Dili, 26 janeiru 2022 , Komandante UPF Superintendente Polisia Euclides Belo hamutuk ho Komandante Polisia Militar (PM), Postu Mota-Ain, Primeiru Sarjentu Lekiluru, hamutuk ho ekipa tekniku forsa rua voluntariamente konstrui uma ba komunidade sira iha Aldeia Tolan TCL 23, Suku Batugade, Postu Administrativu Balibo, Munisipiu Bobonaro.
Euclides Belo hateten planu hari uma ne’e atu dignifika komunidade vulneravel sira iha aspetu seguransa sosial.“Ita nia intensaun atu fasilita deit komunidade sira ne’ebe merese duni hetan tulun, hanesan timor oan ami iha responsabilidade moral atu ajuda malu. Maske apoiu ne’e kik maibe UPF no PM kontinua servisu hamutuk presta servisu baziku ba komunidade sira no garante seguransa ba ita-nia sidadaun atu komunidade sira aproveita hodi dezenvolve moris no envolve sira nia an ba dezenvolvimentu nasionál”, Belo informa ba SRP liu hosi telefonika kuarta ne’e. Nia fo sai katak uma ne’ebé mak sira halo, material konstrusaun mai husi parseria PNTL nian no tulun ne’ebe sira hetan fo diretamente ba komunidade sira iha suku no aldeia ne’ebe merese hetan.“Ita hakarak hateten katak material konstrusaun ba uma ne’e mai hosi ekipa Mama Bolu, Dr. Sam no Avo Ramos Horta. Maski simples ita buka atu halo uma ne’e ho konfortavel no iha loron rua nia laran komunidade sira bele hela ona iha uma ne’e nia laran”, Euclides Belo hateten.
Nia dehan, populasaun sira iha area refere hetan difikuldade tebes hodi asesu ba bee moos durante tinan barak nia laran. Situasaun real ne’e sempre obriga komunidade sira, liu-liu feto no labarik sira tenke lao kuaze metru atus ba atus hodi ba buka bee liu-husi foho ne’ebé ho temperatura manas tebes. Media Serviços Relações Públicas
