Batugade, 07 jullu 2021 (SRP) – Vise Ministru Interior, Antonio Armindo, hamutuk ho Komandante Jeral PNTL, Komisariu Faustino da Costa, halo lansamentu Vinheta Kontrolu Sirkulasaun Transporte entrada no saida iha terotoriu nasional bazeia ba rejime juridiku numeru 28/2017 2 agostu.
Antonio Armindo konsidera vinheta ne’e importante tebes hodi kontrola jestaun veikulu husi estranjeiru tama mai teritoriu nasional.
“Vinheta ne’e importante tebes tanba sai hanesan evidensia ba kontrolu veikulu ho nia funsaun maka atu kontrolu ba transporte sira ne’ebe tama mai ita nia nasaun inklui reforsa kobre reseitas domestikas hodi halo kolesaun taxa ba estadu”, esplika Antonio Armindo durante nia diskursu iha postu integradu Batugade, Mota-Ain, kuarta ne’e.
Nia dehan, ho vinheta ne’e alen de halo kontrolu, asegura mos atividade iha area fronteira hodi estimula ita nia atividade sosio ekonomiku iha rai laran liu-liu oinsa maka transforma ita nia area fronteira sai diak liutan iha futuru.
“Governu iha responsabilidade atu tau matan hodi asegura movimentu Rodoviariu iha ita nia fronteira no ohin ita halo lansamentu ba dahuluk hodi destaka tan membru PNTL hosi Diresaun Nasional Tranzitu Rodoviaria maka sei kontrolu ho kodigu estrada. Karik iha movimentu estranjeiru balu maka lahalo tuir autorizasaun ne’e kontra orden sei aplika multa ho resibu evidensia pagamentu. Tanba ne’e ha’u husu ba membru sira hotu atu haburas espiritu komunikasaun, koperasaun, kordenasaun ho liñas ministeriais hanesan Diresaun Nasionál Transporte Terestre, Alfandega, Migrasaun, Kuarentina no-mós instituisaun Seguransa sira seluk iha postu integradu ida ne’e”, nia subliña.
Governante ne’e haktuir, kuaze 80% konsumu importasaun mai husi rai liur no Indonezia deit kuaze 90% tama husi fronteira tereste.
“Bazeia ba dekretu nu 28/2007 kona-ba rezime kontrolu sirkulasaun kareta tama sai teritoriu nasionál ordena katak, presiza halo kontrolu sirkulasaun tama no sai ba viatura iha teritoriu nasionál. Ezemplu kareta kiik no kareta pezadu sira iha dekretu ne’e rasik temi katak ema sira ne’ebé maka atu tama iha teritoriu nasional iha lei hateten ona tenke aprezenta sira nia dokumentus tuir prosedementu legais ne’ebé maka estimula ona no dekretu ne’e mós regula ona ninia tarefas tuir artigu sira ne’ebe iha ona”, nia hatutan.
Iha okajiaun ne’e, Antonio Armindo husu ba membru tranzitu sira ne’ebé maka destaka iha ne’e atu implementa ho rigor hodi asegura ninia implementasaun ho professional.
“Programa ne’e politika Governu liu hosi Ministeriu Interior nian, ho razaun hirak ne’e maka polisia tranzitu ne’ebé maka ita destaka iha fronteira tenke servisu ho integridade hatudu imi nia profesionalizmu iha atendementu publiku ne’ebé maka di’ak atu evita halo kobransa tuir ita bo’ot sira nia hakarak fora hosi lei ne’ebe maka regula”, nia salienta.
Iha nia liafuan ikus, Governante ne’e dehan katak, timor oan hotu nia kontribuisaun, didikasaun no loyalidade ba nia profisaun maka determina susesu ba iha loron ikus tanba ne’e nia husu atu kolabora di’ak ho Diresaun Nasionál Transporte Terestre no-mós instituisaun sira seluk ne’ebé maka destaka hotu iha linha fronteira atu bele lori susesu ba estadu ida ne’e.
