Dili- Polisia Nasional Timor-Leste (PNTL) halo kordenasaun servisu hamutuk ho Sekretariadu Tekniku Administrasaun Eleitoral (STAE) no Comisaun Nasional Elisaun (CNE) atu bele garante susesu ba Eleisaun Parlamentar.
Komandante Komandu Operasaun Superintendente Xefe Henrique da Costa hateten workshop durante loron tolu ho aprezentasaun lei eleitoral husi CNE no lalaok eleisaun husi STAE nune’e PNTL prepara nia forsa oinsa bele halo atividade prevensaun barak antes kampaña no eleisaun Parlamentar, Nia hato’o asuntu ne’e iha enseramentu workshop preparasaun Eleisaun Parlamentar iha Hotel Ramelau Aimutin Dili Kinta (08/06).
Komandante ne’e haktuirtan katak PNTL halo ona enkontru hamutuk ho autoridade sira iha munisipiu hanesan Lider Partidu Politiku, Lider joventude, Veteranus no Autoridade Lokal sira para oinsa kopera no servisu hamutuk hodi halo prevensaun atu labele mosu problema.
“Esperensia iha pasadu sai lisaun ida ba PNTL atu halo preparasaun diak antes kampaña no eleisaun.”
Komandante Henrique haktuirtan katak iha Fatin hirak ne’ebe maka identifika risku ba konflitu Komandu Jeral sei apoiu membru sira ba munisipiu hirak ne’ebe maka sira nia membru la to’o; Alende ne’e Unidade Espesial Polisia (UEP) sei halo movimentu to’o munisipiu hodi halo prevensaun durante periodu kampaña.
Entertantu Prezidente Interinu CNE Duarte Tilman hateten CNE halo aprejentasaun Lei Eleitoral Lei Nu.9/2017 hodi esplika konaba Lei Eleitoral no komprimentu legalidade durante kampaña ka prosesu Eleisaun Parlamentar.
Nia haktuirtan katak CNE mos fahe informasaun konaba krime eleitoral no oinsa maka PNTL bele halo atuasaun tuir regra no lei haruka, nune’e kuandu halo atuasaun tuir regra lalika hakfodak tanba estadu de diretu demokratiku katak buat hotu tenke lao tuir regra.
“Atu susesu ema hotu tenke lao tuir regra ne’ebe maka determinadu hanesan iha tempu kampaña tenke disiplina atu nune’e populasaun, joven ka votantes sira labele sai vitima tanba deit tuir kampaña balu tenke ba ospital, responde iha Tribunal ou tama kadeia, ” Tilman esplika.
Iha okajiun ne’e Komandante PNTL munisipiu Bobonaro Superintendente Xefe Armando Monteiro rekomenda ba CNE atu halo sosializasaun ba lideransa partidu iha nivel nasional, munisipal no postu administrative atu nune’e sira halo edukasaun votante ba sira nia militante no eleitor sira nune’e sira kompriende sira nia dever no direitu.
Workhop preparasaun Eleisaun Parlamentar ne’ebe maka halao durante loron tolu (06-08) de Juñu hetan partisipasaun maximu husi Komandante PNTL munisipiu 13, Komandante Unidade no Xefe Servisu sira nomos Reprejentante husi F-FDTL. Media PNTL
