News

Viqueque, Manufahi, Aileu, Komandante Jerál Polísia Nasional Timor-Leste (PNTL) Komisariu Polísia Faustino da Costa durante loron rua (12-13/10) hala’o vizita servisu ida ba iha Komandu PNTL munisipiu tolu hanesan Viqueque, Manufahi no Aileu hodi hare’e besik liu tan kondisaun no problema ne’ebe maka Komandu hasoru durante ne’e.

Iha loron 12 fulan Outubru tinan 2020, Komisariu Polísia Faustino da Costa akompaña husi Xefe Gabinete Relasaun Públika no ekipa hala’o vizita dahuluk iha Komandu PNTL munisipiu Viqueque ne’ebe hahu’u kedas hala’o enkontru ho Komandante munisipiu no Komandante eskuadra sira hodi rona preukupasaun no difikuldade ne’ebe maka Komandu ne’e hasoru durante hala’o kna’ar iha terenu.

Iha biban enkontru ne’e, Komandante PNTL munisipiu Viqueque Superintendente Sebastião Alves Quintão aprezenta relatoriu badak kona-ba Koimas ou Infrasaun ne’ebe Komandu PNTL munisipiu Viqueque hatama ba kofre Estadu hahu’u husi fulan Janeiru to’o Outubru tinan 2020 hamutuk $2.181,00. Rezista mós Servisu Investigasaun Kriminal (SIK) durante fulan Janeiru-Outubru ho total kazu 141 ne’ebe maka rezistu ba Ministeriu Públiku (MP) hamutuk 124, kazu 8 maka taka no kazu 9 maka sei iha prosesu nia laran.

Komisariu Polísia Faustino da Costa iha enkontru ne’e hateten vizita ne’e halo hodi mai hare’e no rona difikuldade ne’ebe maka Komandu hasoru. Mai fó mós Komandu PNTL nia hanoin atu ajusta tuir saida maka ita nia governu nia hakarak ba oin, instituisaun Estadu ida ne’e lao husi ne’ebe. Tanba ne’e iha 27 Marsu wainhira simu posse, iha buat haat ne’ebe tau iha importansia bo’ot tebes maka hanesan Mudansa, Konfiansa, Koizaun no Esperansa.

Hafoin hala’o enkontru iha Komandu PNTL munisipiu Viqueuque, Komandante Jerál ho komitiva hala’o fali vizita ba iha eskuadra Fatuberliu munisipiu Manufahi hodi hare’e difikuldade ne’ebe maka membru sira hasoru durante hala’o kna’ar hanesan autoridade seguransa.

Loron 13 fulan Outubru, Komisariu Polísia Faustino da Costa hala’o fila fali enkontru ho Komandante PNTL munisipiu Manufahi hamutuk ho Komandante eskuadra haat hanesan Same, Turiskai, Alas no Faturbeliu inklui Xefe Seksaun no Servisu sira Komandu munisipiu nian. Iha oportunidade enkontru ne’e Komandante PNTL munisipiu Manufahi Superintendente Joni Viana das Regras aprezenta situasaun seguransa iha munisipiu ne’e, servisu no problema ne’ebe maka infrenta durante ne’e.

Iha munisipiu Manufahi, Komisariu Polísia ne’e hala’o vizita mós ba iha Caserna Komandu nian hodi hare’e besik liu tan kondisaun edifisiu no membru hirak ne’ebe maka hela iha fatin ne’e.

Iha loron ikus vizita nian, Komandante Jerál PNTL ho ekipa to’o iha Komandu PNTL munisipiu Aileu hodi hala’o enkontru ho Segundu Komandante PNTL munisipiu Aileu Superintendente Assistente António Lourenço da Costa Soares hamutuk ho Komandante eskuadra sira hanesan Aileu Villa, Lekidoe, Laulara no Remixio.

Objetivu prinsipal husi vizita servisu autoridade másimu seguransa ne’e maka atu hare’e besik liu tan kondisaun no difikuldade hirak ne’ebe maka Komandu munisipiu sira infrenta. No objetivu segundu maka halo preparasaun planu servisu Komandu PNTL nian ba oin iha eventu sira ne’ebe maka Timor-Leste sempre selebra ba.

Media PNTL.   

Atauro, Komandu Polísia Nasional Timor-Leste (PNTL) liu husi Komandu PNTL munisipiu Dili kompleta ona estabelesimentu Konsellu Polisiamentu Komunitaria (KPK) munisipiu Dili iha suku hamutuk 36.

Segundu Komandante PNTL Munisipiu Dili Superintendente Euclides Belo iha loron 08 no 09 fulan Outubru tinan 2020 fó tomada de posse ba membru KPK hamutuk 75 iha suku Beloi Villa postu administrativu Atauro munisipiu Dili, nune’e maka estabelesimentu KPK iha munisipiu Dili kompleta ona 100% ho total hamutuk 1.625 membru KPK.

“Iha munisipiu Dili suku 36 estabelesimentu KPK hotu ona kompara ho munisipiu sira seluk ne’ebe maka balun foin maka ho númeru haat ka lima no agora dadaun ita iha formasaun kontinuasaun ba membru KPK hanesan refreshing training ne’ebe maka hala’o ona iha suku Manleuana no sei kontinua ba suku sira seluk munisipiu Dili nian”, afirma Segundu Komandante PNTL Munisipiu Dili ne’e.

Superintendente Euclides apela ba membru KPK ne’ebe maka foin simu posse atu hala’o kna’ar KPK nian tuir deklarasaun ne’ebe maka iha hodi prontu personalmente hala’o servisu hodi halo identifikasaun ba problema ne’ebe maka mosu iha komunidade nia le’et.

“Kna’ar ne’ebe ohin ita bo’ot sira (Membru KPK-red) simu hanesan vokasaun ida hodi servi ita nia komunidade ho lolos, los no momos tuir matadalan KPK ne’ebe maka iha, espera katak ita sei hasoru dezafiu lubuk ida iha komunidade maibé dezafiu ne’e labele sai obstákulu tanba ne’e ita nia prontidaun ne’e tenke tau prátika iha komunidade nia le’et”, tenik Superintendente ne’e.

Adjuntu Komandante PNTL Munisipiu Dili ne’e hatutan tan ligadu ho kna’ar ida ne’e mak husu ba ita bo’ot sira (Membru KPK-red) atu halo identifikasaun ba problema iha ita nia komunidade karik halo ho lolos tanba Atauro oan mesak religiozu/fiar na’in, nune’e deposita konfiansa iha ita bo’ot sira hodi ita hamutuk.

Kna’ar KPK nian maka sai hanesan ajente hodi halo mediasaun ba kualkér problema komunitaria nian tanba membru KPK sira hetan ona formasaun ne’ebe adekuadu ona ba asuntu kriminal nian tenke refere exsepsaun ba parte ne’ebe ita bo’ot sira hakarak halo mediasaun. KPK mós sai hanesan solusionador ne’ebe maka bele foti solusaun ki’ik ne’ebe laiha impaktu.

Media PNTL.                 

Dili- Durante fulan nen Komandu Polisia Nasional Timor-Leste (PNTL) munisipiu Manufahi rejista kazu Tentativa Homesidiu no Asidente trafiku hodi prosesu ba Tribunal.

Komandante PNTL munisipiu Manu fahi Superintendente Joni Viana das Regras hateten durante Hau nia madatu fulan neen (6) rejista kazu tentativa Homesidiu rua (2) PNTL enkamina ba Ministeriu Publiku no desijaun aplika medida koasaun Prizaun preventiva ba arguidu, Nia hato’o asuntu ne’e ba jornalista sira foin lalais iha Timor-Plaza Komoro Dili.

Nia haktuirtan alende ne’e iha mos kazu asidente iha loron 02/10 iha tuku 19:00 soke labarik ida ho idade tinan 7, PNTL to’o kedas iha fatin akontesementu maibe iha ema ida rua halo agresaun fiziku no mosu problema entaun Ajente ne’e husu apoiu ba Komandu atu fo asistensia urjente ba iha fatin akontesementu to’o iha fatin akontesementu membru PNTL nain tolu (3) mos hetan tuda.

Kazu hirak ne’e hotu submete ona ba prosesu rezultadu husi prosesu ida ne’e finalmente iha Domingu loron 04/10 ita trasporta suspetu sira ne’e ba Tribunal Distrital Suai hodi halo prosesu no rezultadu husi prosesu Interogatoriu Arguido ida ne’ebe maka halo agresaun hasoru PNTL nia hetan Medida Koasaun Aprezentasaun Periodika no arguidu seluk kumri Termu Identidade Rezidensia (TIR) .

Deputadu sira levanta kazu asidente ne’e iha Parlamentu Nasional atu dehan katak infelismente situasaun ida ne’e lao diak maibe parte husi deputadu ou ema ne’ebe maka sente ofendidu hasoru problema, iha dalan ba nia atu hato’o keixa tanba prosesu tomak iha akontesimentu asidente ne’e Polisia nia atendementu professional bainhira to’o iha fatin akontesementu Polisia asegura fatin.

Liga ho situasaun seluk Komandu PNTL Manu Fahi iha relasaun diak tebes ho Kamadas hotu-hotu, liu-liu liga ho Ex Arte Marsiais no juventude sira.

“Hau sente iha Same natureza furak tebes, ema mos diak teb-tebes, autoridade lokal no Ofisial Polisia Suku (OPS) mos iha ligasaun diak no koopera ba malu to’o iha nivel kraik ne’ebe problema laiha,” dehan Komandante Viana.

Antes termina Komandante ne’e relata durante nia mandatu atu tama fulan nen iha munisipiu Manu fahi liu husi atividade pasa revista ba transporte publiku no privadu hodi aplika koima ba Infrator sira ne’ebe kontra regras tranzitu konsege rekola osan hamutuk  $6000.00 hodi hatama reseitas ba kofre estadu; Hau mos fo ordem ba Polisia Komunitariu tenke lao no halo vizivilidade makaas. Media PNTL

Dili, Komandu Polísia Nasional Timor-Leste (PNTL) liu husi Komandante Jerál Komisariu Polísia Faustino da Costa no Segundu Komandante Jerál Komisariu Polísia Mateus Fernandes kinta-feira (08/10) ne’e hala’o enkontru ho Xefe Estadu Dr. Francisco Guterres ‘Lu-Olo’ hodi aprezenta servisu Komandu nian durante fulan Setembru tinan ne’e.

Komandante Jerál Komisariu Polísia Faustino da Costa hafoin sorumutu ba jornalista sira hateten Komandu mai atu aprezenta ba Xefe Estadu kona-ba situasaun jerál durante fulan Setembru nian no mós kazu balun ne’ebe akontese iha primeira semana fulan Outubru nian.

“Situasaun jerál iha teritoriu lao diak maske asidente ne’ebe sempre mosu, iha fulan Setembru asidente hamutuk 123 akontesimentu to’o asidente rodoviáriu ne’ebe rezulta ema na’in sanulu (10) mak mate no mós ema tolu-nulu resin walu (38) mak kanek todan”, tenik Komandante Jerál PNTL ne’e.

Komisariu Polísia ne’e afirma tan katak ne’e asaun polísia nian hodi halo baragem ka Cheek Point hanesan ita hotu akompaña iha Kapital Dili ne’ebe ita halo 178 Cheek Point no ita identifika Infrasaun ne’e hamutuk 1.355 husi númeru ne’e maka ita prega multa ba motorista no transporte sira tanba barak maka dokumentu laiha tantu karreta no ema nian, nune’e iha Setembru nia laran ita hetan Koimas hamutuk $32.480 ne’ebe maka ita hatama ba Kaixa Jerál Estadu nian.

“Iha Insidente ne’ebe akontese mós ami aktualiza ba Xefe Estadu liu-liu kona-ba kazu sira hanesan Laclo nian ne’ebe ida mate no ida kanek todan, hanesan mós kazu Manufahi ninian, liga mós ho kazu ne’ebe Viral los estudante balun hetan baku iha area Cristal ninian prosesu lao hela mesak ema minoridade deit”, haktuir Komisariu Polísia ne’e.

Autoridade másimu seguransa ne’e subliña tan katak além-de ne’e ba parte Estadu Emergensia (EE) nian maka situasaun iha fronteira ida ne’e maka aprezenta ba Xefe Estadu, oinsa Komandu nian antisipasaun ba iha parte fronteira ninian.

Media PNTL.               

Dili- Polisia Nasional Timor-Leste munisipiu Baucau hahu konsolida joventude Baucau oan hodi hametin unidade, amijade no paz atu nune’e komunidade bele moris iha ambiente ne’ebe seguru.

Komandante PNTL munisipiu Baucau Superintendente Xefe Armando Monteiro hateten agora ita iha faze konsolidasaun joventude ligadu ho problema no konflitu entre joventude ne’ebe akontese iha pasadu tanba ne’e liu husi kordenasaun no komunikasaun ho lider komunitaria, veteranus, Intelektual, joventude no organijasaun Arte Marsiais no Rituais iha faze reuniaun oinsa atu kria ekipa TaskForce ida halo kampana paz ho finalidade maka halo konsolidasaun deklarasaun kompromisiu dame ne’ebe sei halo iha tempu badak, Nia hato’o asuntu ne’e hafoin partisipa iha workshop Analisis SWOT iha Timor-Plaza Dili, Kuarta (07/10).

Alende ne’e Komandante ne’e mos tau ona iha nia ajenda programa Estabelesimentu Konsellu Polisiamentu Komunitaria (KPK) iha suku 45 ne’ebe maka seidauk nune’e autoridade seguransa bele servisu hamutuk ho povu hodi hametin seguransa no estabilidade hahu husi suku to’o munisipiu.

Hafoin simu Posse iha fulan tolu liu ba Hau hasoru difikuldade hahu husi inplementasaun programa Polisiamentu Komunitaria iha tinan 2002 to’o agora iha suku 45 maka seidauk kompleta no ida ne’e nudar Hau nia programa prioridade oinsa atu inplementa estratejia governu konstitusional da-VIII maka Polisiamentu Komunitaria no Seguransa Rodoviariu.

Agora dau-daun faze primeiru hahu ho kolokasaun OPS hodi nune’e OPS bele halo kordenasaun, komunikasaun no reuniaun ho estrutura konselu du suku hodi identifika joventude, intelektual, lider veteranus sira, organijasaun nasional no internasional liu-liu organizasaun nasional no ONG lokal sira atu involve iha estrutura KPK  nune’e bainhira iha problema ruma karik sira bele tur hamutuk hola medidas persuasiva antes hetan apoiu husi Eskuadra.

Programa no planu ida ne’e hetan apresiasaun husi parseru Fundasaun Asia (TAF-sigla ingles) no espera iha tempu badak antes tama tinan foun ita nia formasaun balu lao ona.

Konaba inplementasaun estratejia ba seguransa rodoviaria agora daudaun ita iha faze konsolidasaun hari merkadu seguru, Baucau seguru no iha tempu badak sei halo mudansa ba atividade balu ne’ebe maka durante ne’e okupa movimentu trasporte liu-liu iha terminal ne’ebe maka agora daudaun sai hanesan fatin merkadu PNTL Baucau ho Autoridade munisipiu sei muda negosiante sira  nune’e terminal ne’e bele sai terminal uniku hodi akumula movimentu transporte husi kapital ba Baucau tantu husi suku no postu Administrativu mai Baucau, hodi nune’e ita bele eduka no orienta ita nia komunidade sira hodi respeita no hakruk ba lei kodigu Estrada.  Media PNTL

Dili-Polisia Nasional Timor-Leste (PNTL) halao workshop durante loron rua (07-08 Outubru) hodi koalia konaba planu, programa, inplmentasaun misaun no vizaun atu dezenvolve Tranzitu no Polisiamentu Komunitaria.

Segundu Komandante Jeral PNTL Komisariu Mateus Fernandes hateten Analiza rua ne’e atu mellora diak liutan hanoin no vizaun hirak ne’ebe maka Komandante munisipiu sira iha liu-liu konaba Tranzitu no Polisia Komunitaria atu nune’e mai oin ita minimija labele akontesetan problema, Nia hato’o asuntu ne’e iha Timor-plaza Comoro Dili, (07/10).

Komisariu ne’e haktuirtan analiza ne’e sei foka liu ba problema tranzitu, Polisia Komunitaria oinsa mellora ita nia planu, oinsa hetan misaun ho vizaun ne’ebe lolos liga ho Polisia Komunitaria no Tranzitu tanba asuntu rua ne’e sai prekuasaun Estadu no governu ne’ebe maka Polisia inplementa tanba ne’e lor-loron Polisia tenke kadi sira nia matenek no hanoin hodi mellora liutan esperensia ne’ebe sira iha hodi responde ba nesesidade ne’ebe komunidade no estadu hateten ba Polisia.

Workshop ida ne’e inportante teb-tebes hodi hare konaba Analiza Swot nia inplementasaun hodi responde prekupasaun ne’ebe maka iha , maske ita iha difikuldade oi-oin maibe ita kontinua iha komitmentu nafatin oinsa atu solusiona ita nia problema.

“Hau husu ba Komandante munisipiu sira, Tranzitu no Polisia Komunitaria atu partisipa ativu hodi halo planu ne’ebe diak, oinsa inplementa, identifika Programa , misaun no vizaun no nune’e wainhira ita hatama ita nia planu Nai ulun sira bele intende,” Dehan Komandante Jeral.

Iha okajiaun ne’e Embaxador Nova Zelandia iha Timor-Leste Philip Hewitt hateten Planeamentu hanesan parte ida inportante tebes iha siklu programa atu hakat projetu ida tanba bele ajuda ita hodi identifika ita nia metas no rejultadu sira mak ita atu atinji.

Nia haktuirtan parte ida ne’ebe inportante liu maka inplementasaun husi saida maka ita planea ona, monitorijasaun no evaluasaun ba programa ne’ebe inplementa ona no koko halo adaptasaun ba saida maka ita hanoin inportante no presija halo ajustamentu.

Hein katak worksop loron rua ne’e sei sai loron ne’ebe produtivu tebes ba PNTL atu nune’e bele hetan planu ne’ebe diak ba inplementasaun ho rekursu ne’ebe kualidade no susesu ba ita boot sira hotu

Partisipa iha serimonia ne’e parseru Fundasaun Asia, Komandante Operasaun, Xefe Gabinete Relasaun Internasional, Komandante Unidade Tranzitu, Xefe Departamentu Polisiamentu Komunitaria, Komandante munisipiu 12 no RAEOA, Ofisiais Subalternu, Sarjentu no Ajente Sira. Media PNTL

Covalima- Komandante Jeral Polisia Nasional Timor-Leste (PNTL) halao vizita servisu ba postu Unidade Patrulamentu Fronteira (UPF) hodi asegura seguransa iha fronteira no prevene movimentu ilegal.

Komandante Jeral Komisariu Polisia Faustino da Costa alerta ba Komandante munisipiu, Unidade no membru hotu  atu halao servisu makaas liutan hodi kombate movimentu illegal iha fronteira ligadu ho atividade Grupu Arte Marsiais (GAM) neebe maka ba hasae sabuk iha Indonezia liu husi fronteira terrestre nunee bele evita transmisaun pandemia Virus CORONA.

Iha loron Sabadu (03/10) Komandante Jeral akompana husi Xefe Gabinete no membru husi Seksaun Planeamentu halo vizita ba postu UPF iha Postu Salele, Lela, Altu Lebos no Postu Vizilansia iha Bora, Sasa, Wefauk,  nomos Komandu Munispiu Covalima, Bobonaro no Kuartel UPF Batugede.

Alende nee Komandante Jeral vizitamos Kompania Delta Unidade Espesial Polisia (UEP) no postu vizilansia Unidade Polisia Maritima (UPM) iha Maubara (Loes).

Iha vizita ne’e  Komandante Jeral mos hare diretamente dalan illegal ne’ebe maka durante ne’e sidadaun sira utilija hodi hakat liu ba Indonezia. Media PNTL

Dili- Komandu Polisia Nasional Timor-Leste (PNTL) lakontan membru nain ida ne’ebe maka husik ona mundu ne’e (mate) hodi ba fatin deskansa ikus nian.

Porta Voz PNTL Superintendente Xefe Arnaldo Araujo hateten Komandu Jeral PNTL lakon nia membru Ajente Prinsipal Abel Tilman Vicente ne’ebe maka durante ne’e halao nia knaar iha Komandu Unidade Patrulamentu Fronteira (UPF) Batugade, Seksaun Justisa no hakotu iss iha Domingu loron 04/10 tuku 6:30, Nia hato’o asuntu ne’e iha Komferensia Empresa iha Kuartel Jeral PNTL Kaikoli Dili, Segunda (05/10)

Nia haktuirtan Komandu hato’o Sentidu Kondolensia profundu ba Komandu UPF no familia ne’ebe maka matebian husik hela, Komandu lakon tebes nia membru ida ne’ebe maka dedika nia aan ba rai ida ne’e liu husi nia servisu hanesan membru Polisia.

Entretantu Komandante UPF Superintendente João Sancho Pires sente lakon nia membru diak ida ne’ebe maka halo servisu iha terrenu, matebian hanesan membru ne’ebe maka loyal ba Komandu.

Nia haktuirtan Matebian halao hela servisu iha Kuartel UPF, durante halao servisu matebian laiha moras ruma, iha loron Sabadu 03/10 nia servisu to’o kalan, hafoin han kalan hotu membru ida-idak fila ba nia Baraka no deskansa maibe derepente moras ataka matebian nune’e Hau orenta Xefe operasaun ba nia fatin hodi koalia no konvense nia, matebian mos sei koalia nafatin lia fuan balu ba Xefe operasaun no Hau orienta Xefe operasaun ho memebru nain 3 hodi lori ba Klinika Balibo hodi halo tratamentu atu hatene moras ne’e oinsa maibe la konsege salva.

Horseik Komandu UPF kordena hodi hetan Kaixaun no Ambulansia hodi mai to’o Dili ho Familia no lorokraik desloka ba Betanu to’o hori kalan no aban 06/10 maka prosesu Funeral iha nia rai moris fatin .

Matebian kazadu tanba ne’e komandu sei liga ho Rekursu Humanus hodi hare nia Diretu ligadu ho Seguransa Sosial.

Matebian Ajente Prinsipal Abel Tilman Vicente tinan 33, husi munisipiu Manufahi Betano , tama iha Akademia Polisia iha tinan 2012 graduasaun  no kolokasaun ba UPF iha 2013 to’o nia hakotu iss. Media PNTL

Dili, loron 5 nu’udar loron segunda-feira dahuluk fulan Outubru 2020 Komandu Polísia Nasional Timor-Leste (PNTL) hala’o serimonia Isar Bandeira ne’ebe maka dirigi husi Komandante Jerál PNTL Komisariu Polísia Faustino da Costa.

Iha ninia intervensaun ba serimonia ne’ebe hala’o iha resintu Kuartél Jerál Kaikoli Komandante Jerál PNTL hateten Komandu PNTL durante semana ida lakon ninia membru hamutuk na’in 3 ne’ebe mai husi munisipiu Aileu, Lautem no Dili. Tanba ne’e, husu ba membru hotu-hotu atu tau atensaun ba saúde idak-idak nian maske hala’o kna’ar iha terenu.

“Iha fim-de-semana ne’e ita lakon ita nia membru ida PNTL ninian, situasaun ida ne’e kuaze iha semana hirak ne’e PNTL lakon ona ema na’in 3 maka hanesan ida iha Aileu no Lospalos, situasaun hirak ne’e nota katak risku tebes ba moras no ida ne’e kestaun ida ita tenke tau ita nia ann oinsa atu evita tanba moras ida atakasaun ne’e, ita bele servisu maibé ita mós tenke tau ann atu oinsa atu labele hetan depresaun ho mós wainhira iha moras ruma tenke konsulta”, afirma Komandante Jerál PNTL ne’e.

Komisariu Polísia ne’e akresenta tan hanesan ita hotu hatene Estadu Emergensia (EE) ne’ebe hala’o ba dala-lima kontinua tan EE ba dala-neen, dala-ruma ita iha Komandu Jerál sente katak ne’e responsabilidade Komandu Munisipiu, Unidade sira nian mesak maibé ne’e lalos tanba ita hotu tenke hola parte oinsa atu asegura implementasaun EE ne’ebe iha no sei kontinua hela.

“Tanba ne’e hato’o ba hotu-hotu, orienta ona Komandu Operasaun oinsa ita hirak iha Komandu Jerál ne’e tenke suporta munisipiu Dili no mós fatin balun ne’ebe wainhira nesesita ita tenke apoiu”, tenik na’in ulun PNTL ne’e.

Autoridade másimu Seguransa ne’e subliña tan Komandu orienta ona Tránzitu Komandu munisipiu Dili, ba membru PNTL tomak ne’ebe konduz transporte (Motor & Karreta) maka laiha karta kondusaun tenke foti. Tanba ita mak sai exemplu implementador uluk, molok ita haruka no obriga ema seluk atu implementa.

Media PNTL.              

Dili- Governu Nova Zelandia liu husi nia Embaxador iha Timor-Leste Oferese kareta haat (4), no edifisiu ida ba Polisia Nasional Timor-Leste (PNTL) atu apoia servisu Polisiamentu Komunitaria (POLKOM) hodi hakbesik aan ba povu.

Embaxador Philip Hewitt hateten loron ida ohin hanesan loron inportante ba PNTL ho Nova Zelandia tanba ita bele entrega kareta haat(4), ekipamentu servisu no uma edifisiu ida ba PNTL. Hau hein katak apoiu ida ne’e bele ajuda PNTL hodi kontinua nafatin servisu POLKOM hodi kontinua hakbesik aan ba komunidade, Nia hato’o asuntu ne’e iha serimonia asinatura guia entrega iha Kuartel Jeral PNTL Kaikoli Dili, Kinta (01/10).

Nia haktuirtan Komisariu Polisia Nova Zelandia iha nia karta haktuir maske programa PAPK ne’ebe atu remata, hau hakarak fo hanoin hikas katak programa ne’ebe sei remata no prezensa Polisia Nova Zelandia iha rai laran sei laiha maibe ita nia relasaun metin ida ne’e sei kontinua liu husi adidu Polisia Nova Zelandia iha Jakarta.

“Governu Nova Zelandia sei mantein apoiu ba setor seguransa liu husi Fundasaun Asia atu nafatin servisu ho PNTL ho komunidade hodi asegura hakmatek no estabilidade ba Timor-Leste,”  dehan Embaxador.

Hau sente triste uituan tanba iha fulan hirak liuba ami tenke foti desijaun ida difisil hodi haruka fila Asesor Polisia nain tolu(3) ho sira nia familia hodi fila ba Nova Zelandia lais liu husi programa PAPK ne’ebe sei remata iha fulan oin tanba pandemia COVID-19, maske nune’e Xefe ekipa Polisia Nova Zelandia kontinua nafatin servisu liu husi distansia ho funsionariu iha Embaixada no funsionariu lokal sira iha Dili hodi dezenvolve planu tranzisaun atu asegura katak atividade balu bele kontinua iha jestaun Fundasaun Asia (TAF).

Iha okajiaun ne’e Komandante Jeral PNTL Komisariu Faustino da Costa hateten serimonia ida ohin nudar kontinuasaun ne’ebe laos ninin no rohan ba apoiu governu Nova Zelandia nian liu-liu Polisia Nova Zelandia ba iha prosesu dezenvolvimentu PNTL iha area Polisiamentu Komunitatria.

Komisariu ne’e haktuir programa ne’ebe Polisia Nova Zelandia sempre apoiu hahu kedas husi Sentru Formasaun Polisia to’o ikus mai hari programa ne’ebe ohin loron ejisti no inplementa to’o iha nivel suku no munisipiu hotu., programa hirak ne’e reforsa liutan iha tinan 2012 bainhira Timor-Leste hetan fiar no governu hato’o ba PNTL katak kooperasaun PNTL ne’ebe govenu Timor-Leste halo ho governu Nova Zelandia maka instala programa TLCPP iha Komandu Jeral.

Timor-Leste Community Policing Program (TLCPP) halao iha tempu barak nia laran no konsege instala Polisiamentu Komunitaria ba suku 294, no iha munisipiu 12 no RAEOA hari Konselu Seguransa Munisipal (KSM) nune’e mos husi konselu hirak ne’e iha parte governasaun nian maka ho apoiu Polisia Nova Zelandia no nia Embaixada iha Dili alende ita halo formasaun no kapasitasaun ba membru PNTL kontinua kedas ho apoiu seluk hanesan iha suku sira hahu hari konstrusaun Uma ba Ofisial Polisia Suku no seluktan. PNTL iha nafatin esperansa katak konfiansa ne’ebe fo no atribui ba Fundasaun Asia nafatin apoia no fasilita PNTL iha area POLKOM to’o oras ne’e prosesu treinamentu formasaun no estabilesementu Polisiamentu Komunitaria nafatin lao hela iha munisipiu.

Hodi Komandu nia naran agradese ba Embaxador Nova Zelandia iha Timor-Leste no ekipa tomak ne’ebe servisu hodi programa hirak ne’e no ikus mai programa hirak ne’e sai hanesan nain ba instituisaun  PNTL hodi servi ita nia komunidade.

Aproveta oportunidade ne’e hato’o ba Komandu Operasaun liu-liu ba departamentu Polisiamentu Komunitaria apoiu transporte, edifisiuno ekipamentu ne’ebe oferese ba ita husu atu uza ho responsabilidade ho kuidadu nune’e sasan hirak ne’e it abele uza iha tempu naruk nia laran ba interese servisu nian.

Kareta ne’ebe maka Governu Nova Zelandia entrega ho marka Hi-lux 3 no Fortuner ida no uma edifisiu kompleta ho fasilidade hanesan Komputador, Makina Fotokopia no moviliaria seluktan

Serimonia ne’e partisipa husi Inspetor Jeral, Komandante Administrasaun, Komandante Operasaun, Komandante Profost, Xefe Relasaun Publika, Xefe Relasaun Internasional, Komandante Departamentu polisiamentu Komunitaria ho nia membru tomak. Media PNTL