DILI – Polísia Nasionál Timor-Leste (PNTL) lakon tan nia membru polísia na’in 2 (rua) iha fulan Jullu tinan ida ne’e. membru polísia ne’e mak hanesan matebian Sarjentu Fernando Maia nu’udar membru Unidade Polísia Maritima ne’ebé mate iha loron 03 fulan Jullu 2014 no matebian Superintendente Asistente Mateus de Jesus Soares nu’udar Segundu Komandante Distritu Dili, ne’ebé mate iha loron 04 fulan Jullu 2014, matebian na’in rua ne’e mate iha Hospital Nasionál Guido Valadares-Dili. Matebian Fernando Maia, mate tamba sofre moras tensaun no matebian Mateus de Jesus Soares mate tamba sofre moras kánkru fuan (kanker jantung), tuir dadus ne’ebe iha katak membru PNTL sira ne’ebé mate hamutuk atus ida rua nolu resin ida (121) hamutuk ho membru nain 2 ne’e. Entertantu molok familia matebian hala’o prosesu funeral, hanesan bai-bain Polísia Nasionál Timor-Leste hala’o serimonia despedida ba matebian Fernando Maia iha Kuartel Jerál PNTL, Caicoli-Dili ne’ebé prezidi husi Segundu Komandante Jerál PNTL, Komisáriu Afonso de Jesus. Liu husi serimónia despedida ne’e, Segundu Komandante Jerál, Komisáriu Afonso de Jesus hateten, lori Komandu Jerál nia naran hato’o sentidu kondolénsia ba familia matebian no ba membru PNTL sira hanesan matebian nia kolega. Sarjentu Fernando Maia, nu’udar polisia ida ne’ebe hala’o nia knaar durante tinan 12 nia laran, molok matebian muda mai iha Unidade Polísia Marítima, antes ne’e hala’o nia kna’ar iha Estasaun Atabae, Distritu Bobonaro. “Familia triste, Instituisaun PNTL mos triste bainhira rona matebian Fernando Maia ba ona mundu seluk, tamba matebian hala’o nia kna’ar seidauk to’o rohan, maibe matebian husik hela ita iha fatin ida ne’e, tamba ne’e mai ita hato’o ita nia orasaun ba Nai Maromak atu bele tulun nia klamar iha mundu seluk, nomos bele tulun ita iha mundu ida ne’e hodi fó liman ba malu hodi fó siguransa ba ita nia nasaun.” Hatutan Komisáriu Afonso de Jesus. Lori mos Komandu Jerál no matebian nia naran hato’o deskulpa ba maluk PNTL, komunidade sira hotu katak, karik durante ne’e matebian Fernando Maia halo sala iha nia moris ho nia knaar tomak hanesan polísia, tanba ita ema la perfeitu iha okaziaun ne’e, husu atu fó perdua. Iha fatin hanesan, Komandante Unidade Polísia Marítima (UPM), Superintendente Lino Saldanha hateten, matebian ne’e nia esperiénsia la’os iha área marítima de’it maibé molok ne’e nia servisu ona iha área Unidade Espesiál, nomos iha Distritu sira. Superintendente Lino hatutan, molok matebian ne’e husik hela mundu ne’e, matebian husu lisensa semana 2 atu konsulta no tuir informasaun ne’ebe iha matebian ne’e mate tamba sofre moras tensaun. Ikus liu Komandante UPM hameno katak, “fiar ba Maromak, fiar ba ita nia Rai ida ne’e no fiar ba ita nia familia, só buat 3 ne’e mak ita hala’o di’ak, ita nia moris metin”. Entertantu Matebian Fernando Maia moris iha Dili, loron 19 fulan Setembru tinan 1967, oan husi Aman Arnaldo Maia Barreto, ho Inan Maria Manuela, ne’ebé hela iha Aldeia Lahane Oriental, Suku Lahane Oriental, Sub-distritu Vera Cruz, Distritu Dili. Matebian Fernando Maia hahú tama polísia iha loron 4 fulan Jullu tinan 2002, no mate iha loron 03 fulan Jullu 2014, nu’udar Sarjentu Polísia. Matebian Fernando Maia mate husik hela nia fen kaben ho oan na’in 5 (lima). PNTL mos sei hala’o serimónia despedida hanesan ba Matebian Mateus de Jesus Soares hanesan Segundu Komandante Distritu Dili iha loron tuir mai, molok familia hala’o prosesu funeráriu. Matebian Mateus de Jesus Soares, moris iha Maubara-Liquica, loron 10 fulan Jullu tinan 1960, oan husi Aman Antonio Soares, inan Alda Soares de Jesus Pereira, ne’ebé hela iha Suku Vila-Verde, Sub-Distritu Vera Cruz, Distritu Dili. Matebian akaba nia eskola iha nível ensinu Pré-Sekundáriu (SMP) iha tempu Portugés nian. Matebian hahú tama kareira nudar polísia iha loron 6 fulan Marsu tinan 2001, matebian husik hela mundu ne’e iha loron 04 fulan Jullu 2014 ho deviza Superintendente Asistente. Durante tinan 12 (sanulu resin rua) nia laran, matebian Mateus de Jesus Soares hala’o nia kna’ar nu’udar Segundu Komandante iha Kuartel Distritu Dili. Ita ema moris iha mundu hanesan ema la’o rai, loron ida sei fila ba Aman Maromak, hanesan liafuan husi Biblia katak “ita ema mai husi rai sei fila ba rai.” Mídia PNTL