Tibar, 12 outubru 2022 – Atu prevene no kombate krimi tráfiku droga, tráfiku umanu, terorizmu, piratarias, imigrasaun klandestina no poluisaun marítima, Timor-Leste Police Development Program (TLPDP) fasilita formasaun ba membru Unidade Polísia Marítima (UPM) hamutuk nain 42, iha Suku Tibar, Postu Administrativu Bazartete, Munisípiu Liquiça, hodi sai navegadór ne’ebé profisionál nune’e bele fó seguransa ba área tasi nian.
Xefi Seksaun Formasaun no Treinamentu UPM, Primeiru Sarjentu Polísia, José Manuel Gomes, hateten formasaun ne’e hetan apoiu finanseiru hosi TLPDP.
“Atividade ida-ne’e ita hala’o bazeia ba planu estratéjiku ne’ebé dezenvolve hosi Komandante Unidade Polísia Marítima hodi realiza treinamentu ba membru sira ho kooperasaun hosi parseria dezenvolvimentu sira hosi TLPDP hodi apoiu treinamentu no-mós finanseiru formasaun ida-ne’e”, esplika José Manuel Gomes, ba jornalista sira iha Sentru Nasionál Empregu no Formasaun Profisionál (sigla portugés; CNEFP)- Suku Tibar, Liquiça.(12/10/2022).
Nia dehan, formandu sira hamutuk ema nain 42 inklui ofisiais sub alternu, sarjentu no ajente sira ne’ebé maka durante ne’e servisu iha UPM no Komponente Naval nian.
“Formasaun ne’e ita fahe ba parte rua ida longu prazu no ida kurtu prazu. Kurtu prazu ne’e ita komesa hosi fulan agostu tinan ida-ne’e to’o agora enkuantu longu prazu nian ita sei halo iha tinan oin no formasaun ida-ne’e envolve mós instituisaun sira seluk mak hanesan komponente naval no Ministériu Agrikultura no Peskas (MAP) tanba iha futuru mai polítika Guvernu nian estabelese Autoridade Nasionál Marítima ita bele integra hamutuk hodi halo kolaborasaun di’ak liután”, salienta.
Xefi Formasaun UPM ne’e hatutan, treinamentu ne’e hanesan kontinuasaun ba materia sira ne’ebé antes ne’e membru sira simu ona alias “refreshing training” atu fó hanoin hikas fali membru sira ho di’ak tuir espesialista ne’ebé iha.
“Formasaun ida-ne’e ita foka ba materia tolu hanesan lei baze fundamentál marítima nian, sistema navegasaun no-mós treinamentu kona-ba prevensaun no kondusaun. Tanba ne’e ha’u iha esperansa katak ho apoiu másimu hosi Guvernu inklui TLPDP sei bele mellora di’ak liután kapasidade membru sira nian iha siénsia marítima nian atu sira bele sai hanesan navegadór ne’ebé di’ak tuir orientasaun nune’e bele fó rezultadu di’ak nudar servidór estadu iha area marítima nian. ”, hakotu.
Iha fatin hanesan, Cameron Knight, nudar asesór ba area marítima hosi TLPDP akresenta formasaun ida-ne’e importante hodi bele eleva kapasidade formandu sira nian iha area marítima nian.
“TLPDP mai ho hanoin ida katak Timor-Leste nu’udar estadu marítimu soberanu iha responsabilidade internasionál hodi fornese seguransa iha tasi laran entaun formasaun ida-ne’e hanesan kontinuasaun ba dezenvolvimentu instituisaun PNTL nian, tanba ita hatene katak parte importante iha nasaun ida maka seguransa marítima” dehan Cameron Knight.
Formador Cameron hatutan, nia parte sei haree nafatin oportunidade ba oin atu kontinua halo formasaun hodi mellora di’ak liután membru UPM sira sai profisonál liután.
“Pontu importante hosi treinamentu ne’e tanba formasaun ne’e rasik envolve mós komponente naval hosi F-FDTL no Ministériu Peskas nian no ami hosi TLPDP sente kontente bele hola parte durante fulan tolu nia laran halo ona formasaun ba formandu hamutuk nain 42”, tenik tán.
Entretantu formasaun baze navegadór ne’e hetan apoiu formadór hosi CNEFP hanesan Hermenegildo Egidio Nunes Guterres, nudar Nautical Officer pilot kona-ba marítima nian no Ivan Nikolov intsrutór internasionál hosi CNFP rasik. Media Serviços Relações Públicas
