Dili, Komandu Polísia Nasional Timor-Leste (PNTL) Kinta-feira (24/05) ne’e hala’o enkontru semanal ho Presidente Repúblika (PR) Dr.Francisco Guterres “Lu-Olo” hodi hato’o situasaun seguransa iha rai laran.
Komandante Jerál PNTL Komisariu Polísia Julio da Costa Hornay akompaña husi Segundu Komandante Jerál Komisariu Polísia Faustino da Costa hafoin enkontru ba jornalista sira hateten hanesan bain-bain parte seguransa hala’o enkontru semanal ho PR atu hodi hato’o informasaun em jerál kona-ba seguransa iha teritoriu Timor-Leste laran tomak.
“Hakarak informa ba públiku katak situasaun em jerál lao hakmatek laiha problema bo’ot ida ne’ebe sensitivu presija toma atensaun maka’as, só akontese problema ki’ik oan akontese iha ita nia rai ida ne’e maibé em jerál situasaun lao hakmatek, além de ne’e informa mós ba PR kona-ba isu (voatus) hirak ne’ebe oras ne’e dadaun manas iha Media Sosial (MEDSOS) kona-ba terorista nian”, hateten Komandante Jerál PNTL ne’e.
Komisariu Polísia Julio da Costa Hornay salienta liu tan katak informasaun hirak ne’ebe maka iha MEDSOS ne’e hanesan informasaun propaganda ne’ebe ita konsege identifika pesoal sira ne’ebe maka soe hela informasaun sira ne’e iha MEDSOS husu ba sira maibé sira mós fahe tutan ka partilla fila fali informasaun sira ne’e, ida ne’e maka lolos labele akontese maibé ida ne’e hato’o ona ba Ministeriu Públiku (MP) rezistu ona no ita hein ninia prosesu.
“Nune’e ita bele hapara tiha hanoin ida ne’ebe ladiak, bele halo situasaun iha públiku ne’e sente katak ameasadu ida maibé iha realidade laos ida ne’e, hanesan mós kazu ida iha Tasi-tolu ita hotu akompaña Segundu Komandante PNTL Munisipiu Dili mós esplika ona iha públiku katak laos terorista ida”, hatutan na’in ulun PNTL ne’e.
Autoridade PNTL ne’e subliña liu tan katak ita dala-ruma hare’e ita nia maluk islamiku sira uja jilbab ita komesa temi katak ida ne’e terorista, ida ne’e lolos labele maibé ita respeita ba malu, ita fiar nafatin ba malu nu’udar Timor oan além de ita fiar maibé ita vizilansia nafatin karik ita identifika, ita deskonfia buat ruma ne’ebe foun ba ita hare’e ita bele informa imediatamente ba polísia ne’ebe besik liu atu nune’e ita nia PNTL bele halo atuasaun.
Komandu PNTL Apela Ba Povu Atu Nafatin Mantein Paz No Estabilidade
Iha biban ne’e mós na’in ulun PNTL ne’e hato’o ninia mensajem ba povu Timor-Leste tomak atu nafatin mantein paz no estabilidade ida rai ida ne’e.
“Ami hakarak hato’o mensajem ba povu Timor-Leste tomak, ami nia parabéns bebeik ona maibé ami husu nafatin ba ita hotu nu’udar Timor oan atu mantein ita nia estabilidade no paz ida ne’e importante ba ita nu’udar Timor oan, mai ita hamutuk goza liberdade ida ne’e, goza demokrasia ida ne’e ho ambiente ne’ebe nakonu ho paz, dame hanesan mós iha rai seluk ne’ebe moris diak tanba sira kontribui hotu ba estabilidade no paz, hakribi krime hadomi paz entaun sira nia rai mós desenvolve diak, ita mós hakarak ida ne’e nu’udar umanu, nu’udar rai independente ita hotu hakarak ida ne’e, hakarak moris diak”, tenik autoridade PNTL ne’e.
Media PNTL.
