Aileu– Instituisaun Polisia Nasional Timor Leste (PNTL) partisipa iha Expozisaun Kareira ba Juventude liu-liu ba estudante Eskola Bázika no Sekundária iha Munisipiu AIleu durante loron haat (4) ne’ebe hahú husi loron 27-30 Abril 2015. Expozisaun ne’e nia objetivu atu bele dezimina informasaun ba estudante sira kona ba kareira nian, atu nune’e bainhira remata iha Eskola Sekundaria bele hatene ona foti desizaun hodi hili kareira ne’ebe sira hakarak hanesan kontinua eskola ka tuir formasaun profissional hodi bele kompete iha merkadu servisu. Iha serimonia abertura ne’e, Country Director Plan Timor Leste Terence M. hateten, eventu ida ne’e importante ba juventude sira atu bele hatene kona-ba oportunidade ba edukasaun, formasaun no servisu liu husi exhibitor sira ne’ebe hatudu iha expozisaun ne’e. 
Iha parte seluk, Vitoria Mesquita do Rego nuudar reprezentante Administrador Munisipiu Aileu hateten, sira apresia tebes ba eventu ne’e, tamba liu husi expozisaun ne’e nuudar matadalan ida ba juventude sira atu hatene ba planu futuru nian kona ba saida mak estudante ida hili nia kareira bainhira remata iha ensinu sekundaria. “Ha’u nia mensajen ba estudante sira hotu katak tenke aproveita oportunidade ida ne’e atu bele buka informasaun atu rekolla no ida ne’ebe mak imi sira hakarak atu nune’e sira bele enkaxa ba sira nia-an, tamba futuru iha ema ida-idak nia liman rasik,” afirma Vitoria Mesquita. Entertantu tuir Segundu Komandante PNTL Munisipiu Aileu Superintendente Assistente Antonio do Rego Fernandes hateten atividade ne’e kapas tebes tamba husi entidade oi-oin bele fahe informasaun ba juventude sira liu-liu estudante sira atu nune’e bele dezenvolve sira nia-an hodi prepara-an ba merkadu servisu. Kona-ba PNTL nian ne’ebe mos partisipa iha expozisaun ne’e importante no kapas tebes tamba bele fahe informasaun ba juventude sira kona-ba atividade polisia nian, no karik sira iha interese hakarak atu sai polisia, sira bele iha ona koñesimentu kona-ba polisia nian ne’ebe sei responsabiliza ba seguransa interna nian, afirma Superintendente Asst. Antonio do Rego. Expozisaun ne’e loke ofisialmente husi Country Director Plan Timor Leste, Reprezentante SEPFOPE, Diretór Edukasaun Munisipiu Aileu, no expo ne’e hetan partisipasaun másimu husi partisipante sira, liu-liu estudante sira ne’ebe kompostu husi eskola ensinu báziku primeiru no terseiru siklu, no sekundaria ne’ebe akompaña husi mestre/a sira husi kada eskola. Eventu ne’e organiza husi Plan Timor Leste no koopera ho Governu liu husi SEPFOPE no Ministériu Edukasaun, no suporta husi Uniaun Europeia no AusAid. Entertantu, atividade expozisaun ne’e hala’o iha Aileu Villa, Remexio, Lequidoe no Laulara ne’ebe ho nia partisipante husi estudante sira. Exhibitor ne’ebe partisipa iha atividade expozisaun ne’e mak husi Instituisaun Estadu hanesan PNTL, F-FDTL, Universidade no Instituisaun akadémiku hanesan UNTL, DIT, IOB no EIROS, Instituisaun Governu hanesan Centro Nacional de Emprego e Formação Profissional (CNEFP), Instituto de Apoio ao Dezenvolvimento Empresarial (IADE), Associação Nacional de Jovens Empreendedor Universitário de Timor Leste (ANJEU-TL), Youth Empowerment Sustainable Development in Timor Leste husi PLAN Timor Leste, nomos sentru formasaun professional no vokasional hanesan Sentru Formasaun SENAE Becora, Sentru Treinamentu Vokasional Juventude (STVJ) Camea no Comoro, Sentru Formasaun Tibar no Dom Bosco Comoro, Kompaña Timor Telecom, inklui instituisaun, sentru formasaun no ONG lokal husi Munisipiu Aileu rasik hanesan Bombeiros, Projetu Montanha, Rural Youth Action, DATBA, no Hakbiit Komunidade Rural (HCR). Média PNTL.