Dili, relasiona ho situasaun seguransa ne’ebe oras ne’e dadaun akontese iha teritoriu Timor, Komandu Polísia Nasional Timor-Leste (PNTL) prontu iha kualker tempu hodi halo prevensaun ba krime ne’ebe maka akontese.
Hatan ba preukupasaun komunidade nian ba atuasaun polísia nian ba krime ne’ebe maka ikus-ikus ne’e mosu iha kapital Dili no mós munisipiu, Segundu Komandante Jerál PNTL Komisariu Polísia Mateus Fernandes hateten prevensaun Polísia nian lao hela no PNTL prontu hala’o nia kna’ar iha kualker tempu deit iha 24 oras nia laran.
“Hau hakarak dehan hanesan ne’e, nu’udar Timor oan ita hotu-hotu sente bolu, nu’udar nain ba rai ida ne’e, buat ida polísia buat seluk ida ita nia maun sira Forsas Armadas, ami ne’e hanesan instrumentu ida kualker tempu ami iha ne’eba, mas ita Timor oan mak tenke sente bolu hare’e hanusa maka goza ukun rasik aan ne’e, orsida kuandu polisia tun ba atua ho regirozu depois iha hanoin oin-oin mas mak ne’e nu’udar Timor oan dala ida tan hau dehan ita mak nain ba Timor, ita mak nain ba seguransa ami polísia ne’e hala’o deit”, tenik adjuntu Komandante Jerál ne’e.
Komisariu Polísia Mateus subliña liu tan katak tamba ne’e maka kuandu buat ruma lao iha kraik presija servisu hamutuk, só servisu deit mak ita bele pronunsia buat diak ba ita nia nasaun no ba ita nia povu, polísia sei halo esforsu maka’as mas presija kontribuisaun ba ema tomak iha Timor, tamba sá liafuan ida dehan seguransa nain mk povu, rai ida ne’e nain mak ita hotu, entaun sentidu bolu entre ita hotu tenke hatudu iha situasaun ida ne’e.
“Hau hanoin difikuldade iha nasaun ne’ebe deit, Timor foin ukun aan seidauk kleur ita hasoru dezafiu oin-oin, dezafiu sempre iha hodi motiva ita sai diak liu tan mas la signifika katak dezafiu iha mais dezafiu sira la sai difikuldade ba PNTL atu atua situasaun, klaru iha Konstituisaun hatete klaru PNTL prontu kualker tempu iha nia inan aman nia sorin, iha povu tomak nia sorin laiha dalan seluk ,laiha rezerva”, hakotu Komisariu Polísia ne’e.
Media PNTL.
