POLITIKA REFORMA LEGISLAÇÃO LORI KSOLOK BA MEMBRU PNTL SIRA
Loron ohin kinta feira dia 27 de Março de 2025 realiza Cerimónia official Aniversário Polisia Nasional Timor Lorosae – PNTL ba dá-la 25 iha resinto Palácio do Governo ho lema ” Juntos, Reforçamos a Confiança”. Lema ida-ne’e reafirma katak polísia mak povu no povu maka polísia, hamutuk Ita hametin konfiansa hodi prevene krime no kombate krime organizadu sira. Dala balun iha pluralidade ba pensamentu no diferentes hipótese kona-ba komportamentu negativu ne’ebé prátika hosi membru PNTL sira, maibe ida-ne’e la-sai hanesan dezáfiu atu Ita hotu kurije no hadi’ak hodi sai PNTL ne’ebé professional, produtivu no disiplinar iha momentu hotu-hotu. Filozofia polísia iha mundu tomak maka aparélio ba aplikasaun no inplementasaun lei no ordem ho lolos. Polísia mak forsa públika ne’ebé garante orden no seguransa, inpoin lei ho disciplina atu prevene atetudi sira kontra lei penal, prevene kriminalidade, investiga krimi sira, prevene asidente transitu no fiskaliza tranzitu iha teritoriu nasional. Ho nue’e PNTL konvida ba entidade sira hotu-hotu, feto ka mane, veteranu sira, lider komunitaria sira, akademista sira, inteletual sira no relijiozo/a sira atu hamutuk garante paz no estabilidade hodi ema hotu bele ezerse sira nia direitu liberdade iha estadu direito demokratiku.
Iha eventu selebrasaun aniversáriu Polísia Nasionál Timor-Leste iha resintu Palácio do Governo selebra ho ksolok tanba realiza mós promosaun ba membru PNTL sira ho karakterístika extraordinária tuir rekezitu sira ne’ebé prévistu iha Estatuto dos Polícias da Polícia Nacional de Timor-Leste artigu 155. Membru PNTL sira ne’ebé hetan promosaun hamutuk ema na’in 2.755. maske iha sasidik oituan-oituan iha prosesu ida-ne’e.
Implementação promoções tranzitorias ba Polícia Nacional Timor Leste nu’udar korajen no motivasaun ba membru PNTL sira hotu atu kontinua manifesta kualidade profesional no proporsional hodi implementa lei no odem ho disciplina hodi haforsa seguransa interna ba sidadaun sira, lá ho diskriminasaun no sempre respeitu ba direitos humanus ho regrozomente.
Objetivu hosi promosaun ida-ne’e atu haburas liu-tan estabilidade ba progresaun kareiras membru PNTL sira ho komprénsivu no lojiku hodi halo ajustamentu ba estrutura PNTL nian, halo rotasaun ba kargu sira liu-liu fo oportunidade ba feto sira hodi okupa posisaun lideransa iha nivel estratejiku, iha nivél Munisipiu, iha nivél Komandos Unidade Especial sira ate nivél esquadras.
Altersaun lei óganika Polísia Nasional de Timor-Leste hanesan parte ida hosi programa IX Governu Konstitusional ne’ebé promove reforma ba estrutura legal hodi haforsa diak liu-tan funsaun funsional no operasional iha modelo organizasional, hierarquizadu iha nível desizaun estratégika, nível desizaun tátika no nível operasional.
Iha nível desizaun estratégika maka Komandante-Jerál ho Segundu Komandante-Jerál ho órgaun consultivu sira, no parsialmente Komandante-Jerál bele desentraliza kompeténsia propria tuir lei ba iha nível komando diresaun e supervizaun hanesan Komandu Operasaun ne’ebé diriji no superviziona atividade operasional, Komandu Administrasaun ne’ebé diriji no superviziona atividade apoiu administrativu, iha konformidade ho desizaun estratéjika ne’ebé defini husi Komandante-Jerál, no Komandu Pesoál no Formasaun ne’ebé diriji no superviziona jestaun rekursu umanu no formasaun.
Nivél desizaun tátika intruduz mós inovasaun ba kriasaun novos estrutura organizasaun hosi Departamentu ba Diresaun servisu investigasaun kriminal, diresaun servisu Informasaun polícia, diresaun polisiamento komunitáriu, no diresaun trânsitu segurança rodoviária. Iha nível teknika operasional ne’ebé define kona-ba área teritorial hanesan Komandu Munisipal no Komandu Rejionál Rejiaun Administrativa Espesiál Oe-Cusse Ambeno inklui Unidade Espesial sira ne’ebé iha kapasidade taktika no téknika operasionál atu apoiu komandu teritorial sira.
Ikus-liu hakarak agradece IX Governo Constitucional liu-hosi Lideransa Exceléncia Senhor Ministro do Interior Dr. Francisco da Costa Guterres, Komandante-Jerál Henrique da Costa, M.Si no 20 Komandante-Jeral Pedro Belo, Lic.Dir nomós agradece ba Komisaun Promosaun tranzitorias ba servisu preparatóriu sira ne’ebé fo ona naroman ba membru PNTL sira.
Melhores comprimentos e obrigado wa’in.
Dili, 24 de abril de 2025
Hakerek na’in
Virgílio D. Correia, M.H.
