Dili– Polísia Nasional Timor Leste liu husi Servisu Investigasaun Kriminal (SIK) hahú halo prosesu investigasaun ba pistola 2 ne’ebe mak Grupu Konsellu Revolusionariu Maubere (KRM) uza nomos Kartaun identidade PNTL nian ne’ebe hetan husi Grupu KRM refere.
Pistola 2 ne’e ida entrega husi Domingos Gama “Cowboy” no ida seluk ne’ebe Mauk Moruk kaer durante nia sei moris.
“Ami tenke halo duni prosesu investigasaun ba pistola 2 (rua) ne’ebe ida entrega husi Domigos Gama no ida seluk ita foti fila fali bainhira Mauk Moruk mate, tamba pistola 2 ne’e sai hanesan evidénsia ba ita, aleinde pistola 2 ne’e, ita mos sei halo investigasaun ba ID-CARD polisia nian ida ne’ebe mak ita hetan hamutuk iha momentu Mauk Moruk mate,” afirma Komandante Jerál PNTL, Komisáriu Julio da Costa Hornay ba Jornalista sira iha Kuartel Jerál PNTL, Caicoli-Dili, loron sesta (28/08/2015).
Komisáriu Julio hatutan, liu husi prosesu investigasaun mak bele identifika loloos tamba sa mak kartaun identidade (ID CARD) PNTL nian bele hamutuk iha Grupu KRM, tamba ne’e parte investigasaun nian tenke investiga kle’an atu nune’e bele hetan ninia rezultadu.
Iha parte seluk, Komandante PNTL Munisipiu Baucau, Superintendente Justino Menezes informa, pistol 2 inklui atributu seluk hanesan Granada, Dima, Rama no Katana ne’ebe polisia rekolla agora dadaun sei rai hela iha seksaun Investigasaun nian, tamba ida ne’e mak sai hanesan evidénsia hodi prosesu ba oin.
“Atributu ne’ebe polisia rekolla bainhira Mauk Moruk mate mak agora dadaun sei rai iha seksaun investigasaun nian, sira mak rai hodi sai hanesan evidensia hodi prosesu ba oin, sasan sira ne’e mak pistola 2, katana, dima, granada, rama no seluk tan,” esplika Komandante Menezes. Média PNTL.
