Dili, Komandu Polísia Nasional Timor-Leste (PNTL) iha kinta-feira (07/06) ne’e liu husi Komandante Jerál PNTL no akompaña husi Segundu Komandante Jerál PNTL hasoru malu ho Prezidente Repúblika (PR) Dr.Francisco Guterres “Lu-Olo” hodi relata situasaun seguransa iha teritoriu laran tomak durante periodu inisiu fulan Juñu tinan 2018.
Komandante Jerál PNTL Komisariu Polísia Julio da Costa hafoin enkontru ba jornalista sira hateten hanesan bain-bain parte seguransa mai hato’o informasaun kona-ba seguransa nia ba PR katak situasaun en jerál iha munisipiu 13 lao hakmatek, laiha problema ida ne’ebe signifikante atu PNTL toma medida imediatamente.
“Só iha kazu balun ne’ebe akontese hanesan ita hotu hatene katak iha loron 2 liu ba iha Suai, iha homesidiu ida entre grupu joven sira, suspeitu sira orseik lori ona ba Tribunal hodi halo primeiru interogatoriu, ita hein dezisaun Tribunal nian oinsa no kazu ida hori-bainhira suspeitu ida soke ema arbiru, ida ne’e mós suspeitu no vitima sira oras ne’e dadaun iha hela hospital hafoin polísia investigasaun no tránzitu nian sei kontinua ninia prosesu investigasaun ba tribunal”, tenik Komandante Jerál PNTL ne’e.
Komisariu Polísia Julio da Costa akresenta liu tan iha enkontru ne’e informa mós ba PR kona-ba forsa sira ne’ebe kolokadu iha munisipiu sira liu-liu PNTL, tanba hare’e ba situasaun balun ita sei mantein to’o formasaun governu foun hafoin mak ita dada fila fali mai Komandu.
“Ami informa mós ba PR kona-ba kapturasaun suspeitu Timor oan balun ne’ebe maka halai ba Indonesia, servisu hamutuk koordenasaun ho Polri ita kaptura no lori mai ona agora ba ona prosesu judisial ninian”, hatutan na’in ulun PNTL ne’e.
PR Agradese Servisu Seguransa
Iha biban ne’e, pontu-de-vista husi Prezidente Repúblika (PR) Dr.Francisco Guterres “Lu-Olo” ba servisu parte seguransa nian durante ne’e, agradese tebes ba servisu seguransa nian ne’ebe halo durante ne’e.
“Prezidente agradese ba servisu seguransa nian ne’ebe halo en-koordenasaun hamutuk ho FALINTIL Forsa Defeza Timor-Leste (F-FDTL) kooperasaun ne’ebe diak tebes no husu atu mantein nafatin lao ba oin hodi kria estabilidade no paz ba rai doben Timor-Leste nune’e povu tomak Timor oan hakmatek hala’o idak-idak nia moris”, hateten Komisariu Polísia Julio da Costa Hornay. Media PNTL
