Dili- Polisia Nasional Timor Leste sem pursentu (100%) prontu atu fo seguransa ba prosesu funebre Prezidente Konsellu Revolusionariu Maubere (KRM) Paulino Gama “Mauk Moruk”, hahú husi Dili ba to’o iha Postu Administrativu Laga, Munisípiu Baucau.
Lia hirak ne’e hato’o husi Komandante Jerál PNTL Komisáriu Júlio da Costa Hornay ba jornalista sira iha Kuartél Jerál F-FDTL Fatuhada-Dili, iha konferénsia imprensa Komando Empeñamentu Operasaun (EOC), loron Kuarta (12/08/2015).
“PNTL prontu sem pursentu hodi fó seguransa ba prosesu funebre mate isin Mauk Moruk,” tenik Komisáriu Júlio Hornay.
Iha parte seluk, Komandante PNTL Munisípiu Dili Superintendente Xefe Pedro Belo hateten, situasaun seguransa liu-liu iha Munisipiu Dili la’o hakmatek bainhira Prezidente KRM Mauk Moruk mate, komunidade sira tuur hakmatek no hala’o nia atividade hanesan bai-bain tamba ida ne’e kontribuisaun husi komunidade sira.
“Ha’u hakarak hato’o parabens no agradese ba lider komunitariu sira, polisia komunitariu sira nomos ba komunidade tomak iha Munisipiu Dili, ne’ebe durante ne’e fó apoiu maka’as ba polísia mak ohin loron Mauk Moruk mate iha ne’eba, ita hotu moris iha situasaun ne’ebe hakmatek no hala’o ita nia atividade ho di’ak, karik ita boot sira mak la apoiu, oinsa? Susar atu kontrola bainhira mosu situasaun ne’ebe ladiak, maibe ho ita boot sira nia apoiu informasaun mak situasaun seguransa la’o di’ak.”
Tamba ne’e husu ba komunidade tomak atu apoiu nafatin no koopera ho polisia komunitaria sira atu nune’e bele asegura paz no seguransa iha ita nia Nasaun liu-liu iha Munisípiu Dili.
Afirma Komandante Pedro Belo bainhira loke abertura ba enkontru harii KDD Munisípiu Dili nian iha salaun Komando PNTL Munisípiu Dili, loron Kuarta (12/08/2015). Média PNTL.
