Dili, Tersa Feira ne’e (01/03/2016) Komandante Jerál PNTL Julio da Costa Hornay asina akordu ho Komandante Timor-Leste Police Development Program (TLPDP), Paul Dickinson iha Salaun Enkontru Quartél Jerál Kaikoli, kona ba estabelesimentu Konsellu Koordenasaun Programa.
Iha abertura serimonia ne’e, Komandante TLPDP, Paul Dickinson iha ninia diskursu hateten, konsellu ne’e aliña PNTL ho TLPDP nia valores kona-ba kooperasaun, respeitu no responsabilidade mutual. “Ho haksolok mak hau ohin iha ne’e atu asina PNTL – TLPDP nia akordu ba Konsellu Koordenasaun Programa. Estabelesimentu ba Konsellu ne’e, refleta parseira aprosimasaun atu dezenvolve PNTL no reforsa papél Komandante Jerál ho nia Ezekutivu nian hodi hato’o lideransa estratéjiku ba PNTL ho programa parseirus”, hateten Paul Dickinson.
Konsellu ne’e sei tau matan ba implementasaun Programa Dezenvolvimentu ba Polísia Nasionál Timor-Leste husi Polísia Federal Australiana, halo avaliasaun ba nia progresu, hare ba mudansas no fó orientasaun kona-ba nesesidades dezenvolvimentu nian.
“Nu’udar ajénsia polisiamentu rua, Polísia Federal Australiana ho Polísia Nasionál Timor-Leste partilla ho objetivus hanesan, kona-ba protesaun ba ita nia komunidade ho fó ambiente seguru ba ita nia povu. Kriasaun Konsellu ne’e tau ita nia hamutuk hodi haburas no hametin polisiamentu, prevene krime no promove boa governasaun institusionál”, tenik Komandante TLPDP.
Iha fatin hanesan, Komandante Jerál PNTL Julio da Costa Hornay iha ninia diskursu apresia “em primeiru lugar lori Komando Jerál PNTL hakarak hato’o agradesimentu ba TLPDP ne’ebe maka sai hanesan parseiru servisu dezenvolvementu instituisaun PNTL nian iha area lubuk ida desde 2004 to’o mai loron ne’e. Apoio ne’e positivu tebes, tanba konsege dezenvolve kapasidade rekursu umanu PNTL nian”.
Komandante Jerál PNTL agradese ba TLPDP no kontinuasaun progresu ne’e maka ohin asina planu servisu 2015 ba 2016. “Ohin asina planu servisu 2015 ba 2016, balun ita halo ona iha 2015, balun ita sei hatutan ba to’o iha Jullu 2016. Iha programa ne’e diak tebes, tanba hau hare’e kapasitasaun ba membru PNTL liu-liu investigasaun iha nivel 1, 2, no 3. No mós iha parte IMS apoio informasaun husi distritu mai Nasionál. Hau espera programa ne’e bele lao ho diak”, hateten Julio da Costa Hornay.
Husi apoio ne’ebe maka TLPDP fó mai PNTL durante ne’e, Sentru Formasaun Polisia sai hanesan rekordasaun ne’ebe diak tebes. Media PNTL
