kona-ba Virus COVID-19.

Superintendente Xefe Arnaldo Araújo iha konferensia imprensa ne’e hateten asuntu dahuluk maka Prevensaun Kriminalidade iha teritoriu nasional. Implementasaun Estadu Emergensia (EE), Serka Sanitaria no Kofinamentu Jerál ba populasaun, la ignora servisu PNTL atu kontinua promove kondisaun seguransa, preve kriminalidade no hahalok sira seluk ne’ebe kontra Lei.

“Krime sira ne’ebe akontese no PNTL partisipa ona ba Ministeriu Públiku (MP) maka hanesan Asaltu malu entre Grupu, Asaltu Sexual, Violensia Domestika no Dano ka estraga propriedades”, relata Porta Voz Komandu PNTL ne’e.

Xefe Gabinete Relasaun Públika ne’e informa tan katak PNTL liu husi Servisu Investigasaun Kriminal Nasional (SIKN) ezekuta Mandadu Judisial husi Tribunal ba kazu Krime Homesídiu iha Universidade da Paz. Autor sira ne’ebe kaptura hamutuk ema na’in 17 no oras ne’e dadaun detein ona iha sela Polísia.

“Asaltu malu entre grupu iha loron 11 fulan Maiu 2021 rezulta membru PNTL hetan kanek tanba tuda husi sidadaun iha munisipiu Manatutu, postu Administrativu Laleia; iha parte seluk asaltu malu entre grupu 77 iha loron 11 fulan Maiu 2021 ne’ebe rezulta kanek no estragus, suspeitu aprezenta aan ona ba Komandu Munisipiu Ermera no oras ne’e halo hela identifikasaun. Kauza husi asaltu malu ne’e tanba falta dezentendimentu ba malu no ikus mai sira asalta malu”, hatutan Xefe Gabinete Relasaun Públika ne’e.

Pontu daruak ne’ebe maka hato’o iha konferensia ne’e maka kona-ba Kazu Asaltu malu entre grupu iha area Vera Cruz (Mascarinhas) aldeia 06 kontra suku Caicoli aldeia 04 rezulta kanek no estragus. Asaun Polisial nia maka fó avizu verbal, tiru Advertênsia no ikus mai Polísia halo atuasaun hodi rezulta joven na’in rua kanek. Kazu sira ne’e kanaliza ona ba MP no ita hein Delegasaun Kompetensia husi MP ba Polísia. Iha parte seluk prosesu investigasaun dixiplinar mós rejistu ona husi Departamentu Justisa.

“Asuntu ikus maka informasaun kona-ba Virus COVID-19 iha ne’ebe PNTL kontinua apoiu Ministeriu Saúde (MS) hodi disemina informasaun kona-ba inimigu invisível Coronavirus ba populasaun hotu. Fó avizu nafatin ba populasaun hotu atu kumpri Regras Organizasaun Mundial Saúde (OMS) no MS nian, fiskaliza nafatin ba fatin sira ne’ebe proíbidu ka bandu atu halo atividade Komersiu tuir Rezulasaun Governu Nu.55/2021 no nafatin husu ba ita hotu atu tuir exame médiku diagnóstiku obrigatóriu, kuandu ita hadomi ita nia familia”, hakotu Superintendente Xefe ne’e.

Media PNTL.