DILI, 01 juñu 2021 (SRP) – Vise-Ministru Interior, Antonio Armindo orienta ona Diretor Nasional Lojistika no Gabinete Inspesaun Jeral hosi Ministeriu Interior hodi halo inspesaun fizika ba kareta hodi sertifika kondisaun patrimóniu ne’ebe sei entrega ofisial ba PNTL iha tempu besik.
Objetivu fundamental husi inspesaun ne’e, maka atu hare kona-ba baze de dadus ba uzu veikulu tomak ne’ebe rejista, nune’e bele mantein nia efisiente no efikaz ba prosedimentu jestaun patramoniu atu rejistu. Ida seluk maka atu hare kondisaun fizika veikulu sira ne’ebe integra iha Ministeriu Interior tomak.
Vise-Ministru Interior, Antonio Armindo esplika inspesaun ne’e importante hodi kompleta dadus ne’ebe iha no nia konsidera kareta hirak ne’e seidauk sufisiente ba PNTL “Ohin ita mai hare rasik kondisaun fizik ba kareta hamutuk 21 ne’ebe maka tuir planu Komandu Jeral sei distribui ba postu polisia no eskuadra sira ne’ebe maka kareta seidauk iha, maibe ita konsidera kareta hirak ne’e seidauk to’o, no politikamente Ministeriu Interior hamutuk ho PNTL sei hare atu sosa tan kareta 25 iha tinan oin, hodi bele fahe ba eskuadra sira nebe mak seidauk hetan, hodi nune bele ajuda PNTL halo servisu sira hanesan ezekuta implementasaun Estadu Emerjensia no-mos preparasaun ba kampaña politika ba eleisaun prezidensial iha tinan oin no-mos Eleisaun Parlamentar ne’ebe sei mai”, dehan Antonio Armindo, ba jornalista sira iha Kuartel Jeral PNTL, Caicoli tersa ne’e.
Vise-Ministru Antonio Armindo hatutan, iha nia mandatu nia sei kontinua lobi mos doador sira no parseria dezenvolvimentu sira ne’ebe maka akreditadu iha Timor-Leste atu kontinua fo sira nia apoiu balu ne’ebe Ministeriu Interior ho PNTL labele kobre.
“Hau hanoin sistema kontrola mak importante tebes, karik identifika buat balu bele rekomenda hodi rezolve kedas antes ita entrega ofisial ba PNTL. Maibe ohin iha inspesaun ne’e notifika kareta hotu ho kondisaun diak falta maka xapa matrikula” nia fo hanoin.
Governante ne’e mos rekomenda ba Komandu atu wainhira entrega veikulu hirak ne’e, nia husu atu halo treinamentu ka pelumenus briefing ba motorista sira, nune’e bele nafatin iha kontrola no nia mos husu ba Gabinete Inspesaun Jeral mos presija halo Checklist hodi kontrola elementu baziku sira hanesan kilometrazen, oli no mina nune’e labele estraga sasan estadu nian. #AX
