Ainaro- 24 juñu 2021 (SRP) – Vise-Ministru Interior, Antonio Armindo hamutuk ho reprezentante Komandu Jeral PNTL (Polísia Nasionál Timor-Leste), Superintendente Xefi Polisia, Arnaldo de Araujo, halo vizita servisu ba Komandu PNTL Munisipiu Ainaro hodi sosializa planu vasinasaun kontra COVID-19 ba membru PNTL sira nune’e bele hatutan ba komunidade sira hodi tuir vasina.
“Ita hanesan seguransa nasaun nian iha liña oin tenke kumpri, nune’e atividade bele normal fila fali, no labele prezudika fali planu Guvernu nian. Tanba ne’e husu ba membru PNTL hotu tenke obrigatoriumente simu vasina nune’e bele salva ita nia vida no aumenta imunidade hodi kontra moras COVID19 liu hosi simu vasina kompleta,” VMI hateten Sentru Komandu Kontrolu Covid-19, iha suku Ainaro, kinta ne’e.
Nia dehan, tuir dadus vasina nian iha Munisipiu Ainaro no Suai atinji numeru kik liu, nune’e nia enkoraja membru PNTL sira atu tuir vasina.
“Daudaun ne’e povu tomak, nasaun no parseiru sira koopera hamutuk ho Guvernu hodi kombate pandemia globál ne’e iha Timór. Orientasaun Primeiru Ministru nian mos husu atu ami nia komisaun Elaborasaun no Koordenasaun ba Ezekusaun Planu Vasinasaun kontra COVID-19 servisu makas tanba Governu nafatin halo esforsu atu moras ne’e labele fó impaktu maka’as ba ema nia vida”, nia subliña.
Vise-Ministru Antonio mos husu ba komandante Munisipiu Ainaro atu hasai diretiva hodi avizu no halo aprosimasaun bebeik ba fatin publiku sira, nune’e ema hotu bele mai tuir vasina kontra Covid-19.
Iha okajiaun ne’e, Vise-Ministru Antonio Armindo mos halo kampaña ba komunidade sira iha dalan, eskuadra PNTL Ainaro no komunidade sira iha Sentru Saude Ainaro hodi enkoraja komunidade sira atu simu vasina kombate COVID-19 ho doze kompletu, nune’e livre halo sirkulasaun sein halo teste.
Fontes: Media VMI-Media PNTL
