Dili- Komandante Interinu Polisia Tranzitu Nasional (Poltraz) Nasional, Inspetur Xefe Valente Soares da Silva relata, iha semana kotuk hahu husi loron 7-10 Setembru, asidente ne’ebe mak akontese iha territoriu laran tomak hamutuk 31 mak hanesan kanek kmaan 26 no kanek todan 9 no mate 1.
“Ha’u hakarak relata katak husi Munisipiu Dili hamutuk 13, Baucau 5, Viqueque 3, Bobonaro ho Liquisa 2 deit no restante ida de’it, no balun laiha liu mak Munisipiu Lautem,” haktuir Valente ba jornalista sira iha nia knaar fatin, Kaikoli (17/09).
Nia hatutan mate ne’e akontese iha loron 8 lokraik iha Institute of Bussines (IOB) Pantai Kelapa nia oin tamba soke malu iha dia 7 lokraik no vitima refere lori ba Ospital no mate iha dia 8. Ida ne’e akontese entre motorizada ho labarik ne’ebe mak korta dalan.
Nia informa liutan katak kronolojia lolos husi akontesimentu ne’e seidauk entrega maibe tuir informasaun mak to’o uluk ba POLTRAS mak hatete katak labarik ne’e lao ho nia bin la kaer nia liman hodi ultrapassa no labarik ne’e atravesa derepente, tamba ne’e soke husi motorizada ne’e. Labarik ne’e tinan lima (5).
“Ita seidauk simu nia kronolojia loloos maibe tuir informasaun ne’ebe mak hetan katak labarik ne’e la’o ho nia bin mak atravesa derepente mak motor ne’e soke,” dehan Valente.
Entretantu, nia dehan, parte tránzitu mos koloka nia membru hamutuk na’in 10 hodi akompaña programa Tour de Timor, ne’ebe involve husi motorizada 3 no Land Rover 1. Husi motorizada 3 ne’e atu kontrola siklista sira karik hetan asidente iha ai laran tuan, no Land Rover ne’e atu prepara hodi loke dalan. (Fontes: Timor Post, Sesta 18 Setembru 2015).
