Dili, Komandu Polísia Nasional Timor-Leste (PNTL) liu husi Servisu Investigasaun Kriminal Nasional (SICN) realiza konferensia ida iha Kinta ne’e (25/05) hodi uniformiza setór justisa no aplikasaun Lei iha Timor-Leste.
Komandante Jerál PNTL Komisariu Polísia Julio da Costa Hornay iha nia intervensaun ba abertura konferensia ne’e hateten oportunidade diak iha sorumutu ne’e hakarak refere ba importansia aktualidade, ba tema iha konferensia ne’e maka Uniformiza Setor Justisa no Aplikasaun Lei Iha Timor-Leste hodi afirma katak ida ne’e bele sai hanesan ezersisiu halo reflesaun hodi hasai konkluzasaun importante ba futuru.
“Ohin loron mundu ne’ebe globalizadu no ema labele ona se’es husi ameasa sira ne’ebe sai paradigma foun ba estratégia atu kombate inseguransa, globalizasaun ne’ebe lao lais haluha ameasa no hamosu problema iha skala mundial ema labele ona tau fronteira entre seguransa interna no externa”, hateten Komandante Jerál PNTL iha Hotel Garden Beach.
Komisariu Polísia Julio da Costa Hornay subliña liu tan katak iha tinan 2016 PNTL rezista númeru krime ne’ebe sae akompaña ho tendensia internasional ho munisipiu Dili iha leten tuir estatistíka ne’ebe hatudu ho krime ne’ebe as liu maka ofensa ba integridade físika no rezista mós aumenta kriminalidade kontra patrimoniu.
“Atu hala’o servisu PNTL nian buat esensial maka prosedimentu legais tenke uniforme ba munisipiu hotu-hotu nune’e hodi fasilita aplikasaun ba kódigu prosesu penal, kona-ba ida ne’e hau hanoin ita nia parseiru sira fó apoio material ba ita no mós livrus balun ne’ebe maka Investigasaun Kriminal kria iha nivel distrital to’o ba iha eskuadra”, salienta Komisariu Polísia ne’e.
Entertantu Prokurador Jerál da Repúblika Dr. Jose da Costa Ximenes iha nia intervensaun konferensia ne’e hateten kestaun importante maka kooperasaun entre Ministeriu Públiku ho PNTL iha âmbitu invetigasaun kriminal nian.
Iha fatin hanesan Komandante SICN Superintendente Jorge Monteiro hafoin konfrensia ba jornalista sira hateten konferensia ne’e halo relasiona ho uniformalizasaun ba iha prosesu sira investigasaun nian no mós prosedura-prosedura sira ne’ebe maka nesesita iha prosesu krime nian.
“Partisipantes sira ne’ebe maka hola parte iha konferensia investigasaun kriminal ne’e ita hare mai husi ajensia sira ne’ebe maka iha interligadu ba malu hanesan gabinete Prokurador Jerál da Repúblika, gabinete prokurador sira iha area jurídiku hat nian hanesan Dili, Baucau, Suai no mós Oecusse”, tenik Komandante SICN.
Superintendente Jorge Monteiro salienta liu tan katak além de area jurídiku hat ne’ebe iha, inklui mós polísia sira ne’ebe iha parte Polísia Sientifika Investigasaun (PSIK) nian no mós iha polísia sira iha parte servisu imigrasaun nian.
“Ita nia objetivu atu involve instituisaun estadu ka instituisaun governu interligadu iha prosesu krime nian laran ne’e, ita bele kria métodu ou mekanizmu ida hodi bele kria servisu hamutuk hodi nune’e ita bele uniformiza sistema investigasaun tantu iha PNTL nian, tantu PSIK nian, tantu iha Ministériu Públiku nian ne’ebe tutela ba iha prosesu krime nian atu nune’e sistema no prosedimentu prosesu investigasaun ne’e halo iha fatin sira ne’ebe diferente maibé nia formatu no sistema ne’e hanesan deit”, tenik Superintendente Jorge Monteiro.
Partisipa iha konferensia ne’e Komandante Jerál PNTL, parseiru desenvolvimentu TLPDP, Emabaixador Australia iha Timor-Leste, Embaixadora Estadu Unidus Amerika iha Timor-Leste, Prokurador Jerál Repúiblika no hetan partisipantes sira husi investigador PNTL nian iha munisipiu.
Media PNTL.
