Dili: Komisaun B Parlamentu Nasional kestiona makaas ho attitude membru Polisia Nasional Timor-Leste(PNTL) ne’ebe tiru joven nain rua ho pistol.
Prezidente Komisaun B PN, David Diaz Ximenes ‘Mandati’ konsidera atuasaun membru PNTL ne’ebe tiru joven sira ne’e.
Nia esplika katak, hare husi kronolojia ne’ebe akontese iha loron 2 Novembru 2015 ne’e, joven sira ne’e sala duni tanba kontra kodigu Estrada nian tanba nain tolu sa’e motor ida. Maibe lolos polisia tenke hasai sira nia karta hodi aprezenta ba komando konaba hahalok sira ne’e.
“Laiha razaun atu baku ema kuandu ema la halo rezistensia, maibe kuandu halo rezistensia mos iha forum ida para entrega ba iha polisia, tanba polisia maka garante seguransa laos halo fali violensia,” dehan nia iha uma fukun PN horsehik.
Ne’e duni, deputadu David konsidera membru PNTL ne’e salatanba viola rgra kodigu tráfiku nian.
Hato’o keisa ba PN
Iha Tersa (18/11), horsehik, vitima nain rua ne’ebe hetan tiru husi membru PNTL iha suku Letemumu, Kelekai-Baucau, hato’o keisa ba Komisaun B PN asuntu defeza, Seguransa nian.
Vitorino Ximenes nudar aman ba vitima sira, husu ba komisaun B PN atu bele direitu vitima sira nian hodi lori suspeitu ba tuir prosesu justisa ne’ebe iha.
Tuir kronolojia ne’ebe konta husi vitima sira, iha loron 2 Novembru 2015 vitima nain tolu ne’ebe hetan tiru husi membru PNTL sae motor ida deit iha suku Letimumu. Hare ba ida ne’e, membru polisia ida diretamente hapara sira ho motor depois fo basa ba vítima.
Tenta Hadau Pistola
Entretantu antes ne’e Komandante polisia Munisipiu Baucau, Superintendente justino Menezes, afirma antes tiru joven sira ne’e polisia Eskuadra Kelikai ba atua uluk problema entre grupu rua husi suku Baguia, aldeia Saraida ho suku Letemumu postu administrative kelikai nian.
“bainhira polisia eskuadra kelikai ba hakalma tiha situasaun entre joven suku rua nian iha sede suku Letemumu mosu joven nain tolu ho motor ida deit ne’ebe la uja kapasete ho atributu arte-marsiál nian kompletu ne’ebe maka estadu taka tiha ona, dehan Justinu ba jornalista sira iha edifisiu Komando PNTL Baucau, tersa (3/11) semana ne’e.
Xefe polisia Baucau ne’e hatete, joven nain tolu ne’ebe la uza kapasete naran Agostu dos Santos, Sidonio Guterres no Januario dos Santos.
‘Sira nain tolu ba iha ftin problema nian halo provokasaun au mesmu tempu dudu polisia no rasta polisia ninia pistol atu hadau ho manera ida ne’e mak polisia mos uza forsa hodi defende aan hakanek joven nain rua,” dehan Justinho.
Fonte: INDEPENDENTE edisaun 19 Novembru 2015