News

Dili, Komandu Polísia Nasional Timor-Leste (PNTL) Kinta-feira (24/05) ne’e hala’o enkontru semanal ho Presidente Repúblika (PR) Dr.Francisco Guterres “Lu-Olo” hodi hato’o situasaun seguransa iha rai laran.

Komandante Jerál PNTL Komisariu Polísia Julio da Costa Hornay akompaña husi Segundu Komandante Jerál Komisariu Polísia Faustino da Costa hafoin enkontru ba jornalista sira hateten hanesan bain-bain parte seguransa hala’o enkontru semanal ho PR atu hodi hato’o informasaun em jerál kona-ba seguransa iha teritoriu Timor-Leste laran tomak.

“Hakarak informa ba públiku katak situasaun em jerál lao hakmatek laiha problema bo’ot ida ne’ebe sensitivu presija toma atensaun maka’as, só akontese problema ki’ik oan akontese iha ita nia rai ida ne’e maibé em jerál situasaun lao hakmatek, além de ne’e informa mós ba PR kona-ba isu (voatus) hirak ne’ebe oras ne’e dadaun manas iha Media Sosial (MEDSOS) kona-ba terorista nian”, hateten Komandante Jerál PNTL ne’e.

Komisariu Polísia Julio da Costa Hornay salienta liu tan katak informasaun hirak ne’ebe maka iha MEDSOS ne’e hanesan informasaun propaganda ne’ebe ita konsege identifika pesoal sira ne’ebe maka soe hela informasaun sira ne’e iha MEDSOS husu ba sira maibé sira mós fahe tutan ka partilla fila fali informasaun sira ne’e, ida ne’e maka lolos labele akontese maibé ida ne’e hato’o ona ba Ministeriu Públiku (MP) rezistu ona no ita hein ninia prosesu.

“Nune’e ita bele hapara tiha hanoin ida ne’ebe ladiak, bele halo situasaun iha públiku ne’e sente katak ameasadu ida maibé iha realidade laos ida ne’e, hanesan mós kazu ida iha Tasi-tolu ita hotu akompaña Segundu Komandante PNTL Munisipiu Dili mós esplika ona iha públiku katak laos terorista ida”, hatutan na’in ulun PNTL ne’e.

Autoridade PNTL ne’e subliña liu tan katak ita dala-ruma hare’e ita nia maluk islamiku sira uja jilbab ita komesa temi katak ida ne’e terorista, ida ne’e lolos labele maibé ita respeita ba malu, ita fiar nafatin ba malu nu’udar Timor oan além de ita fiar maibé ita vizilansia nafatin karik ita identifika, ita deskonfia buat ruma ne’ebe foun ba ita hare’e ita bele informa imediatamente ba polísia ne’ebe besik liu atu nune’e ita nia PNTL bele halo atuasaun.

Komandu PNTL Apela Ba Povu Atu Nafatin Mantein Paz No Estabilidade

Iha biban ne’e mós na’in ulun PNTL ne’e hato’o ninia mensajem ba povu Timor-Leste tomak atu nafatin mantein paz no estabilidade ida rai ida ne’e.

“Ami hakarak hato’o mensajem ba povu Timor-Leste tomak, ami nia parabéns bebeik ona maibé ami husu nafatin ba ita hotu nu’udar Timor oan atu mantein ita nia estabilidade no paz ida ne’e importante ba ita nu’udar Timor oan, mai ita hamutuk goza liberdade ida ne’e, goza demokrasia ida ne’e ho ambiente ne’ebe nakonu ho paz, dame hanesan mós iha rai seluk ne’ebe moris diak tanba sira kontribui hotu ba estabilidade no paz, hakribi krime hadomi paz entaun sira nia rai mós desenvolve diak, ita mós hakarak ida ne’e nu’udar umanu, nu’udar rai independente ita hotu hakarak ida ne’e, hakarak moris diak”, tenik autoridade PNTL ne’e.

Media PNTL.                

Dili, Komandu Polísia Nasional Timor-Leste (PNTL) no FALINTIL Forsa Defeza Timor-Leste (F-FDTL) hato’o sira nia apresiasaun no parabéns ba povu Timor-Leste tomak iha realizasaun Eleisaun Antisipada Parlamentar tinan 2018. Agradesimentu ne’e Komandu PNTL no F-FDTL hato’o liu husi konfrensia imprensa ida ne’ebe hala’o iha Kuartél Jerál F-FDTL Fatuhada.

Komandante Jerál PNTL Komisariu Julio da Costa Hornay hateten prosesu eleisaun antisipada parlamentar remata ona iha loron 12 Maio 2018 ho susesu no agora dadaun Comissão Nacional Eleição (CNE) halo apuramentu nasional, susesu bo’ot ne’e laos monu husi lalehan maibé susesu bo’ot ne’e povu Timor-Leste tomak nian ne’ebe sei hakerek iha ita nia istoria rasik nune’e ita oan no bei-oan sira sei hatene no rekoñese no laos ita deit maibé mundu tomak mós rekoñese Timor oan tomak nia matenek hodi haburas no tau iha prátika lalaok demokrasia nian.

“Ami forsa seguransa PNTL ho F-FDTL ne’ebe iha responsabilidade másimu hodi asegura presesu eleisaun antisipada ida ne’e, hato’o ami nia parabéns no agradesimentu bo’ot tebes ba povu doben Timor-Leste tomak liu-liu oan joven Timor-Leste tomak ne’ebe namkari iha rai laran no mós lider ho militante partidu politiku, veteranus tomak, lider relijaun hotu iha teritoriu Timor-Leste, autoridades lokais, organizasaun arte marsias no arte kultural sira, ami nia apresiasaun bo’ot ba maturidade politika ne’ebe imi hatudu ne’e kontribui tebes ba estabilidade no paz iha ita nia rai doben Timor-Leste ida ne’e”, tenik Komandante Jerál PNTL ne’e.

Komisariu Julio da Costa Hornay salienta liu tan katak nu’udar sidadaun ba nasaun ida ne’e ita hotu ezerse ona ita nia dever iha loron 12 Maio liu ba, kona-na rezultadu partidu ne’ebe hetan konfiansa maioria liu husi votus ida ne’e maka determinasaun povu nian, ita entrega ba na’in ulun sira ne’ebe ita fiar ona atu ukun, ita hein katak sira sei ukun ho diak, ukun ho responsabilidade hodi hadia ita hotu nu’udar povu nia moris diak, maibé atu desenvolvimentu ne’ebe sira atu halo bele lao ho diak presija estabilidade no paz.

“Tanba ne’e husu ba sidadaun hotu nu’udar Timor oan, na’in ba rai ida ne’e atu mantein hakmatek no kontribui nafatin ba estabilidade ho paz hodi fó oportunidade ba ita nia governante sira oin mai iha oitavu governu konstitusional biban hala’o sira nia programa desenvolvimentu tinan lima oin mai tuir promesa ne’ebe hato’o ona ba povu, manan ka lakon ita hotu nu’udar Timor oan nian prosesu demokrasia maka hanesan ne’e”, hatutan lideransa másimu PNTL ne’e.

Iha fatin hanesan Xefe Estadu Maior Jeneral F-FDTL Major Jeneral Lere Anan Timur iha oportunidade ne’e hodi instituisaun F-FDTL nia naran hato’o ami nia parabéns ba ita nia povu Timor-Leste, parabéns ba ita nia lider partidu politiku idak-idak nian no liu-liu parabéns ba partidu vensedor iha eleisaun antisipada tinan ida ne’e nian.

“Dala ida tan povu Timor-Leste hatudu nia maturidade politika ba komunidade internasional, ita afirma katak vale apena ita sai nasaun, sai povu ida iha mundu rai-klaran, maske ki’ik maibé ita nia dignidade iha komunidade internasional ass liu, parabéns ba partidu vensedor liu-liu ba Aliansa Mudansa Progresu (AMP) ba imi nia vitoria, vitoria la signifika susesu ba imi nia servisu, vitoria oin seluk susesu oin seluk, susesu só ao longu iha imi nia servisu ne’ebe que imi sei hala’o loron kalan hamutuk ho ita nia povu Timor tomak ne’e mak sei hatudu susesu ba imi nia governasaun”, koalia Xefe Estadu Maior Jeneral F-FDTL ne’e.

Major Jeneral Lere Anan Timur hatutan liu tan katak situasaun ida ne’e hanesan situasaun foun ida ba ita nia povu ho eleisaun antisipada ne’ebe maka foin dadaun hala’o ba hanesan uluk hahu’u kampaña politika to’o eleisaun ami nu’udar elementu seguransa ami apela ba ita nia povu tomak, ba juventude, ba lider hotu-hotu katak rezultadu saida maka CNE anunsia, hotu-hotu tenke simu ho liman rua no prátika hatudu katak to’o ohin loron problema la mosu, problema laiha iha nivel nasional.

Media PNTL.                 

Dili, Komandu Polísia Nasional Timor-Leste (PNTL) kinta-feira ne’e (10/05) hala’o serimonia deslokasaun membru PNTL sira ne’ebe maka sei fó apoiu seguransa ba iha Eleisaun Antisipada Parlamentar 2018 iha teritoriu Timor laran tomak.

Komandante Jerál PNTL Komisariu Polísia Julio da Costa Hornay ne’ebe dirige serimonia deslokasaun ne’ebe hala’o iha resintu Kuartél Jerál PNTL ne’e hateten, ohin loron ida importante ita hala’o serimonia ida ne’e, apoiu forsa Polísia husi Kuartél PNTL ba apoiu munisipiu 13 hodi asegura prosesu eleisaun antisipada ne’ebe sei hala’o iha loron 12 Maio 2018.

“Ita bo’ot sira sei koloka iha sentru votasaun sira tuir programa ne’ebe Komandu munisipiu prepara ona ba ita bo’ot sira, to’o iha ne’eba Komandu Munisipiu sira maka iha responsabilidade másimu hodi hare’e, koloka, kontrola kona-ba servisu sira ne’ebe maka ita bo’ot sira sei desentende iha sentru votasaun iha munisipiu 13”, hateten Komandante Jerál PNTL ne’e.

Komisariu Polísia Julio da Costa Hornay akresenta liu tan katak tanba ne’e husu ba membru tomak ne’ebe hala’o kna’ar ida ne’e atu hala’o kna’ar ida ne’e ho responsabilidade másimu tuir misaun ne’ebe ita iha, além de ida ne’e hatudu nafatin ita nia disiplina servisu, bainhira ita hala’o kan’ar iha servisu iha sentru votasaun ne’eba.

“Hatudu ita nia neutralidade, imparsialidade iha servisu laran ida ne’e maka importante, durante loron 30 nia laran kampaña eleisaun ita asegura ho diak, ita kontinua nafatin to’o festa demokrasia ida ne’e determina, eleisaun, kontagen, anunsiu to’o ba iha formasaun oitavu governu konstitusional, ida ne’e maka Konstituisuan Repúblika fó mai ita atu ezerse no kompetensia ne’ebe ita iha, laiha buat seluk husi ne’e”, hatutan Komisariu Polísia ne’e.

Na’in ulun PNTL ne’e husu ba membru sira ne’ebe maka desloka ba munisipiu atu bele halo koordenasaun ho autoridade lokal iha munisipiu, parte Comissão Nacional Eleição (CNE), parte Sekretariadu Tékniku Administrasaun Eleitoral (STAE) no sira ne’ebe maka iha responsabilidade kona-ba eleisaun atu bele halo servisu ho diak to’o ba iha rohan.

Ba dala ikus, Komisariu ne’e apela ba membru tomak atu hala’o servisu ho diak, hatudu nafatin disiplina, responsabilidade, neutralidade no imparsialidade nu’udar forsa seguransa hanesan aparellu estadu atu bele hala’o misaun ida ne’e ho diak.

Partisipa iha serimonia deslokasun ne’e Komandante Jerál akompaña husi Segundu Komandante Jerál, Inspector Jerál, Komandante Administrasaun, Komandante Operasaun, Komandante Unidade, Komandante Munisipiu, Ofisias Superiores, Ofisias Subalternu, Sarjentu no ajente PNTL.

Media PNTL.  

Relasiona ho tempu kampaña Eleisaun Antisipada (EA) parlamentar 2018 ne’ebe remata ona iha loron 9 Maio orseik, Komandu Polísia Nasional Timor-Leste (PNTL) la rezista kazu krime ne’ebe bo’ot no iha ne’ebe presija PNTL toma atensaun.

Komandante Jerál PNTL Komisariu Polísia Julio da Costa Hornay hafoin serimonia deslokasaun membru PNTL sira ne’ebe maka sei fó apoiu seguransa ba iha Eleisaun Antisipada Parlamentar 2018 hateten durante kampaña mosu deit maka insidente no asidente.

“Insidente sira maka hanesan militante partidu balun hatun bandeira partidu balun, troka malu ida hatun ida, ida hatun fali ida depois tuda malu oituan hanesan iha tempu deslokasaun ne’e mobilizasaun ne’e maka akontese nune’e mós asidente, maibé ita nia forsa seguransa hamutuk ho ita nia FALINTIL Forsa Defesa Timor-Leste (F-FDTL) konsege ezerse sira nia misaun hodi hakalma, sira kaer lori ba prosesu no balun sei iha prosesu nia laran depois ita hare’e Tribunal nia dezisaun, Ministeriu Públiku nia delegasaun mai para ita bele kontinua prosesu investigasaun”, koalia na’in ulun PNTL ne’e.

Komisariu Polísia Julio da Costa Hornay koalia liu tan katak em jerál situasaun lao diak apésar de statement politika husi ita nia maun bo’ot sira manas, maibé ida ne’e maka politika, demokrasia maka ne’e, nune’e importante tebes maka ita tenke louva, ita tenke fó apresiasaun bo’ot ba ita nia povu Timor-Leste ho ita nia joven sira.

Media PNTL.          

Dili- Polisia Nasional Timor-Leste (PNTL) asegura seguransa ba distribusaun bulletin de votus husi STAE nasional ba munisipiu 12 inklui RAEOA.

Diretur STAE Acelino Manuel Branco hateten ohin ofisialmente Sekretariadu Tekniku Administrasaun Eleitoral (STAE) distribui bulletin de votus no urnas ba munisipiu 12 inklui RAEOA no estranjeiru tanba ne’e husu ba PNTL atu fo seguransa hodi asegura voletin de votus  to’o fatin destinasaun ho seguru, Nia hato’o asuntu ne’e iha serimonia distribuisaun bulletin de votos iha edifisiu STAE Kaikoli Dili, Sexta (04/05).

STAEmos agradese ba PNTl ne’ebe maka durante ne’e fo seguransa ba prosesu imprime bulletin de votos husi Grafika nasional to’o entrega ba STAE hodi halo distribuisaun.

Iha okajiaun ne’e Komandante Komandu Operasaun Superintendente Xefe Henrique da Costa hateten Material Eleisaun ne’ebe maka entrega ba STAE munisipiu sira saimos responsabilidade Komandu PNTL munisipiu ida-idak atu akompaña material sira ne’e to’o munisipiu no kontinua to’o Sentru Votasaun.

Komandante Henrique husu ba membru PNTL ne’ebe maka fo seguransa ba transportasaun vuletin de votus halo komunikasaun diak atu akompaña no kordena ho STAE atu nune’e transportasaun material Eleisaun Antisipada husi nasional ba munisipiu lao ho diak no seguru.

“ Husu ba STAE atu orienta Brigada sira hodi responsabilija material hirak ne’ebe sira simu no labele abandona material hirak ne’e no entrega fali responsabilidade ba PNTL mesak, maibe ita hotu tenke tau responsabilidade katak susesu ba eleisaun antisipada ne’e susesu ba Timor-Leste,” dehan Komandante Operasaun.

PNTL preparadu atu responde ba situasaun saida deit ho apoiu maximu husi F-FDTL tanba kordenasaun diak atu asegura prosesu kampaña, Eleisaun, Kontajen no publika rejultadu.

Iha okajiaun ne’e Prezidente CNE Alcino Barris hateten distribusaun material sensitivu ne’e garantidu seguru no transporta ho responsabilidade no akompañamentu ne’ebe rigroju tanba iha prosesu nia laran sempre iha diskomfiansa tanba ne’e tenke kuidadu no fo atensaun.

Nia hatutan ita hotu tenke garante verisidade no kredibilidade eleisaun antisipada atu nune’e labele mosu interpretasaun no diskomfiansa.

Entertantu vice ministru Administrasaun Estatal José Anuno apela ba PNTL no F-FDTL nudar lutu ba nasaun atu asegura seguransa no kumpri orientasaun Komandu hodi fo susesu ba preparasaun to’o eleisaun antisipada no kaer metin segredu nasaun nian.

Serimonia distribuisaun material Eleisaun Antisipada ne’e diriji husi Diretur Jeral STAE Acelino Manuel Branco, akompaña husi Vice ministru Administrasaun ESTATAL, Diretor Grafika Nasional  no partisipa husi Administrador, Komandante PNTL munisipiu 13, reprejentante ONG, reprezentante UN reprejentante UNDP no komvidadu sira. Media PNTL

Dili- Komandu Polisia Nasional Timor-Leste (PNTL) no Komandu Falintil-Forsa Defeza Timor-Leste (F-FDTL) husu ba povu atu mantein paz no estabilidade durante kampaña Eleisaun antisipada to’o formasaun governu.

Komandante Jeral PNTL Komisariu Julio da Costa Hornay hateten ami nia agradesementu ba lideres partidu politiku ho koadru tomak ne’ebe bele eduka no konsola nia militante sira hodi kontribui ba estabilidade no paz ho dalan kopera makaas ho autoridade Seguransa no Defeza durante kampaña lao, Nia hato’o asuntu ne’e liu husi komferensia emprensa ne’ebe maka halao iha Komandu jeral PNTL Kaikoli Dili, Kinta (03/05).

Komisariu Julio husu ba povu atu asegura nafatin prosesu demokrasia nia lalaok iha ita nia nasaun, respeita malu no fo oportunidade ba partidu hotu to’o iha suku no postu administrativu no munisipiu iha teritoriu laran tomak hodi hato’o sira nia programa nune’e povu bele hatene hodi determina nia votus.

“ Hela loron lima partidu politiku sira konsentra sira nia atividade kampaña iha kapital Dili tanba ne’e husu ba joven sira kontinua asegura estabilidade no paz, halao kampaña ho disiplina no kumpri regras sira ne’ebe estabelese ona, respeta malu no haburas amizade nudar timor oan,” dehan Komisariu Julio

Atu termina komandante Jeral PNTL apela ba timor oan hotu ne’ebe utilija no asesu media sosial atu uza ho diak labele aproveta hodi hato’o lia fuan la edukativu ba malu,  liu-liu ba ita nia lider istoriku sira ita tenke respeita no tane aas nafatin nudar ita nia lider istoriku ba ukun rasik ann no hanesan aman ba nasaun.

Iha okajiaun ne’e Xefe Estadu Mayor Jeneral Lere Anan Timur hato’o parabens ba povu tomak ne’ebe iha tempu hirak nia laran ho situasaun politika ne’ebe manas hatudu sira nia maturidade politika signifika povu iha nasionalismu no patriotismu  hodi hadomi rai doben Timor-Leste.

“Maturidade politika povu nian nudar oportunidade diak atu bele lori sira nia aspirasaun ba futuru ne’ebe diak ba progresu no dezenvolvimentu ba povu no nasaun, dehan General Lere.

Nia haktuirtan katak Ita moris iha demokrasia nia laran no demokrasia hanorin ita katak hotu-hotu iha direitu atu koalia no halo buat ne’ebe diak ba nasaun no ba povu tanba ita moris iha lei no regulamentu nia okos.

Komferensia emprensa ne’ebe maka halao husi Komandu Jeral PNTL no F-FDTL ne’e partisipamos husi ofisiais Sub Alternus husi instituisaun rua. Media PNTL

Aileu, Komandu Polísia Nasional Timor-Leste (PNTL) liu husi Centro Formação Polícia (CFP) hala’o inagurasaun ba Sentru Treinamentu iha munisipiu Aileu ne’ebe maka hetan apoiu husi parseiru Timor-Leste Police Development Program (TLPDP).

Inspetór Jerál PNTL Superintendente Xefe Carlos Jerónimo ne’ebe reprezenta Komandante Jerál PNTL iha serimonia ne’ebe hala’o iha kinta-feira ne’e (26/04) hateten inagurasaun fatin treinamentu ne’e hanesan pasu importante ida tan ba instituisaun PNTL tanba bele duni servisu hamutuk ho ninia parseiru sira hanesan TLPDP ne’ebe halo diskusaun lubuk ida atu hare’e oinsa bele profesionaliza Polísia Nasional nune’e mós oinsa bele sustentabiliza situasaun sira ne’e hanesan formasaun.

“Tanba ho hanoin ida ne’e maka ita hare’e ba dadus ne’ebe iha rekursu umanu nasional hatudu katak iha polísia balun, ema ida deit maka tuir formasaun diploma ka sertifikadu ne’e to’o walu kursu ida deit no ho ida ne’e ema ne’e maka tun nafatin, enkuantu ita nia maluk balun iha sub distritu sira la hetan oportunidade ba tuir formasaun”, haktuir Inspetór Jerál PNTL ne’e.

Superintendente Xefe Carlos Jerónimo salienta liu tan katak tanba ho razaun sira ne’e hotu maka CFP halo esforsu lubuk ida hodi prepara hamutuk ho parseiru TLPDP liu husi koordenasaun ida ne’ebe ami iha nasional sempre halo diskusaun bebeik atu hare’e saida maka bele fó fasilidade hodi desenvolve kapasidade PNTL.

“Entaun mai ho forma ida atu bele desentraliza duni sentru sira ne’e atu nune’e formasaun sira hanesan refresh training la presija ita halo deslokasaun ba Dili, ita bele halo deit iha munisipiu rasik parte ida bele mós ajuda atu bele fasilita ita nia PNTL feto sira balun iha difikuldade barak wainhira husu atu tun ba Dili”, hatutan Superintendente Xefe ne’e.

Iha fatin hanesan Pasific Manager Program TLPDP Madam Amanda iha ninia intervensaun ba serimonia ne’e hateten ho orgullu bo’ot mak hau mai iha munisipiu Aileu hanesan fatin segundu ida ne’ebe hodi hari’i Sentru Treinamentu liu husi kooperasaun servisu ne’ebe maka iha.

“Sentru Treinamentu ida ne’e hanesan fatin ida ne’ebe maka atu fornese ba membru sira ne’ebe presija atu treinu no liu-liu ba ida ne’ebe maka atu treinu ba munisipiu ne’e rasik no iha Sentru Treinamenru ne’e rasik sei minimiza kustu balun ne’ebe maka ita bele hare’e liu ba treinamentu ninian”, hateten Pasific Manager Program TLPDP ne’e.

Enkuantu Komandante PNTL Munisipiu Aileu Superintendente Damião da Silva iha ninia intervensaun koalia presensa ita hotu nia iha serimonia ne’e atu halo inagurasaun ba fatin edifisiu ki’ik oan ida ne’e ne’ebe apoiu husi TLPDP  maibé ninia pesu bo’ot tebes tanba hare’e ba kualidade diak tebes no ami Komandu PNTL munisipiu AIleu ho orgullu bo’ot no agradese ba fatin ida ne’e hodi halo trinamentu ninian.

“Tanba ne’e laos foin maka TLPDP apoiu Komandu PNTL munisipiu Aileu maibé hahu’u kedas iha tinan 2004 sira nia existe iha Timor Leste entaun sira nia apoiu ne’e lubuk ida ne’ebe ohin edifisiu ida ne’e no hau hakarak temi apoiu iha pasadu, ne’ebe iha tinan hirak liu ba iha mós apoiu ba parte kapasitasaun ofisias no sarjentu ne’ebe konsentra iha akademia”, hateten Komandante PNTL Munisipiu Aileu ne’e.

Partisipa iha serimonia inagurasaun ne’e Inspetór Jerál PNTL, Komandante PNTL Munisipiu Aileu, Komandante CFP, Komandante TLPDP, Autoridade Lokal munisipiu Aileu no komunidade munisipiu ne’e rasik.

Media PNTL.                      

Dili- Komandante Jeral Polisia Nasional Timor-Leste (PNTL) no Segundu Komandante Jeral  halo enkontru ho Prezidente Republika hodi informa situasaun jeral seguransa iha periodu kampaña Eleisaun Antisipada.

Komandante Jeral PNTL Komisariu Julio da Costa Hornay hateten situasaun seguransa iha teritoriu laran lao hakmatek no diak kampanña no mini kampaña ne’ebe maka partidu politiku sira halo lao hakmatek no laiha problema grave ne’ebe akontese, Nia hato’o asuntu ne’e ba jornalista sira iha Palasiu Prezidente Bairu Pite Dili (26/04).

Komisariu Julio ne’ebe maka akompaña husi Segundu Komandante Jeral Komisariu Faustino da Costa hato’o agradesementu ba joven sira hotu nia partisipasaun no kontribusaun ba estabilidade no paz durante kampaña, nudar timor oan ita nia dever  hodi kontribui ba estabilidade no paz hamutuk ho Forsa Defeza no Seguransa.

Atu termina Komandante Jeral mos  husu ba joven sira no povu tomak atu hakmatek nafatin no hatudu maturidade politika ne’ebe ita halo no hatudu ona durante kampaña eleitoral hahu loron primeiru to’o ohin loron no to’o eleisaun hodi hatudu ba mundu katak ita iha maturidade politika ne’ebe ass no forte hodi lori ita nia nasaun no povu ba prosesu dezenvolvimentu ne’ebe diakliu iha future. Media PNTL

Dili- Centru Formasaun Polisia (CFP) Comoro halo teste fiziku ba kadidatu trabalador ba Korea do Sul nain 619 antes desloka ba Korea.

Komandante CFP Superintendente Arquimino Ramos hateten teste ne’e halao bazeia ba pedidu husi Sekretariu Estadu Joventude no Traballu (SEJT) ba Komandu Jeral PNTL, nune’e Komandu  hatun despaixu ba CFP hodi halo teste fiziku ba sira, Nia hato’o asuntu ne’e ba jornalista sira hafoin halo abertura teste iha CFP Comoro Dili, Kinta (19/04).

“CFP prepara ekipa ida kompostu husi ema nain 20 hodi fo ezame fizika tuir kriteria ne’ebe maka SEJT estabelese maibe diferente ho teste ba kandidatu Polisia sira nian,”dehan Superintendente Ramos.

Iha okajiaun ne’e Sekretariu Estadu Joventude no Traballu Nivio Leite Magalhães hateten teste fiziku ne’e halao hodi hatene kondisaun fiziku traballador sira nian antes ba servisu iha Korea do Sul tanba sira sei halao servisu iha area peskas ho servisu nebe todan tanba ne’e sira tenke preparadu atu halao servisu.

“Teste fiziku ne’e nudar parte ida hodi hadia programa no sistema rekrutamentu ba kandidatu traballador ba Korea do Sul nune’e traballador sira ne’ebe maka fiziku diak sei halao servisu ho diak ho tratamentu diak no dignu husi empregador sira,” SEJT Nivio esplika.

Teste fiziku ne’e halao durante loron rua (19 to 20/04 ) ba kandidatu nain 619 iha CFP Comoro Dili. Media PNTL.

Dili, Komandu Polísia Nasional Timor-Leste (PNTL) rezeita informasaun falsu ne’ebe maka espallha iha Media Sosial (MEDSOS) ne’ebe hateten katak PNTL bandu atu halo movimentu iha tempu kalan liu-liu iha area sira ne’ebe maka identifika sai fatin risku ba konflitu.

Komandante Jerál PNTL Komisariu Polísia Julio da Costa Hornay segunda-feira ne’e (16/04) ba jornalista sira hateten loron hirak liu ba ita simu informasaun iha MEDSOS liu-liu Facebook katak ema balun lori PNTL nia naran hasai informasaun katak iha fatin lubuk ida ne’ebe temi ne’e fatin ida risku portantu limite movimentu iha tempu kalan.

“Hau responde kedas iha MEDSOS mós liu husi Facebook, hau apela ba ema hotu-hotu ne’ebe asesu ba Media Sosial katak informasaun ne’ebe sai iha MEDSOS liu-liu Facebook ne’e lalos, Polísia to’o ohin loron seidauk hasai informasaun ida ba públiku katak fatin hirak ne’ebe sira temi iha Media Sosial ne’e risku no husu ba povu atu limite sira nia movimentu, ne’e laiha”, tenik Komandante Jerál PNTL ne’e.

Komisariu Polísia ne’e apela ba povu tomak Timor-Leste atu lalika hakfodak ho informasaun sira ne’e, halo imi nia aktividade normal hanesan bain-bain, aktividade diariu ne’ebe povu tomak halo tuir idak-idak nia programa hodi sustenta moris loron-loron nian hanesan aktividade eskola no aktividade saida deit maka imi halo, halo ho avontade.

“Iha problema ruma karik, PNTL hamutuk ho Falintil Forsa Defesa Timor-Leste (F-FDTL) ne’ebe durante ne’e halo servisu koordenasaun, sei atúa, sei atende problema hirak ne’ebe ita bo’ot sira sente hasoru, hato’o mai informasaun klaru, fatin ne’ebe klaru ita nia polísia sira sei to’o iha fatin ida ne’eba tanba ita nia polísia no forsa iha terenu loron ba loron durante 24 oras nia laran prontidaun atu asegura situsaun em jerál iha kapital no mós iha munisipiu no iha fatin hotu-hotu hodi nune’e ita nia povu tomak bele hakmatek hodi akompaña prosesu kampaña ne’e tomak to’o ba rohan”, hatutan na’in ulun PNTL ne’e.

Komisariu Polísia Julio da Costa Hornay apela mós ba membru PNTL tomak no mós F-FDTL katak proibidu atu involve ann ou ka iha prátika politika iha kampaña ida ne’e ka iha ne’ebe deit, iha kualkér situasaun ne’e proibidu atu halo prátika politika, bele aprende politika maibé proibidu prátika politika iha terenu.

“Tanba ne’e husu ba membrus tomak, Ofisias sira, Komandante sira atu mantein nafatin orientasaun Komandu ne’ebe hato’o ona ba imi iha enkontru hamutuk ho Ofisias Superior sira iha Kuartél Jerál F-FDTL iha loron 9 liu ba, katak proibidu atu envolve ann iha prátika politika, hala’o imi nia misaun tuir Lei haruka, kompetensia ne’ebe maka Lei fó ba ita ida ne’e maka ita hala’o ho responsabilidade másimu ba ita nia povu doben Timor-Leste ida ne’e”, hateten Komisariu Polísia ne’e.

Media PNTL.