Dili, 6 jullu 2021 (SRP) –Vise Ministru Interior , António Armindo (VMI), hamutuk ho embaixador Australia mai Timor-Leste Peter Roberts, halo inaugurasaun ba sentru formasaun tátika ho fasilidade foun ba Unidade Espesiál Polísia (UEP) ne’ebe hetan tulun hosi Guvernu Australia liu hosi Programa Dezenvolvimentu Polísia Timor-Leste (TLPDP-sigla Inglés), hodi fasilita diak liutan servisu membru sira nian ba treinamentu hodi responde ba atividade operasional nian.
Antonio Armindo iha nia diskursu, kongratula Guvernu Australia ne’ebe hatudu nafatin sira nia vontade hodi konstrui sentru treinamentu tatiku ba UEP. “Hakarak agradese ba ita nia belun di’ak Australia, tanba kontinua hatudu komitmentu forte hodi apoiu no ajuda dezenvolvimentu Timor-Leste, inklui iha area kooperasaun seguransa interna, atraves de hakbit PNTL ho infrastutura xave sira, hanesan konstrusaun postu UPF, postu UPM, inklui apoiu finansia sistema MIDAS hodi moderniza servisu migrasaun, no ohin ita hotu hamutuk, hodi sai sasin ba inagurasaun Sentru Treinamentu Tatiku-UEP nian, ita nia apresiasaun bo’ot tebes ba laran luak ne’ebé Australia kontinua hatudu no halo ba Timor Leste. Hakarak hato’o obrigadu barak Embaixador Peter, tanba ita bo’ot nia dedikasaun ho espiritu fraternal, ohin ami bele hetan Sentru Treinamentu Tatiku ne’e”, dehan Antonio Armindo, ba jornalista sira iha Kuartel UEP, Bairo-Pite, ohin.
Nia dehan, sentru treinamentu ida ne’e, hola parte hodi kompleta dadauk ona PNTL nia infraestrutura baziku sira inklui halakon ona rajaun atu laiha treinamentu.
“Treinamentu kontinua ho konstante, konserteja sei hadi’ak komportamentu, inklui skils individual agents sira nian, treinamentu la’os de’it hasa’e kapasidade teknika, maibé hasae mós nivel kumpriensaun no kuñesementu kona-ba responsabilidade hodi hala’o serbisu hanesan feramenta xave hodi reforsa performance iha terenu”, dehan tan.
“Sentru Treinamentu Tatiku ida ne’e sei fo vantazen no oportunidade bo’ot tebes ba PNTL, hodi eleva membru sira nia aptidaun professional tanba oferese espasu apropriadu ho ambiente ida siguru, mós no konveniente ba kualker tipu de treinamentu relasiona ho kestaun taktikal sira hanesan indoor small arms and gun shooting range, weapons inspections, maintenance, and firearms training”, nia esplika.
Governante ne’e hatutan, prioridade dezenvolvimentu barak tebes maka presiza orsamentu, tanba ne’e nia enkoraja komandante sira tenke fuan bo’ot no pasensia wainhira programa prioridade balu seidauk hetan atensaun masimu, nune’e nia sei la tur hakmatek maibe nia tenta nafatin buka meus halo kontaktu ho parseiru sira hodi hetan tulun.
“Molok remata ha’u apela ba PNTL, liu-liu UEP no ita bo’ot sira hotu, atu uza fatin ne’e ho di’ak no kuidadu fatin ne’e hanesan ita bo’ot sira nian rasik, hanesan ita nia responsabilidade no gratidaun ba Australia nia TAX payers sira nia laran luak hodi oferese fatin ne’eba ita. Finalmente, lori Ministériu Interior no Primeiro Ministru nia naran, ha’u hato apresiasaun bo’ot no a’as tebes ba governu Australia nia kontribuisaun no ho nia Maromak nia bensaun ha’u deklara Sentru Treinamentu Tatiku ne’e Operasionál”, tenik Antonio Armindo.
Entertantu Embaixadór Austrália Peter Roberts, hateten Austrália iha komitmentu atu kontinua hametin relasaun liuliu ba dezenvolvimentu PNTL, no sei suporta treinamentu iha sentru formasaun ne’e.
“Ho inagurasaun sentru ida ne’e, Australia iha komitmentu atu halo treinamentu hamutuk entre Polisia Australia no PNTL liu hosi TLPDP maka sei suporta treinamentu ba PNTL, liu-liu oinsa maka atu fó kapasitasaun ba membru-sira hodi responde ba situasaun perigu inklui hamenus risku no ameasa no foka deit ba direitus humanus tanba polisia iha mundu tomak halo treinamentu hanesan ne’e”, esplika diplomata Australia ne’e.
Hafoin halo inagurasaun, membru UEP sira mos halo atraksaun ho senariu tomada refen ne’ebe inisia ho grupu kriminozu nain 6 ho armas kompletu halo emboskada hodi refen VIP Ministra Saude ho nia komitiva ne’ebe halo vizita servisu ba Munisipiu Suai hodi sosiliza kampanha imunizasaun ba komunidade sira hodi tuir vasina no ikus mai misaun termina ho susesu tanba ekipa asaltu halo kedas atuasaun liu hosi faze tekniku operasaun ida ne’ebe koordenadu. Media Relasaun Publika MI
