Aileu, Komandu Polísia Nasional Timor-Leste (PNTL) Munisipiu Aileu Kinta orseik (19/10) hala’o serimonia fatuk dahuluk ba konstrusaun uma ba Ofisial Polísia Suku (OPS) iha Munisipiu Aileu postu Administrativu Aileu Vila, Suku Seloi Craic.
Inspector Jerál PNTL reprezenta Komandante Jerál PNTL, Superintendente Xefe Carlos Jerónimo iha ninia diskursu ba serimonia ne’e hateten konstrusaun uma OPS ne’e hanesan programa pilotu ne’ebe hala’o entre Governu Nova Zelandia liu husi ninia Embaixada iha Timor-Leste no governu Timor-Leste liu husi Ministeriu Interior (MI) reprezenta PNTL no Ministeriu Adminstrasaun Estatal (MAE) reprezenta PNDS (Programa Nasional Desenvolvimentu Suku) prosesu ida ne’ebe laos fasil.
“Instituisaun PNTL hamosu politika oin-oin atu oinsa bele hamosu saida maka diak atu ba ninia membru PNTL tomak iha area oin-oin hanesan mós formasaun, infrastrutura no apoio sira seluk tan ne’ebe Komandu PNTL mesak labele hala’o buat sira ne’e hotu, maibé tanba konfia katak nia iha parseiru balun bele fó apoio hodi nune’e bele hakma’an ninia membru sira bele hala’o aktividade iha area rurais”, tenik Inspector Jerál PNTL.
Superintendente Xefe Carlos Jerónimo salienta liu tan katak apoio ne’ebe maka parseiru sira fó laos deit hari’I uma OPS iha munisipiu Aileu maibé sei fó apoio mós atu hari’I uma ba OPS seluk hamutuk 14 iha munisipiu 13 inklui rejiaun espesial Oecusse.
Iha fatin hanesan Administrador munisipiu Aileu João Tilman do Regu hateten komunidade hamutuk ho autoridade lokal munisipiu Aileu sente privilegio tebes ba apoio ne’ebe maka fó husi governu Nova Zelandia iha termu ida ne’e mós ami hatene katak laos ba konstrusaun uma ba OPS deit maibé liu husi mós formasaun atu bele fó apoio ba instituisaun PNTL iha teritoriu liu-liu iha munisipiu Aileu.
“Ida ne’e hatudu katak kooperasaun entre governu nasaun rua ninian espesialmente apoio ida ne’e mai iha munisipiu Aileu, ami lori governu lokal hato’o ami nia agradese ba apoio ida ne’e, hein katak ba futuru kooperasaun entre estadu rua bele metin diak liu tan iha aspektu oin-oin ne’ebe maka hakarak atu bele desenvolve diak liu tan instituisaun hotu-hotu liu-liu maka PNTL atu bele ajuda ami diak liu tan, hasa’e ami nia profesionalismu hodi nune’e bele servisu hamutuk garante Lei no Ordem iha Timor-Leste”, hateten Administrador munisipiu Aileu.
Nune’e mós embaixadora Nova Zelandia iha Timor-Leste Vicky Poole hateten inisiativa lansamentu primeira pedra ba pilotu uma ba OPS ne’ebe hetan apoiu husi governu Nova Zelandia no iha insiativa ida ne’e sei hari’I uma hamutuk 14 ne’ebe maka sei kompleta ba OPS uza deseñu ne’ebe desenvolve ona husi PNDS hamutuk ho PNTL. Implementasaun sei hahu’u iha tempu badak no hein katak uma sira ne’e sei remata iha fulan Janeiru tinan 2018.
“Ami apoiu ona polisiamentu komunitaria ba tinan barak no rekoñese katak OPS maka sai xave ba susesu polisiamentu komunitaria iha Timor-Leste, tanba ne’e uma OPS importante ba sira atu hela besik ho komunidade ne’ebe maka sira servi”, hateten Vicky Poole.
Iha programa Apoio Pilotu Uma ba OPS, Nova Zelandia sei fó apoio osan hamutuk $500,00 ba hari’I provizaun uma ba OPS no total uma ne’ebe maka sei hari’I hamutuk sanulu resin ha’at. Implementasaun programa pilotu ne’ebe sei uza Sistema servisu hotu iha PNDS (Programa Nasional Desenvolvimentu Suku) hodi koopera ho komunidade sira iha suku ba hari’I uma ba OPS.
Partisipa iha serimonia hatur fatuk dahuluk ba konstrusaun uma OPS maka Komandu PNTL munisipiu Aileu hamutuk ho membru eskudra tomak, Komandante PNTL munisipiu Ainaro, Komandante PNTL munisipiu Manufahi, reprezentante Centro Formação Polícia (CFP), lideransa komunitaria, autoridade lokal, ekipa embaixada Nova Zelandia iha Timor-Leste, The Asia Foundation (TAF), PNDS, estudante no komunidade suku Selio Craic. Iha biban serimonia ne’e, entrega mós livru Norma Organizasaun no Proseidementu (NOP) ba uma Ofisial Polisia Suku ba komandante PNTL eskuadra Aileu Vila.
Media PNTL.
