Dili– Polisia Nasional Timor-Leste (PNTL) husu ba komunidade sira nia apoiu atu fo informasaun ba polisia bainhira hatene, rona no haree membru familia ou ema ne’ebe kaer kilat ilegal.
Komandante Jeral Polisia Nasional Timor-Leste (PNTL) Komisariu Julio da Costa Hornay ba jornalista sira iha Sesta (18/09) hateten ami husu nafatin apoiu husi komunidade atu bele fo apoiu informasaun nune’e PNTL bele rekolla no asegura kilat ne’ebe maka pertense ba instituisaun seguransa ne’e.
Karik ema ruma iha informasaun no hatene iha membru familia balu maka subar, kaer ou rai hela kilat iha sira nia uma membru familia ou vizinu ruma haree bele informa ba instituisaun PNTL.
Nia mos husu ba ema ruma ne’ebe sei kaer ou rai hela kilat iha uma tenke entrega voluntairamente nune’e bele prevene asidente ruma ne’ebe bele akontese iha familia laran ou iha komunidade nia le’et no hamosu perigu ba ema barak nia vida.
“Ami presija apoiu husi komunidade no ema hotu atu bele koopera, tamba polisia mesak deit seidauk bele halo buat barak, Polisia la’os Maromak atu hatene se mak lori ida ne’e, tanba ne’e presija apoiu husi komunidade inklui jornalista sira,” afirma Komisariu Hornay.
Sasan kro’at ne’e povu nian tenke tau iha fatin ne’ebe loos no instituisaun kompetente maka bele kaer nune’e uza tuir regras tamba se ema ida-idak hakarak kaer nia sei sente la seguru tanba ne’e tenke hanoin pozitivu.
“Sidadaun ida hakarak moris paz no hakmatek maka tenke entrega sasan meik no kroat ba autoridade ne’ebe mak iha kompetensia atu uza, presija kontribuisaun” apela Hornay. Média PNTL.
