News

Dili- Situasaun seguransa no ordem publika iha Timor-Leste kontroladu no seguru nune’e povu kontrinua halao nia knaar ho seguru.

Komandante Jeral PNTL Komisariu Julio da Costa Hornay hateten enjeral situasaun seguransa rai laran lao hakmatek no kontroladu, laiha problema boot ne’ebe maka presija toma atensaun imediata ka halo atuasaun, Nia hato’o asuntu ne’e ba jornalista sira iha knaar fatin Kaikoli Dili, Segunda (13/08).

Komisariu ne’e haktuirtan katak maske iha kazu balun ne’ebe maka akontese hanesan kazu violensia domestika, joven sira hemu tua lanu depois tuda malu no baku malu, maibe Polisia marka prezensa hodi atende problema hirak ne’e.

Kazu balu Polisia konsege lori ba prosesu, kazu balu wainhira Polisia to’o fatin akontesementu suspetu sira halai lakon, no kazu balu informasaun iha terrenu la temi suspetu sira nia naran entaun polisia sei buka informasaun hodi kaptura suspetu sira maibe presiza mandadu kapturasaun husi Pinisteriu Publiku nune’e Polisia ezekuta. Media PNTL

Dili- Komandu Polisia Nasional Timor-Leste fo promosaun diviza por antiguidade ba membru nain sanulu resin ne’ebe maka hatudu prestasaun servisu diak durante ne’e.

Segundu Komandante Jeral PNTL Komisariu Faustino da Costa hateten promosaun por antiguidade ne’e halao tanba membru ne’e halao knaar ho diviza ne’e to’o tinan lima (5) ou liu ho kategoria diviza Ajente ba Ajente principal, Ajente principal ba ajente Xefe, Sarjentu ba primeiro Sarjentu, no Inspetor Assistente ba Inspetor, Nia hato’o asuntu ne’e ba jornalista sira hafoin serimonia promosaun diviza iha Kuartel Jeral PNTL Kaikoli Dili, Kinta (09/08).

Komisariu ne’e haktuir ba promosaun por antiguidade la depende ba vaga iha kalae maibe tuir kriteriu hanesan membru ne’e lima (5) ou neen (6) iha diviza ida ne’e, la halo problema, laiha kazu, no kondisaun fizika no mental diak.

Promosaun diviza por antiguidade ne’ebe maka realiza ohin iha Kuartel Jeral simbolikamente fo ba membru nain tolu (3) maka hanesan Ajente Prinsipal Margarida F.M da Cruz promove ba postu Ajente Xefe, Sarjentu Jose N.B Soares promove ba postu Primeiru Sarjentu no Inspector Assistente Gaspar N. Abi promove ba postu Inspector no ba sira seluk Komandante Unidade no munisipiu maka organiza tanba despaisu husi Komandu Jeral fo sai ona.

Membru hirak ne’ebe hetan promosaun diviza maka hanesan Ajente principal promove ba Ajente Xefe, Sarjentu nain ida (1) promove ba Primeiru Sarjentu no Inspector Assistente nain hitu (7) promove ba Inspetor; Maioria Ofisial sira feto husi Saude PNTL, Servisu imigrasaun nain ida no Pilotu PNTL.

Promosaun Diviza por antiguidade ne’ebe maka realiza ohin iha Kuartel Jeral diriji husi Komandante Jeral, akompaña husi Segundu Komandante Jeral no partisipa husi ofisiais sira. Media PNTL

Dili- Komandu Polisia Nasional Timor-Leste (PNTL) no Falintil Forsa Defeza Timor-Leste (F-FDTL) halo briefing jeral konaba seguransa nasaun nia ligasaun ho situasaun politika rai laran.

Komandante Jeral PNTL Komisariu Julio da Costa Hornay hateten hanesan forsa seguransa no defeza ita hamrik metin no hamutuk nafatin hodi koopera ba malu iha servisu iha terrenu ne’e maka intensaun ita hamutuk iha ne’e atu hato’o briefing jeral ida ne’e ba Komandu rua, Nia hato’o asuntu ne’e iha intervensaun Briefing Jeral Seguransa iha Centru Formasaun Polisia Dili, Tersa (24/07).

Komisariu Julio haktuirtan Nudar Forsa seguransa no defeza firmeja hodi mantein nafatin estabilidade no paz liu husi servisu makaas, pasensia no sakrifisiu ne’ebe ita halo; Hau, Jeneral Lere hamutuk ho Ministru Defeza no Ministru Interior interinu buka nafatin dalan atu koalia nafatin ho nai ulun sira hanesan Prezidente Republika, Primeiru Ministru no Parlamentu Nasional koalia oinsa buka solusaun ba situasaun PNTL no F-FDTL.

Liga ba situasaun politika rai laran ita hotu rona no akompaña impasse politika ne’ebe lao iha ita nia rai husi entidade sira ho situasaun politika ida ne’e konvida ita forsa seguransa atu alerta hodi mantein seguransa paz no hakmatek.

buat ne’ebe ita halo ona iha fulan hirak liu ba forsa rua hamutuk ida deit ho objetivu boot tebes hodi manan komfiansa husi komunidade, autoridade lokal no lideransa sira no komunidade internasional, ita mantein nafatin ida ne’e tanba Inportante forsa rua hamutuk atu mantein estabilidade no paz ba povu no nasaun.

Iha okajiaun ne’e Xefe Estadu Mayor General F-FDTL  Jeneral Lere Anan Timur hateten briefing jeral ne’e alende atu apar ho situasaun politika rai laran hakarak mos halibur hamutuk ofisiais husi instituisaun rua ne’e maske instituisaun F-FDTL no PNTL misaun ketak-ketak maibe iha situasaun konkreta ruma mosu  ita hamutuk organija malu komandu fo komfiansa institusional

Politika defeza no seguransa maka atu nasaun ne’e estavel, nudar Komandante Jeral, Xefe Estadu Mayor no Segundu Komandante Jeral  ami nia prekupasaun maka halo nusa para instituisaun rua ne’e garante seguransa no estabilidade atu estadu no  governu metin atu povu moris iha estabilidade no paz nia laran.

Briefing jeral seguransa ne’e partisipa husi Segundu Komandante Jeral PNTL, Vice Xefe Estadu Maiyor F-FDTL, Ofisiais Superior PNTL no Ofisias Kapitaun F-FDTL. Media PNTL

Dili- Media maka espiritu ba demokrasia tanba media hanesan pilar inportante husi demokrasia iha estadu direitu demokratiku hodi hatutan povu nia lian, nudar instrumentu ida atu fasilita sosiedade hodi komunika ba malu no halo kontrolu sosial.

Xefe Gabinete Asesor Juridiku PNTL Inspetor Virgilio D. Correia hateten  Polisia Nasional Timor-Leste (PNTL) hó Media tenke no sempre fo konfiansa ba malu hodi garante estabilidade politika no trasmite mensangen ba públiku hó imparsiál no neutral, tanba instituisaun rua ne’e sempre presiza malu tuir ida-idak nia misaun ne’ebe konsagra iha Konstituisaun RDTL, Nia hato’o asuntu ne’e iha iha aprejentasaun Forum Dialogu Dili iha salaun Ministeriu Finansas Aitarak laran Dili foin lalais.

Nia haktuir ita kompara PNTL ho média hanesan kilat ne’ebe labele utuliza tuir ema ida-idak  vontade ka sira nia hakarak, maibe uza tuir stándar no kode etika ne’ebe instituisaun rua ne’e iha.

Atu garante servisu lao ho diak PNTL no média labele politizadu husi politikus sira; waihira politizadu maka kualidade informasaun no prevensaun kriminalidade sei la kredibel, la proporsionál no la iha transparansia hodi haklaken mensanjen demokrasia ba públiku.

“ Papel Média iha Operasaun Polísial nian durante eleisaun maka hamutuk hó PNTL promove kondisaun seguransa, asegura manutensaun ordem publika, no prevene kriminalidade no hahalok seluk ne’ebé kontra valor demokrasiaa nian, ne’ebe hanaran krime eleitoral,”Inspetor Virgilio dehan.

Media no PNTL hatudu ona kualidade professional hodi fo kontribusaun ba susesu eleisaunXefe suku, eleisaun Prezidensia, eleisaun Parlamentar no eleisaun Antisipada 2018 nune’e povu ezerse sira nia poder politika hodi hili sira nia lideransa ho livre, direita no sekreta.

Iha okajiaun ne’e Prezidente Asosiasaun Radio Komunidade Timor-Leste  Prezado Ximenes husu ba PNTL atu servisu hamutuk ho radio komunidade iha munisipiu atu transmite informasaun seguransa no lalaok servisu Ofisial Polisia Suku (OPS) iha suku hotu iha teritoriu laran tomak nune’e komunidade iha area rural bele hatene, kompriende no kontribui ba seguransa.

Iha fim da semana ne’e loron 19-20 de Jullu, Konselu Imprensa (KI) Timor-Leste realija Forum Dialogu Dili ho tema “ Building a Network to strengthen Media Self Regulatory Mechanism”  in South Asia and the pacific ka auto regulasaun media iha sudeste Aziatiku hodi halibur hamutuk konselu Imprrensa husi Indonezia, Filipina, Tailandia, Papua Nova Guinea no seluktan hamutuk ho media nain, jornalista no estudante Komunikasaun sosial husi UNTL no UNITAL hodi fahe ideia ba malu.  Media PNTL.

Dili- Komandu Polisia Nasional Timor-Leste (PNTL) halo enkontru ho parseru dezenvolvimentu sira hodi hare hamutuk programa hirak ne’ebe maka inplementa ona no kontinuasaun ba futuru.

Komandante Jeral PNTL Komisariu Julio da Costa Hornay hateten enkontru ne’e atu halo evaluasaun servisu ho parseru United Nation Development Program (UNDP) ne’ebe maka durante ne’e fo apoiu ba PNTL, Nia hato’o asuntu ne’e ba jornalista sira hafoin enkontru ho parseru sira iha Kuartel jeral PNTL Kaikoli Dili, Kuarta (18/07).

iha area Administrasaun no operasaun, apoiu finanseru ba dezenvolvimentu instituisaun PNTL ne’ebe maka ohin sira relata para depois ami fo hanoin buat balu ne’ebe presija atu hadia no aumentatan.

Komisariu Hornay haktuirtan katak parseru sira hanesan Estadus Unidus Amerika (EUA), Embaixada Japaun no TLPDP iha komitmentu nafatin atu fo apoiu PNTL liu husi UNDP tanba ne’e inportante liu maka nudar timor oan oinsa ita aproveta ida ne’e, aprende buat ruma hodi tau iha ita nia ulun no ita nia laran para depois uza hodi dezenvolve instituisaun.

Durante ne’e parseru sira apoiu PNTL iha area Administrasaun hanesan parte Lojistika, Rekursu Humanu, Finansas, IT  no Relasaun Publika no area operasional ba Polisiamentu Komunitaria, Sosializasaun lei armas brankas, lei tranzitu seguransa rodoviariu no seluktan.

Iha okajiaun ne’e Reprejentante UNDP Maja Stojanovska hateten ami nia mandatu maka atu suporta haforsa kapasidade PNTL nian tanba ne’e ami agradese ba PNTL ne’ebe maka kopera no suporta inplementasaun projetu ne’e, PNTL sai hanesan parseru estratejiku ba tempu naruk, koperasaun servisu ho PNTL inportante tebes ba seguransa sidadaun nian, paz no estabilidade iha nasaun post komflitu ne’ebe maka PNTL servisu makaas tebes hodi prevene krime no violensia.

Enkontru parseria ne’e partisipa husi Komandante Komandu Administrasaun, Superintendente Xefe Mateus Fernandes, Ofisiais Sub Alternus no parseru TLPDP, reprezentante Embaixada Japaun no reprezentante Embaixada Amerika ne’ebe maka iha komitmentu boot tebes atu suporta nafatin PNTL iha future. Media PNTL

Oecusse – Komandante Jeral Polisia Nasional Timor-Leste (PNTL) halo vizita servisu ba Rejiaun Autonoma Espesial Oecusse (RAEOA) hodi hare direta servisu membru sira iha baze.

Komandante Jeral PNTL Komisariu Julio da Costa Hornay hateten lori Komandu PNTL nia naran kongratula agradese no fo parabens ba PNTL Oecusse nia servisu makaas no sakrifisiu hodi asegura estabilidade no paz iha rai Oecusse durante prosesu Eleisaun Parlamentar Antisipada to’o formasaun governu Nia hato’o asuntu ne’e iha formatura membru PNTL iha Kuartel PNTL Oecusse foin lalais.

Komisariu Julio haktuirtan Oecusse hakmatek tanba ema hotu nia koperasaun, Forsa Seguransa no Defeza hamutuk hodi asegura paz no estabilidade ho apoiu populasaun Oecusse ne’ebe hatudu maturidade politika tanba ne’e hau fo parabens ba susesu ne’ebe imi hatudu.

“ Firmeja nafatin mantein lei no ordem hodi halao misaun, Hau fo ordem ba Komandante munisipiu no eskuadra sira atu halao knaar tuir lei no kompetensia ne’ebe maka iha, PNTL nia misaun klaru atu asegura estabilidade no paz ba povu Timor-Leste especial Oecusse,” Komisariu Julio apela.

Iha vizita servisu durante loron rua (2) iha Oecusse Komandante Jeral fo tomada de posse ba Vise Prezidente Konselu Seguransa Rejional (KSR), enkontru ho membru KSR sira, inagura gruta Santo Antonio Eskola Kolejio Santo Antonio Oecusse ne’ebe maka apoiu husi PNTL Oecusse, enkontru ho Veteranu sira no membru PNTL Oecusse hodi motiva membru sira atu servisu makaas hodi asegura estabilidade no paz. Media PNTL

Oe-Cusse- Komandante Jeral Polisia Nasional Timor-Leste (PNTL) Komisariu Julio da Costa Hornay halo enkontru  ho Veteranu Rejiaun Espesial Autonoma Oe-cusse hodi fo agradesementu ba veteranu sira nia kontribuisaun ba seguransa.

Komandante Jeral PNTL Komisariu Julio da Costa Hornay hateten enkontru ho veteranus sira ne’e konaba servisu ne’ebe maka durante ne’e lao hahu husi prosesu Eleisaun Antisipada Parlamentar, tanba durante ne’e PNTL halo koperasaun diak no aprosimasaun ho veteranu sira no servisu hamutuk hodi kria estabilidade no paz nune’e buat hotu lao ho susesu, Nia hato’o asuntu ne’e ba Jornalista sira iha oecusse foin lalais ne’e.

Komisariu Hornay haktuirtan katak estabilidade no paz laos PNTL deit maibe veteranu sira mos sai fator determinante maske sira laos ona militar maibe  sira nia partisipasaun no involvimentu ba reforsa seguransa maximu tebes, tanba ne’e ami orgulu no mantein nafatin koperasaun diak no hakbesik ba veteranus sira hodi hamutuk kopera ba malu atu kria estabilidade no paz ba rai doben Timor-Leste.

“ PNTL iha prinsipiu ida no hau fo hatene ba Komandante munisipiu sira hotu atu iha ida-idak nia munisipiu halo kordenasaun no koperasaun diak no aprosimasaun ho veteranu sira para nune’e ita hotu hamutuk nafatin hodi estabelese paz no dame,”dehan Komandante Jeral.

Iha okajiaun ne’e veteranu Jeferino da Cruz Sao hateten tuir prespetiva Veteranu ami hare katak atendementu PNTL ba populasaun Atoni Oecusse, veteranu, instituisaun publiku no privadu, nomos komponente hotu iha Oe-cusse lao diak tebes tanba ne’e maka iha Eleisaun Jeral tinan 2017 no eleisaun Antisipada lao ho susesu tanba fator koperasaun ne’ebe lao kapas tebes iha Oe-cusse maske iha problema, partidu politiku ne’e normal ba sidadaun iha nasaun demokratiku ida maibe ita sempre opta unidade.

Enkontru halao liu husi vizita servisu Komandante Jeral PNTL Komisariu Julio da Costa Hornay iha Rejiaun Autonoma Oe-cusse semana foun lalais ne’e. Media PNTL

Dili- Polisia Nasional Timor-Leste (PNTL) Unidade Tranzitu Seguransa Rodovariu halo evualusaun servisu tinan 2018 nune’e bele hadia diak liutan servisu lor-loron nian.

Diretor Departamentu Tranzitu Nasional Inspetor Xefe António L.C. Soares hateten liu husi enkontru ne’e halibur hamutuk Xefe Tranzitu no Xefe Aministrasaun munisipiu 12 inklui rejiaun Oecusse hodi halo evaluasaun servisu mediu prazu no longu prazu ba atividade tranzitu seguransa rodoviariu nian, Nia hato’o asuntu ne’e ba media PNTL iha salaun enkontru PNTL Kaikoli Dili, Segunda (09/07).

Nia haktuirtan katak atu hadia diak liutan servisu Polisia Unidade Tranzitu nian maka presija fo kapasitasaun ba membru sira hodi hasae sira nia koñesementu konaba lei no regulamentu nune’e bele halao knaar ho diak bazeia ba lei no ordem; alende ne’e presijamos ekipamentu no transporte

Iha Okajiaun ne’e Komandante Komandu Administrasaun Superintendente Xefe Mateus Fernandes nudar Komandante Operasaun Interinu hateten liu husi inkontru ne’e komandante tranzitu nasional  bele halo avaliasaun servisu atu nune’e servisu ne’ebe maka halao karik ladun diak no komunidade ladun satisfetu ba lalaok no atuasaun polisia nian no buat balu la tuir lei karik iha avaliasaun ida ne’e retoma para iha futuru mai halo diak liutan.

“Tranzitu ne’e servisu ida ne’ebe inportante tebes tanba tranzitu hanesan asaun operasional ida ne’ebe lor-loron diretamente hamutuk ho komunidade sira hodi halo cek point, patrula no atividade seluktan ne’ebe ligadu ho servisu tranzitu nian,” Komandante Mateus haktuir.

Komandante ne’e haktuirtan katak koalia konaba ekipamentu no treinamentu ne’e inportante tebes tanba atu halo servisu ho professional Polisia tenke treinadu no iha fasilidade ne’ebe sufsiente nune’e bele halao servisu ho professional no proporsional nomos Polisia tenke motivadu no matenek atu priense nesesidade no ejijensia povu no nasaun.

Iha abertura enkontru komandante Operasaun Interinu Superintendente Xefe Mateus Fernandes husu ba Xefe tranzitu sira atu orienta membru hodi halao servisu ho disiplina no kumpri lei ne’ebe maka iha, niamos husu atu membru tranzitu sira uza tempu livre hodi tuir kursu lingua ingles no portuges nune’e karik iha oportunidade bele ba tuir kursu no formasaun iha rai liur nomos hola parte iha misaun forsa manutensaun paz (Peace Keeping force) Media PNTL.

Dili- Komandu Jeral Polisia Nasional Timor-Leste (PNTL) halo enkontru ho Prezidente Republika (PR) hodi aprejenta situasaun seguransa rai laran ne’ebe paz no hakmatek.

Komandante Jeral PNTL Komisariu Julio da Costa Hornay hateten Ami informa katak situasaun jeral iha teritoriu laran tomak lao hakmatek no laiha problema bo’ot ne’ebe maka presija atensaun urjente , hanesan bai-bain ita hotu hatene katak problema insidente no asidente ne’ebe maka akontese iha Dili laran PNTL firmeja nafatin hodi halo atendementu no patrulamentu ba prevensaun iha rai laran, Nia hato’o asuntu ne’e ba jornalista sira hafoin enkontru ho PR iha palasiu Prezidente Bairo-Pite Dili, Sexta (06/07).

Komisariu Julio haktuirtan katak ami mos informa ba Prezidente da Republika konaba apoiu lojistika iha orsamentu duodesimu PNTL hasoru difikuldade konaba transporte no konvustibel hodi suporta membru iha servisu operasaun iha terrenu.

“Komandu Operasaun iha nivel munisipiu no unidade hato’o kestaun ida ne’e mai Komandu Jeral maibe tanba to’o agora orsamentu annual seidauk iha no sei uza orsamentu duodesimu ne’ebe maka limitadu tebes no ejekusaun urjente maka presija hato’o ba estadu hodi konsidera, ” Nia dehan.

Iha nia lia menon Prezidente Republika hateten nudar Xefe de Estadu sei informa kestaun ne’e ba governu no ami hatene katak governumos entende ona situasaun ida ne’e.

Alende ne’e informa mos servisu Komandu Jeral nian hodi partisipa iha asembelia jeral Organizasaun Nasões Unidas (ONU) nian iha Nova Yorke semana rua liu ba, informa ba Prezidente Republika katak ONU kontente teb-tebes hakarak apoiu PNTL hodi involve aan iha misaun da paz iha nasaun hirak ne’ebe iha konflitu, ami konsidera oportunidade ne’e diak ba PNTL atu manan esperensia iha misaun da paz iha ONU nian.

Koalia konaba misaun da paz ONU nian PNTL prontu tanba iha enkontru Asembleia ONU hau hato’o intervensaun hodi fahe ita nia esperensia katak hahu iha tinan 1999 to’o 2012 ONU nia misaun hotu PNTL hetan esperensia bo’ot iha servisu Nasões Unidas nian.

Atu prepara aan diak liu ba misaun ONU maka horseik (05/07) PNTL loke ona kursu lingua inglesh ba membru Unidade Espesial Polisia (UEP)  primera faze no segunda faze, alende ne’e PNTL mos halo kordenasaun ho TLPDP no sira konkorda atu fo apoiu orsmentu ba preparasaun ne’e tanba ne’e oras ne’e dadaun ita prepara ita nia pessoal no rekursu material atu ba partisipa iha misaun ONU. Media PNTL