Dili– Unidade Espesial Polisia (UEP) sei koloka nia membru iha Munisipiu Covalima no Rejiaun Autónomu Oe-Cusse Ambeno (RAOA) hodi suporta programa governu nian iha tasi mane Suai no Oe-Cusse.
Komandante Jeral Polisia Nasional Timor-Leste (PNTL) Komisáriu Julio da Costa Hornay iha Aniversáriu UEP ba dala-6 Segunda 28 Setembru iha Bairo-Pite hateten la kleur tan sei koloka pelotaun 9 iha Munisipiu Covalima no Rejiaun Autónomu Oe-Cusse atu asegura projetu Supply Base iha Suai no Rejiaun Autónomu Oe-Cusse Ambeno.
Komisariu haktuir tan, ita sakrifika-an nafatin maske ho kondisaun mínimu maibe ho espiritu nasionalizmu, Espiritu de corpu sentimentu na’in ba rai forte ho kondisaun hirak ne’e la’os obstaklu atu hala’o misaun ho susesu.
“Ha’u husu ba imi atu kondisaun hirak ne’e labele sai obstaklu ba imi atu hala’o imi nia misaun, ita tenke sakrifika nafatin ita nia-an hodi servi ita nia nasaun hanesan na’in ba nasaun ida ne’e, laiha ema seluk atu mai serví ita nia rai, se la’os ita. Komando ho governu sei esforsu hodi kria kondisaun servisu ba imi maske neneik maibe ita la’o nafatin,” dehan Hornay.
Entretantu iha okajiaun ne’e Komandante Unidade Espesial Polisia Superintendente Xefe Afonso dos Santos hateten oras ne’e dadaun UEP iha membru efetivu kuaze nain 700 tamba ne’e husi tinan ba tinan unidade ne’e tenke dezenvolve.
“Iha fulan oin sei aumenta tan membru na’in 60 ba preparasaun atu koloka kompania Delta iha Suai no Kompania Eco iha Oe-cuse, servisu ba unidade ida ne’e mos kada tinan sempre aumenta tuir dezenvolvimentu governu nian,” espera Komandante UEP. Média PNTL.
