DILI – Durante tinan 3 (tolu) hahú tinan 2007-2009, sidadaun Timor oan na’in 2 (rua) sai vítima ba kazu krime liu husi via Internet (Internet Crime). Kazu krime ne’e hetan liu husi servisu INTERPOL (Internationl Police) Timor-Leste nian.
“Iha tinan 2007-2009 durante tinan 3 sidadaun Timor Oan na’in 2 mak sai vítima ba Internet crime, tamba ema balun husi nasaun seluk bosok sira, no sira haruka tiha sira nia osan ba, to’o ikus ema ne’ebé bosok sira lori lakon tiha sira nia osan. Haktuir Adjuntu Komandante INTERPOL Timor Leste, Inspektúr Xefe Polisía Mario da Costa ba Média PNTL iha ninia kna’ar fatin Kaikoli-Dili, (08 Maiu 2014).
Sidadaun Timor oan nain 2 ne’ebe mak sai vitima ba via internet ne’e la bele fo sai ba publiku tanba konsedera iha segredu nia laran.
Inspektúr Xefe Polisía Mario da Costa hatutan, Timor-Leste sai membru INTERPOL ba dala-171 iha fulan Juñu 2004. Membru Polisía Nasionál Timor-Leste (PNTL) ne’ebé agora dadaun servisu iha INTERPOL hamutuk na’in 7 (hitu).
Atividade ne’ebé INTERPOL hala’o durante ne’e mak simu keixa husi nasaun membru INTERPOL sira kona-ba kazu krime internet, sidadaun estranjeiru ne’ebé uza pasaporte ilegál no kazu krime sira selseluk tan. Bainhira sira simu keixa kona-ba kazu hirak ne’e, sira hala’o avaliasaun, análiza, no halo investigasaun ba kazu hirak ne’e hodi prosesa tuir lei ne’ebé vígora iha Timor-Leste.
Adjuntu Komandante INTERPOL ne’e mos esplika katak difikuldade ne’ebé sira hasoru durante ne’e mak kna’ar ba estrutura INTERPOL nian seidauk define klaru hodi hala’o ida-idak nia servisu, tamba dala ruma balun bele hala’o servisu dupla.
Adjuntu Komandante Mario da Costa husu ba parte Seksaun Planeamentu PNTL nian atu bele revé fali normas no prosidementu PNTL nian liu-liu ba servisu INTERPOL, atu nune’e servisu INTERPOL bele la’o di’ak liu tan iha futuru.
Ikus liu Adjuntu Komandante INTERPOL ne’e husu ba parte Unidade Patrullamentu Fronteira, Imigrasaun, Alfándega no komunidade sira atu servisu hamutuk hodi bele detekta ba aktu krime husi rai liur. Mídia PNTL.