Batugade– membru foun Unidade Patrullamentu Fronteira (UPF) Polisia Nasional Timor Leste hamutuk na’in 26 (ruanulu resin neen) simu graduasaun iha Kuartel UPF Batugade, loron Tersa (22/12/2015) hodi haforsa seguransa iha área fronteira terrestre.
Komandante Jerál PNTL Komisariu Júlio da Costa Hornay iha nia diskursu hateten atu haforsa seguransa iha área fronteira, presija rekursu umanu ne’ebe sufisiente atu nune’e bele asegura seguransa iha área fronteira terrestre nian.
Komisariu Hornay hatutan, ba membru foun UPF sira ne’ebe simu graduasaun, farda ne’ebe sira hetan la’os fasil maibe liu husi prosesu ne’ebe naruk no ho sira nia kosar ben mak bele hatais farda ne’e, tamba ne’e tenke uza farda ne’e ho responsabilidade no professional.
“Ita boot sira simu boiña hodi hamriik iha oin ne’e atu halo buat ruma karik tenke hanoin katak bainhira ha’u sai Polisia Unidade Fronteira la’os buat fasil, la’os sosa iha merkadu, la’os hili iha dalan maibe imi sosa ho imi nia kosar ben, tamba ne’e labele husik monu arbiru, farda ema hotu la tau maibe ema ne’ebe selesionadu mak tau, no halo juramentu ba bandeira Nasional hodi serví ita nia rain no ita nia povu, no haree sira hotu hanesan iha fatin neebe deit tamba sira mak ita iha,” apela Komandante Jeral Julio.
Hornay mos Husu ba ajente foun sira atu servisu ho fuan ho laran tamba servisu iha fronteira iha área ekonomia nian maibe labele monu ba tentasaun ruma maske ho salariu ne’ebe ki’ik.
Entertantu partisipa iha serimonia graduasaun ba membru foun UPF ne’e mak Komandante UPF, Superintendente Assistente João Sancho Pires, membru UPF, Unidade Maritima inklui Komunidade sira. Média PNTL.
