Dili, Komandu Polísia Nasional Timor-Leste (PNTL) sexta-feira (07/07) ne’e hala’o serimonia abertura Treinamentu Taekwondo ba membru Unidade Espesial Polísia (UEP) ne’ebe maka hetan suporta husi embaixada Korea do Sul iha Timor-Leste.
Komandante Jerál PNTL Komisariu Jerál Polísia Henrique da Costa iha ninia diskursu ba serimonia ne’ebe hala’o iha Komandu UEP Bairo-Pite hateten prezensa embaixador Korea nian iha serimonia abertura ida ne’e hanesan jestu ida ba prontidaun governu Korea do Sul hodi fó apoiu mai PNTL iha dezenvolvimentu instituisaun ida ne’e.
“Ohin ita hotu foin asiste embaixador Korea nian entrega ekipamentu Taekwondo mai PNTL espesial ba iha UEP ho nia estrutura tomak, atu ho responsabilidade kuidadu didiak ekipamentus hirak ne’e, nune’e ita hotu bele utiliza ba akividade ita nian iha tempu ida ne’ebe naruk”, tenik Komandante Jerál PNTL ne’e.
Komisariu Jerál Polísia ne’e afirma iha okaziaun ida ne’e hakarak hato’o agradesimentu ida ne’ebe klean ba apoiu ne’ebe fó ona mai PNTL, no hein katak apoiu hirak ne’e laos to’o deit iha ne’e maibé bele mós fó apoiu iha area seluk ba dezenvolvimentu instituisaun PNTL nian iha futuru. Tanba ne’e ami hakarak espresa katak dezenvolvimentu PNTL sei konta mós ho ita bo’ot (Korea do Sul) nia apoiu.
“Ba ita sira ne’ebe maka sei aproveita treinamentu ida ne’e, iha siênsia defesa pesoal laos hanorin ita hodi uza forsa ho violensia, maibé siênsia defesa pesoal hanorin ita atu pasiensia, disiplina, iha benefisiu barak tebes iha treinamentu defesa pesoal ida ne’e maka hanesan, primeiru sai meius ida hodi defende ann, rua maka ita iha físiku ne’ebe saudável, hala’o ita nia múskulo sira ne’ebe forte no isin sira fleksu liu, halo ita konfia ann liu tan no barani hodi hala’o servisu, promove ita nia pasiensia, disiplina no kontrola ann”, hatutan Komisariu Jerál Polísia.
Autoridade másimu intituisaun seguransa apela ba membru UEP ne’ebe maka sei partisipa iha treinamentu ne’e katak aktividade ne’e fó benefisiu maka’as tebes hanesan membru PNTL, tanba ne’e husu imi hotu atu tuir Treinamentu Taekwondo ida ne’e ho sériu no responsabilidade. Informa mós katak Treinamentu Taekwondo ida ne’e laos deit ba membru UEP maibé mós ba membru PNTL hotu ne’ebe hakarak hola parte iha Treinamentu ida ne’e.
Iha fatin hanesan, embaixador Korea do Sul iha Timor-Leste Shin Mantaek iha ninia intervensaun hateten mai iha fatin ida ne’e hanesan onra ida ba hau hodi bele mai asiste abertura treinamentu Taekwondo ida ne’e no atu fahe ekipamentu treinamentu nian.
“PNTL ninia misaun ida maka atu oinsa atu asegura paz no seguransa ba povu sira Timor-Leste nian, maibé entre Polísia sira ne’e, membru UEP iha buat ida maka espesial iha ne’ebe ema sira seluk laiha hanesan aifunan ida ne’ebe ita bo’ot sira espesial”, hateten embaixador Korea do Sul ne’e.
Shin Mantaek haktuir tan katak atu halo servisu espesial sira ne’e, membru Polísia sira mós tenke iha esperítu ida katak laiha buat maka inposivel, hafoin iha físiku, forsa ne’ebe maka ema seluk laiha, no sempre prontu atu hasoru dezafiu saida deit maka akontese iha terenu.
“Tanba ne’e hau fiar ho treinu Taekwondo ida ne’e sei bele ajuda atu eleva tan ita bo’ot sira nia skill ka abilidade ne’ebe iha ona, treinamentu Taekwondo ida ne’e la hanesan ho treinamentu sira seluk maibé treinamentu ida ne’e sei foka liu ba oinsa atu hametin liu tan auto konfiansa, esperítu fiar ann, hasa’e liu tan físiku atu nune’e bele hasoru situasaun saida deit maka akontese, ba iha terenu ita bo’ot sira bele ultra pasa”, haktuir Shin Mantaek.
Iha biban serimonia ne’e, embaixador Korea do Sul iha Timor-Leste Shin Mantaek entrega ekipamentus Taekwondo nian ba iha Komandante Jerál PNTL Komisariu Jerál Polísia Henrique da Costa akompaña husi Komandante UEP. Hola parte iha aktividade ne’e, Komandante Komandu PNTL Munisipiu Dili, Komandante Interinu CFP, Komandante UEP ho estrutura tomak, Sekretariu Jerál Taekwondo Timor-Leste no kovidade sira seluk.
Media PNTL.
