Dili- Komandu Polisia Nasional Timor-Leste (PNTL) investiga ona suspeitu nain 13 ne’ebe kaptura no detein iha sela Komandu PNTL munisipiu Dili wainhira mosu anarkismu iha demostrasaun pasifiku ne’ebe organija husi Movimentu Universitariu Timor-Leste (MUTL).
Segundu Komandante PNTL munisipiu Dili Superintendente Asistente Euclides Belo hateten Suspeitu hirak ne’ebe maka PNTL detein wainhira akontese konfrontasaun iha demostrasaun kontra leilaun pradu husi membru Parlamentu Nasional iha loron 21/08 submete ona ba prosesu investigasaun no Polisia konklui ona investigasaun no hein xamada husi Tribunal Distrital Dili hodi halo Primeiru Interogatoriu ohin 23/08, Nia hato’o asuntu ne’e ba jornalista sira iha Kuartel Jeral PNTL Kaikoli Dili Tersa (22/08).
Komandante Euclides haktuirtan katak relasiona ho aktu krime ne’ebe maka akontese Tribunal maka iha kompeternsia atu foti desijaun ba suspeitu sira tuir lei ne’ebe maka vigora iha nasaun ne’e.
“Ami komfirma ona CCTV no sei kaptura tan demostrante sira ne’ebe maka halo estragus ba sasan hodi hamosu desordem publika,” dehan Euclides.
Iha demostrasaun ne’e mosu hahalok anarkismu hodi tuda kareta estadu ne’ebe maka sosa ho Orsamentu Jeral Estadu ne’ebe maka atu fasilita sira nia servisu hodi servi komunidade no nasaun maibe hetan estragus ne’e hahalok anarkismu no wainhira mosu anarkismu maka PNTL nia knaar atu atua hodi asegura trankulidade no ordem publika tuir mandatu husi konstituisaun RDTL no lei organika PNTL Nu. 9/2009.
Responde konaba involvimentu tersera pessoa iha demostrasaun pasifiku ne’e Komandante Euclides hateten ba PNTL laiha tersera pessoa se maka organiza nia maka responsabilliza.
Demostrasaun ne’ebe maka organiza MUTL kontra rejolusaun Parlamentu Nasional hodi fo lelaun kareta Unidade 65 ba membru deputadu tersera lejislatura falta kontrolu ba manifestante sira nune’e rejulta estragus ba kareta estadu hamutuk 12 inklui kareta RTTL.Ep nian ida.
Alende ne’e rejulta mos vitima nain 14 kanek inklui mos membru PNTL nain 3 nune’e tenke halo tratamentu iha Ospital, husi vitima hirak ne’e estudante feto nain 3 trauma tanba hetan tiru gas lacrimogenio (gas air mata) husi PNTL.
Iha loron 21/08 PNTL taka Estrada publiku diresaun ba Parlamentu Nasional nian maibe ohin 22/08 loke hikas ona no atividade hotu lao normal nune’e negosiante sira kontinua halo negosiu no estudante sira kontinua tuir prosesu aprendizajen iha aula. Media PNTL
