News

Dili, Hahu’u husi loron 11 to’o 17 fulan Novembro tinan 2020 Komandu Polísia Nasional Timor-Leste (PNTL) rezista kazu Insidente hamutuk 43 ne’ebe maka akontese iha teritoriu nasional. Maibé ida ne’e la afeta ba situasaun seguransa iha rai laran.

Porta Voz Komandu PNTL Superintendente Xefe Arnaldo Araújo liu husi Konferensia Imprensa tersa-feira (17/11) deklara husi númeru Insidente hirak ne’e dominante liu maka kazu Violensia Domestika hamutuk 10, Asaltu malu 8 no Tuda malu 7 ne’ebe maka ass liu durante semana ida nia laran.

“Iha loron 16 fulan Novembro tinan ne’e oras 09:50 iha aldeia Moris Foun suku Comoro mosu insidente ne’ebe kauza husi problema Domin ne’ebe maka ikus mai rezulta Lezada ida inisial ODM hetan kanek iha parte ulun, motivu husi aktu ne’e tanba deit lezada lakoi kontinua namora ho suspeitu insial LBB ho ida ne’e mka suspeitu satiado hodi foti tudik ta’a lezada to kanek”, informa Porta Voz Komandu PNTL ne’e.

Superintendente Xefe ne’e afirma tan iha loron hanesan (16 Novembro 2020) oras 09:51 komunidade sira husi Lunu-Heni munisipiu Baucau hetan material Exsplosivo hanesan Granada: Hand Frag. K.413 ho kor metan, agora dadaun PNTL munisipiu Baucau kontaktu ona ba Seksaun EOD husi UEP.

“Husu ba komunidade sira ne’ebe hetan karik material sira tipu hirak ne’e imediatamente informa ba PNTL atu bele asegura lalais sasan hirak ne’e, tanba ida ne’e bele sai ameasa ba ema nia vida; dala ida tan husu ba komunidade sira atu fó hatene lalais ba parte Polísia karik hetan material perigu sira hanesan ne’e”, apela Superintendente Xefe ne’e.

Xefe Gabinete Relasaun Públika PNTL ne’e akresenta tan além de insidente, durante semana ida nia laran akontese mós asidente ne’ebe PNTL rezista maka hamutuk 12 kompustu husi monu ho motor lima no kareta soke malu hamutuk 4 ne’ebe rezulta ema ho kanek maibé mate laiha.

Media PNTL.    

Dili- Komandante Jeral PNTL halo enkontru ho Komandante munisipiu no unidade sira hodi evalua inplementasaun estadu Emerjensia da hitu (VII) hodi hare hikas dezafiu hirak ne’ebe maka Polisia hasoru iha baze.

Komisariu Faustino da Costa hateten Enkontru ida ohin ita bolu Komandante munisipiu sira no unidade sira mai iha ne’e hodi halo avaliasaun ba situasaun seguransa 2020 hanesan mos avaliasaun ba inplementasaun hodi asegura estadu emerjensia ne’e maka ohin hau hato’o ba Komandante sira pontu saida maka sira tenke hare ida ne’ebe diak ona Komandu sempre apresia.

Enkontru ne’e koalia konaba situasaun seguransa iha teritoriu nasional tinan 2020 no oinsa asegura inplementasaun estadu emerjensia.

Komandu hato’o katak PNTL iha duni problema no difikuldade liu-liu kestaun transporte, no meius seluk oinsa suporta servisu autoridde seguransa nian no husu mos ba Komandante sira atu kompriende ba situasaun liu-liu orsamentu ne’ebe maka ita iha no hato’o ba Komandante sira katak ba tinan 2020 foku hare ba divida hirak ne’ebe maka iha desde tinan 2012.

Durante inpelementasaun estadu Ememrjensia hahu fulan Marsu to’o Outubru PNTL kaptura sidadaun hirak ne’ebe maka tama sai illegal hamutuk 1000 resin maibe ba estadu emerjensia dala nen ho hitu movimentu illegal hahu menus no ikus liu maka iha Suai no Maliana.

Entretantu iha fronteira terestre kontrolu maximu husi Ekipa konjunta ne’ebe maka kompostu husi PNTL (UPF, munisipiu  no UEP) nomos F-FDTL  iha koperasaun servisu ne’ebe maka diak. PNTL nafatin alerta hodi garantia inplementasaun EE.

Iha okajiaun ne’e Komandante PNTL munisipiu Bobonaro Superintendente Xefe Octavio Araujo Bucar hateten iha inplementasaun estadu emerjensia durante fulan Outubru mai oin laiha movimentu illegal  PNTL Bobonaro rejista sidadaun timor oan hirak ne’ebe maka tama mai Timor-Leste tuir dalan legal hamutuk nain 307 nain 291 mai karantina iha Dili no nain 16 kumpri karantina iha Mota Ain no fulan Novembru nain 227 husi total ne’e nain 213 mak kumpri karantina iha Dili no nain 14 maka kumpri  karantina iha Mota Ain.

Komandu munisipiu halo koperasaun servisu diak ho UPF iha lina fronteira ami iha area juridiku halo rejistu no prosesu hodi entrega ba saude lori ba karatina se krime Ministeriu Publiku halo prosesu.  Media PNTL    

Dili- Kazu homesidiu agravadu iha postu administrativu Lospalos rejulta vitima Aleixo dos Santos tinan 34 lakon nia vida tanba hetan taa husi suspetu AS

Porta voz PNTL Superintendente Xefe Arnaldo de Araujo esplika iha loron 09 Novembru 2020 oras tuku 14:05 akontese insidente homesidiu agravadu nebe akontese iha aldeia Maulo, Suku Rasa, Postu Administrativu Lospalos suspetu AS tinan 37 ta’a vitima, Nia hato’o asuntu ne’e liu husi komferensia Emprensa iha Kuartel UEP, bairo Pite Dili, Tersa (10/11).

Kazu ne’e akontese tanba vitima ho suspetu hamutuk ho sira nia kolega nain 9 halibur hamtuk iha Sr. Arlindo da Silva nia uma hodi hemu tua mutin litru 10 lanu depois suspeitu uza tudik hodi sona vitima iha fatin sira hemu tua ba.

Alende ne’e iha dia 7 akontese asidente viasaun iha ponte Manulede-Kairabela Vemase Munisipiu Baucau involve kareta prado nu. Xapa matrikula 27-433  ho motor Honda Supra X 125 kor metan nu. Xapa matrikula F-7137 TL tuir kronolojia katak kareta nia roda nakfera (lakon kontrola) nemaka halai fali ba diresaun motor nian   hodi soke mate vitima Joao da Silva tinan 33.

Asidente ne’e mos rejulta vitima nia fen Anita Freitas tinan 36 no oan tinan 6, kanek todan no agora halo tratamentu iha ospital.

Iha dia 09/11/200, tuku 15.00 iha area sarlala, Munisipiu Aileu akontese asidente involve kamioneta ho xapa matrikula 56778 TL soke malu ho motor Mio Beat nebe rejulta motorista mate fatin, Kauja husi asidente motorista motor nia la domina vulante wanhira hasoru malu dalan subida maka ba soke iha kamioneta nia okos. Mate bian oras ne’e iha familia nia uma, suspeitu iha ona sela hodi halao prosesu investigasaun.

Atualija mos ba publiku katak durante semana ida hahu (04-09 fulan ne’e PNTL rejista kazu insidente hamutuk 25 no Asidente trafegu hamutuk 10, kazu hirak ne’e maka hanesan Suisidiu (hatalik aan), Asaltu malu, Agresaun Fiziku, kontra bandu, Asidente trafegu motor ho kareta soke malu, kareta soke ema nia uma no motor ho motor soke malu. Media PNTL

Dili-Unidade Espesial Polisia (UEP) halo enseramentu kursu lingua ingles no aptidaun fiziku ba membru sira hodi prepara ba Misaun da Paz

Segundu Komandante Jeral PNTL Komisariu Mateus Fernandes hateten enseramentu kursu lingua ingles ne’ebe maka halao durante fulan nen (6) nia rejultadu diak tebes tanba partisipante sira inklui Komandante Unidade, Segundu Komandante Unidade, Komandante BOP no membru sira ne’ebe tuir kursu ida ne’e hetan sertifikadu no sira hotu pratika ingles, laos deit iha klase maibe iha uma mos tanba lian ingles ne’e ita presija pratika bebeik hodi nune’e hanesan bukae ida, ita nia parseru sira fo laos deit ita uza bainhira iha PNTL maibe depois iha PNTL ita sei uza nafatin iha tes oi-oin, nia hato’o asuntu ne’e ba jornalista sira iha Kuartel UEP Bairo-Pite Dili, Tersa (10/11).

Komisariu ne’e haktuirtan Polisia kada tinan tolu (3) dala ida hetan konvite husi Nasoens Unidas atu partisipa iha misaun da Paz (peace keeping) iha nasaun hirak ne’ebe konflitu tanba ne’e hau hanoin sira nia rejultadu ohin diak teb-tebes sira hotu koalia ingles signifika ita enkoraja sira bele pratika nafatin iha sira nia vida lor-loron hodi fo solusaun diak ba sira nia vida iha futuru.

Alende ne’e halomos Aptidaun fiziku (medical cek) tanba Polisia ikus-ikus ne’e servisu barak derepente moras tanba ne’e ami antisipa  no halo cek up bebeik hodi nune’e membru sira hare kondisaun fiziku  tanba iha realidade membru balu subar sira nia moras to’o mate.

“Ida ne’e hanesan antisipasaun ida ami tenke cek hela deit laos deit ba membru iha UEP maibe PNTL hotu iha nasional, munisipiu no RAEOA unidade saude PNTL sempre sai ba munisipiu hodi halo cek up maske ita ho kondisaun limitadu maibe la signifika katak ita husik deit maibe ita lao nafatin depois hare ba oin,”dehan Segundu Komandante Jeral.

Komisariu Mateus esplika agora daudaun inportante maka hadia liutan servisu Tranzitu iha Dili, nomos Polisia Komunitaria nia vizivilidade, entertantu cek aptidaun fizika ida ohin loron ita hare sira ne’ebe maka kondisaun labele reuni no labele mantein iha UEP entaun dada fali ba kontijente jeral hodi reforsa iha neba hodi asegura Polisia Komunitaria ne’ebe ema hotu ejiji katak presija lao diak no tranzitu ida ne’ebe presija repoin ema aumentatan  hodi hadia diak liutan.

Serimonia ne’e hahu ho parada hodi simu orentasaun husi Komandu kontinua ho teste aptidaun fiziku ne’ebe kompostu husi halai, bomba rai, sit up, rise top no entrega sertifikadu ba partisipante kursu. Media PNTL

Dili, Komandante Jerál Polísia Nasional Timor-Leste (PNTL) Komisariu Polísia Faustino da Costa segunda-feira (09/11) ne’e halo abertura Kursu rua hanesan Kursu Kombate Krime Violasaun no Abuzu Seksual Ba Menor Hodi Mellora Servisu Investigasaun ne’ebe partisipa husi Xefe Investigasaun Vulnerable Person’s Unit (VPU) husi Komandu Munisipiu 13 no Kursu Jestaun Lideransa Ba feto PNTL ne’ebe partisipa husi Polísia Femenina sira husi Kuartél Jerál PNTL.

Komisariu Polísia Faustino da Costa iha ninia diskursu ba serimonia ne’ebe hala’o iha Centro Formação Polícia (CFP) hateten ohin oportunu diak ida atu kontinua Kursu ba dala rua area VPU ninian no oportunu ba dahuluk maka ba area Jestaun Lideransa ne’ebe foku liu-liu ba PNTL feto sira.

“Iha oportunidade ida ne’e Komandu Jerál PNTL hakarak hato’o ba ita hotu iha ne’e katak PNTL desde tinan 2019 ita iha ona Planu Estratéjiku tinan lima ba area Jender ninian, ne’ebe parte ida ohin Kursu ne’ebe ita halo nu’udar aktividade ba implementasaun ba Planu Estratéjiku ida ne’e”, tenik Komisariu Polísia ne’e.

Autoridade másimu Instituisaun Seguransa lo’os duni katak iha Planu Estratéjiku tinan lima ne’e maka mai mós husi suporta ka apoiu programa ONU nian ida parseiru sira hotu tau iha ne’eba maka Spotlight parte ida suporta tebes-tebes husi UNDP tantu mós husi embaixada Australia no TLPDP.

“Aproveita Kursu ida ne’e no hatudu rezultadu wainhira imi remata Kursu ida ne’e hodi halo imi nia servisu iha idak-idak nia munisipiu, unidade no departamentu sira tanba sertifikadu ne’ebe imi simu hafoin Kursu ne’e laiha valor wainhira imi la hatudu ka implementa iha kna’ar loron-loron nian”, apela Komandante Jerál PNTL ne’e.

Iha fatin hanesan Komandante CFP Superintendente Xefe Arquimino Ramos hateten Kursu rua hanesan Jestaun Lideransa ba femenina PNTL sira no Kursu ida maka Asaltu Seksual ba VPU sira, ne’e ita hala’o dala ida iha semana oin, Kursu Jestaun Lideransa sei kontinua to’o tinan oin.

“Iha balun ne’ebe area formasaun ninian inklui mós kapasitasaun ba femenina PNTL sira tanba dala-barak femenina PNTL sira ezizi partisipasaun feto nian iha Lideransa PNTL, konferensia ka seminariu ne’ebe feto sira organiza sempre ezizi ida ne’e, desde tinan uluk to’o agora, ida ne’e maka oportunidade ne’ebe Komandu Jerál ho ita nia parseiru TLPDP, ita buka ona dalan atu bele kapasita feto sira, atu bele sai líder PNTL ne’ebe diak agora no ba futuru”, haktuir Komandante CFP ne’e.

Hola parte iha serimonia abertura ne’e Komandante Jerál PNTL, Komandante TLPDP, Xefe Kooperasaun Area Boa Governasaun UNDP nian, Adjunta Embaixador Australia iha Timor-Leste, Komandante CFP, Xefe SIKN, Xefe Relasaun Internasional, paertisipante sira Kursu rua no ekipa TLPDP no UNDP.

Media PNTL.  

Dili, Durante loron 30 Outubru to’o loron 4 Novembro 2020, Komandu Polísia Nasional Timor-Leste (PNTL) liu husi Departamentu Nasional Tránzitu no Seguransa Rodoviaria (DNTSR) servisu hamutuk ho Komisaun Anti Korrupsaun (CAC), Diresaun Nasional Patrimoniu Estadu (DNPE), Diresaun Nasional Transporte no Terrestre (DNTT) halo apreensaun ba motorizada privadu no Estadu nian hamutuk 69 no Karreta tolu. Motor 69 ne’e kompustu husi motor Estadu nian matrikula G ka GA hamutuk 19, motor privadu 49 no karreta Estadu rua (2) ho karreta privadu ida (1).

“Ami prende karreta Estadu hamutuk rua, la justifika dokumentu autorizasaun viajen nian no karreta privadu ida, tanba nia na’in ne’e lanu no motorizada hamutuk 49 kompostu husi motor Estadu nian 19”, tenik Komandante DNTSR Superintendente João Belo dos Reis kuarta-feira (04/11) iha Komandu Jerál Kaikoli Dili.

Karreta no motor Estadu ne’ebe hetan apreensaun, nia hatutan, parte PNTL sei koordena ho CAC fó tiha karta autorizasaun foin infrator sira ba motorizada no karreta Estadu hirak ne’e hodi ba foti fali billete infrasaun iha PNTL hodi ba selu tiha multa foin foti transporte hirak ne’e.

Superintendente João esplika tan, ba transporte privadu ne’ebe halo apreensaun, PNTL sei aplika mós prosesu selu multa tuir infrasaun ne’ebe PNTL deteta iha terenu. Durante halo operasaun konjunta, ekipa deteta maioria transporte hirak ne’e iha dokumentu, karta kondusaun laiha, inklui infrator balun sa’e motor la uza kapasete.

Operasaun ne’e, Komandu PNTL halo mós iha munisipiu 12 hodi evita asidente tráfegu no eduka sidadaun uza transporte atu kumpre regra tránzitu nian. Durante loron finadu, PNTL rejista mós kazu asidente tráfegu ne’ebe akontese iha loron 1 Novembru iha Aileu rezulta motor ida monu halo vitima ida kanek Kaman kauza husi velosidade. Dadaun ne’e, parte PNTL liu husi DNTSR sei rekolla mós dadus husi parte PNTL munisipiu 12 hodi fó sai relatoriu iha tempu besik.

Iha loron ne’e mós Komandante Jerál PNTL Komisariu Polísia Fautino da Costa hala’o vizita hodi halo observasaun direita ba karreta Estadu no motor Estadu nian inklui motorizada privadu hirak ne’ebe PNTL halo apreensaun. Iha vizita ne’e, Komisariu Polísia Faustino dezafia parte DNTSR atu koordena nafatin hodi instituisaun Estadu hodi halo operasaun kada semana ba transporte Estadu no transporte públiku sira.    Fontes: Media TATOLI

Dili, Komandu Polisia Nasional Timor-Leste (PNTL) durante loron Finadu rezista kazu Insidente hamutuk 3 ne’ebe maka mosu iha teritoriu nasional. Insidente hirak ne’e maioria kazu asalta malu.

Porta Voz Komandu PNTL Superintendente Xefe Arnaldo Araújo kuarta-feira (04/22) ne’e liu husi Konferensia Imprensa ne’ebe hala’o iha Salaun Enkontru Kuartél Jerál hateten durante selebrasaun loron Finadu tinan ida ne’e buat hotu lao diak no kontroladu, la hanesan ho tinan hirak liu ba kotuk ne’ebe maka mosu problema barak maibé kompara ho tinan ida ne’e tanba PNTL tomak nia servisu maka’as hodi situasaun bele lao diak no kontroladu.

“Iha insidente balun ne’ebe maka mosu iha teritoriu laran tomak hanesan kazu ida mosu iha munisipiu Aileu, iha loron 03 fulan Novembro oras 20:15 akontese joven ida ta’a ema na’in tolu (3) iha Aldeia Kirilolo Suku Liurai, Postu Administrativu Aileu Villa, suspeitu ho inisial JS idade 21 anos; suspeitu ne’e komunidade sira kaer hodi entrega ba PNTL no oras ne’e dadaun suspeitu detein hela iha Sela 72 oras, kauza husi insidente ne’e maka wainhira sira fila husi festa kazamentu maka sira asalta malu”, informa Porta Voz Komandu PNTL ne’e.

Superintendente Xefe Arnaldo afirma tan iha loron hanesan (03 Novembro) mosu insidente ida iha Hatulia Villa munisipiu Ermera ne’ebe akontese entre familia rua iha edifisiu Timor Telecom (TT) nia oin ne’ebe rezulta membru PNTL ida ho inisial LTA hetan kanek, iha momentu ne’eba membru PNTL sira halo hela atuasaun ba konfrotu entre familia rua ne’e, wainhira iha atuasaun refere membru PNTL lori stick hodi hakalma situasaun maibé stick refere kona familia parte ida nia kabas nune’e maka sira la satisfeitu no sira tuku membru PNTL ne’e kanek iha kabas; oras ne’e dadaun suspeitu ho inisial BS iha ona prosesu nia laran.

“Iha loron 03 fulan Novembru mós mosu kazu asalta malu ida iha Kaibada munisipiu Baucau iha oras 19:48, rezulta ema ida kanek kma’an, wainhira joven sira baku malu, suspeitu na’in 3 Polísia detein ona iha Komandu PNTL Baucua, motivu husi akontesimentu ne’e maka joven sira hemu tua Lanu ho problema pasadu”, tenik Superintendente Xefe ne’e.

Xefe Gabinete Relasaun Públika PNTL ne’e hakarak louva ita nia komunidade sira ne’ebe maka durate loron finadu ne’e, kolabora diak tebes-tebes ho PNTL liu-liu iha kapital Dili no mós iha munisipiu sira. Tanba iha loron finadu tinan ne’e deferente tebes ho tinan hirak ba kotuk ne’ebe maka sempre mosu asidente no insidente ne’ebe maka grave hodi rezulta ema barak maka kanek no mate. Maibé iha tinan ida ne’e, buat hotu lao diak no situasaun kontrloladu tanba iha kooprasaun diak entre komunidade ho parte seguransa hodi asegura situasaun lao hakmatek.

Media PNTL.  

Dili- Ofisiais Superior Polisia Nasional Timor-Leste (PNTL) sai kampiaun iha jogu Futeball U40 hasoru klube Centru Instrusaun Komandante Nicolau Lobato (F-FDTL) 3-0.

Komandante PNTL munisipiu Dili Superintendente Xefe Henrique da costa ne’ebe maka partisipa iha jogu ne’e hateten iha jogu ida ohin ami hetan valor ne’ebe diak no manan ami nia adversariu husi Insttuisaun F-FDTL ida ne’e inportante mai tanba iha jogu tuir mai ami sei hasoru ekipa rua seluk ne’ebe makaas hotu, hato’o asuntu ne’e hafoin partisipa iha jogu Futeball U40 iha kampu Futeball Stadion Dili, Kinta (29/10)

Jogador Nu.kamizola 10 nudar abansadu ne’e hateten Ami fiar katak ba futuru mai wainhira hasoru ekipa rua ne’e ami sei prepara diak liutan, ohin foin primera vez ami  hahu iha difikuldade barak maibe ba futuru ami hadia ami nia kualidade jogu atu nune’e iha jogu tuir mai rezultadu diak.

Iha parte abansadu nian ohin ita hare ami nia finalizasaun araska maibe ami konsege hatama liu golu tolu maibe ne’e hanesan esforsu makaas ne’ebe maka ami nia ekipa hatudu hodi hatama golu.

Entretantu Segundu Komandante Centru Instrusaun Komandante  Nicolao Lobato, Maijor Eugenio Guterres hateten klubu Futeball Sentru Komandante Nicolao Lobato FC Sentru Komandante Nicolao Lobato  lakon hasoru nia adversariu maibe motto U40 nian katak Trenu ho Saude no Populasaun Saudavel entaun ami esforsu oinsa promove ami nia saude para fizikamente kontinua diak.

Nia haktuirtan preparasaun ba futuru ami sei jogatan dala rua iha dia 07/11 FC Sentru Komandante Nicolao Lobato sei hasoru U40 Zebra antigu no iha loron 15/11 sei hasoru U40 husi Moacau Ponta Leste, tanba ne’e ami sei prepara maximu para bele hasoru jogu ida tuir mai.

Jogu amizade Taxa U40 PNTL VS F-FDTL ne’e hetan antusiasmu husi membru PNTL NO F-FDTL ne’ebe maka asisti jogu ne’e. Media PNTL

Dili, Durante semana ida Komandu Polísia Nasional Timor-Leste (PNTL) rezista kazu Insidente hamutuk 3 no Asidente 1 ne’ebe maka mosu iha teritoriu nasional. Maske nune’e situasaun seguransa ia rai laran kontinua lao hakmatek.

Porta Voz Komandu PNTL Superintendente Xefe Arnaldo Araújo segunda-feira (26/10) ne’e liu husi konfernesia imprensa ne’ebe hala’o iha Kuartél Jerál Kaikoli hateten Insidente 3 ne’ebe maka mosu hanesan kazu Homisidiu ida akontese iha loron 22 fulan Outubru tinan ne’e iha oras 18:00 akontese oho malu iha Mota Laclo Suku Dato Postu Administrativu Liquiça Villa ne’ebe rezulta vitima ho inisial J.S idade 20 husi Suku Fatukesi tenke lakon vida; suspeitu husi kazu refere ho insial A.C idade 20 husi Suku Dato Liquia Villa, kauza husi insidente maka tanba hadau malu rai-henek.

“Parte seluk maka iha loron 24 fulan ne’e hetan ema balun diskonfia soe bebe iha area Vila-Verde, oras ne’e dadaun bebe iha hela ospital hodi hetan tratamentu, bebe nia inan parte polísia kaptura kedas lori ba Hospital no oras ne’e dadaun iha ona Uma Mahon, aman husi bebe parte polísia sei buka tuir hela hodi buka hatene kauza husi aktu refere, kazu ne’e iha hela prosesu investigasaun Komandu PNTL Munisipiu Dili nia liman”, esplika Porta Voz Komandu PNTL ne’e.

Iha loron hanesan (24 Outubru) mosu kazu Suisidiu/Tara-Ann, labarik ida ho idade 12 tara-ann iha area Bekusi Munisipiu Dili, oras ne’e dadaun mate isin iha ona familia nia liman. Kauza husi akontesimentu ne’e, parte Polísia sei buka tuir hela hodi hatene motivu husi insidente ne’e. Insidente seluk mosu iha loron 25 Outubru ne’e, wainhira Ró husi Oecusse mai Dili iha pasageiru ida maka mate iha ró laran.

“Entretantu, iha loron 25 Outubru mosu Asidente ida ne’ebe akontese soke malu entre kareta HILUX ho Motorizada iha area Manleu Metinaru, rezulta feto ida mate iha fatin no mane ida mate iha Hospital Nacional Guido Valadares (HNGV), transporte rua ne’e mai husi diresaun ne’ebe la hanesan, kauza husi asidente ne’e maka fátor umanu”, afirma Xefe Gabinete Relasaun Públika PNTL ne’e.

Iha biban ne’e Superintendente Xefe Arnaldo esklarese mós kona-ba informasaun ne’ebe espalha iha Media Sosial katak PNTL sei sobu hotu aktividade Kemping ne’ebe hala’o iha fim-de-semana husi jovem balun iha area Area Branca nian. Intensaun Komandu nian maka atu hare’e aktividade refere maibé laos atu ba sobu, tanba tuir Komandu nia hare’e dala-barak iha Kemping ne’e bele iha feto ida mane rua ou mane rua feto ida. Ema hotu iha liberdade atu hala’o Kemping maibé ita mós iha Moral atu bele hato’o ba komunidade sira liu-liu jovem sira katak hala’o aktividade ne’e ho Pozitivu.

“Tanba ita hare’e oras ne’e dadaun kazu ema soe bebe, ema tara-ann parese fátor ida maka mai husi aktividade Kemping sira ne’e, tanba ne’e apela ba inan-aman sira atu tau manatn ba oan sira karik sira iha aktividade ruma ne’ebe hala’o iha fim-de-semana atu nune’e bele evita problema sira ne’ebe maka ikus-ikus ne’e mosu iha ita nia rai”, tenik Porta Voz Komandu PNTL ne’e.

Media PNTL.