Dili, Komandu Polísia Nasional Timor-Leste (PNTL) iha data espesial segunda-feira loron 09 Fulan Setembru tinan 2019 hala’o tan mudansa balun hodi fó posse ba Ofisias Superior No Subalternu Na’in 8 hodi kompleta servisu instituisaun seguransa nian.
Komandante Jerál PNTL Komisariu Polísia Faustino da Costa hafoin serimonia ba jornalista sira hateten desde instituisaun ida ne’e governu tau prioridade ba area polisiamentu komunitariu, polísia proximidade hanesan mós area Trânzitu Seguransa Rodoviaria tanba ne’e maka ita halo mudansa ida ne’e atu bele responde no ita ezizi nafatin ba sira atu bele halo mós mudansa ruma iha terenu liu-liu liga ba aktividade prioridade instituisaun no governu nian ne’ebe iha.
“Ohin nu’udar pasu ida ne’ebe hau deklara nanis ona iha loron 27 Marsu, ita halo ida ne’e ba dala-tolu maibé ohin hau dehan mós ba Komandante sira hotu ida ne’e laos últimu maibé ita sei halo katak Komandante ida labele hela kleur liu iha fatin ida, katak sé Komandante ida mak kleur liu iha fatin ida dala-ruma ninia koñesimentu subar ann iha fatin ida, mas kuandu ita rota hanesan estrutura ida husi Komandu nia ba iha fatin ida foun klaru nia hetan ambiente ida foun, nia hasoru kultura foun, karakter foun entaun ida ne’e aumenta ninia koñesimentu atu bele sai referensia diak ida ba Komandante ida atu hola desizaun além-de responde saida maka estratégia Komandu nian hanesan governu no Estadu ida ne’e nian”, esplika Komandante Jerál PNTL ne’e.
Komisariu Polísia ne’e akresenta liu tan katak mudansa ne’e halo ba kargu adjuntu Komandante na’in rua mak ita rota hanesan Baucau mai fali Manatuto, adjuntu Manatuto ba fali Baucau no adjuntu Ermera sai hanesan Ofisial Ligasaun ba iha Instituto Defesa Nacional (IDN) ba Komandu no Liquiça ne’ebe durante ne’e hanesan xefe Operasaun interinu assume kargu Segundu Interinu ita ofisialmente tau nia iha Segundu Komandante iha Liquiça. Agora iha parte Komandu Operasaun nian maka Diretor Polísia Komunitariu ba ona iha Indonesia frekuenta hela formasaun Lideransa ninian tinan ida nia laran entaun nomea fali ninia adjuntu durante ne’e assume fali kargu hanesan Diretur Polísia Komunitariu, além-de ne’e como fatin mamuk iha Ermera entaun diretur Trânzitu ne’ebe maka desde tinan 2000 mai to’o ohin loron entaun ita rota atu sai fali hanesan adjuntu Komandante iha Ermera; aumezmu tempu diretur Trânzitu ita nomea fali Ofisial ne’ebe durante ne’e hala’o kna’ar hanesan diretur Logistika no Ofisial ida husi Unidade Espesial ita tau hanesan diretur Logistika.
“Esperansa maka ne’e, hau dezafia sira atu sira halo duni mudansa ruma iha kna’ar fatin foun ne’ebe sira halo atu bele responde Estrategia Komandu ninian hanesan mós prioridade Komandu nian aumezmu tempu prioridade governu no Estadu ida ne’e nian”, tenik autoridade másimu Instituisaun Seguransa ne’e.
Iha fatin hanesan enposadu Superintendente Asistente Joni Viana das Regras ne’ebe simu pose nu’udar Segundu Komandante munisipiu Manatuto sente kontente ho mudansa servisu husi Baucau ba fali Manatuto atu kontinua implementa servisu diak liu tan.
“Hau kontente no privilejiu tanba Estadu liu husi Komandu PNTL sei iha konfiansa ne’ebe ass mai hau oinsa atu assume fila fali kargu iha munisipiu ne’ebe hau nia moris fatin hanesan munisipiu Manatuto no hau triste tanba hau kuaze tinan hitu iha munisipiu Baucau, hau iha relasaun ne’ebe diak ho povu tomak no sosiedade tomak iha munisipiu Baucau tantu autoridade no aumezmu tempu povu iha Baucau ne’e diak tebes-tebes liu-liu joventude, aman-inan, veteranu no igreja tanba oinsa maka atu kria relasaun ne’ebe diak ho ema ida ne’e presiza tempu”, hateten Superintendente Asistente ne’e.
Asuntu Nomeasaun ne’e halo basea ba Despasu Komandu Jerál nian hanesan tuir mai ne’e:
Lista naran emposadu (AsuntuTransferensia)
Partisipa iha serimonia ne’ebe dirigi husi Komandante Jerál no Segundu Komandante Jerál, Komandante Komandu Operasaun, Komandante Administrasaun, Komandante PNTL munisipiu 12 inklui Komandante RAEOA, Komandante Servisu Informasaun Polísia (SIP), Komandante Centro Formação Polísia (CFP), Xefe Rekursu Umanu no Xefe Departamentu sira.
Media PNTL.
