Dili– Komandu Polisia Nasional Timor Leste (PNTL) husu ba Governu atu tau osan hodi sosa ró ne’ebe mak bele hala’o operasaun iha área tasi mane nian, tamba ró ne’ebe mak Unidade Polísia Marítima (UPM) ho Komponente Naval FALINTIL-Forsa Defeza Timor Leste (F-FDTL) nian susar atu halo operasaun iha tasi mane.
Komandante Jerál PNTL, Komisáriu Júlio da Costa Hornay dehan, atu asegura Tasi Timor nian mak PNTL hanoin ona atu harii postu UPM iha área kosteira maritime nian ne’ebe mak importante no husu governu tau osan hodi bele sosa tan ró ne’ebe mak bele hala’o operasaun iha área tasi mane nian.
“Ami hein hela diskusaun orsamentu kapitál dezenvolvimentu nian para ami bele haree oinsa bele kria postu UPM. Ró lansa sira mós át hotu ona, ne’ebe agora ami tau hela osan hodi halo manutensaun para membru sira UPM nian hala’o sira nia kna’ar ho di’ak. Se lae ita hateke husi liur deit ita labele ba to’o iha tasi klaran para kaer ema,” dehan Julio ba jornalista sira iha Kuartel Jerál PNTL, Caicoli-Dili, sesta (25/09/15).
Nia hatutan, se ró iha on abele asegura ona kosteira tasi mane nian. Tasi feto nian ne’e la problema. Ró lansa sira ne’e bele hala’o operasaun diak hela.
“Maibé agora ita nia ró lansa sira UPM nian mos át hotu ona no ita tau hela osan para hadi’a,” dehan eis Komandante Akademia Polisia ne’e.
Nia hatutan, sira tenta nafatin maibe depende ba orsamentu para bele hola ró ne’ebe sufisiente. PNTL pronto hala’o servisu maibe orsa ne’e orsamentu ba PNTL tinan 2016 nian ki’ik loos. (Fontes: Timor Post Edisaun Segunda, 28/09/2015).
